2Raja-raja Uram 20

Sienyi Hizkia bukam u yiramwe asi kwetebdeibmou uram deyok

20:1-11

(2Taw. 32:27-33; Yes. 39:1-8)

1A talak ara Yehuda mutuk sienyi Hizkia ilila toro deiamwe ba, dibmanto kuramwe. Bok, Amos mi si nabi Yesaya biryi Hizkia u yiramwe ati dirbinmouci, ato ebmou, “Er Iya Erebdobnyi biryi ato ebmakir, ‘Kan kam kuna kum kubkwandim ati, kan ner ab kan mabwe ab asi sirya uram katabum ebdeibdum,’ ebmakir. Ara, uki kum aryok dibkwamarim ati ebmakir,” ebmou 2Ura, Hizkia ai abilinga tam urasin deiboka Er Iya Erebdobnyi bisi molobmou. 3Ura, ato ebmou, “Nai Iya Erebdobnyi nira Kan wa busul asa inunci kanyi luknurdongonun. Nai Kan tenebmaminyi to akwe kuboka kununun,” eboka molobmouci, engebmou. 4Nabi Yesaya biryi Hizkia deibloboka anabdobmouci, noutumang ai dam yangau uca Er Iya Erebdobnyi biryi ato ebmou, 5“Tamuboka Hizkia bisi birum,” Biminyi ura, ato ebdum. “Ni Iya Erebdobnyi, kan abwe Daud bira Nisi moloranounyi biryi kan Nisi molobmanirim dinyi ara sirya kekebmakin. Ani, kan asimaka sakmakir dinyi ara sirya asing eibmakin ati Niryi kan u yikurun dinyi lobdeibkwamakin. Ba, amdi ara Ni Imtamnyi ai binkwamarim. 6Biminyi ura, Niryi kansi kwalina 15 baryi tubto tabakdongobkwamakin. Ani, kan ab Yerusalem atei ab asi Asyur sienyi biryi talebsou ara lobdeibkwamasin. Ba, Yerusalem atei ara Ni Imtamnyi biryi lika dobkwan, Ara, Ni ab Daud ab uram talak minob ebdeibdananoumwe deyok aryi lika dobkwan,” ebmakir ebdum ebmou. 7Ura, nabi Yesaya biryi ato ebmou, “Kwarang du boyandoka Hizkia bisi toro moubwe dam asi lubdeibdarur,” ebmou. 8Ura, Hizkia biryi Yesaya bisi ato kuboka asibmou, “A kubnyi dinyi aryi Er Iya Erebdobnyi biryi ni u yinurur dinyi lobdeibkwamanir. Ba, uki winiryi tum ara Er Iya Erebdobnyi ai binkwaman do?” eboka asibdenmou. 9Uca Yesaya biryi ato ebmou, “Er Iya Erebdobnyi biryi uram talak ebdeibmakir to kuboka kunubkwamakir. Ati, nai kanci dan dinyi wibkwindim, ara kiting kanya yakna takubaryi welebdeibkwindim kum, kiting kanya takubaryi tamubdeibkwindim kum?” ebmou. 10Ura, Hizkia biryi ato ebmou, “A kiting kanyi yakna takubaryi tamurdeirina ara malyi tenebman,” ebmou. Ura, kiting yakna takubaryi tamubdeibmou. 11Ura, Nabi Yesaya biryi Er Iya Erebdobnyi bisi uram doboka molobmou. Ba, Er Iya Erebdobnyi biryi Ahas biryi kikniamwe kiting kukumna asi yakna#20:11 Yesaya biryi Er Imtamnyi bisi molobmou ba, kiting kukumna yakna kiknibdeiboka kikliramnyi dinyi asi a tum aryi yakna bisibmou bok, Imtamnyi biryi tamubdeibmou ba, tubto yakna takubaryi bisiboka kitingtam kibdeibmou. Kiklina ara lukunda jam 8 sirya kubmou bok, Imtamnyi biryi kitingtam jam 10 kibdeibmou. takubaryi tubto tamubdeibmou.

Hizkia ab, Babel mutuk aryi bokdonokmou nang ab ebdanmai uram deyok

20:12-21

(2Taw. 32:27-33; Yes. 39:1-8)

12Hizkia u taleamwe ani, lobdobmou. Ura, Babel mutuk sienyi Baladan mi si Merodakh-Baladan biryi kekeramwe uca, “Hizkia youn sirya lobdobmar,” ena kekebmou. Ura, Merodakh-Baladan biryi ninyi er ai wa in nang asi uram ab kanyi teleb kun dinyi ab Hizkia bisi bobindarur eboka arukmou. 13Ura, Hizkia biryi kanya kilkil asa aryi a yanganmai nang asi damdeiryanmou. Atei binmai ura, Hizkia biryi a yanmai nang asi er ai kuramwe bona-bona nirya ukuboka deirinun eboka lak kibdeibmou. A asing eibmai dinyi ara emas keil ab, perak keil ab dengna weik me yung ab, yin ab yin doun nang ongon aling ab, co bok deirin ai ab nirya lak ebmou ba, asing eibmai. 14A dirkiringmai talak nabi Yesaya yandoka weik sienyi Hizkia bisi ato kuboka asibmou, “A nang ara dantam aryi yanmang do? Sun uram ara una ebmang do?” ebmou. Uca Hizkia biryi Yesaya bisi uram ato dekeibmou, “Sunda yana mutuk Babel atei aryi yanmang,” ebmou. 15Ura, nabi Yesaya biryi Hizkia bisi ato kuboka tubto asibmou, “Kan kun atei aryi una dinyi asi sun asing eibmang do?” eboka asibmou. Uca, Hizkia biryi ato ebmou, “Ni kunun ai kurur bona-bona nirya asing eibmang. Dantam bona asi ton kum asing eibkwamarum ebman ba, nirya asing eibmang,” ebmou. 16Ura, nabi Yesaya biryi Hizkia bisi ato ebmou, “Er Iya Erebdobnyi biryi ato ebmar, 17‘Uki tentok berekwande tum ara ninyi ilinto yandoka kan ai kurur bona-bona ab, kan abwe yabwe aryi bulubdeibkei bona nirya boboka Babel mutuk bobinkwaming. Sirik tentok bona ababyi ton kan kun ai kum kubkwande. 18Ani, kan mi tentok ara weik sienyi kun ai wa inanyi kibdiryi Babel weik sienyi wa irmilinanyi kibkwande,’ ebdeibkou,” ebmou. 19Uca, Hizkia biryi nabi Yesaya bisi ato ebmou, “Er Iya Erebdobnyi biryi ebdeibmar ba, nisi ebmanirim uram ara telebto ebmanirim!” Hizkia biryi ato ebmou ara ato tenebmouci, “Ni kam kuranyi talak ara teleb asa akwe kubdobkwan,” tenebmouci, a uram ebmou.

20Weik sienyi Hizkia er weik sienyi kiamwe dinyi ab, me kwan lokoka weik atei boboka dongoamwe dinyi ab ara Yehuda mutuk weik sien nang kerek sengna umbura dam sekdongobyi. 21Hizkia sirya dibmou ura, er abwe yabwe dongoramnyi tukwe dam dongobmai. Ba, er mi Manasye biryi Yehuda mutuk sienyi kibmou.

Currently Selected:

2Raja-raja Uram 20: MTG

Highlight

Copy

Compare