2Raja-raja Uram 21

Yehuda atei sienyi si Manasye uram deyok

21:1-18

(2Taw. 33:1-20)

1Manasye er uki kuna kwalina 12 baryi kimbinmou ura, Yehuda atei weik sienyi kibmou. Yerusalem atei taleamwe ara kwalina uki 55 baryi kwaliamwe. Ba, Manasye er kwin si ara Hefzibah. 2Ba, Manasye biryi Er Iya Erebdobnyi dam asi malyi kuramwe. Ara, Israel nang Kanaan mutuk wengbinkwamnyi ba, Er Iya Erebdobnyi biryi yakdonokamwe nang duknasito kwemdeina moloramnyi to kuboka kunuramwe. 3Manasye biryi er nai Hizkia dakamwe mutuk konkon aryi kwemdeina ai yumkuna dobmou. Ani, Baal kwemdeina molon ai ab, Baal kwemdeina ati bisam dama deiboka molon keil dungna ab, Israel atei sienyi Ahab biryi kikniamwe kwemdeina si Asyera molon abyokomna ab kikniamwe. Ani, Manasye bibabyi kiting ab, wala ab, kurya ab asi moloramwe. 4Ba, Yerusalem atei ara Er Iya Erebdobnyi biryi ato eamwe, “Yerusalem atei ara Ni Iya Erebdobnyi kun atei. Ani, Ni Imtamnyi bisi si weik eboka molon atei,” eamwe. Bok, Manasye biryi Er Iya Erebdobnyi ai dam Yerusalem atei kwemdeina ati dama deirina keil dungna kikniamwe. 5Ani, Er Iya Erebdobnyi ai dam dina-dina asi kurya kwemdeina asi molon keil lamna doamwe. 6Er mi ababyi kwemdeina ati dama deiboka uk daamwe. Ani, Manasye bibabyi kir don dinyi ab, ninyi lengdera mabmangnyi ba, “Ato kuboka mabmar,” eboka lak kimna dinyi ab, “Kubtinyi,” tenen ukurderamwe. Ani, ninyi kwemdeina kanyi ab, ninyi dibdob nang sambal ab namnamwe. Ato kuramwe deyok aryi Er Iya Erebdobnyi kanyatam u yirkareramwe. Ba, Er Iya Erebdobnyi yu wekmou. 7Ani, Manasye biryi kwemdeina si Asyera bitoanun kikniboka Er Imtamnyi ai umbura dam deiamwe. Bok, akai deyok ati Er Iya Erebdobnyi biryi minob Daud dam ab, Salomo dam ab si ato ebdeiamwe, “Sun Israel nang yala koklombaryi atei yuk-yuk kankan aryi Ni Imtamnyi molon ai ab, Yerusalem atei ab wibdeibse. Akiryi Ni Iya Erebdobnyi si ara a mutuk dam ab, a ai dam ab iya kubkwande,” ebdeibse. 8“Ni Imtamnyi biryi Israel yala nang, sun abwe yabwe dam asi uram talak ebdeianse mutuk dam aryi boboka yuk mutuk kum bobinkwan. Ara, Niryi sun Israel nang dam ab, Musa dam ab asi yan memen uram ab, ‘Ukubdarur-ukuna mem,’ en uram ebdeibse dinyi asi kunuramingnyi ura, yuk mutuk kum bobinkwan,” ebdeiamwe. 9Bok, Yehuda yala nang ara Er Iya Erebdobnyi ebdeiamwe uram kekena kum uca, Manasye kuramwe to kunuramnyi. Ba, iya malyito dinyi akwe kuramnyi. Ara, Er Iya Erebdobnyi biryi Israel nang wengbinkwamnyi ati, yakamwe ninyi kwemdeina moloramnyi to ara mitik malyi tenen bok Manasye ab kuramnyi dinyi ara iya malyito kunuramnyi.

