2Raja-raja Uram 19

Sun Yerusalem nang ara Sanherib taruk dam aryi kum lebkaboka yibindobkwamnyi uram deyok

19:1-37

(2Taw. 32:20-23; Yes. 37:1-38)

1Sienyi amwetam bun nang ninyi winiryi aryi sienyi Hizkia dam bindoka, “Nai, ato ebmar,” ebmai uram sirya kekebmou. Kekebmouci, sienyi er ongon aling kwilikmou. Ura, “Se, talya ebmasir,” tenen kanya bobmouci, ongon aling kolo asi ongobdobmouci, Er Iya Erebdobnyi ai wengbinmou. 2Ura, sienyi ai wa in sienyi si Elyakim ab, weik atei kerek sengnanyi si Sebna ab, Er Imtamnyi biti ninyi dama deirin du nang ab asi, “Ongon aling kolo ongobdarur,” ebmou. Ba, Hizkia biryi a nang asi, “Imtamnyi uram ermurunanyi Amos mi nabi Yesaya bisi bindarur,” eboka bokeibmou. 3Ura, sunci ersi, “Hizkia bira ato ebmar,” ebmai. Ara, “Arub ara mambul dinyi ab, isin ena kum ab, malyi uram wisi keken tum ab ati berekmar. Nunci mi deibkwamar ner ato kunub. Er mi dein tum ati sirya berekmar. Bok, a mi deirona mikib ara ton kum,” ebmou. 4Ara, “Asyur atei sienyi Sanherib biryi, ‘Ato erbirum,’ eboka arukeibmounyi weiknyi biryi nun molonubnyi Er Iya Erebdobnyi, iya kam kururnyi si asi yandoka malyi kibdeibmar. Ba, nun molonubnyi Er Iya Erebdobnyi biryi a ebmou uram Er kekebmaci to kuboka ilila ikin dinyi karebkwandarya. Ati, Er Imtamnyi bisi, nun a kunmab ninyi asi Ersi molobliknibsurum!” ebmou. 5Ba, Hizkia er amwetam wa in nang Yesaya dam yanmai ura, 6Nabi Yesaya biryi a nang asi, Er Iya Erebdobnyi biryi uram ara ato ebdeibwe, “Asyur atei sienyi Sanherib biryi arungni nang aryi yandoka, Ni si malyi kibminikmanir asi kekebmarum uram ati sun ilil kuna mem! 7Niryi ninyi kanya yuk kanya asi aruknyi ba, Asyur sienyi biryi arukmounyi koukwe tam wekwande. Ba, erci uram tentok kekebdiryi, ilil weik kubci ura, er atei bindobkwande. Ba, niryi ersi ninyi on ya aryi obnyi ba, er mutuk Asyur dam bindoka dibkwande,” ebmou.

8Ba, Sanherib biryi arukmounyi biryi, “Kan sienyi Sanherib bira Lakhis atei aryi kuboka Libna atei nang asi mar bobmar,” en uram kekebmou. Ura, er sienyi mar bobmou ai aminda Libna atei binmou. 9A talak ara Asyur atei sienyi biryi Etiopia atei sienyi Tirhaka deyok ati ato kekebmou, “Etiopia atei sienyi Tirhaka biryi mar bobkwamakiraryi iyanganmakir,” en uram kekebmou. Ura, Asyur atei sienyi biryi Yehuda mutuk sienyi Hizkia bisi tubto, “Uram ato erbindarur,” eboka bokeibmou. 10Ara, Yehuda atei sienyi Hizkia bisi, “Kanci dib tenerumci molorum kwemdeina ara tola ati, ‘Niryi Yerusalem atei asi Asyur mutuk sienyi biti kum dobkarebkwan,’ ebkou uram ara diba tenebminyei,” ebdeibmou. 11“Ani, Asyur mutuk minob sienyi kiboka taleamiryi yuk-yuk mutuk nang asi oboka kum danardeiramyi dinyi ara kanci sirya kum bingdum do? Ati, ‘Nunbabyi lebdandobkwamibca,’ tenebminyei! 12Sun Asyur minob sienyi kiboka taleramnyi nang aryi, Gozan nang ab, Haran nang ab, Rezef nang ab asi oboka kum dandeiamnyi. Ani, Telasar mutuk kuramnyi Eden yala nang ababyi nirya oamnyi. Ba, sun moloramnyi kwemdeina ara mikib kum aryi, sun anda atei nang asi ton kum lebdamwe. 13Hamat atei sienyi ab, Arpad atei sienyi ab, Sefarwaim atei sienyi ab ara dantam do? Ani, Hena atei sienyi ab, Iwa atei sienyi ab ara dantam do? A nang nirya ara niryi sunsi sirya kum daneibse!” Ara, sienyi Sanherib biryi ato eboka sekeibmou.

