1Raja-raja Uram 22

Er Imtamnyi uram ermurunanyi nabi Mikha ab, Baal kwemdeina molon nang ab ebdanmai uram deyok

22:1-40

(2Taw. 18:1-34)

1Ura, sun Israel nang aryi, kwalina winiryi kuboka mabde yanamnyi talak aryi, sunci Aram nang ab ton mar bobdandoka kum ordaramiryi, mangkau asa akwe kuramnyi. 2Kwalina winiryi talak aryi, Yehuda sienyi Yosafat biryi Israel sienyi Ahab bisi binmou. 3Ura, Israel sienyi biryi er wa irmilin nang asi ato ebmou, “Ramot-Gilead mutuk ara nun mutuk nong kobdoba bok asi, Aram nang arabdobsici kunung. Bok, nunci unatoa ati Aram sienyi bisi, ‘A mutuk ara nun mutuk aca,’ eboka kum arabdobuburyi, uram kiliklobokubwe do? Ara, sun sirya bikdau do?” ebmou. 4Ura, Israel sienyi Ahab biryi Yosafat bisi ato ebmou uca, Yosafat biryi ersi ato ebmou, “Nunci mar boboka Ramot-Gilead mutuk asi bindoka orbinkwanim do?” ebmou uca, erci ato ebmou, “Ni ab kan ab, ni atei nang ab kan atei nang ab, ni bisam kuda kan bisam kuda nirya bobulubniminyi ura, Aram nang mar bobkwayeb,” ebmou.

5Bok, Yosafat biryi Israel sienyi bisi ato ebmou, “Teleb, ura nunci Er Iya Erebdobnyi bisi minob asibdenimiryi,” ebmou. 6Ura, Israel sienyi biryi sun Imtamnyi uram ermurun nang nabi nang yubwa 400 baryi boboka bulubdeibmouci, sunsi ato eboka asibdenmou, “Ni mar ur bobokabniryi Ramot-Gilead mutuk ati mar bobinkwanim do taklobkwan do?” eboka sun nabi nang asi asibdenmou uca, sunci ersi ato ebmai, “Ur! Er Imtamnyi biryi a mutuk kanti karebkwamakir,” ebmai. 7Bok, Yosafat biryi ersi tubto ato eboka asibdenmou, “Er Imtamnyi uram ermurun nang aryi Iya Erebdobnyi bisi, ‘Una kubkwandurung?’ eboka asirdeirisin nang ara da ton kum darib? Ba, sun deici aryi nun kubkwamanim dinyi bisik karebsurum ebkwamatinimnya?” ebmou. 8Uca, Israel sienyi Ahab biryi Yosafat bisi ato ebmou, “Er Imtamnyi uram ermurun nang deici aryi nun kun dinyi ati, ‘Er Iya Erebdobnyi tenerur to ara ato kurur, ati ukubkwandurum,’ erdeirisin nang ara a tentok kunmar. Bok, niryi kuboka anyi bisi, ‘Ni li,’ tenenun. Ara, anyi biryi niti teleb dinyi minob bikoka, ‘Ato kubkwande,’ erdeirina ton kum kunurur. Eda, erci en dinyi ara ni malyi kurminingnin dinyi akwa enurur. Anyi bira Yimla mi Mikha bitiba,” ebmou. Bok, Yosafat biryi ato ebmou, “Sienyi kan ato ena mem,” ebmou. 9Ura, Israel sienyi Ahab biryi er ai wa inanyi tentok asi nabmouci, ato eboka arukmou, “Yimla mi Mikha bisi olong inirbirum!” 10Ba, Israel sienyi Ahab ab, Yehuda sienyi Yosafat ab ara sun sien nang ongon aling ongobmareici, gandum yalyi kwen dam Samaria atei bisik wengban ai asi bukmareici, Mikha yangana ati kalikoka bukmarei. Ba, sun nabi nang ara a sien nang bitinyi urasin dam tikmaici, mabde binkwamnyi tam kunubkwamwe to ati, “Ato kuboka kunubkwande,” erkarenmai. 11Ba, Nabi Kenaana mi si Zedekia bira bisam sapi kisok yang belerona atoanun besi aryi kikninmouci, Ahab bisi ato ebmou, “Nai, Iya Erebdobnyi bira ato ebdeibkou, ‘A bisam kisok atoa besi yang aryi, Yehuda nang asi mar bobkwandim tum aryi, sunsi lukoka obminci muna kibdongobkwandim,’ ebdeibkou,” ebmou. 12Ura, nabi nang yuk nang ababyi, Zedekia ebmou to akwe neik toto ebmai. Ara, “Ur mar bobokabminci, Ramot-Gilead mutuk dam orbirum. Er Imtamnyi biryi kansi karebkici ba, sunsi oboka erebdobkwamarim,” ebmai.

