2Korintus Uram 6
6
1Nunda Er Imtamnyi wa irmilin nang kunubci, nunci sunsi ato eboka ebkatabdeibkwinsib. “Nun Nai Imtamnyi biryi sunti, ‘Ni mabwe nermabwe,’ tenen dobdobmasou ati, sunci, ‘Talyi ati kum dobdobsou,’ tenen Er Imtamnyi dam kun nang diboka kubdarur.” 2Nun Nai Imtamnyi biryi Er Uram umbura aryi ato esurur.
“Ni kanya teleb tenebmase tum berekmou ura, Niryi sun molonin uram kekebmasise.
Tonda, Niryi, ‘Lebkwan,’ tenebmase tum berekmou ura, Niryi sunda, ‘Lebdeibsurum,’ eboka molon nang dam tingyandoka lebdeibmasise,” ebmou. (Yesaya 49:8)
Ura, nunci sunsi ato ebmasib. Dindarur. Ukuryok ara nun Nai Imtamnyi teleb teneamwe tum sirya berekmar. Tonda, nun Nai biryi, “Lebkwan,” teneansou uki tum sirya yanmar. A deyok aryi niryi sunsi, “Busul kuboka Er Imtamnyi dam kun nang diboka kubdarur,” ebmasin.
Paulus biryi, “Teleb Uram eterebde banun cok, niryi mambul kimdeirinin dinyi amuma-amuma bonun,” eboka nukeibmou uram
6:3-13
3Nun kwit yabwe. Nunci Teleb Uram eterebde banub cok, nunci, “Yuk nang asi mitik malyi dinyi tentok ababyi kibtibyi uca, sunci Teleb Uram dokdonokingyei,” tenen teleb dinyi akwe kunubde banub. Ati nunci, “Ninyi nirya aryi nun Du Yesus bisi dib tenebting,” tenen, “Teleb Uram eterena deyok ati talyi ati ina ngilikingnyei,” tenen nunci nun damnyi diboka kalingdamibiryi, Teleb Uram eterena ati bisik sekte dinyi tentok ababyi kum kunub. 4Eda, nunda Er Imtamnyi wa irmilin nang kunubci, nunci, “Ninyi nirya ara nunti, ‘Er Imtamnyi biryi bokdonokmou nang diboka kunung,’ tenen biksiting,” tenen teleb dinyi akwe kunubde banub. Ati, ninyi aryi nunsi iya mambul kimdeirisin dinyi amuma-amuma asi kimdeirisunung bok, nunci mikib weik kuboka tanglona kum uca Er Imtamnyi wa irmilinub. 5Ton tum ara ninyi aryi nunsi kulab-kulab eransing. Yuk tum ara ninyi wenen ai dongoransing. Yuk tum ara ninyi ilinto aryi, “Teleb Uram nun li,” tenen, “Obdankwamab kum,” tenen buluboka lilim weik eransing. Nunda bisibkaboka iya busul kuboka Teleb Uram eterebde banub uca, mambul weik doramib. Tonda, lukunda ababyi mana kum kuramib. Tonda, yuk tum ara kwaning ataransir. 6Tonda, Teleb Uram eterebde banubci, nunci lek kanya bonub. Tonda, bikdob dinyi bingna kanya bonub. Tonda, nunci yuk nang ati minola yu wengna kanya kum bonub. Tonda, namin kanya bonub. Tonda, nunda Er Imtamnyi Kanya Roh Kudus dam kun nang kunub. Tonda, nunci yuk nang asi boukwe weik kunub ara si bambul ena dem deib aryi boukwe kum kimnub. Eda, nun kanya dam aryi boukwe weik diboka kunub. 7Ato kunubde banubci, nunci tola uram bai donokoka dib en uram akwe enub. Tonda, nun Nai Imtamnyi mikib deib aryi Teleb Uram lak eterebde banub. Tonda, nunci, “Er Imtamnyi biryi nunsi dobdobmasou,” tenen bingnub cok, nunda, “Isa ab er milin nang aryi Teleb Uram bisik sekingnyei,” tenen kalingnub. Ara, yin doun nang aryi, “Nun ordana nang aryi nunsi bisik seksingnyei,” tenen yin ab mar ab diboka douboka kalingnaming to, nunda Er Imtamnyi wa irmilin nang ababyi neiktoto kalingnub. 8Ton tum ara ninyi aryi nunsi kisal dangnansing. Yuk tum ara ninyi aryi nunsi ina nglilingnansing. Ton tum ara ninyi aryi nunti, “Teleb dinyi akwe kunubde banung,” eboka nungdeiriransing. Yuk tum ara tola ati, “Malyi dinyi kunubde banung,” eboka nungdeiriransing. Nunda nun damnyi ati, “Er Imtamnyi biryi bokdonokmasou nang diboka kunub,” tenen bingnub. Ba, ninyi ton nang aryi nunti, “A nang ara sun damnyi erebdeibdandoka Er Imtamnyi wa irmilin nang kibdeibdanmang,” teneransing. 9Ton nang aryi nunti, “Er Imtamnyi biryi bokdonokmou nang,” tenen bingsunung. Ba, yuk nang aryi nunti, “Unato nang kunung do?” tenen kum bingnansing. Nunda mambul dinyi mitik kum boramib ati dibmanto nang ato kuramib. Dibmanto nang kuramibiryok, kam tuba kuramib. Ninyi aryi nunsi kulab-kulab eransing. Kulab-kulab eransing bok, diboka kum oransing. 10Nunda mambul kimdeirisin dinyi ilinto donub. Mambul dinyi ilinto donub cok, kilkil kanya tuba bonub. Nunda bona bon kum nang kunub. Bona bon kum nang kunub cok, nunci Teleb Uram eterenub deib aryi ninyi ilinto asi iya teleb dinyi langdeiboka bongkarenub. Tukwetam bona bon dinyi kum boramibiryok, nunci nun Du Yesus biriman aryi, “Imtam dinyi tukwetam dinyi nirya aryi nun dinyi kusurur,” tenen bingnub.
