2Raja-raja Uram 17

Hosea Israel yala nang sienyi kibmou uram deyok

17:1-6

1Ahas Yehuda mutuk weik sienyi kiamwe ani kwalina amolbaryi kibmou. Ura, Ela mi Hosea Israel nang weik sienyi kibmou. Hosea bira Samaria mutuk kwalina toubnibaryi weik sienyi kiamwe. 2Hosea biryi Er Iya Erebdobnyi dam asi malyi dinyi kunuramwe. Bok, erci kuramwe dinyi ara Israel mutuk yuk weik sien nang kuramnyi to kum eda mitikanun malyi dinyi kunuramwe. 3Ura, Asyur weik sienyi Salmaneser biryi Hosea bisi mar bobmou. Ura, Hosea biryi Salmaneser bisi, “Ilil kuboka dengna weik dinyi kwalina tentok kubcitok dengkwankin,” ebmou. 4Bok, Hosea biryi uram boban nang bokdonokmouci, Mesir sienyi So bisi ni milibnurum ebdeibmou. A ebmou talak aryi Hosea biryi Asyur mutuk sienyi bisi kum dekmou. Ara, ato eamwe. Kwalina tentok kubcitok dengkwankin eamwe. A eamwe dinyi ab, Hosea biryi Mesir mutuk sienyi bisi ni milibnurum eamwe dinyi ab nirya bikmou ura Asyur mutuk sienyi biryi Hosea bisi malyi kun nang wenen ai dongobmou. 5Ura, kwalina uki winiryi ara Asyur mutuk sienyi Salmaneser biryi Israel nang nirya yakmouci, Samaria atei arabdobmou. 6Hosea Samaria mutuk weik sienyi kiamwe kwalina uki toubnibaryi kibmou. Ura, Asyur mutuk sienyi Salmaneser biryi Samaria mutuk arabdobmou. Ba, Israel yala ninyi nirya ara Asyur mutuk yakdonokmouci, Halah atei kubdarur ebmou. Ara, Habor me duman Gozan mutuk kabdeibmou. Ton ninyi ara bokoka weik atei weik atei Madai mutuk bokdonokmou.

