2Korintus Uram 9
9
1Ni kwit yabwe, niryi sunsi kerek sekeibmasin ara, “Sun Yerusalem atei kuboka dib tenen nang ati co bok bulubdeibdarur,” eboka kerek sekeibmasin bok, sunci, “Sun Yerusalem nang ati co bok bulubdeibkwayeb,” sirya tenerandum ati bikmasin. 2Sunda Korintus nang ara busul kuboka, “Nun kwit yabwe kwaning atan nang ati co bok bulubdeiboka karebkwayeb,” tenerandum ati bingsunun deyok aryi, niryi sunsi, “Karebdarur,” kum ebkwinsin. Tonda, niryi sun Makedonia mutuk kuboka dib tenen nang ab tonkwa kuramuburyi, niryi sunsi kisal dakmasise. Ara, niryi sunti kisal dakoka sun Makedonia nang asi ato ebmase. “Sun Akhaya mutuk Korintus atei kuraming dib tenen nang ara o kwalina aryi kuboka ukuryok ababyi busul kuramingiryi, ‘Co bok bulubdeiboka karebkwayeb,’ tenen kunung.” Ato eboka nukeibmase uca, sun Makedonia mutuk kuboka dib tenen nang ilinto aryi, “Nunbabyi bulubdeiboka karebkwayeb,” eboka co bok bulubdeibmai. 3Ura, niryi nun kwit yabwe sun dam bokdonokmasin ara, “Co bok nirya asi sirya bulubdeibmang do kum do?” tenen bikwanking ati bokdonokmasin. Ara, niryi sunti kisal dangnansise ara, “Talyi ati kisal kum dangnanse,” tenen a nang asi sun dam bokdonokmasin. Ati, sunci a co bok nirya asi kiknibminikoka bulubdeibdarur. Sunci, “Bulubdeiboka karebkwayeb,” ebdeibmanindau ani, kum kunubdate ura, niryi sunsi talyi ati kisal dakmasitinyi. 4Ara, Makedonia mutuk kuboka dib tenen nang ton nang nun ab tonkwa sun dam yatibyi ura, sunci co bok kum bulubdeibdate uca, nira sun Makedonia mutuk nang urasintam aryi alyi weik kibnute. Niryi kankana asa kum uca sunsi kisal dakmasise bok, kisal dangna dinyi kum kunubdate uca, ni alyi weik kubnute. Ba, sunda Korintus atei nang ara bisibkaboka iya alyi weik kubsute. Ara, sunci, “Bulubdeiboka karebkwayeb,” ebdeibmandau ani, diboka kum bulubdate ura, sunsi bisibkaboka alyi weik kubsute. 5Ati, niryi, “Alyi kubsicei,” tenebmase deyok aryi, niryi ni bokdonokmasin nang winiryi asi ato eboka ebkatabdeibmase. “Ni ab yuk nang ab Korintus atei dirbana kum bok, sunci minob bindoka sun Korintus nang asi, ‘Co bok kiknibminikoka bulubdeibdarur,’ ebdarur,” ebmase. Ura, sunda Korintus nang aryi sun ebdeibmandau to sirya bulubdeibmunyi ura, ni sun dam yankwansin. Ati, sunci kilkil kanya boboka co bok kiknibminikoka langdeiboka karebdarur. “ ‘Karena nun li,’ tenen kanya boboka karebingnyei,” tenen ato ebmasin.
