2Raja-raja Uram 15

Uzia Yehuda mutuk sienyi kiamwe deyok

15:1-7

(2Taw. 26:3-5; 2Taw. 26:16-23)

1Yerobeam Israel atei weik sienyi kiamwe kwalina uki nungna 27 baryi kimbinmou. Ura, Yehuda atei sienyi Amazia mi si Azarya Yehuda mutuk sienyi kibmou. 2Azarya deiamnyi aryi kubde baramwe ani kwalina 16 baryi kibmou ura, Yerusalem atei weik sienyi kibmou. A weik sienyi kiamwe aryok kwalina uki nungna 52 baryi Yerusalem atei weik sienyi kiamuryi, taleamwe. Ba, er kwin bira Yerusalem atei ner si Yekholya. 3Erci weik sienyi kiamwe ara er nai Amazia kuramwe to kuboka kunuramwe. Ara, Er Iya Erebdobnyi teleb tenen dinyi akwe kunuramwe. 4Bok, erci mutuk konkon kwemdeina moloramnyi dinyi asi dalurkana kum kuamwe. Ba, Israel ninyi ara tuba yuk kwemdeina moloramnyi. 5Ato kuramnyi deyok aryi, Er Iya Erebdobnyi biryi Israel atei weik sienyi Azarya bisi bol malyi kun youn si susa kareamwe. Ba, a youn ara iya minob lobdobman kum youn aryi er atei yuk dobdeiamnyi. Ura, Azarya weik sienyi kiamwe wa ara er mi si Yotam unubmouci, er nai kuramwe atei weik sien nang kun atei weik sienyi kibmou.

6Azarya Yerusalem atei weik sienyi kiamwe aryi kuboka er wa ibde baramwe dinyi nirya ara Yehuda atei weik sien nang-sien nang kerek sengna umbura dam sekdongobyi. 7Weik sienyi Azarya dibmou. Ura, weik sien nang dongoramnyi tukwe dam Daud atei tukwe dongobmai. Ba, er mi Yotam weik sienyi kibmou.

Zakharia Israel atei weik sienyi kibmou uram deyok

15:8-12

8Azarya Yehuda mutuk weik sienyi kiamwe kwalina uki nungna 38 baryi kimbinmou. Ura, Yerobeam mi si Zakharia Israel mutuk bok Samaria atei weik sienyi kibmou. Zakharia Samaria atei weik sienyi kibmou uki nungna ara wala nabaryi kiamwe. 9Zakharia bira Samaria atei weik sienyi kiamwe bok, erci wa iramwe dinyi ara Er Iya Erebdobnyi dam asi malyi dinyi kunuramwe. A kuramwe to ara minob sien nang kuramnyi to akwe kunuramwe. Tonda erci kuramwe ara Yerobeam biryi Israel ninyi asi malyi kun dinyi borsiniramwe to kuboka erbabyi neiktoto kuramwe. 10Ura, Yabesh mi Salum biryi Zakharia bisi Yibleam mutuk dam aryi obniryi er weik sienyi kibwe wa ara nisi weik sienyi kibkwan eboka mar moun yibmou.

11Erci, yuk dinyi-yuk dinyi kunuramwe dinyi babyi, weik sienyi kiboka wa ibde baramuryi kunuramwe dinyi babyi nirya ara Israel mutuk weik sien nang kerek sengna umbura dam sekdongobyi. 12Er Iya Erebdobnyi biryi weik sienyi Yehu dam asi ato kuboka uram ebdeiamwe, “Kan yaldangna deibde baraminyi ani liki dumbaryi dinyi kurbici ura, Israel atei weik sien nang kibkwandum,” ebdeiamwe. A ebdeiamwe to kuboka sirya kunubmou.

Salum Israel atei weik sienyi kibmou uram deyok

15:13-16

13Uzia Yehuda mutuk weik sienyi kiamwe talak kwalina uki nungna 39 baryi kimbinmou. Ura, Yabesh mi si Salum biryi Israel atei bok Samaria mutuk weik sienyi kibmou. A weik sienyi kibmou uki nungna ara wala tentok kibmou. 14Ura, Gadi mi si Menahem Tirza atei aryi kuboka Samaria atei binmouci, Yabesh mi Salum obmou. Sirya obwe ura, Menahem Yehuda mutuk weik sienyi kibmou.

15Weik sienyi Salum kuramwe dinyi ara weik Israel mutuk sien nang kerek sengna umbura sekdongobyi. 16Weik atei bisik bublan kungdeirina kum kubmai ati, Menahem biryi Tirza atei ab, Tifsah mutuk ab, a mutuk kuramnyi ninyi nirya ab kum dandeibmou. Ba, mundu bon nerabwe ara ona kum kubmou.

Menahem Israel atei weik sienyi kibmou uram deyok

15:17-22

17Azarya bira Yehuda atei sienyi kiamwe kwalina uki nungna 39 baryi kimbinmou ura, Gadi mi si Menahem Israel mutuk weik sienyi kibmou. Ba, kwalina takubaryi Samaria atei taleamwe. 18Menahem er weik sienyi kiamwe talak ara Er Iya Erebdobnyi dam asi malyi dinyi kunuramwe. Ani, Yerobeam kuramwe to kuboka erbabyi neik toto kuramwe. Ara, sun Israel ninyi nirya asi malyi dinyi borsiniramwe. 19Asyur atei weik sienyi Pul Israel atei iyanmou. Bok, Menahem biryi Pul bisi dengna weik keil si perak 34 kilogram baryi karebmou. A karebmou dinyi ara Asyur weik sienyi bira ni tam makdobkwanir tenebmouci, karebmou. 20Israel mutuk sienyi Menahem biryi dengna weik keil Asyur atei sienyi bisi karebmou ara Israel mutuk wa in nang nirya nukoka ninyi tentok ara dengna weik keil perak 50 baryi nukmouci, karebmou. Ura, Asyur atei sienyi Israel kuna kum uca er atei bindobmou.

