2Raja-raja Uram 18

Hizkia biryi Yehuda mutuk sienyi kiamwe uram deyok

18:1-8

1Ela mi Hosea Israel atei weik sienyi kiamwe talak kwalina winiryi kimbinmou. Ura, Ahas mi Hizkia Yehuda mutuk sienyi kibmou. 2Ba, Yehuda mutuk weik sienyi kiamwe talak er kubde baramwe kwalina nungna ara 25 baryi kimbinmou talak aryi Yehuda mutuk sienyi kibmou. Ba, atei weik sienyi kiboka taleamwe talak kwalina nungna ara 29 baryi kwaliamwe. Er kwin bira Zakharia nebnyi si Abi kuramwe. 3Hizkia Yerusalem atei weik sienyi kiamwe talak ara Er Iya Erebdobnyi kanya teleb kun dinyi akwe kunuramwe. Ara, er abwe Daud kuramwe to akwe kuboka kunuramwe. 4Ba, Hizkia Israel mutuk weik sienyi kiamwe talak ara Israel nang aryi Musa biryi tembaga aryi kikniamwe kwatima si Nehustan bisi bisam dama deiboka uk dabnaryi moloramnyi. Ani, Hizkia biryi a tembaga kwatima dalubmou. Ura, Israel nang sun kwemdeina moloramnyi ati mutuk konkon aryi doamnyi ai ab, yuk kwemdeina teneina ati keil dungna ab, kwemdeina si Asyera bitoanun kikniboka moloramnyi co ab nirya dalubkaamwe. 5Hizkia biryi Er Iya Erebdobnyi sun Israel ninyi molonungnyi bisi ilil kuboka Er uram ebdeiamwe to kuboka kunuramwe. Ba, Hizkia kuramwe to ara minob Yehuda mutuk weik sien nang ab, ukuryok kimnung weik sien nang ab ton kum kuramnyi. 6Hizkia bira biryi Er Iya Erebdobnyi biryi Musa dam ebdeiamwe uram asi talebnuruboka Imtamnyi ebdeiamwe to akwe kunuramwe. 7Ato kuramwe deyok aryi Er Iya Erebdobnyi biryi Hizkia ninyi mar bobkun ababyi deirlona kum uca kalingnamwe. Ba, Hizkia biryi Asyur atei weik sienyi aruknici to kuboka kunubnyob tenen mar bobmou. Ani, Hizkia biryi Asyur mutuk sienyi ebni tok kum kunuramwe. 8Hizkia biryi Filistin atei nang nirya oboka erebdobmouci, sun kuron mutuk nirya arabdobmou. Ara, weik atei aryi kuboka mitik atei nirya arabdobmou. Ani, Filistin atei aryi kuboka Gaza atei nirya arabdobmou.

Yehuda mutuk sienyi Hizkia uram deyok

18:9-12

(2Taw. 29:1-2)

9Hizkia biryi Yehuda atei sienyi kiboka taleamwe kwalina uki nungna ara kwalina dumbaryi kimbinmou. Ba, Ela mi Hosea bira Israel me utam mutuk sienyi kiboka taleamwe ara kwalina tabaryi kwalina kimbinmou. A talak aryi, Asyur mutuk sienyi Salmaneser ab, er yin doun nang ab aryi, Samaria atei ninyi asi mar bobmaici, iyandoka warikdongobmai. 10Ato kuboka Asyur nang aryi sun Samaria nang asi, mar boboka warikamnyi kwalina ara kwalina winiryi kimbinmou. Ura, sun Asyur nang aryi Samaria atei asi arabdobmai. Ara, Hizkia biryi sienyi kiboka Israel mutuk taleamwe ara kwalina nabaryi kimbinmou. Ba, Hosea biryi Israel mutuk sienyi kiboka minob taleamwe kwalina ara nabaryi kwaliamwe. Ba, sun Asyur nang aryi yandoka warikamnyi kwalina antaniboka ara toubnibaryi kimbinmou. 11Ba, Asyur mutuk sienyi biryi sun Israel nang asi boboka Asyur mutuk bobinamuryi, er il wa arungni nang kibdeiamwe. Ara, erci sunsi boboka ton ninyi ara Halah atei dongorbinamwe. Ba, ton ninyi ara Gozan mutuk bok me Habor duman asi dongorbinamwe. Ba, ton ninyi ara Madai mutuk neik dam-dam atei asi dongorbinamwe. 12Ara, Er Iya Erebdobnyi, sun moloraminyi biryi erdeirin uram asi diboka kekena kum aryi sunsi ato kuboka bobinamnyi. Ara, Er Iya Erebdobnyi er wa inanyi Musa biryi, “Ato kubdarur-ato kuna mem,” ebdeiamwe uram asi diboka kekeboka kununa kum deyok aryi sunsi ato kubmai.