13Ura, Ahab biryi ninyi tentok asi, “Mikha borbirum,” eboka arukmou. Ba, a borbinmounyi biryi Mikha bisi bindoka ato ebmou, “Sun nabi nang yuk nang nirya ara sienyi Ahab dam asi, ‘Mar bobkwamarim ara kanci Gilead nang asi oboka erebdobkwamarim,’ eboka Ahab bisi ato ebmang. Ati, kanbabyi sun ebmang to kuboka ebkwandum,” ebmou. 14Uca, Mikha biryi anyi bisi ato ebmou, “Er Iya Erebdobnyi, kam kururnyi biryi nisi ebdeibnou to asi kuboka Ahab dam ebkwaman,” ebmou. 15Ura, Mikha bira sienyi Ahab dam sirya yanmou. Yanmou ba, Ahab biryi ersi ato eboka asibmou, “Mikha, ni ab, Yosafat ab aryi Ramot-Gilead mutuk nang asi ur mar boboka orbinkwanim do? Taklobkwanim do?” eboka asibdenmou. Uca, Mikha biryi Ahab bisi ato ebmou, “Er Iya Erebdobnyi biryi Ramot-Gilead nang asi oboka muna kirdongon dinyi sun taruk dam karebkwansir ati, ur mar boboka ibirurum,” ebmou. 16Uca, sienyi Ahab biryi ersi ato ebmou, “Liki unabaryi asibkinyi uca, kanci niti, ‘Dib ati, Er Iya Erebdobnyi si deici aryi ebman,’ ebkwamarim do?” ebmou. 17Ebmou uca, Mikha biryi ersi ato ebmou, “Ni kunumna deici aryi ato asing eibmonwe. Israel nang ara sun kalingnanyi kum deyok aryi bokwalwalaboka tentok-tentok yibinkirikoka kuramnyi bok, sun teleb akwe kubdobkwaming. Ara, Iya Erebdobnyi biryi ato ebdeiamwe, ‘Israel ninyi ara sun kalingnanyi kum deyok aryi sun yuk-yuk bokwalwalabdankwaming,’ ebdeiamwe,” ebmou. 18Uca, Israel sienyi biryi Yosafat bisi ato ebmou, “Kansi sirya kum ebmonwe do? Erci niti teleb dinyi ati, ‘Aminda ara ukubde binkwande,’ eboka kunurdeirin dinyi ara ton lak ena kum kunurdeirirur. Eda, malyi kurminingni dinyi akwe kunurdeirirur ebmounwe,” ebmou.

19Uca, Mikha biryi ato ebmou, “Ura, Er Iya Erebdobnyi uram asi kekebdum. Niryi Er Iya Erebdobnyi sirya Er bun sokon burur asi eibse. Ba, Er dinatam-dinatam ara imtam ai yin doun nang tikoka kalingnung. 20Ba, ton kekebse ara Er Iya Erebdobnyi biryi ato ebwe, ‘Unanyi biryi Ahab bisi neneboka Ramot-Gilead nang asi mar bobirum ebci ba, bobaci asi obkwaming do?’ eboka asibmou. Uca, imtam erban nang aryi ato kubkwande-ato kubkwande eboka lulubdanmai,” asi kekebmase. 21“Ba, kanya atoa tentok anaboka, Er Iya Erebdobnyi dam tingyanmouci, ato ebmou, ‘Niryi ersi teleb-teleb kibdeiboka bobinkwaman,’ ebmou. Uca, Iya Erebdobnyi biryi ersi ato eboka asibmou, ‘Unatoa aryi er kanya teleb kibdeiboka onobkwamarim do?’ ebmou. 22Uca, a kanya atoa aryi Er Iya Erebdobnyi bisi ato ebmou, ‘Niryi er Ahab Imtamnyi uram ermurun nang nirya asi sun si bambul dam aryi, ninyi tola en nang kibminikwan,’ ebmou. Uca, Er Iya Erebdobnyi biryi ato ebmou, ‘Kanci sunsi, “Ukubkwan,” tenebmarim to kuboka kunubkwamar ati, sakweteboka ur kurbirum!’ ebmou.” 23Akiryi Mikha biryi Ahab bisi ato ebmou, “Er Iya Erebdobnyi biryi nabi nang asi tola uram en nang kibsinibkwande ati, a kanya atoa deici aryi malyi kubminikdeibkwankir dinyi sirya kiknibdeibkou,” ebmou.