Israel yala ninyi aryi yuk kwemdeina moloramnyi bok walwalabdeibmou uram deyok

17:7-23

7Samaria atei yandoka arabdobmai dinyi ara Israel ninyi aryi Er Iya Erebdobnyi sun Mesir mutuk sienyi Firaun aryi taruk taleboka boyasounyi bisi ilil teneboka dib tenena kum uca, yuk kwemdeina moloramnyi ba, arabdobmai. 8Ara, Er Iya Erebdobnyi biryi yakamwe ninyi moloramnyi kwemdeina asi moloramnyi. Ani, Israel weik sien nang dam aryi yakdonokamwe nang kwemdeina asi moloramnyi. 9Ani, Israel yala ninyi aryi Er Iya Erebdobnyi teleb tenena kum dinyi kunuramnyi. Ara, weik atei ab mitik atei ab nirya ara kwemdeina yuk-yuk kikniboka moloramnyi. 10Israel yala ninyi aryi mutuk kon dam ab, ilila co bukan dam ab ara kwemdeina molon ai kibnin binamnyi. 11Ba, Kanaan ninyi aryi moloramnyi to kuboka Israel ninyi ababyi moloramnyi. Ba, Er Iya Erebdobnyi bisi yu wekeibmai. 12Sunci yuk kwemdeina asi moloramnyi. Bok, Er Iya Erebdobnyi biryi minob ato ebdeiamwe, “Sunsi Kanaan ninyi molonung kwemdeina asi kiknibdeiboka molona mem!” ebdeiamwe. 13Er Iya Erebdobnyi biryi nabi-nabi nang deici asi Israel ninyi ab, Yehuda ninyi ab ati ato ebdeibmou, “Sun kanyi dangubdeiboka Niryi yan memen uram ab, ukubdarur-ukuna mem en uram ab sun abwe yabwe dam karebse uram asi dib tenebdarur. Ani, a uram ara Nabi nang dam ebdeibse to asi kununkwandarur,” ebdeibse. 14Bok, sun Israel yala ninyi ab Yehuda yala ninyi ab ara Ni ebdeibse uram kekena kum kunung. Eda sun abwe yabwe aryi Er Ni Iya Erebdobnyi bisi dib kum teneramnyi to kunung. 15Israel yala ninyi ab Yehuda yala ninyi ab ara Er Imtamnyi biryi ebdeibwe to kum kununung. Ani, sun abwe yabwe ab Ni ab uram talak ebdanamoubwe to kuboka kununa kum kunung. Ba, sunci Ni Imtamnyi biryi yan memen uram ebdeibse to ababyi kununa kum kunungci eda Kanaan ninyi molonung kwemdeina asi molonung. Minob ara Er Iya Erebdobnyi biryi Israel ninyi asi ato ebdeiamwe, “Sunci yuk nang moloramingnyi kwemdeina molona mem!” ebdeiamwe bok kum bikana ato kunung. 16Sunci Er Iya Erebdobnyi biryi ebdeibwe to ara kununa kum kunung. Eda, bisam sapi kikniboka molonung. Ani, kwemdeina si Asyera kikniboka molonung. Tonda, kiting ab, wala ab, kurya ab, kwemdeina si Baal ab asi molonung. 17Ani, sun mabwe nermabwe asi kwemdeina ati dama deirbindoka uk dongonung. Ba, sunci ninyi sun du naboka molonung. Ani, tola ati ukuboka kunubkwande en nang asi bindoka nun bisik eterebsurum er baramnyi deyok aryi Er Iya Erebdobnyi bisi yu wekdeamnyi. 18A deyok aryi Er Iya Erebdobnyi biryi sun Israel yala ninyi ab Yehuda Yala ninyi ab asi kalingna kum uca deibloamwe. Ani, Er Imtamnyi biryi Israel ninyi asi kareamwe mutuk dam aryi dobtaleboka yuk mutuk donokamwe. Bok, Yehuda mutuk tentok ara iya a kubwe. 19Ba, Yehuda ninyi ababyi Er Iya Erebdobnyi bisi dib teneboka ilil kuna kum kuramnyi. Eda Israel ninyi kuramnyi to kuboka kunuramnyi. 20Ato kuramnyi deyok aryi Er Iya Erebdobnyi biryi Israel yala ninyi asi sun mar ordan nang taruk dam kareamwe ba, obsekmai. Ani, Er Imtamnyi biryi kalingna kum kuramwe. 21Ura, Er Iya Erebdobnyi biryi Israel yala ninyi yuk Yehuda yala ninyi yuk kibdeibwe ura, Israel yala ninyi ara Nebat mi si Yerobeam bisi Israel yala ninyi weik sienyi tikeibmai. Bok, Yerobeam biryi sun Israel ninyi asi Er Imtamnyi urasin dam iya malyi dinyi kunuramnyi. 22Israel ninyi aryi Weik sienyi Yerobeam kuramwe to akwe kunuramnyi. 23Ato kuboka kunuramnyi deyok aryi Er Iya Erebdobnyi biryi kalinga kum uca deibloamwe. Ara, Er Iya Erebdobnyi biryi Er ai wa in nang dam asi minob ebdeiamwe. Ara, “Ni Imtamnyi biryi ebdeibse uram asi talebnuruboka kuna kum kubmunyi ura, deiblobkwansin,” eamwe. Akiryi Israel ninyi ara Asyur nang aryi Asyur mutuk boboka binamnyi. A boboka binamnyi tok ukubabyi iya Asyur mutuk a kunung.

