2Raja-raja Uram 14

Yehuda atei sienyi Amazia uram deyok

14:1-22

(2Taw. 25:1–26:2)

1Amazia biryi Yehuda atei sienyi kiboka talebmou. Ba, Yehu mi si Yoahas mi Yoas biryi Israel mutuk sienyi kiamuryi, taleamwe ara kwalina bitinyi kimbinmou talak aryi, Amazia biryi Yehuda mutuk sienyi kibmou. Amazia er nai si ara Yehuda yalanyi Yoas. 2Ba, Amazia er kwin si ara Yoadan, Yerusalem atei yala ner. Er deiamwe ba, kubde yanamwe talak aryi kwalina kwaliamwe nungna ara 25 baryi kubmou ura, Yerusalem atei sienyi kiboka talebmou. Ura, Yerusalem atei sienyi kiamuryi, taleamwe kwalina nungna ara 29 baryi taleamwe. 3Akatei sienyi kiboka taleamwe tam ara Er Iya Erebdobnyi urasintam aryi teleb dinyi akwe kunuramwe. Bok, er abwe Daud biryi iya telebto kuramwe to, kum kuramwe. Eda, er nai Yoas biryi sienyi kiboka taleamuryi, mitik telebto ibde baramwe to kuboka taleamuryi, iramwe. 4Bok, Yehuda atei ninyi aryi kwemdeina ati bisam obokabnaryi, dama deiboka moloramnyi mutuk konkon asi, Amazia biryi kum dalubkabokamwe. Akiryi, akatei ninyi aryi, mutuk konkon asi kwemdeina ati bisam domba oboka, dama deiboka tuba molorbaramnyi. 5Ura, erci akatei sienyi kiboka talebmou ba, katabum ebmou talak aryi er nai Yoas oamnyi nang nirya asi sunbabyi obmou. Ara, er mining wa in nang aryi, er nai sienyi kiboka tuba akatei taleamwe bok asi oamnyi deyok aryi sunbabyi obmou. 6Bok, Amazia biryi er nai oamnyi nang sun mabwe ara kum obmou. Ara, Er Iya Erebdobnyi biryi Musa deici aryi ato ebdeiamwe, “Er nai malyi kuranci dinyi ati, er mi ona mem! Ani, er mi aryi malyi kuranci dinyi ati, er nai ona mem! Eda, sun malyi kuramingnyi to kuboka, sun yuk-yuk ikin takubdobkwanung,” ebdeiamwe ati sun mabwe ara kum obmou.

7Amazia er yin doun nang aryi, Asin Mutuk Lu dam aryi Edom mutuk nang 10.000 baryi nang asi, oboka muna kibdongoamnyi. Muna kibdongoboka, Sela atei arabdamnyi. Ba, akatei ara Yokteel atei eboka si doamwe asi, a talak ababyi tuba a doamwe si enung.

8Ura, a talak aryi Yehuda mutuk sienyi Amazia biryi er arungni nang asi arukmou ba, Israel mutuk sienyi Yoas bisi, “Obdankwanim ati mar ordana dam yarum!” eboka eryanmai. 9Uca, Israel mutuk nang sienyi Yoas biryi erbabyi uram dekeibmouci, kiklina kikliboka ato nukmou, “Libanon kon asi tiling co sirilukluka mitik co tikanci aryi, Libanon kon ilila co keibyal asi ato eboka uram deibte. ‘Kan nebnyi ara ni mi dobkwande ati iniboka boyarum!’ eboka uram deibmote. Uca, Libanon kon bai kurande kamyoa kurante aryi yibaturyi, a mitik tiling co asi tulubyanibte.” Ato eboka Yoas biryi Amazia bisi ebmou. 10Ani, Yoas biryi, “Kanci, Edom nang asi oboka muna kibdongoamoumwe aryi, ‘Dubnyi,’ kibdanmarim. Ati, teleb kanya akwe bobdaminci, kan mutuk akwe kuronkwandum. Asi, ‘Kanci ni ab obdatinimyi,’ tenen ati, beneboka yu dinyi dubdongobniminyi ura, kan ab, kanci sienyi kiboka talebumwe atei ara niryi daluboka sici kibdeibkwankin,” ebmou. 11Bok, Yehuda atei sienyi Amazia biryi a ebmou uram kum kekebmou. Ba, Israel mutuk sienyi Yoas biryi er yin doun nang asi arukoka, “Sienyi Amazia ab mar boboka obdankwayeb,” ebmou. Ura, a bitinyi sien nang aryi sun yin doun nang yuk-yuk asi, Bet-Semes dam Yehuda mutuk asi bindoka obdankwamaici, boboka bulubminikmarei. 12Bulubminikmareici, ordanmai uca, Israel yin doun nang aryi, Yehuda atei yin doun nang asi muna oboka kibdongobmai. Ba, Yehuda atei yin doun nang ara sun atei yuk-yuk binsekdobmai. 13Ura, Israel mutuk sienyi Yoas biryi Yehuda atei sienyi Amazia bisi Bet-Semes dam aryi bindoka talebmou. Ura, sienyi Yoas bira Yerusalem atei yanmouci, akatei keil lika asi, cang ara 200 meter baryi asi dalubkabokmou. Ara, weik bisik bublan wengyangantam Efraim aryi kuboka Sudut wengyantam bisik noutam nirya asi dalubkabmou. 14Dalubkabmouci, Er Iya Erebdobnyi ai deiramnyi bona-bona nirya dobdobmou. Ara, emas ab, perak ab, akai deiramnyi yuk-yuk bona ab asi dobdobmou. Tonda, akatei sienyi ai deiramnyi bona ababyi dobdobmou. Ani, akatei ninyi mikbaryi asi dengna dobdobtibyi tenebne ura, tabwe deboka bobaramnyi nang nirya asi bobmouci, Samaria yandobmou.

