Popular Bible Verses from 2Korintus Uram 9

Share

Nun Nai Imtamnyi bira utotoa nirya talerurnyi kururci, kisal dangna dinyi karebsuturyi, sun ataransici dinyi nirya asi langdeiboka karebdeibsute. Karebdeibsici ura, sunda uki-uki nirya kubde baramun ba, atan dinyi utotoa nirya asi kum atabkwansir. Ato kuramunyi ura, sunci Er Imtamnyi urasintam aryi teleb dinyi akwe langdeiboka kunubkwandum.

Ura, unanyi-unaner ara, “Sun atan nang asi co bok karebkwan,” tenebingnyi ura, sunci sun kanya teleb kubmaci tok karena teleb. Ara, “Karena ni li,” tenebdaturyok, karebdate ara manmaliboka karebdate. Tonda, yuk nang aryi, “Karebdarur,” eboka arukdeibsiting uca, karebdate ara manmaliboka karebdate. Ba, sun kanya yuk aryi, “Ur karebkwayeb,” tenen karerandum ara manmalina kum uca karerandumci. Sun ato kun nang asi nun Nai Imtamnyi biryi boukwe weik kurur.

Ni kwit yabwe, sunci a ebkwinsin uram asi kisok dam bobdarur. “Sun yala kwengnaming nang ara yala mitik akwe kwekting uca, du moun dinyi mitik akwe dakwanting. Ba, yala ilinto asi kwekingnyi uca, du moun dinyi ilinto dakwaming.” Ati, sunci yuk nang asi langdeiboka karebmunyi uca, kisal dangsina dinyi langdeiboka dobdobkwandum ati ebman.

Ura, nun Nai Imtamnyi bira sun yala kwengna nang asi yala karerur. Tonda, sun yina yibkwamingnyi nang asi roti karesurur. Tonda, nun Nai bira sunda yuk nang asi dirnilirandum nang ababyi yala kwengna dinyi ton du mousin dinyi ton karebkwansir. Kebdeiboka ati ato ebmasin. Ara, sunci yuk nang asi langdeiboka kareramunyi to, nun Nai biryi langdeiboka kisal daksici uca, Er Imtamnyi urasintam aryi du langdeiboka moubtabakwansir. Nun Nai biryi kisal dakoka yina ab yuk karesin dinyi ilinto amuma-amuma ab langdeiboka karebkwansir uca, sunci yuk nang asi tuba-tuba langdeiboka karebkwandum. Sunci langdeiboka karebmunyi ura, nunci sun bulubdeibmandau dinyi asi bobibyi uca, sun a dinyi dobdobkwaming nang ara Er Imtamnyi si weik ebkwaming.

Ura, nun Nai Imtamnyi biryi nun Du biriman aryi lemsin dinyi karebmasou ara utotoa nirya asi bisibkaboka kisal dangsin dinyi karebmasou deyok aryi, nunci Er si weik ena teleb ati ebman.