Samaria mutuk ninyi aryi Israel ninyi kuramnyi mutuk bindoka unubmai uram deyok

17:24-41

24Ura, Asyur mutuk sienyi biryi Babel atei ninyi ab, Kuta atei ninyi ab, Awa atei ninyi ab, Hamat atei ninyi ab, Sefarwaim atei ninyi ab boboka Israel nang kuramnyi atei si Samaria mutuk dam bobinmou. Ba, Israel ninyi kuramnyi atei Samaria mutuk dam kuramnyi. 25A bindoka kuramnyi deyok aryi Er Iya Erebdobnyi biryi yu kam si singa asi arukmou ba, singa aryi anda bindoka kuramnyi ninyi obmou. Ara, Er Iya Erebdobnyi bisi ilil teneboka er uram ebdeiamwe to kununa kum ati ato kubmou. 26Ura, Samaria mutuk dam bindoka kuramnyi nang aryi Asyur mutuk sienyi bisi ato ebmai, “Nai kanci Samaria mutuk dam bobindoka kabdeibumwe nang ara kam singa aryi nirya obkiribmar. Ara, sun Samaria mutuk nang Moloramnyi kwemdeina dib tenena kum deyok aryi Samaria nang kwemdeina aryi yu kam singa lobdongobmar ba, ninyi nirya obmar,” ebmai. 27Ura, Asyur mutuk sienyi biryi ato ebmou, “Samaria mutuknyi imam tentok asi Asyur mutuk boboka bindaunyi bisi arukmunyi ba, Samaria mutuk bindoka kubdiryi sun molonung kwemdeina asi eterebkwande,” ebmou. 28Ura, Israel nang imam tentok Samaria atei dam aryi Asyur mutuk dam bobinmai. Ba, erci anabdobmou ura, Betel atei dam tingyanmou. Ba, a Er Imtamnyi wa inanyi imam biryi Er Iya Erebdobnyi bisi ilil kuboka dib tenebnaryi Iya Erebdobnyi bisi ato kubkoba molobkwandarur eboka eterebmou. 29Bok, Samaria mutuk dam kuramnyi nang ara sun kwemdeina yuk-yuk asi moloramnyi. Ani, sun kwemdeina yuk-yuk mutuk kon dam ab, keil deyok dam ab, Israel nang aryi doamnyi ai dam ab asi dobdandoka moloramnyi. Ato kuboka yala yuk-yuk binamnyi to kwemdeina dobdanin yibinamnyi. 30Ara, Babel mutuk nang ara kwemdeina Sukot-Benot kikniboka moloramnyi. Ba, kuta mutuk nang ara kwemdeina Nergal kikniboka moloramnyi. Ba, Hamat mutuk nang ara kwemdeina Asima kikniboka moloramnyi. 31Awa mutuk nang ara kwemdeina si Nibhas kikniboka moloramnyi. Ba, Tartak mutuk nang ab, Sefarwaim nang ab ara sun mabwe asi kwemdeina si Adramelekh ab, Anamelekh ab ati oboka dama deibnaryi uk daramnyi. 32Sun Samaria mutuk dam bindoka kuramnyi nang ababyi yuk kwemdeina moloramiryok, Er Iya Erebdobnyi bisi moloramnyi. Ani, sun a bindoka kuramnyi nang asi kwemdeina molorban nang si imam wiamnyi. Ba, a imam nang aryi sun kwemdeina asi mutuk kon dam molorbaramnyi. 33Ara, Israel nang aryi Er Iya Erebdobnyi bisi moloramnyi, bok yuk kwemdeina ababyi kikniboka moloramnyi. Ara, sun Babel atei boboka kuramnyi yuk atei nang aryi sun kwemdeina yuk-yuk moloramnyi to, Israel nang ababyi sun kwemdeina moloramnyi. 34Uku talak ababyi Israel nang aryi sun minob kuramnyi to kuboka iya ukunung.

Sunci Er Iya Erebdobnyi bisi ilil teneboka Er Imtamnyi ebdeibwe to uram asi kununa kum kunung. Er Iya Erebdobnyi biryi a ebdeibwe uram ara Yakub mabwe dam Israel enung nang dam ebdeiamwe to kununa kum kunung.

35Er Iya Erebdobnyi biryi Israel nang dam asi uram talak ato ebdeiamwe, “Yuk kwemdeina asi si weik ena mem! Yuk kwemdeina asi luknubdongoboka molona mem! Yuk kwemdeina asi si weik eboka bisam oboka dama deirina mem! 36Eda, Ni Iya Erebdobnyi Mesir mutuk dam Ni mikib aryi boyasisinyi bisi si weik ebnindarur! Nisi luknubdongoboka molobnindarur. Tonda, Niti dama deibkwanindarur. 37Bok, Ni Iya Erebdobnyi biryi yan memen uram ab, ‘Ukubdarur-ukuna mem,’ en uram ab, sun dam ebdeibsise to asi kunubkwandarur. Sunci yuk kwemdeina asi molona mem! 38Ani, Ni Imtamnyi ab, sun ab uram talak ebdeibdabwe uram asi luba kimna mem! 39Ni Iya Erebdobnyi bisi dib teneboka ilil kubkwandarur. Ba, Niryi sun mar ordan nang dam aryi lebdeibkwansunun. Ba, sun erebdobkwandarur,” ebdeiamwe. 40Bok, Samaria mutuk dam kuramnyi nang ara a ebdeiamwe to kuboka kekena kum kuamnyi. Eda, sun kwemdeina yuk-yuk asi talebnuruboka moloramnyi.

41Ato kuramiryok Israel nang aryi Er Iya Erebdobnyi bisi moloramnyi. Ani, sun kwemdeina yuk-yuk ababyi kikniboka moloramnyi. Ara, wisi nang ab, sun mabwe ab, odei-odei banung ninyi nirya ab ara sun abwe yabwe kuramnyi to kuboka kunungci ukubabyi iya ukunung.

Currently Selected:

2Raja-raja Uram 17: MTG

Highlight

Copy

Compare