2Raja-raja Uram 11
11
Yehuda mutuk sien ner si Atalya oboka Yoas sienyi tikeibmai deyok
11:1-20
(2Taw. 22:10–23:21)
1Ura, Yehuda mutuk sien ner si Atalya bira Israel mutuk sienyi kiboka taleamunyi si Ahab nebnyi kuramwe. Asi, Yehuda mutuk sienyi kiboka taleamunyi si Yehoram doamwe ba, kurandei. Ani, uki tentok tum ara, “Atalya kan mi Ahazia bira Yehu biryi sirya obmar ba, dibmar,” en uram kekebmou. Sirya kekebmouci, er yin doun nang asi ato eboka arukmou, “A mutuk sien nang kiboka talebde yangardenung nang sun mabwe nirya obkabdarur!” 2Ato eboka arukmou ba, orkanmai bok, Yoas bira sienyi Yoram nebnyi si Yoseba, sienyi Ahazia er malner aryi Ahazia mi Yoas bisi doboka bona-bona deirin ai um inibdeiamwe. Ato kuboka inibdeiamwe ba, Atalya biryi Yoas bisi kum oamunyi kuramwe. 3Ba, sien ner Atalya biryi Yehuda mutuk sien ner kiboka taleamwe talak ara Yoas bira er naiyong Yoseba ab duknuboka kurorandei. Ara, Er Iya Erebdobnyi ai kurandei asi kwalina nabaryi kwaliandei. 4Ba, kwalina tabaryi sirya dobmou talak ara imam nang sun sienyi si Yoyada biryi Yehuda mutuk sien ner si Atalya er wa in nang sun sien nang ab, Kari nang ara yin doun nang sun yubwa 100 baryi sien nang ab asi ato eboka nabmou. “Er Iya Erebdobnyi ai dam buluryandarur! Ni ab sun ab uram talak ebdeibdankwayeb ati yandarur! Ani, sienyi mi si Yoas bisi sun urasin dam lak kibdeibkwamou ati yandarur!” eboka nabmou ba, sirya bulurbinmai. Ura, sun tonkwa uram talak ebdeibdanmaici, sienyi mi Yoas lak kibdeibmou. 5Ura, Yoyada biryi sun yin doun nang asi Er Imtamnyi ai ab sienyi ai ab ara ato kuboka kalingkwandum! “Uki Sabat tum ara sun ninyi bokoka-bokoka kalingkwandum! Ara, sun ninyi yubwa winiryi bokoka sienyi ai kalingkwandum! 6Ba, ton yubwa winiryi nang ara weik wengyangan bisik si Sur dam kalingkwandum! Ba, dongtam wengyangan weik bisik kalingkwandum nang ara ton yubwa winiryi nang kalikabingnyi ani, ton yubwa winiryi nang kalikabingnyi kiboka unubdandoka kalingkwandum! 7Ba, sun a olong bitinyi yin doun nang nirya aryi, uki Sabat tum ab Er Iya Erebdobnyi ai ab asi kalingkwandum! 8Ara, sunci sienyi Yoas er yibanmaci to kuboka sun ninyi on yin aryi doubmamunci kalikoka yibinkwandum. Ba, sienyi Yoas kalikoka yibanmamunyi dam asi yangangnyi ninyi ara sunci onkwandum!”
