2Raja-raja Uram 16

Ahas Yehuda mutuk sienyi kibmou uram deyok

16:1-20

(2Taw. 28:1-27)

1Remalya mi si Pekah Israel nang weik sienyi kiamwe talak kwalina 17 kimbinmou ura, Ahas mi si Yotam Yehuda mutuk sienyi kibmou. 2Ahas er deiamnyi talak aryi kuboka weik sienyi kibmou ara kwalina 20 baryi kibmou bok, Yehuda mutuk sienyi kibmou. Kwalina 16 baryi Yerusalem atei weik sienyi kiamwe. Bok, erci Er Iya Erebdobnyi dam asi malyito dinyi kunuramwe. 3Ahas biryi kuramwe ara Israel nang weik sien nang kuramnyi to kuboka kunuramwe. Ani, er mi asi kwemdeina asi dama deiboka uk daamwe. A duknasito kuamwe to ara Kanaan nang minob ukuboka kwemdeina moloramnyi to kuramwe. 4Ba, Ahas biryi mutuk konkon dam ab, ilila co tikoka kunukanci dam ab si kwemdeina moloramwe.

5Ahas bira Israel mutuk weik sienyi kiamwe talak aryi, Aram atei sienyi Rezin ab, Yehuda mutuk Remalya mi sienyi Pekah ab aryi Yerusalem atei weik sienyi Ahas bisi iyanmarei. Bok, Yerusalem ninyi aryi a nang bitinyi asi ona kum kubmai. 6Ura, Aram mutuk sienyi Rezin biryi Edom mutuk nirya ara Elat atei tukwe kibdeibmou. Ba, Yehuda mutuk ninyi Elat mutuk kuramnyi ninyi ara nirya yakmou. Ura, Edom ninyi Elat mutuk yandobyi, a ninyi ara ukubabyi iya a kunung. 7Ura, Yerusalem sienyi Ahas biryi er ai wa in nang asi Asyur sienyi Tiglat-Pileser bisi ni uram bobindarur ebmou. Ara, ato, “Nira kan mi, kan wa irmilinanyi. Nai kan yaminci ni lebdobnurum, ara Aram mutuk sienyi ab, Israel nang sienyi ab aryi nisi iyanmaniring ati lebdobnurum,” eboka uram ebdeibmou. 8Yerusalem atei weik sienyi biryi uram akwe erdeirina kum kubmou. Eda, dengna weik keil si emas ab perak ab Er Iya Erebdobnyi molon ai deiamnyi dinyi ab weik sienyi kun atei deiamnyi dinyi ab doboka Asyur weik sienyi biti deibmou. 9Ura, Asyur weik sienyi Tiglat-Pileser biryi Ahas ebmou uram kekebmouci, Damsyik atei iyanmou a mutuk nirya arabdobmou. Ura, Damsyik kuramnyi ninyi ara boboka Kir mutuk bobinamuryi, weik sienyi Rezin bira obmou.

10Ura, Yerusalem atei weik sienyi Ahas Damsyik mutuk binmouci, Asyur mutuk sienyi Tiglat-Pileser ab ebdanmarei. A ebdanmarei dam aryi Ahas biryi diramwe uca, ukutotoa dama deirin keil lamna doamnyi asi eibmou. Ura, Ahas biryi imam nang weik sienyi Uria bisi, “A dama deirin keil lamna doamnyi to kuboka ukuboka dobyi,” eboka kerek sekoka deibmou. 11Ura, Weik sienyi Imam Uria biryi Ahas kerek sekoka deibmou dinyi eibmou. Ura, a kerek sekoka deibmou to kuboka Er Imtamnyi bisi dama deirin keil lamna dobmou. Ura, Ahas Damsyik mutuk aryi kuboka Yerusalem atei yanmou. 12Damsyik aryi yandoka diramwe uca, dama deirin keil lamna ara sirya dobmou. 13Ura, a keil lamna deici asi, uk daboka dama deirin dinyi ab, yuma kibmangnyi yina dama deirin dinyi ab gandum du ab dama deibmou. Ani, anggur me ab bisam ining ab a keil lamna dub dikmou. 14Bok, Ahas biryi tembaga aryi doamnyi keil lamna Er Iya Erebdobnyi ai deiamnyi dinyi ara otam kisibdonokdarur ebmou. Ura, a tembaga aryi doamnyi keil lamna ara Er Imtamnyi bisi molon ai dam aryi kuboka me youkwa tam kisibdonokmai. 15Sirya ukubmai ura, Ahas biryi Uria bisi ato ebmou, “Weik keil lamna dub asi belekuna tam Er Imtamnyi biti bisam oboka uk dan dinyi ab, sintam bisam oboka uk dan dinyi ab, yuma kibmangnyi kouryina dama deirin dinyi ab dama deibkwandum. Ani, weik sienyi dinyi ati Er Imtamnyi bisi kouryina dinyi ab, anggur du me yung ab Dama deibkwandum. Ani, dama deiboka uk dabmaminyi bisam ining ara keil lamna dub diknin yibinkwandum. Bok, tembaga keil aryi dobyi keil lamna ara niryi kubkwan,” ebmou. 16Ura, Uria biryi weik sienyi Ahas ebmou to kuboka kunubmou. 17Ura, Ahas biryi tembaga aryi ninyi bon bisam si kereta atoanun kikniboka Er Imtamnyi bisi molon ai deiamnyi dinyi ara nirya lobkwetebmou. Ani, bisam sapi atoanun ilila amolbaryi kikniboka deiamnyi dinyi ababyi lobkwetebmouci, tembaga aryi doamnyi keil lamna dub deyok dam deibmou. 18Ura, Ahas biryi Asyur mutuk weik sienyi kanya teleb kimna ati Er Iya Erebdobnyi bisi molon ai atolonga ara dalubmouci, weik sienyi wengyangan bisik akwe kibdeibmou.

19Weik sienyi Ahas ibde baramwe dinyi ara Yehuda mutuk weik sien nang kerek sengna umbura dam sekdongobyi. 20Ahas dibwe ura, weik sien nang dongoramnyi mutuk Daud atei dongobmai. Ura, Ahas mi Hizkia weik sienyi kibmou.

Currently Selected:

2Raja-raja Uram 16: MTG

Highlight

Copy

Compare