Sanherib biryi Yerusalem ninyi asi ibindoka warikmou deyok

18:13-37

(2Taw. 32:1-19; Yes. 36:1-22)

13Hizkia biryi Yehuda atei sienyi kiboka taleamuryi, ibde baramwe ara kwalina 14 baryi kimbinmou. A talak aryi, Asyur mutuk sienyi Sanherib biryi Yehuda mutuk asi mar bobmouci, sunsi muna kibdongobmou. Ura, anda mutuk atei lika doboka aknabdongoamnyi weik atei nirya asi arabdobmou. 14Ura, Yehuda atei sienyi Hizkia biryi Lakhis atei kuramwe Asyur atei sienyi bisi kerek sekeibmouci, “Sienyi Sanherib bisi erbindarur,” eboka ninyi asi arukdeibmou. Ara, ato eboka sekeibmou, “Niryi sirya malyi kun dinyi bobman, ati ni urasin dam aryi tamubdobdum. Kanci ikin takubdeibmanirim dinyi ara teleb aryi niryi takubdobkwan,” eboka sekeibmou. Ura, Asyur atei sienyi biryi Yehuda atei sienyi Hizkia bisi ikin dinyi takubdeibmou. Ara, “Dengna 10.000 kilogram perak ab, 1.000 kilogram emas ab dekwanirim,” eboka ikin takubdeibmou. 15Ba, Hizkia biryi Er Iya Erebdobnyi ai deiramnyi perak ab, sienyi ai deiramnyi bona-bona nirya dobdobmouci, Sanherib bisi dekmou. 16A talak aryi Hizkia biryi Er Iya Erebdobnyi ai aryi emas dobokaburyi, Asyur atei sienyi biti karebmou. Ara, Er Iya Erebdobnyi ai bublan ab, akai ab ara emas aryi deneboka doamnyi asi nirya longokokaburyi, Asyur mutuk sienyi biti karebmou.

17A sirya ura, Asyur mutuk sienyi biryi er yin doun nang sien nang ninyi winiryi nang ab, yuk yin doun nang mer ab asi Yerusalem ninyi asi mar boboka obdankwamnyi ati Lakhis atei aryi arukoka sienyi Hizkia bisi bokeibmou. Ba, Yerusalem atei nang asi iyanmaici, ongon aling me ilingnamnyi dikum me wakamnya lilun asi yandoka kalikmai. 18Kalikmaici, akatei sienyi Hizkia bisi nabmai. Ba, er amwetam wa in nang ninyi winiryi sakweteboka sun mar ordana nang dam binmai. Sun si ara akai sienyi Hilkia mi si Elyakim ab, a mutuk sienyi kerek sengnanyi si Sebna ab ani, akatei co bok talenanyi si Asaf mi Yoah ab binmai. 19Ura, Asyur mutuk yin doun nang sienyi biryi a winiryi nang asi ato ebmou, “Asyur mutuk sienyi biryi sun sienyi Hizkia biti ebdeibmar to asi sunci ersi ato bindoka ebdarur. Ara, ‘Una atei nang aryi nisi milibkwaning teneboka talebnurubdobumwe do? 20Uram demang ebde buna aryok ara mikib dobokabtumci mar ordana dinyi ati moun yibkwamatumwe do? Ukuca, a mutuk nang aryi milibkwaning ati, “Kan ab obdankwanim,” ebnurum? 21Kanda, “Mesir mutuk sienyi biryi milibdobkwanir,” teneboumwe. Bok, Mesir mutuk sienyi bira kat kama kuma, eda ola bulakman kama. Asi kanci tuba ati, “Sunci miliboka lebdobkwaning,” teneaminyi ura, a kama aryi kan nong asi lukoka dilaka sakeibkwankir. Mesir atei sienyi Firaun biryi, “Milibkwanirca,” teneraminyi ura, erci sunsi kum milibkwande. 22Ani, sunci ato ebkwamarum, “Er Iya Erebdobnyi, nun molonubnyi biryi nun milikwansirarya,” teneboubwe ebkwamarum. Bok, sun diba teneboka molondarurnyi biti molorban ai mitik-mitik ai nirya ara Hizkia biryi sirya dalubkabokwe. Ura, ato ebdeibwe, “Yehuda nang ab, Yerusalem nang ab ara tonkwa Yerusalem atei weik molon ai akwe molonkwaming,” ebwe. 23Akiryi ukura, Asyur sienyi biryi Hizkia bisi bisam kuda 2.000 baryi karebkute ababyi Hizkia yin doun nang 2.000 baryi nang aryi kuda bisam boboka ordana co biribdob nang ton kum kunung. 24Kanci Mesir atei mar ordana kereta ab, bisam kuda bukoka ordaraming yin doun nang mer aryi milibdobkwaning tenerum dinyi ara talyi tenerum. Ati, ni ab ordaranimnyi ababyi, nun Asyur yin doun nang asi muna kibdongoboka erebdobman kum! 25Er Iya Erebdobnyi biryi ato ebdeibnou, “Kanci akatei nang asi mar bobminci, oboka kum dandeibdum!” ebdeibnou. Ati, niryi Er Iya Erebdobnyi biryi kum ebdeibnou to kuboka akatei nang asi kum dandeibkwaman do?’ ebdarur.” Sanherib biryi Hizkia bisi ebdeibmou to kuboka Hizkia yin doun nang winiryi asi, Sanherib yin doun nang aryi ebdeibmai.