9-10Ba, sun a yin doun nang sun sien nang asi imam Yoyada biryi, “Ato-ato ukubde binwandum,” ebdeibmou to kuboka kunuramnyi. Ara, sun a yin doun sien nang aryi a uki Sabat tum berekman ba, kalikman yin doun nang babyi, sirya kalikman yin doun nang babyi nirya, Yoyada dam boyangaramnyi. 11Ba, yandoka sun ninyi on yin yuk-yuk doubtaleboka kalingdamnyi. Ara, Er Imtamnyi ai ab, Imtamnyi biti dama deirin keil lamna ab sienyi Yoas ab ati akai aknabdongoboka kalingdamnyi. 12Ura, Yoyada biryi sienyi mi Yoas bisi bosakweteboka er kisok deici asi sien nang kaluraming kisok kaluna kibdeibmouci, Er Imtamnyi yan mem uram karebmou. Sirya kibdeiboka karebmou ura, erci Yoas bisi sienyi tikeiboka kisal dakmou. Sirya ato kubdeibmou ura, sun a dinmai yin doun nang ab talyi ninyi nirya aryi ato ebmai. “Yoas Yehuda mutuk sienyi sirya tikmar,” ebnin yibinmai. 13Asi akatei sien ner Atalya kekebmouci, Er Iya Erebdobnyi ai dam binmou. 14Bindoka dinmou uca, a tikeibmou sienyi bira sun sien nang ukuryok tikeibmangnyi ba, tingdaming dikum Er Imtamnyi ai bisik wengban ai asi tikmou. Ba, yin doun nang sun sien nang ab, buu ena si trompet buu en nang ab ara Yoas aknabdongobmaici, tikmai. Ba, sun akatei ninyi nirya ara buu ena aryi buu enmaici, sun kilkil asa aryi Yoas sienyi sirya tikmar enmai asi eibmou. Ura, Atalya er ongon aling kwiliklobmouci, ato ebmou. “Niryi a mutuk sien ner kiboka talebse wa sirya dobdobing,” ebmou. 15Bok, Yoyada biryi sun yin doun sien nang asi ato eboka arukmou. “Er Iya Erebdobnyi ai aryi, a ner yuk dikum bobindoka orbindarur! Ba, unanyi biryi Atalya tam kibdobdinyi bira ninyi on ya aryi sun tonkwa obdarur,” ebmou. 16Ba, sun yin doun nang aryi Atalya talebmaici, sienyi ai dam bobindoka obmai. 17Ura, Yoyada biryi ato ebmou, “Er Iya Erebdobnyi ab sienyi Yoas ab sun Yehuda mutuk ninyi nirya ab aryi, ‘Diba ati nunda Er Iya Erebdobnyi nermabwe mabwe kibib,’ ebdarur!” eboka uram talak likeibdandarur! Ani, sienyi Yoas ab sun a mutuk ninyi ab aryi uram talak ebdeibdandarur! ebmou. 18Ato kuboka uram ebdeibdandarur! Ebmou ba, sirya ebdeibdanmai ura, a mutuk ninyi nirya aryi kwemdeina si Baal molon ai nirya dakabmai. Ani, a kwemdeina kiknibdeiboka moloramnya ab, a kwemdeina ati dama deirin keil lamna ab nirya daluboka sici kiblobokmai. Ani, tonda Baal kwemdeina uram ermurunanyi si Matan bibabyi a kwemdeina ati dama deirin keil lamna dub dam a obmai. Ba, Matan er kalingna nang ara Yoyada biryi sunsi Er Iya Erebdobnyi ai kalingna nang kibdeibmou. 19Sirya ura, Yoyada biryi Kari nang ara yin doun nang 100 baryi kalingna nang ab, weik sienyi kun atei bisik bublan dam kalingna nang ab, Israel nang nirya ab asi arukmou. Ba, weik sienyi birya Er Iya Erebdobnyi ai aryi kuboka er kun ai boboka yuryanmai. Ura, Weik sienyi bun sokon dam buryanmou. 20Ura, weik sienyi Atalya sirya obmaici, akatei ara teleb akwa kunmai. Ba, Israel nang nirya ara a mutuk dam mot seboka akatei teleb kibdeibmai.
Yehuda mutuk sienyi si Yoas deyok
11:21–12:21
(2Taw. 24:1-27)
21Ura, sienyi Yoas bira er yuma deiamwe ba, kubde yangaramwe aryi kuboka kwalina tabaryi kurbinmou ura, Yehuda mutuk sienyi kiboka talebmou.
Currently Selected:
2Raja-raja Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