“Sun kanya yanduk-yanduk eransici tok langdeiboka karebdarur,” ebmou uram
9:6-15
6Ni kwit yabwe, sunci a ebkwinsin uram asi kisok dam bobdarur. “Sun yala kwengnaming nang ara yala mitik akwe kwekting uca, du moun dinyi mitik akwe dakwanting. Ba, yala ilinto asi kwekingnyi uca, du moun dinyi ilinto dakwaming.” Ati, sunci yuk nang asi langdeiboka karebmunyi uca, kisal dangsina dinyi langdeiboka dobdobkwandum ati ebman. 7Ura, unanyi-unaner ara, “Sun atan nang asi co bok karebkwan,” tenebingnyi ura, sunci sun kanya teleb kubmaci tok karena teleb. Ara, “Karena ni li,” tenebdaturyok, karebdate ara manmaliboka karebdate. Tonda, yuk nang aryi, “Karebdarur,” eboka arukdeibsiting uca, karebdate ara manmaliboka karebdate. Ba, sun kanya yuk aryi, “Ur karebkwayeb,” tenen karerandum ara manmalina kum uca karerandumci. Sun ato kun nang asi nun Nai Imtamnyi biryi boukwe weik kurur. 8Nun Nai Imtamnyi bira utotoa nirya talerurnyi kururci, kisal dangna dinyi karebsuturyi, sun ataransici dinyi nirya asi langdeiboka karebdeibsute. Karebdeibsici ura, sunda uki-uki nirya kubde baramun ba, atan dinyi utotoa nirya asi kum atabkwansir. Ato kuramunyi ura, sunci Er Imtamnyi urasintam aryi teleb dinyi akwe langdeiboka kunubkwandum. 9Er Imtamnyi Uram umbura aryi a deyok ati ato eboka kerek sekeiamnyi.
“Nun Nai Imtamnyi bira kisal dakoka sun bona bon kum nang asi langdeiboka karerur.
Tonda, nun Nai urasintam aryi teleb dinyi kunubde ban dinyi ara nun Nai biryi iya teneibkwande.” (Mazmur 112:9)
10Ura, nun Nai Imtamnyi bira sun yala kwengna nang asi yala karerur. Tonda, sun yina yibkwamingnyi nang asi roti karesurur. Tonda, nun Nai bira sunda yuk nang asi dirnilirandum nang ababyi yala kwengna dinyi ton du mousin dinyi ton karebkwansir. Kebdeiboka ati ato ebmasin. Ara, sunci yuk nang asi langdeiboka kareramunyi to, nun Nai biryi langdeiboka kisal daksici uca, Er Imtamnyi urasintam aryi du langdeiboka moubtabakwansir. 11Nun Nai biryi kisal dakoka yina ab yuk karesin dinyi ilinto amuma-amuma ab langdeiboka karebkwansir uca, sunci yuk nang asi tuba-tuba langdeiboka karebkwandum. Sunci langdeiboka karebmunyi ura, nunci sun bulubdeibmandau dinyi asi bobibyi uca, sun a dinyi dobdobkwaming nang ara Er Imtamnyi si weik ebkwaming.
12Sunci sun kwaning atan nang asi co bok karerandum deib aryi Er Imtamnyi dam kun nang ataranci dinyi akwe kum kunurandum. Eda, sunci karerandum deib aryi ninyi ilinto aryi Er Imtamnyi si langdeiboka weik ebkwaming. 13Sunci sun kwaning atan nang asi co bok karebkwandum ara iya teleb dinyi kubkwande. Ato kuramunyi biriman aryi sunci sun boukwe weik tenen dinyi lak kibkwandum. Ura, yuk nang aryi asing eibingnyi ura, sunci Er Imtamnyi si weik ebkwaming. Ara, ato eboka Er Imtamnyi si weik ebkwaming. “Sun dib tenen nang ara nun Du Yesus Kristus uram Teleb Uram lak ena akwe kum kuraming. Eda, sunci nun Du Yesus Uram kunubde baramingiryok, sun atan nang ababyi dirniliraming.” Ato ebingiryok, sunci Er Imtamnyi bisi, “Ei, nun Nai,” ebkwaming. Tonda, a nang ara sunda Korintus nang ati ato eboka kisal dakwansing. “Nunbabyi yuk nang ababyi langdeiboka karebmasing,” eboka kisal dakwansing. 14Tonda, sunci langdeiboka karebmunyi ura, sun dinyi dobdobmangnyi nang ara sunti boukwe weik kibingiryi Er Imtamnyi bisi molobmilibingiryok, langdeiboka molormilibkwansing. Ara, Er Imtamnyi biryi sun biriman aryi langdeiboka kisal dakmasir deyok aryi, a nang aryi sunti langdeiboka molormilibkwansing. 15Ura, nun Nai Imtamnyi biryi nun Du biriman aryi lemsin dinyi karebmasou ara utotoa nirya asi bisibkaboka kisal dangsin dinyi karebmasou deyok aryi, nunci Er si weik ena teleb ati ebman.
Currently Selected:
2Korintus Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