26Ebmou uca, Elyakim ab, Sebna ab, Yoah ab aryi ersi ato ebmai, “Kanci nun winiryi nang asi, Aram mutuk uram aryi danguboka Yehuda uram aryi ebkarebsurum. Ba, sun akatei weik lika dub a buki yibinmang nang aryi kan enmarim uram kekebingnyei,” ebmai. 27Uca, Asyur atei yin doun nang sienyi biryi sunsi ato ebmou, “Ni nai biryi a uram asi kan ab, kan sienyi ab atikwe ebkwamasunwe ati arukeibmanou do? Ba, lika duba anda bukiyibinmangci, sun mining dei ab, lin ab yirdandarur nang ara kum tenebmunyei,” ebmou. 28Ura, a yin doun nang sienyi tikokmouci, Yehuda atei uram aryi er uram iboka ersi ato ebmou, “Asyur atei weik sienyi biryi ato ebmar uram ara sirya kekebdum! 29Asyur mutuk sienyi biryi sunsi ato ebdeibmasir. Ara, ‘Sun sienyi Hizkia biryi ni taruk dam aryi sunsi da ton kum lebdeibkwansir. Ati, erci sunsi tola ati talyi esurur uram ara kekebmunyei! 30Hizkia biryi sunsi talyi ati ebsici uram ati diba tenebmunci kekebmunyei! Ara, “Er Iya Erebdobnyi biryi nunsi lebdeiboka Yehuda mutuk ara Asyur atei sienyi biti kum dobkarebkwande,” tenebmunyei. 31Asyur mutuk sienyi biryi sunsi ato ebdeibmasir. Ara, “Sunci sun sienyi Hizkia uram kekena mem!” Eda, “Kanci nunsi sirya muna kibdongobmasirim,” ebokabmunci, ni taruk dam karebdamunyi akwa, sun mutuk yina asi mangkau asa aryi doboka yibkwamarum. Ara, anggur co du ab, kwarang du ab ani sun mutuk me yindarur ai aryi doboka yibkwamarum. Ati, sunci sun atei dam aryi sakwetebmunci, nisi yamunyi ura, Asyur atei sienyi biryi ebsici uram asi kekebdarur. 32Ba, niryi sunsi yandoka bobsinyi ura, yuk atei bok sun atei ato atei nun asi bobinkwansin. Ba, a bobinkwansin atei ara gandum ab, anggur co du yung ab, roti kwaning ab, anggur wa nirya kurur atei asi bobinkwansin. Ani, zaitun du ab, madu ab kurur asi yibde kuramunyi tok asi kum dibkwandum. Bok, Hizkia biryi sunsi oloboka, “Er Iya Erebdobnyi biryi nunsi lebdeibkwansir,” enmasici uram ara sunci ersi kekena mem! 33Asyur atei sienyi taruk dam aryi yuk-yuk atei nang asi, sun dib tenebiryi molonung kwemdeina aryi sunsi ton lemdeirirur do? 34Sun Hamat atei nang molonung kwemdeina ab, Arpad atei nang molonung kwemdeina mer ara dantam do? Ani, Sefarwaim atei nang ab, Hena atei nang ab, Iwa atei nang ab aryi molonung kwemdeina mer ara dantam do? Ni taruk dam aryi sun Samaria atei nang asi ton lebdeibyi do? 35Dantam atei nang molonung kwemdeina aryi, ni taruk dam aryi er atei nang lebdeibwe. Ba, Er Iya Erebdobnyi biryi Yerusalem atei nang asi ni taruk dam aryi lebdeibkwamote do?’ ebmar,” ebmai. 36Asyur atei sienyi biryi sunsi ato ebmou. Bok, sunci ersi mitik uram ababyi ton kum ebdenmaici, ur dem bukokmai. Ara, sun sienyi Hizkia biryi er atei ninyi asi, “Sunci er uram dengdeina mem!” ebdeiamwe deyok aryi sun uram kilikokmai. 37Ura, Elyakim ab, Sebna ab, Asaf mi Yoah ab aryi, “Se, unatoa ati eande asi da,” tenen kanya aryi sun ongon aling kwilik-kwilik eblobokmai. Ura, sienyi Hizkia bisi binmaici, Asyur atei sienyi er yin doun sienyi biryi sunsi ebmou to kuboka, “Ato kuboka ebmasir,” ebmai.

Currently Selected:

2Raja-raja Uram 18: MTG

Highlight

Copy

Compare