2Raja-raja Uram 13
13
Israel mutuk sienyi si Yoahas deyok
13:1-9
1Ura, Yehu mi si Yoahas biryi Israel mutuk bok Samaria atei sienyi kiboka talebmou. Ara, Ahazia mi si Yoas biryi Yehuda mutuk sienyi kiboka taleamwe ara kwalina 23 baryi taleamwe. A talak aryi Yoahas biryi Yehuda mutuk sienyi kiboka talebmou. Ba, erci Yehuda mutuk sienyi kiboka taleamwe ara kwalina 17 baryi taleamwe. 2Ba, sienyi Yoahas biryi Er Iya Erebdobnyi urasintam aryi iya malyi kun dinyi akwe kunuramwe. Ani, Nebat mi si Yerobeam biryi malyi kuramwe malyi kun dinyi asi dakoka bai donongna kum kuamwe. Eda, Yerobeam malyi dinyi kuramwe to akwe miliboka kunuramwe. Ba, sun Israel ninyi nirya ababyi er kuramwe to kuramnyi deyok aryi malyi kun dinyi borminingdamwe. 3A deyok aryi, Er Iya Erebdobnyi biryi sun Israel ninyi nirya asi yu bobmouci, Aram mutuk sienyi si Hazael ab er mi si Benhadad ab taruk dam dobkareamwe. 4Bok, Yoahas biryi Er Iya Erebdobnyi bisi, “Nai, Aram mutuk sienyi biryi oboka arungsurur dinyi asi eiboka boukwe kibdobsurum,” eboka molobmou. Ba, Er Iya Erebdobnyi biryi er molona kekebmou. Ara, Aram mutuk sienyi biryi sun Israel mutuk ninyi asi oboka il dimnamwe dinyi ati er molona kekebmou. 5Er Iya Erebdobnyi biryi er molona kekeboka karebmou ara sun Israel ninyi lebdobkwamunyi tentok karebmou. Ara, Sun Israel ninyi asi, Aram mutuk sienyi biryi oboka il wa dimnamwe asi lebdeiboka, minob mangkau asa akwe kuroramnyi to kubdeibkwamunyi karebmou. 6Ato kuboka karebkwamwe bok, sun Israel ninyi aryi tuba ati malyi kun dinyi kunuramnyi. Ara, Yerobeam ab er ai ninyi ab aryi kikniamnyi kwemdeina asi tuba miliboka moloramnyi. Ani, Samaria atei dam aryi kwemdeina si Asyera kikniamwe kwemdeina asi daluboka bai kum donokamwe. 7Ara, Er Imtamnyi biryi sun Israel mutuk yin doun sien nang nirya asi Aram mutuk sienyi taruk dam dobkareamwe ba, obkiriamwe. Ba, kuda bisam boboka ordana co biribdob nang sun ninyi 10.000 baryi ab, kereta boboka mar ordana co biribdob nang sun ninyi 10.000 baryi ninyi ab, asi Aram mutuk sienyi biryi oboka nirya kum danabdeiamwe.
8Ba, sienyi Yoahas biryi sienyi kiboka taleamuryi, ukubde yangaramwe dinyi nirya ara sun minob Israel mutuk sienyi kiboka tikamiryi taleboka ukubde yanamnyi to ati liliboka sekeibwe kerek sengna umbura a sirya liliboka sekeibwe. 9Ura, Yoahas sirya dibmou ba, er abwe yabwe dongoramnyi tukwe Samaria mutuk dam tukwe dongobmai. Ba, er mi Yoas biryi a mutuk sienyi kiboka er nai unubmou.
Israel mutuk sienyi si Yoas deyok
13:10-13
10Ura, Yoahas mi si Yoas biryi Israel mutuk Samaria atei sienyi kibmou. Ara, Yoas biryi Yehuda mutuk sienyi kiboka taleamwe ara kwalina 37 baryi kimbinmou talak aryi Samaria atei sienyi kiboka talebmou. Ba, Yoahas mi si Yoas biryi Samaria atei sienyi kiboka taleamwe ara kwalina 16 baryi taleamwe. 11Ba, sienyi Yoas biryi Er Iya Erebdobnyi urasintam asi iya malyi kun dinyi akwe kunuramwe. Ara, Nebat mi si Yerobeam biryi sun Israel ninyi asi, kwemdeina kiknibdeiamwe ba, a kwemdeina asi tuba miliboka moloramnyi. A kwemdeina asi dalurkana kum kuamwe eda, erbabyi miliboka moloramwe.