21Yuk dinyi Menahem wa ibde baramwe dinyi nirya ara Israel mutuk weik sien nang kerek sengna umbura dam sekdongobyi. 22Menahem dibmou ura er mi si Pekahya Israel atei sienyi kibmou.

Pekahya Israel atei sienyi kibmou uram deyok

15:23-26

23Azarya bira Yehuda atei weik sienyi kiamwe kwalina uki 50 baryi kimbinmou. Ura, Menahem mi si Pekahya Israel mutuk bok Samaria atei weik sienyi kibmou. Samaria atei weik sienyi kiamwe kwalina bitinyi kwaliamwe. 24Pekahya biryi Er Iya Erebdobnyi dam asi iya malyito kuramwe. Ara, Yerobeam kuramwe to kuboka kunuramwe. Ato kuramwe deyok aryi Israel ninyi ababyi malyi dinyi borsiniramwe. 25Ura, Israel yin doun nang sienyi Pekah mi si Remalya ab, Gilead atei nang ninyi 50 baryi nang ab uram toubmaici, “Pekahya bisi obkwayeb,” ebmai. Ura. Pekahya bira weik sien nang kuraming ai kunmou bok bindoka obmai. Pekahya bikwe ona kum kubmai, eda Argob ab, Arye ab neika obmai. Obmai ura, Pekah biryi Samaria atei weik sienyi kibmou.

26Yuk dinyi weik sienyi Pekahya biryi kuramwe dinyi ara Israel mutuk weik sien nang kerek sengna umbura dam sekdongobyi.

Pekah biryi Israel mutuk weik sienyi kibmou uram deyok

15:27-31

27Azarya bira Yehuda mutuk weik sienyi kiamwe talak kwalina uki nungna 52 baryi kimbinmou. Ura, Remalya mi si Pekah Israel mutuk weik sienyi kibmou. Pekah biryi Samaria atei weik sienyi kiboka taleamwe kwalina uki nungna ara 20 baryi kwaliamwe. 28Bok, weik sienyi Pekah biryi kuramwe dinyi ara Er Iya Erebdobnyi dam asi malyi dinyi kunuramwe. Ara, Yerobeam biryi Israel ninyi asi malyi dinyi borsiniramwe to kuboka neiktoto kunuramwe. 29Pekah bira Israel ninyi asi Samaria atei weik sienyi kiamwe talak aryi, Asyur atei weik sienyi Tiglat-Pileser biryi yuk atei-yuk atei nirya arabdoamwe. A arabdoamwe atei ara Iyon atei ab, Abel-Bet-Maakha atei ab, Yanoah atei ab, Kedesh atei ab, Hazor atei ab, Gilead atei ab, Galilea atei ab Naftali mutuk ab nirya arabdoamwe. Ba, anda atei kuramnyi ninyi ara Asyur mutuk dam boboka binamuryi, er wa arungna ninyi kiamwe.

30Uzia mi Yotam Yehuda atei sienyi kiamwe talak kwalina uki nungna 20 baryi kimbinmou ura, Ela mi Hosea biryi uram toubmouci, “Remalya mi si Pekah obkwan,” ebmou. Sirya obwe ura, Hosea Israel mutuk sienyi kibmou.

31Remalya mi Pekah weik sienyi kiamwe dinyi ara Israel atei weik sien nang kimnamnyi ba, sengdongoramnyi kerek sengna umbura dam sekdongobyi.

Yotam Yehuda mutuk weik sienyi kibmou uram deyok

15:32-38

(2Taw. 27:1-9)

32Remalya mi si Pekah Israel nang weik sienyi kiamwe talak kwalina uki bitinyi kimbinmou ura, Uzia mi si Yotam Yehuda mutuk weik sienyi kibmou. 33Yotam er deiamnyi aryi kuboka weik sienyi kibmou ara kwalina 25 baryi kimbinmou ura Yehuda mutuk sienyi kibmou. Ura, Yerusalem atei weik sienyi kiamwe ara kwalina 16 baryi kiamwe. Yotam er kwin si ara Zadok nibnyi Yerusa. 34Yotam erci kuramwe dinyi ara Er Iya Erebdobnyi teleb tenen dinyi akwe kunuramwe. Ara, er nai Uzia kuramwe to kuboka kunuramwe. 35Bok, Yotam biryi kwemdeina moloramnyi mutuk kon asi dalurkana kum kuamwe deyok aryi, Israel ninyi ara kwemdeina tuba moloramnyi. Weik sienyi Yotam biryi Er Iya Erebdobnyi molon ai imtam bisik bublan kikniamwe.

36Weik sienyi Yotam er wa ibde baramwe dinyi ara Yehuda mutuk weik sien nang kerek sengna umbura dam sekdongobyi. 37A talak ara Er Iya Erebdobnyi biryi Aram atei Aram mutuk sienyi Rezin ab Israel nang sienyi Remalya mi Pekah ab si Yehuda mutuk ibirurum ebmou. 38Ura, Yotam deibmou ba, weik sien nang dongoramnyi tukwe dam er abwe yabwe dongoamnyi ai Daud atei tukwe dongobmai. Ba, er mi si Ahas unubmouci, Yehuda mutuk sienyi kibmou.

Currently Selected:

2Raja-raja Uram 15: MTG

Highlight

Copy

Compare