14Sienyi Hizkia a sekeibmou kerek sengna sirya Sanherib arungni nang taruk dam aryi doboka nukmou. Ura, Er Iya Erebdobnyi ai wengbinmouci, a dobmou kerek sengna ara Er Iya Erebdobnyi urasintam asi deibmou. 15Ura, Hizkia biryi Er Iya Erebdobnyi bisi ato eboka molobmou, “Nai, Iya Erebdobnyi Israel nang aryi nun Imtamnyi ebde molokunubnyi. Kan tentok ara malaikat atoa nang kerubim#19:15 Kerubim ara maka atoanun bok, Er Imtamnyi uram eryuryangan nang si malaikat ara bisam kuda deici buna atoanun. sun noutam aryi, iya erebdob sokon deici kurumci, tukwe dangna mutuk nirya talebumnyi kurum. Ani, Nai, Kanci im dangna tukwe dangna kiknibumwe. 16Nai Iya Erebdobnyi, nun mambul doramib dinyi asi eiboka diblilibsurum. Ani, nunci Kansi molororamib dinyi kekebokabsiminci, lebdobsurum. Tonda, Sanherib biryi Kan Iya Kam Kurumnyi si asi malyi kibminikmakir dinyi asi kekebdum! 17Nai Iya Erebdobnyi, Asyur atei sien nang aryi yuk mutuk weik atei weik atei ab, yuk mutuk ninyi ab nirya asi oboka sirya kum dandeibyi. 18Ba, sun yuk mutuk kwemdeina mer ara sirya uk dongobyi. Ara, sun anda moloraming kwemdeina aryi sunsi lebdeibman kum. Eda, ninyi aryok co ab, keil ab aryi kiknibdeiboka molon kwemdeina ati uk dongobyi. 19Ati, Nai Iya Erebdobnyi, nun Nai Imtamnyi, Asyur nang aryi malyi kurminingsunung dinyi asi lebdeibsurum. Ba, tukwe dangna mutuk nang nirya aryi Imtamnyi bira da ton kum kurur. Eda, Kan tentok asi, ‘Diba, Er Iya Erebdobnyi kurur,’ tenebkwanking,” eboka molobmou.

20Ura, Amos mi Yesaya biryi Hizkia bisi ato erbindarur eboka bokeibmou. Ara, “Er Iya Erebdobnyi, Israel nang aryi molonungnyi bira ato ebdeibmakir, ‘Asyur atei sienyi Sanherib biryi kansi malyito kukurur deyok ati, kanci Nisi molobdobmoumwe dinyi ara Niryi sirya kekebmakin,’ ebmakir. 21Ati, Er Iya Erebdobnyi biryi Sanherib biti ato ebdeibmar,

‘Kan cukoka yuk mutuk barominyi ura, sun Sion atei ner sal aryi Sanherib kansi akwi tuboka durukwanking.

Ara Yerusalem atei ninyi aryi

baronmaminya dongtam kuboka aryi kisok kwakub-kwakub eboka durukwanking.

22Kanda unanyi bisi kereboka ina ngilikoumwe do?

Ani, unanyi bisi uram iboka dobmoumci,

kan kanya erebdandoboumwe do?

Nira sun Israel nang aryi ilil weik kuboka Ererdeirinunungnyi urasin dam asi kubnoumwe!

23Kan arungni nang deici aryi

Er Iya Erebdobnyi bisi kanci sirya ina ngiliknoumwe.

Tonda, “Nira kereta weiki talenunyi

akiryi weik mutuk konkon ababyi welenun.

Ara, era mutuk kon,

Libanon kon ababyi yibindoka welenun,” ebumwe.

Ani, “Cang ilila co si mek ababyi sirya kwebdesiryi,

iya telebto co si mek ababyi kwebdese,” ebumwe.

Ani, “Sirya kobdob mutuk ninyi binman kum ai,

mutuk tiliba ababyi nirya sirya yibindese,” ebumwe.

24“Niryi sun yuk nang mutuk me asi sirya longnun.

Ani, a yuk nang mutuk me asi sirya yibsiryi,

ni yin doun nang yan aryi sirya cebsinibse

ara Mesir nang mutuk me nirya asi ato kubse,” ebumwe.

25Kanda sirya kekeboka bikumwe do?

Ara, Niryi minob uca teneiboka, kan mutuk ara weiki kibdeianse.

Ara, minob nang kuramnyi uca teneibokabsiryi, kiknibdeianse.

Uku talak ara Niryi a teneiboka kubdeianse dinyi asi kunurdeirinun,

Ara, Niryi mikib kareankise ba, mikib ilila atei nirya asi

keil teleboka dalurloran ato kubdeibnin yibimwe.

26Ba, kanci oboka dalubminikumwe atei mikib kum nang ara

ilil kanya bobdamunguryi, alyi kibdeiamwe.

Ani, sunsi kanci talyi dolkua ato kwiniblobmangnyi ba, yalangnande to kubloamoumwe.

