2Raja-raja Uram 12

1Ura, Yoas biryi Yehuda mutuk sienyi kiboka talebmou. Ara, Yehu biryi Israel mutuk sienyi kiboka taleamwe talak aryi Yehuda mutuk sienyi kiboka talebmou. Ba, Yoas biryi Yehuda mutuk sienyi kiboka taleamwe ara kwalina 40 baryi taleamwe. Ba, sienyi Yoas er kwin si ara Zibya Bersyeba atei ner kuramwe. 2Sienyi Yoas biryi Yehuda mutuk sienyi kiboka taleamuryi, ibde baramwetam nirya ara Er Iya Erebdobnyi urasintam aryi teleb dinyi akwe kunuramwe. Ara, imam Yoyada biryi, “Kan sienyi kiboka Yehuda mutuk talebkwandim a nirya ara ato-ato ibde binkwandum!” eboka etereramwe aryi teleb dinyi akwe kunuramwe. 3Ato kuramwe bok, sun Yehuda ninyi aryi mutuk konkon asi kwemdeina moloramnyi ai nirya ara erci kum dakabokamwe. A deyok aryi, sun Yehuda mutuk ninyi aryi kwemdeina ati bisam domba oboka anda mutuk konkon asi tuba uk daboka molorkiringdamnyi. 4Ura, sienyi Yoas biryi sun imam nang asi naboka bulubdeibmouci, ato ebmou. “Er Imtamnyi biti kareraming ba, deirirandum co bok nirya ara Er Imtamnyi ai luboka dangsangdur dikum nirya asi tubto dobkwayeb. Ara, Er Iya Erebdobnyi biti yuk wiboka deirin co bok ab, sun ninyi kam kuna ati kareraming co bok ab ninyi malyi kun dinyi asi, ‘kilibsute,’ tenen kareraming co bok ab ani, sun kanyi teleb asa aryi, ‘Nun Nai, nun babya,’ eboka kareraming co bok ab nirya deirin diksum asi dalursangdur ati dobkwayeb. 5Ati, sunci anda co bok asi co bok deirinanyi taruk aryi dobmunyi ura, Er Iya Erebdobnyi ai luboka dalursangdur dikum dobdarur!” Sienyi Yoas biryi sun imam nang asi ato eboka arukmou.

6Sienyi Yoas biryi Yehuda mutuk sienyi kiboka taleamwe talak aryi, “Ato kuboka dobdarur!” eboka arukamwe bok, sun imam nang aryi a eamwe to kuboka kum doamnyi asi kwalina 23 baryi kimbinmou. 7Ba, sienyi Yoas biryi imam nang sun sienyi Yoyada ab imam nang ab asi tubto naboka bulubdeibmouci, sunsi ato ebmou. “Sunda, ‘Er Imtamnyi ai dangsangdur dikum dobdarur!’ ebsise asi unato ati kum dobdau do? Ni ebdeibsise to kum kunubdau ati sun co bok sunci deirandau to kum kubkwandum. Eda, anda co bok nirya ara akai dangsangdura dobkwaming ati nirya karebkwandum!” 8Sienyi Yoas biryi sun imam nang asi ato kubkwandum ebmou. Ba, sun imam nang aryi, “Yo teleb, nunci kan ebmasirim to kuboka kunubkwayeb.” Ara, akatei ninyi aryi nun dam boyangaraming co bok kum dobkwayeb. Ani, Er Imtamnyi ai ara nun demang aryi kum dobkwayeb ebmai.

