2Korintus Uram 10
10
Paulus biryi, “Nira ato-ato kubde banun cok, nun Du Yesus bisi wa irmilibde banun,” eboka lak ebmou uram
10:1-18
1Ni kwit yabwe, nun Du Kristus bira Erdamnyi luknubdongobdandoka namin kanya borurnyi kurur to, ni Paulus bibabyi neiktoto luknubdongon kanya ton namin kanya ton bonun. Ato tenen kanya bonun deib aryi, niryi uram ebkatabdeiboka sunti molon dinyi ton molobkwinsin. Ara, “Ni uram kekebdarur,” eboka molobmasin. Sun kankan aryi ton nang ara niti ato eranei. “Paulus bira nun urasintam aryi uram erandiryok, ilil kanya bonanyi bitonyi kuboka mitang uram sisingnande se. Ba, kerek sengna deib aryi kerek sekeibsici ba, ilil kuna kum uca ilil kuna kum kanya bonanyi bitonyi kuboka mikib uram eboka kerek sengdeiriransir se.” 2Ni kwit yabwe, niryi ato eboka molobkwinsin. “Niryi sun dam diryanyi ura, nira ilil kanya bona kum uca sun kankan kuboka niti, ‘Malinyi,’ eraning nang asi mikib uram eboka kerebsinyei,” eboka molobmasin. Sun kankan ton nang aryi ni Paulus biti ato eraning. “Erda Er Imtamnyi Kanya Roh Kudus aryi eteresurur to kum kunubde barur cok, Er mining kanya aryi tenen dinyi akwe kunubde barur se.” A nang ara talyi ati ato eraning ati, niryi sun dam yandoka mikib uram kerebtinyi ati ebman. 3Ara, nunda nun Du Yesus bisi wa irmilin nang ababyi tukwetam nang akwe kunub cok, nunci sun tukwetam kanya bon nang aryi kunubde baraming to dinyi kunubde kum banub. Sun tukwetam kanya bon nang aryi mar ordaraming to ara yuk. Tonda, nunda nun Du Yesus bisi wa irmilin nang aryi mar ordaramib to ara yuk. 4Ara, sun tukwetam kanya bon nang aryi mar ordaramingnyi ara ya sirik ab yin mar sirik ab taleboka ordaraming. Ba, nunda dib tenen nang ara, “Malyi kun dinyi muna kibdongobtibyi,” tenen mar ordaramibiryok, ya sirik ab yin mar ab kum taleramib. Eda, Er Imtamnyi mikib deib aryi nunci isa talerande dinyi yuk-yuk asi muna kimdongonub. Tonda, ninyi aryi talyi eraming uram nirya asi bisik sekoka muna kimdongonub. 5Nunda Er Imtamnyi biryi dib en uram bikoka erebdeibibiryok, nunda tola uram nirya asi bisik sengnamib. Ara, Er Imtamnyi Uram bisik sengna dinyi nirya asi kum daneiramib. Tonda, ninyi kanya aryi tenen dinyi nirya asi nunci bisik sekoka kum daneiramib. Ninyi kanya aryi tenen dinyi nirya asi muna kibdongoboka tabwe debibyi uca, nun Du Yesus Kristus Uram amwetam dinyi kimnub. 6Ura, ni kwit yabwe, unanyi-unaner ara nun Du Yesus Uram ati, “Nun li,” tenen kununa kum kuramingnyi ura, nunci a nang nirya asi diba ati wenebkwayeb. Ba, sunda Korintus nang sunglona kum uca nun Du Yesus Uram asi kunubkalibmunyi ura, nunci sun kankan aryi kuboka nun Du Yesus Uram ati, “Nun li,” tenen nang asi diba ati wenebkwayeb.
7Ni Paulus ab ni kwit yabwe ab ara nun Du biryi bokdonoksou nang diba ati kunub. A dinyi ara ninyi nirya urasintam aryi lak kurur ati sunbabyi neiktoto nunti, “Nun Du biryi bokdonokmou nang kunung,” tenen bikdarur. Sun kankan ton nang ara ilil kanya bona kum uca, “Nunda Kristus wa irmilin nang kunub,” tenerdarandum to, nunbabyi neiktoto ilil kanya bona kum uca, “Nunda nun Du Yesus wa irmilin nang kunub,” tenen bingnub. Ati, sun damnyi ati, “Nunda Kristus wa irmilin nang kunub,” tenerdaraming nang ara nunti, “A nang ababyi nun Du Yesus Kristus wa irmilin nang diboka kunung,” tenen dobdobsiting ati ebman. 8Ara, nun Du Yesus biryi nunsi mikib karebsou ara, “Ninyi diba ati wenebmincok, sun kanya mambul kibdarur,” eboka mikib kum karebsou. Eda, “Dib tenen nang kanya katabum ebdeibdarur,” eboka mikib karebsou. Niryi ilil kanya bona kum uca a dinyi ati bisibkaboka nunukeibsitinyi ababyi, nun Du Yesus bira nisi mikib karebmanounyi biryi niti, “Ni bokdonokmasinyi kum kurur se,” kum tenebkwaniriryi, nisi alyi kum bobdongobkwanir. 9Ati, sunci niti, “Kerek sengna kerek sengdeirisurur biriman aryi nun kanya ilil kimdongoransir,” tenebsumunyei. 10Ara, sun kankan aryi ton nang ara niti ato eraning. “Paulus bira kerek sengna kerek sengdeiriransici uca, kat uram ton, mikib uram ton eboka kerek sengdeirisurur. Ba, ninyi urasintam yaci ura, erci mitang uram ton ina ngilikmanto uram ton eransir,” eraning. 11Sun talyi ati ato dinyi eraning nang ara ato dinyi tenena teleb. Nira kerek sengna deib aryi eboka kerek sengnun to ababyi, sun urasintam yandoka uram sisingnun ababyi neik dinyi akwe enun. Ni kerek sengna deib aryi kat uram ebsitinyi tok, niryi sun dam yanyi ura, neik dinyi akwe ebniryok, diboka kunubkwansin ati ebmasin.