15Ba, sienyi Yoas biryi Yehuda atei sienyi Amazia ab obdanandei dinyi ab, Yoas er kubde yanamwe tam ati nirya ara sun Israel minob sien nang aryi kubde yanamnyi to ati liliboka kerek sekeibwe kerek sengna umbura sirya a sekeibwe. 16Ura, Yoas sirya dibmou. Ba, sun Israel mutuk sien nang tukwe dongoramnyi ai, Samaria atei dam dongobmai. Ba, er mi Yerobeam biryi akatei sienyi kiboka er nai unubmou. 17Ba, Israel mutuk sienyi Yoahas mi Yoas sirya diamwe talak aryi, Yehuda atei sienyi Amazia bira tuba kuramwe asi, kwalina 15 baryi kwalibmou.

18Ba, sienyi Amazia biryi kubde binamwe to ati liliboka sengdeina ara sun Yehuda atei minob kiboka akatei taleamnyi sien nang kubde yanamnyi to ati liliboka sekeibwe kerek sengna umbura sirya a sekeibwe. 19Ba, Yerusalem atei ton nang aryi, “Sienyi Amazia bisi obkwayeb,” eboka mar moun yibmai deyok aryi, Lakhis atei bindamwe. Uca, sunci ersi Lakhis atei dam o dombindoka oamnyi. 20Ba, ersi obyi ura bisam kuda deici aryi boyandoka, Yerusalem atei dongoamnyi. Ara, er abwe yabwe dongoamnyi dam, Daud atei asi dongobmai. 21Ba, Yehuda atei nang nirya aryi Amazia mi Azarya bisi wibmaici, Yehuda atei sienyi tikeibmai. Ara, Azarya bira kabir tuba kuramwe bok asi akatei sienyi kiboka, er nai Amazia unubmou. 22Unubmouci, Elat atei asi tubto tamuboka dobdobmouci, er mutuk kibdobmou. Ba, akatei asi talebmouci, tubto dobtabaknin binmou.

Yoas mi Yerobeam Israel mutuk sienyi kibmou uram deyok

14:23-29

23Ura, Yerobeam biryi er nai Yoas unuboka Israel mutuk sienyi kiboka Samaria atei dam kuboka talebmouci, ibde baramwe kwalina nungna ara 41 baryi kwaliamwe. Ara, Amazia biryi Yehuda atei sienyi kiboka taleamwe asi, kwalina 15 baryi kimbinmou talak aryi, Yerobeam biryi Israel sienyi kibmou. 24Ba, erci Er Iya Erebdobnyi urasintam asi malyi dinyi kurdongoramwe. Ara, er Nebat mi Yerobeam minob uca sienyi kiamunyi Yerobeam biryi malyi dinyi kuramwe aryi, sun Israel ninyi ababyi malyi dinyi bobdongoamwe. 25Yerobeam biryi Israel mutuk Weik Me kwan Araba me youkwetam aryi kuboka me utam Hamat atei wengbantam nirya asi, tubto arabdobmou. Ara, Er Iya Erebdobnyi biryi Er uram ermurunanyi, Gat-Hefer ateinyi, Amitai mi Yunus deici aryi ebdeiamwe to kuboka kunubmou. 26Akiryi, Er Iya Erebdobnyi biryi sun Israel ninyi weik mambul u don dinyi sirya eibmou. Ara, erebdob nang aryi kuboka luknubdob nang nirya aryi weik mambul dinyi doramnyi. Ba, sunsi miliboka lemdeina nang ton kum aryi ato kubmou. 27Bok, Er Iya Erebdobnyi biryi sun Israel nang asi, Yoas mi Yerobeam deici kuboka, sun mambul weik don dinyi milibmou. Ara, Erci sun Israel nang asi oboka kum danardeirina kum kubkwamwe deyok aryi Yerobeam biryi Israel mutuk nirya tubto arabdobmou.

28Yerobeam biryi sienyi kiboka taleamuryi, wa ibde yanamwe dinyi ab, ninyi atei mar boboka oramwe dinyi ab, Yehuda mutuk aryi, Damsyik atei ab, Hamat atei ab asi, Israel mutuk dobkareamwe. A dinyi nirya ara sun minob Israel mutuk sien nang kibde yanamiryi, sun kubde yanamnyi to ati, liliboka sekeibwe kerek sengna umbura sirya a sekeibwe. 29Ura, Yerobeam sirya dibmou ba, sun Israel sien nang tukwe dongon dam, dongobmai. Ba, Yerobeam mi Zakharia sienyi kiboka er unubmouci, Israel atei talebmou.

Currently Selected:

2Raja-raja Uram 14: MTG

Highlight

Copy

Compare