11Nun kwit yabwe Korintus atei nang. Nunci nun kanya yokloboka sunsi iya boukwe weik kusunub. Boukwe weik kusunubci, nunci sunsi dib en uram ebmasib. Ara, kemdeirin uram deib aryi kum ebmasib. Eda, nun tenen kanya lak ebmasib cok, dib en uram ebmasib. 12Nunda sunsi boukwe weik kusunubci, nunci sunti, “Boukwe weik tuba kum kubkwayeb,” tenesina kum kunub. Ba, sunci nunsi boukwe weik kuransindau ani, ukuryok ara boukwe weik tuba kum kuransurum ati ebman. 13Nunda sunsi boukwe weik kusunub ato, sunbabyi neiktoto nunsi boukwe weik kimsina teleb ati ebman. Nira sun nai bitonyi kunun deyok aryi, “Ni mabwe nermabwe,” tenen ato ebmasin. Ati, nunci nun mamun boukwe kimdana teleb ati ebman.
“Sun dib tenen kum nang ab dam kun nang kibdamunyei,” eboka eterebmou uram
6:14–7:1
14Ni kwit yabwe. Sun dib tenen kum nang ab dam kun nang kibdeibdamunyei. Sunda dib tenen nang ara Er Imtamnyi urasintam aryi teleb dinyi kunubde ban nang kurandum ati, sunci, “Malyi dinyi miliboka kunubibyei,” tenen malyi kun nang ab tonkwa kubmunyei. Er Imtamnyi urasintam aryi teleb dinyi kunubde ban dinyi ara yuk, malyi dinyi kunubde ban dinyi ara yuk. Tonda, berengna dinyi ara yuk, kunuk dinyi ara yuk kurur. A deyok aryi, sunda dib tenen nang ab dib tenen kum nang ab ara ururdeirdana kum uca yuk-yuk bokdandarur. 15Nun Du Kristus ab isa sienyi si Belial ab asi antanibdeibtibyi do? Ato tenen kum. Tonda, dib tenenanyi ab dib tenen kumnyi ab murubdeibtibyi do? Ato tenen kum. Sun tenen dinyi ton kunubde ban dinyi ton ara yuk-yuk kurur deyok aryi, antanirdeirirdana kum kurantibyi. 16Tonda, Er Imtamnyi bisi dama deirin ai ara yuk, kwemdeina dinyi asi dama deirin ai ara yuk kurur. Nunci kwemdeina dinyi asi doboka Er Imtamnyi bisi dama deirin ai deibtibyi do? Ato tenen kum. Nunda dib tenen nang kanya umbura aryi Er Imtamnyi kusurur deyok aryi, nunda Er Imtamnyi bisi dama deirin ai ato kunub ati ato ebman. Ara, nun Nai Imtamnyi biryi Er Uram umbura aryi ato esurur.
“Nira Imtamnyi bira Ni dam kun nang ab tonkwa kubibiryi, sun kankan aryi yibarkiringkwan.
Tonda, a nang ara Niti, ‘Er Iya Erebdobnyi,’ tenen
Ni uram kunubde baramingiryi,
Ni dam kun nang kubkwaming,” ebmou. (Ezekiel 37:27)
17Tonda, nun Nai Imtamnyi biryi, “Malyi kun dinyi Ni mabwe nermabwe asi dakdongobcei,” tenen yuk tam asi ato eboka esurur.
“Er Imtamnyi biryi ato esurur.
Sunda Ni dam kun nang ara sun malyi kun nang kankan aryi takloboka yuk dam bina kubdarur.
Taklobmunci, sunci Er Imtamnyi biryi, ‘Mem,’ tenen dinyi tentok ababyi kunubde bimunyei.
Ato kubdate ura, Nira Imtamnyi biryi sunsi dobdobkwansin.” (Yesaya 52:11)
18“Ara, Nira sun Nai kusunun ba,
sunda Ni mabwe nermabwe kibkwandum ati ebman.
Nun Nai Imtamnyi Iya Mikibnyi biryi ato ebmou.” (2 Samuel 7:8,14)
Currently Selected:
2Korintus Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