12Sun kankan aryi ton nang ara sun damnyi ererdeirirdaraming. A nang ara sun damnyi biti, “Nunda iya teleb kun nang kunub,” tenen sun damnyi ererdeirirdaraming. Nunda ilil kanya bonub deyok aryi, nunci ato kuboka nun damnyi kum erebdeibdatibyi. A nang ara sun damnyi ati, “Nunda kiklina nang aryi kunubde banub to yuk nang ababyi kunubting,” teneramingiryok, sun damnyi kisal dangdaraming. Ato dinyi kunubde banung nang ara bikdob dinyi kun nang kum kunung ati ebman. 13A nang ara sun damnyi erebdeibdandoka sun damnyi kisal dangdaraming. Ba, nunbabyi nun damnyi kisal dakdatibiryok, nunci nun damnyi ati bisibkaboka kisal kum dakdankwayeb. Eda, Er Imtamnyi biryi nunsi Er wa irmilin dinyi karebsou to, nunci kikiman dinyi akwe eboka kisal dakdankwayeb. Er Imtamnyi biryi nunsi wa takubdeibsou tok, nunci akatei okatei bindoka wa iramibyi ani, sunda Korintus atei nang kankan ababyi yandoka wa iramib ati ebman. 14Nun Du biryi nunsi takubdeibsou tok, nunda sun Korintus atei nang ababyi yanmoubwe ura, nun Du Yesus uram Teleb Uram etereransoubwe. Ati, nunci, “Sun Korintus atei nang asi Teleb Uram etereramoubwe,” enub ara uram aryi ou nebdeiboka kum enub. Eda, kikib ati ato enub. 15Yuk nang aryi sunsi Teleb Uram etereransiting deib aryi nunci nun damnyi kisal kum dangdanub. Eda, nunci sunsi Teleb Uram etereransib deib aryi nunci nun damnyi kisal dangdanub. Ati, nunci sunti ato tenen dibde bunub. “Nunci sun dam yandoka Teleb Uram tubto eterebsibyi uca, sun dib tenen dinyi ara tabakdongo-tabakdongo katabum ebsici ba, sun kankan aryi nun uram kekebkwaming nang ababyi tabakdongo-tabakdongo weik kubting,” tenen dibde bunub. 16Ato kubibyi ura, nunci sun atei Korintus atei aryi anaboka otam bukmaci mutuk yuk-yuk ababyi bindoka Teleb Uram eterebtibyi. Ati, nunci, “Yuk nang ara deyok kouboka Teleb Uram sirya etereramingnyi nang aryi wa ina deib aryi nunci nun damnyi ati kisal dakdabibyei,” tenenub. Tonda, nunci, “Yuk nang aryi wa iramingnyi wa wekibiryi, Teleb Uram eterebibyei,” tenenub. Eda, nunci, “Teleb Uram kum kekebmangnyi atei yuk-yuk bindoka nun Du Yesus uram eterebkwayeb,” tenen kunub 17Ba, nunda nun Du Yesus wa irmilinub nang ara nun damnyi kisal dakdabyei. Unanyi-unaner ara, “Kisal dakwan,” tenebingnyi ura, ninyi si erebdeiboka kisal dakingnyei. Eda, nun Arungdeirisururnyi Iya Erebdobnyi bisi si erebdeiboka kisal dakwanung. 18Nun Du Yesus bira nun Arungdeirisururnyi biryi kisal dangsici nang ati Er Imtamnyi biryi, “Ni kwit yabwe, ni kanya teleb kimdeirinunung nang,” tenen kisal dangsurur. Ba, sun damnyi kisal dangdangnyi nang ati Er Imtamnyi biryi, “Ni kwit yabwe, ni kanya teleb kimdeirinunung nang,” tenen kisal kum dangdur. A deyok aryi, niryi, “Nun Du bira nun Arungdeirisururnyi bisi kisal dakwayeb,” ebman.
Currently Selected:
2Korintus Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