10Ato kuramnyi deyok aryi Er Iya Erebdobnyi biryi Er uram ermurun nang nabi nang deici aryi ato ebmou, 11“Yehuda mutuk sienyi Manasye bira iya malyito kunuramwe. Minob Kanaan mutuk kuramnyi nang Amori nang moloramnyi to ara mitik malyi tenen bok, Nai Imtamnyi kanci yakdonokamoumwe. Bok, Manasye biryi kwemdeina molorur to ara iya malyito dinyi molorur. Akiryi Manasye kikniboka molorur kwemdeina aryi Yehuda yala nang nirya iya malyi dinyi borsinirur. 12A deyok aryi Ni Iya Erebdobnyi Israel nang molonunungnyi biryi Yehuda atei ab, Yerusalem atei ab asi iya mambul tenen dinyi karebkwaman. Ba, a ebman uram kekebingnyi ura, sun kekebmangnyi nang ara ilil weik kubkwande. 13Ba, Yerusalem atei ara Niryi dakabokwan. Ara, Ni Imtamnyi biryi Samaria atei ab, Israel sienyi Ahab ab, er deibdoba ab kuanse to kuboka kunubkwan. Ba, Yerusalem atei ara nirya kum dandeiboka kwaning yangan suwa aryi ilikoka amurdeiraming to kubkwan. 14Ni Iya Erebdobnyi biryi Israel nang tuba kam kunmangnyi ninyi ara Niryi sun mar ordan nang taruk dam dobkarebkwan. Ba, sun mar ordan nang aryi nirya obingiryi, sun kunung mutuk nirya arabdobkwaming. 15A ebman to ara Ni Imtamnyi biryi nirya Ni mabwe asi kunubkwan. Ara, sunci Ni Imtamnyi dam asi iya malyito dinyi kunung ba, Ni kanya u yiboka yu weik wengdeirinunung. Ara, sun abwe yabwe Mesir mutuk dam aryi anabmai tum aryi kuboka ani, arub ababyi yu weik wengdeirinunung,” ebmou.

16Ani, Manasye biryi malyi kuna kum nang bok tabakoka obnin yibinamwe ba, Yerusalem atei ninyi ining aryi langkiamwe dinyi ab, Yehuda atei ninyi Manasye kuna aryi malyi kuramnyi dinyi ab, aryi Er Iya Erebdobnyi yu wekamwe.

17Yehuda atei sienyi Manasye weik sienyi kiamuryi, ibde baramwe dinyi ab, Manasye er malyi kuramwe dinyi nirya ab ara Yehuda weik sien nang kerek sengna umbura dam sekdongobyi. 18Ba, Manasye dibwe ura, weik sien nang kun atei dam si Uza tukwe dam dongobmai. Ba, er mi Amon biryi Yehuda mutuk sienyi kibmou.

Yehuda atei sienyi si Amon uram deyok

21:19-26

(2Taw. 33:21-25)

19Amon er uki kuna 22 baryi wengbinmou ura, Yehuda atei weik sienyi kibmou. Ura, Yerusalem mutuk talebmou uki nungna ara kwalina bitinyi talebmou. Er kwin bira Yotba ateinyi Harus nebnyi si Mesulemet. 20Amon biryi er nai Manasye kuramwe to kuboka Er Iya Erebdobnyi dam malyito dinyi kunuramwe. 21Amon biryi er nai moloramwe kwemdeina asi moloboka, kwemdeina asi luknubdongoboka si weik eramwe. 22Erci Er Iya Erebdobnyi teleb tenerande dinyi kununa kum kuramwe. Ani, er abwe yabwe moloraminyi Imtamnyi bisi deibloamwe. 23Ba, weik sienyi Amon ai wa in nang aryi uram sisikmaici, mar moun yiboka ibinmaici, weik sienyi Amon bisi er ai umbura obmai. 24Bok, Yehuda nang aryi Amon obmai nang asi danguboka obmai. Ura, Amon mi Yosia biryi Yehuda mutuk sienyi kibmou. 25Amon er wa ibde baramwe dinyi nirya ara Yehuda mutuk weik sien nang kerek sengna umbura dam sekdongobyi. 26Yehuda atei sienyi Amon dibmou ura, Uza mutuk tukwe dam dongobmai. Ba, er mi Yosia unubmouci, Yehuda mutuk sienyi kibmou.

Currently Selected:

2Raja-raja Uram 21: MTG

Highlight

Copy

Compare