Ani, ukuryok koubmangnyi kwaning yala asi kiting tin aryi oboka yalangnande to kubminikamoumwe.

27Bok, kan kubkwandim to ara Niryi sirya bikise

ara mabkwandima babyi, bukwandima babyi,

sakoka yibinkwandima babyi, wengyankwandima babyi,

ani kanci Nisi kerebkwanirima babyi ara sirya bikise.

28Kanci Nisi sirya kerebnoumwe ani,

kan ererdana uram ara Niryi sirya kekebkise.

Akiryi, ukura Niryi kan u ara yumci aryi dakwankin.

Ba, kan si bambul ara, “Malyi bisik bicob,” tenen ati besi tabwe aryi u ngar-ngarya bisik asi tuknibkwankin.

Ba, Niryi kan yanaminyi bisik tubto kiliboka bobinkwankin,’

Er Iya Erebdobnyi biryi Sanherib, kanti ato kuboka ebdeibmakir,” ebmou.

29Ura, nabi Yesaya biryi Hizkia biti ebdeibmou to ati ato eboka sekeibmou. Ara, “A sekeibman kerek sengna ara diba kunubkwanci ura, diba ati Er Iya Erebdobnyi biryi ebdeibmaci to kuboka ebmaniryi. Ara, a kunmarim kwalina aryi kuboka, o kwaliboka kubkwaming kwalina ara ninyi aryi, er yuk tingni gandum asi yibkwamang. Bok, kwalina winiryi dinyi ara ninyi aryi anggur wa iboka koubingiryok dakoka yibnin binkwaming. 30Ba, sun Yehuda mutuk ninyi tuba kam kunung ninyi ara kum danana kum kubkwaming. Eda, sunda yina teleb aryi kouamingnyi ba, sulsul eboka sasibokabdiryi, du teleb mourande ato kuboka sunbabyi kam kubde binkwaming. 31Ara, Er Iya Erebdobnyi boukwe kimna aryi, sun Yerusalem ninyi ara nirya dirsengna kum kubkwaming. Ani, sun Sion mutuk kunung dinatam ninyi ara tuba kam kubkwaming. Ara, Er Iya Erebdobnyi, imtam yin doun nang sienyi biryi er matan aryi sirya ato kuboka teneibokaburyi, kiknibdeibwe.”

32Er Iya Erebdobnyi biryi Asyur atei sienyi Sanherib deyok ati, sienyi Hizkia bisi ato ebdeibwe, “Sanherib ab, er yin doun nang ab aryi Yerusalem atei ton kum yandenkwaming. Tonda, akatei asi mar ton mitikanun kum dobdenkwaming. Tonda, er yin doun nang aryi mar lisikwandura tenen ting ab limdon co las doubokabingiryi, yandoka ton kum yandenkwaming. Ani, sunci akatei lika asi yandoka weleboka kum warikdenkwaming. 33Akiryi, Asyur sienyi Sanherib ab, er yin doun nang ab aryi Yerusalem atei ara ton kum wekdenkwaming. Eda, sunci yandamingnyi to kuboka tubto tamurorbinkwaming. 34Ati, Yerusalem nang asi Niryi sunsi dibniliboka kalikniryi, sunsi lebdeibkwan. Ara, Nibiramnyi si weik deyok ati akatei asi ato kubkwan. Tonda, Ni wa inanyi Daud biryi Nisi er kanya tentok boboka Ni wa diboka iranou. Ba, Niryi ersi ato kuboka ebdeianse, ‘Kan atei Yerusalem nang asi kalikoka dibnilibkwan,’ eanse deyok aryi ato kubkwan.” Er Iya Erebdobnyi biryi sienyi Hizkia bisi nabi Yesaya deici aryi ato ebdeibmou.

35Ura, a lukunda aryok Er Iya Erebdobnyi uram eryuryanganyi Malaikat Tuhan sakweteboka, Asyur atei yin doun nang ninyi yubwa 185.000 baryi asi sun keis ol ai um wengyandoka obminikmou. Ba, belukuna ara dinmai uca, ninyi yubwa a dibdanin binmai ara dilakmou asi eibmai! 36Ura, sienyi Sanherib bira anabdobmouci, Asyur mutuk weik atei Niniwe a bindoka kuroramwe. 37Asi, uki tentok tum ara Sanherib er kwemdeina si Nisrokh bisi moloramwe ai binmouci, kutam ikdongoboka, kisok luknubdongobmouci, molobmou. Asi, er mining mabwe bitinyi aryi, yandoka ninyi on ya aryi obmarei. Obdei ura, Ararat mutuk bindobmarei. Sun si ara Adramelekh ab, Sarezer ab aryi oandei. Ba, er mi si Esarhadon biryi akatei sienyi kiboka er nai unubmou.

Currently Selected:

2Raja-raja Uram 19: MTG

Highlight

Copy

Compare