24Ebmou ba, nabi si Kenaana mi Zedekia biryi yandoka Mikha er urasin bokdonokmouci, ato ebmou, “Er Iya Erebdobnyi kanya aryi, ni takloboka kantikwe erdeiriryakutwe do?” ebmou. 25Uca, Mikha biryi ato ebmou, “Kanbiramnyi aryi akai weki inirorbina, okai weki inirorbina, kimaminyi tum aryi, ato ati eamwa tenebkwandimca,” ebmou. 26Ura, sienyi Ahab biryi ato ebmou, “Mikha talebokabmunci, a mutuk talebunyi Amon ab, sienyi mi Yoas bisi tamuboka bobindarur. 27Bobimunyi ura, ato ebdarur, ‘Ersi malyi kuramnyi nang dongon ai dongobdarur.’ Dongobmunyi ura, ersi kwaning ab me ab mitikanun karenkwanung. Ato kuramingnyi ba, ni tamuryankwan,” ebdeibmou. 28Bok, Mikha biryi ato ebmou, “Nai, dib ati ebman to kuboka kan ona kum kubkingnyi ba, teleb asa aryi tamuroryaminyi ura, Er Iya Erebdobnyi uram ara ni biriman aryi dib sirik ebdeianci ba, kansi ebmakiniryi! A ebne uram ara a wekmang ninyi nirya sirya kekebmang!” ebmou.

29A sirya ura, Israel sienyi Ahab ab, Yehuda sienyi Yosafat ab Ramot-Gilead mutuk mar boboka ibinmarei. 30Ura, Israel sienyi biryi Yosafat bisi ato ebmou, “Nira mar ordana nang kibdandoka, mar ordana dam wengbinkwaman. Ba, kanda sien nang ongon aling ongoboka wengbinkwamarum,” ebmou. Ura, Israel sienyi yuk nang kibdandobmouci, mar ordana dam wengbinmou. 31Ba, a talak ara Aram sienyi bira er yin doun sien nang yubwa 32 baryi nang asi, ato ebdeibmou, “Sunci talyi ninyi talya mar boboka ordana mem! Eda, er Israel sienyi bikwe mar boboka obdankwamandarur,” ebmou. 32Ura, sun Aram yin doun sien nang aryi, Yosafat eibmaici ato ebmai, “Israel sienyi bira a kunum!” ebmaici, ersi mar boboka ibanmai. Uca, Yosafat er ilil aryi uram eboka ngolokmou. 33Ura, sun Aram yin doun sien nang aryi, a dombanmainyi bira Israel sienyi kuma eda, yuknyi mutuk sienyi urasin asi eibmaici tamubdobmai.

34Bok, sun Aram yin doun sien nang kankan dam tentoknyi biryi mar lelekdakaburyi, sun mar ordana nang kankan tam mar talyi dorloramwe uca, Israel sienyi er ting si zirah kinikmoua dungdongon dikum asi bingbinmou. Ba, Israel sienyi biryi er kereta bonanyi bisi ato ebmou, “Ni sirya mar bingyanmanir ati, kongkong ena dangubdeibminci, bobde bindobnurum!” ebmou. 35Bok, mar ordanmaia uruk-uruk ena mak aryi, sienyi Ahab bira kongkong ena deici aryi Aram atei nang er urasin a tikoka dibluklobmou tok asi sintam kibwe ura dibmou. Er obmaia dilaka ining aryi, er kereta umbura dingibmou. 36Ba, kiting wengdongorbau talak aryi, er yin doun nang a cang leleboka mar bobmai nang nirya ara sun sienyi dibmou ati uram ilila dobdandoka ngwelengmai. Ani, a yin doun nang nirya asi sun atei, weik atei bindobmunci, “Sun atei yanamunyi to kuboka yuk-yuk bindobdarur,” ebmai ba, bindobmai. 37Sienyi Ahab sirya dibmou ura, er tukwi boboka Samaria mutuk asi tukwe ukoka dongobmai. 38Ura, Samaria atei yin doun nang aryi, sienyi kongkong eboka boramwe keica si kereta ara Samaria mutuk me katum dam bobindoka me ilikmai. Ba, sienyi er ining ara akatei kam mer aryi mulakoka yibmai. Ba, akatei talyi yortamni nerabwe mer ara a me kwan kengmai. Ara, Er Iya Erebdobnyi biryi minob uca, ato kubkwande ebdeiamwe to kuboka kunubmou.

39Sienyi Ahab biryi er kun ai doamwe ara dengna weik bisam si gajah er yang aryi telebto deneboka doamwe. Ani, erci sienyi kiboka taleamuryi, weik atei-weik atei dobde baramwe. Ato kuramwe dinyi ara sun Israel sien nang aryi kubde yangantam ati liliboka sengdeirin kerek sengna umbura sekdeiamnyi to kunuramwe. 40Ahab dibmou talak aryi, er mi Ahazia biryi sienyi kiboka er nai unubmouci, akatei talebmou.