9Ura, imam Yoyada biryi co bok deirin co sangkol dobmouci, a co sangkol er bisik bublan kiknibdeibmouci, Er Imtamnyi biti dama deirin keil lamna siriktam asi bukeibmou. Ba, Er Iya Erebdobnyi ai wengbangnyi tok ara, “Co bok dongobkwanung,” tenen ati a dikum deibmou. Ba, sun Er Imtamnyi ai wengban bisik kalingna imam nang aryi Er Iya Erebdobnyi ai bobinmangnyi co bok ara a co sangkol dongoramnyi. 10Ato kuboka dongoramnyi, sirya weik kibwe ura, sienyi er kerek sengnanyi ab imam nang sun sienyi ab aryi yandoka, a buluramnyi co bok nirya nukmarei. 11Sirya nukmareici, a co bok nirya ara Er Iya Erebdobnyi ai luboka dangsangdamwa dobkwamnyi nang sun sien nang taruk dam karebmarei. Ba, akai don nang sien nang aryi, sun co cangni nang ab sun akai don nanga ab asi dengnamnyi. 12Ani, sun akai weik lika don nang ab keil memeboka uturubde miningnamnyi nang ab asi dengnamnyi. Ani, tonda akai don keil ab co ab yuk dinyi babyi dengnamnyi. 13Bok, sunci a co bok aryi doboka Er Iya Erebdobnyi ai deiramnyi yuk bona ati ton kum dekamnyi. Eda, akai dangsangnamwe dikum atikwe doramnyi. Er Imtamnyi ai a deiramnyi bona-bona ara pasu perak ab, pisau ab, bokor ab, nafiri ab deiramnyi. Ani, emas ab Er Iya Erebdobnyi ai boyangaramnyi co bok ab kuboka deiramnyi. 14A co bok nirya ara Er Iya Erebdobnyi ai dangsangnamwa dobkwamnyi ati sun ai don nang asi karebmai. 15Ba, sun akai doramnyi nang sun sien nang nirya ara sun kubmanto kuboka lak en nang akwe sien nang kuramnyi. Akiryi sun imam nang aryi, “A co bok ara ato-ato kuboka dekubwe ebkwandarur!” kum ebmai. 16Bok, “Malyi kuanci ba, kilibnute,” tenen co bok ab, sun mamun malyi kubdongobdanamingiryi, dekdanamingnyi co bok ab nirya ara sun imam nang dinyi. Akiryi Er Iya Erebdobnyi ai bowengbana kum kuaramnyi.

17A talak aryi, Aram mutuk sienyi si Hazael biryi Gat mutuk ninyi asi mar boboka muna kibdongobmouci, arabdobmou. Ato kuboka oboka arabdobmouci, tubto sun Yerusalem ninyi asi, “Mar bobkwan,” tenebmou. 18Bok, Yehuda mutuk sienyi Yoas biryi Er Imtamnyi biti yuk wiboka kareramnyi bona-bona asi er nai yabwe Yosafat ab, Yoram ab, Ahazia ab aryi Er Iya Erebdobnyi ai deiramnyi bona nirya asi doboka Aram mutuk sienyi Hazael biti karebmou. Ato kubmou deyok aryi Hazael biryi, “Yerusalem ninyi mar bobkwan,” tenebmou dinyi ara taklobmou. A doboka karebmou bona ara Er Imtamnyi biti yuk wiboka kareramnyi bona ab Er Iya Erebdobnyi ai inirdeiramnyi emas ab sienyi ai deiriramnyi bona nirya dobkarebmou.

19Ba, sienyi Yoas biryi Yehuda mutuk sienyi kiboka taleamuryi, ukubde yanamwe dinyi ara sun minob sien nang aryi Yehuda mutuk sienyi kiboka taleamiryi, ukubde yanamnyi to ati liliboka kerek sekeibwe kerek sengna umbura sirya a liliboka sekeibwe. 20Ura, sienyi Yoas sienyi kiboka sirya-sirya talak ara er mining wa in nang aryi, “Sienyi Yoas obkwayeb,” eboka uram moun yibmai. Ba, er obmarei dikum ara Yerusalem atei bok yaletam kuboka Sila atei yourban bisik tukwe luboka burlorbinamwe deici asi doamnyi ai um aryi obmarei. 21Sun sienyi obmarei nang bitinyi si ara Simeat mi si Yozakar ab, Somer mi si Yozabad ab aryi obmarei. Ara, er mining wa in nang bitinyi aryi sienyi Yoas oandei ba, diamwe. Ba, er abwe yabwe dongoramnyi tukwe dam Daud atei dongoamnyi. Ba, er mi Amazia biryi akatei sienyi kiboka er nai unubmou.

Currently Selected:

2Raja-raja Uram 12: MTG

Highlight

Copy

Compare