12Ba, Yoas er Samaria atei sienyi kiamuryi, ukubde yanamwe to ab, er Amazia bisi mar boamwe to ab ara sun minob Israel atei sienyi kiamnyi nang aryi sun ukubde yanamnyi to ati liliboka sekeibwe kerek sengna umbura a sirya sekeibwe. 13Ura, sienyi Yoas sirya dibmou ba, er abwe yabwe dongoramnyi tukwe dam Israel mutuk bok Samaria atei a dongobmai. Ba, er mi si Yerobeam biryi Samaria atei sienyi kiboka er nai unubmou.
Elisa dibmou ba, er tukwe dongobmai umbura aryi ilil tenen dinyi ukubmou deyok
13:14-21
14Israel mutuk sienyi si Yoas biryi Elisa ilila dibmanto youn doramwe asi diryanmouci, “Se, ni nai e, ni nai e! Kanda, Israel mutuk nang asi mikib kuboka talebumci, kalingdamoumwe!” eboka, Israel mutuk sienyi Yoas biryi Elisa biti yandoka engebmou. 15Ba, Elisa biryi Israel mutuk sienyi bisi, “Yin ab, mar ab dobdobdum!” ebmou. Ba, Israel mutuk sienyi Yoas biryi a yin ab, mar ab dobdobmou. 16Ura, Elisa biryi Yoas bisi, “Kan yin ab, mar ab kumkum deibdongoboka, ibokdum!” ebmou. Ba, er ebmou to yin kumkum dibdongoboka ibokmou. Asi, Elisa taruk ara Israel mutuk sienyi Yoas, a ibokmoua deici asi deibmou. 17Elisa er taruk ara sienyi Yoas yin a ibokmoua deici asi deibmouci, “Kiting anamyangantam bisik botona asi kukeibdum!” ebmou. Ba, kukeibmou ura, Elisa biryi, “A ibokmarim mar dobdum!” ebmou. Ba, a ibokmou mar dobmou. Ura, Elisa biryi tubto ato ebmou, “A dobmarim mar ara Er Iya Erebdobnyi biryi kanci Aram ninyi asi mar bobkwandim tum aryi sunsi muna kirdongon dinyi karebkwankir. Ara, Aram mutuk ninyi asi Afek atei dam aryi sunsi nirya kum dandeibkwandim,” ebmou. 18Ura, Elisa biryi Israel sienyi Yoas bisi, “Anda mar ur dobdobdum! Dobdobminyi ura, tukwe ai oublobdum!” ebmou. Ba, Yoas biryi anda mar dobdobmouci, tukwe ai liki winiryi oublobmou ba, sirya dakdobmou. 19Bok, Elisa biryi yu urasin bobdakaburyi, kerebmouci, “Anda mar asi liki amubaryi kum liki nabaryi kum tukwe ai oublobmatumwa!” ebmou. “Ba, Aram nang asi liki amubaryi kum liki nabaryi kum sunsi muna kibdongobkwantumwe. Bok, ato kum kubmarim deyok aryi Aram nang mar bobkwandim ara liki winiryok demang sunsi muna kibdongobkwandim,” ebmou.
20Ura, Elisa dibmou ba, tukwe dongobmai. Kwalina tentok talak ara sun Moab mutuk nang aryi sun Israel ninyi asi liki tentok mar ibaramnyi. 21Uki tentok tum Israel mutuk aryi, ninyi tentok da dibmou ba, tukwe dongonmai. Asi, Moab nang aryi iyandoka dalubmai. Iyandoka dalubmaici, a dibmounyi tukwi asi dobtaleboka, Elisa dongoamnyi bisik asi dongobloboka cungdorbinmai. Ba, a dibmounyi er tukwi aryi Elisa diamwe yok bolibmou deyok aryi, anyi tubto kam bukokmou.
Israel nang ab Aram nang ab obdanmai uram deyok
13:22-25
22Yoahas Israel atei sienyi kiamwe talak aryi Aram mutuk sienyi Hazael biryi Israel nang mar bobmou. 23Bok, Er Iya Erebdobnyi biryi Er mabwe Israel nang asi deirlona kum kubmou. Ara, Er Imtamnyi biryi Israel nang sun abwe yabwe Abraham dam ab, Ishak dam ab, Yakub dam ab asi uram talak minob eamwe deyok aryi deirlona kum uca, boukwe kiboka lebdobmou. Uku talak ababyi deibloboka luba kimna kum uca iya dirlilirur. 24Ura, Aram atei sienyi, Hazael dibmou. Ba, er mi si Benhadad Aram mutuk sienyi kibmou. 25Ura, Yoas Israel nang sienyi biryi Aram atei sienyi Benhadad bisi liki winiryi muna kibdongoboka, Benhadad biryi arabdoamwe mutuk tubto Yoas erbiramnyi arabdobmou. Ara, Yoas er nai Yoahas Israel nang weik sienyi kiamwe talak aryi arabdoamwe bok, er mi Yoas biryi tubto, “Ni mutuk,” eboka arabdobmou.
Currently Selected:
2Raja-raja Uram 13: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