Yehuda mutuk sienyi si Yosafat deyok

22:41-51

(2Taw. 20:31–21:1)

41Ura, Ahab bira Israel mutuk sienyi kiboka tikamuryi, taleamwe kwalina ara kwalina dumbaryi kimbinmou. A kimbinmou talak ara Asa mi si Yosafat biryi Yehuda mutuk sienyi kibmouci, talebmou. 42Ba, sienyi Yosafat er deiamwe aryi kubde yangaramwe kwalina nungna ara kwalina 35 baryi kimbinmou ura, Yehuda mutuk sienyi kibmou. Ba, Yerusalem mutuk sienyi kiboka taleamuryi, ibde binamwe kwalina nungna ara kwalina 25 baryi kwaliamwe. 43Ba, er nai Asa biryi Er Iya Erebdobnyi urasin dam aryi, “Er Imtamnyi tenen dinyi akwe,” kunuramwe to kuboka kunuramwe. 44Bok, a mutuk ninyi aryi mutuk konkon asi yuk kwemdeina moloramnyi ai ara kum dakabokamwe ba, tuba ati kwemdeina moloboka, dama deiboka uk darkiringdamnyi. 45Ba, sienyi Yosafat bira Israel mutuk sienyi ab teleb asa akwe kurandei.

46Ba, sienyi Yosafat biryi Yehuda mutuk sienyi kiboka taleamuryi, ukubde baramwe dinyi nirya ara sun minob Yehuda mutuk sien nang kiboka talebnin yanamnyi to ati liliboka sekeibwe kerek sengna umbura a sirya sekeibwe. 47Ani, sienyi Yosafat er nai Asa biryi Yehuda mutuk sienyi kiboka taleamwe talak aryi kwemdeina molon ai talyi yobdandoka kwemdeina wa iramnyi nerabwe babyi sal babyi nirya asi oboka kum dandeibmou. 48Ba, Edom mutuk ara sienyi ton tikoka kum taleamnyi deyok aryi Yehuda mutuk sienyi Yosafat biryi a mutuk talenanyi tentok wiboka wa kareamwe ba, taleamwe. 49Ani, sienyi Yosafat biryi Tarsis mutuk bok Ofir atei emas dorban weik co ngun-ngun kikniamwe. A mutuk emas dorbana ati kikniamwe bok, anda kikniamwe weik co ngun-ngun ara Ezion-Geber mutuk aryi toloamwe ba, Ofir atei emas kum dorbaramwe. 50A talak ara Israel mutuk sienyi Ahazia biryi Yehuda mutuk sienyi Yosafat bisi, “Milibtinyi,” tenen ati ato ebmou. “Kan weik co ngun-ngun bona co biribdob nang ab ni weik co ngun-ngun bona co biribdob nang aryi sun tonkwa anda weik co ngun-ngun boboka emas dorbinkwaming,” tenen ebmou. Bok, sienyi Yosafat biryi, “Ni li,” ebmou. Ahazia er nai si ara Ahab kuramwe. 51Ura, sienyi Yosafat dibmou ba, er abwe yabwe dongoramnyi dikum Daud atei dam tukwe dongobmai. Ba, er mi si Yoram biryi a mutuk sienyi kiboka er nai unubmou.

Israel mutuk sienyi si Ahazia deyok

22:52-54

52Ura, Ahab mi si Ahazia biryi Samaria mutuk dam Israel mutuk sienyi kiboka talebmou. Ara, Yehuda mutuk sienyi si Yosafat biryi Yehuda mutuk sienyi kiboka taleamwe kwalina ara kwalina 17 baryi kimbinmou talak aryi, Ahazia biryi Israel mutuk sienyi kiboka talebmou. 53Ba, Ahazia biryi Israel mutuk sienyi kiboka taleamuryi, ibde baramwetam ara Er Iya Erebdobnyi urasintam asi malyi dinyi kunuramwe. Ani, er nai er kwin aryi Nebat mi si Yerobeam bisi oandei deyok aryi sun Israel ninyi nirya malyi kun bobdongoandei to kuboka kunuramwe. 54Ani, erci kwemdeina si Baal bisi miliboka moloramwe. Ba, Er Iya Erebdobnyi sun Israel nang molonanyi kanya u yirsiniramwe. Ara, er nai er kwin aryi kurandei to nong asi kuramwe deyok aryi Er Iya Erebdobnyi kanya u yirsiniramwe. Ato kuboka Ahab mi si Ahazia biryi Israel mutuk sienyi kiboka taleamuryi, ukubde baramwe.

Currently Selected:

1Raja-raja Uram 22: MTG

Highlight

Copy

Compare