2Korintus Uram 7
7
1Ura, Ni kwit yabwe dib tenen nang ni boukwe weik kusunun nang. Nun Nai Imtamnyi biryi nunsi, “ ‘Ni mabwe nermabwe,’ tenen sun kankan dam iya kubkwansin,” eboka erdeiriransou deyok aryi, nunci, “Lek kanya akwe bobkwayeb,” tenebibiryi, nun kanya ab nun nong ababyi diboka kalikdabiryi, nun nong kanya malyi dakdongobsute dinyi nirya bai donokwayeb. Ati, nunci nun Nai Imtamnyi biti, “Nun Nai Erebdobnyi Er Uram kunubde binkwayeb,” tenenubci, nunci “Sunglona kum uca lek kanya borantibyi,” tenen busul kubtabakoka Er Uram kunubde binkwayeb.
Er Paulus biryi sun Korintus nang kuramnyi to kekebmou uca, er kanya kilkil weik kubmou uram
7:2-16
2Ni kwit yabwe, nunci ninyi tentok ababyi malyi kum kibdongobmasoubwe. Tonda, nunci ninyi tentok ababyi kum bowanikminikmasoubwe. Tonda, nunci sun talerandum bona ton co bok ati, “Dobdobtibyi,” tenen olorkwetesina uram kum eransoubwe. Ati, sunci sun kanya yoklobsumunci, nunsi boukwe weik kibsindarur. 3Niryi sunti, “Tatab-tatab ebkwan,” tenen ato kum ebmasin. Eda, niryi sunti, “Ni boukwe kunun nang,” tenen ato ebmasin. Nunci sunsi boukwe weik kusunub ati nun sirya ebmasib. Ati, nunci sunti boukwe kusunub deyok aryi, sun ab tonkwa kurantibyi ati tenesunub. Ara, kam kurantibyi ababyi, dibtibyi ababyi, nun sun ab tonkwa kurantibyi ati ebman. 4Niryi sunti, “Nun Du dam kun nang,” tenen dib tenesunun. Niryi sunti erebdeiboka kisal dangsunun ati ebman. Tonda, yuk nang aryi nisi mambul kimdeirin dinyi ilinto kareraning bok, niryi sun kurandum to deyok aryi kilkil kanya langdeiboka bonun.
5Ura, nunda Makedonia mutuk binmoubwe ura, nun mambul dinyi boramoubwe ati ebman. Ninyi aryi nunsi dumderanseici, mambul weik dinyi ilinto amuma-amuma kimnansei deyok aryi, nun nong ab nun kanya ab ara mambul weik kuransou. Ninyi aryi nunti, “Obtibyi,” tenen domkiringnansei. Tonda, nunci sunda Korintus nang ati, “Teleb kuraming do kum do?” teneramoubwe deyok aryi tabakoka mambul kanya boramoubwe. 6Ato kuramoubwe bok, nun Nai Imtamnyi bira mambul nang teleb kurdeirisururnyi biryi nun kanya teleb kurdeiriransou. Ara, nun kwit Titus nun dam yanmou biriman aryi nun Nai biryi nun kanya teleb kubdeibmasou. 7Ara, nun kwit Titus yanmou deyok atikwe nun kanya teleb kum kibdeibmasou. Eda, sunda Korintus nang aryi nun kwit bisi teleb kurdeirirandau ati kekebmoubwe deyok ababyi erci nun kanya asi teleb kibdeibmasou. Nun kwit bira sun kankan kuamwe ani, ni dam yanmou ura, erci sun kurandau to nukeibmasou. Ati, erci, “Sun Korintus atei nang aryi, ‘Kan ab tonkwa kurantibyi se,’ eranking,” ebmanou. Tonda, erci, “Sun Korintus nang aryi, ‘Nun nai Paulus bisi mambul kibdeibmoubwe se,’ tenen mambul weik kanya boraming,” ebmanou. Tonda, erci niti, “Sun Korintus nang ara kanti boukwe weik boranking,” eboka nukeibmanou. Ato eboka nukeibmanou deyok aryi, ni kanya ara kilkil weik kuranse. Minob ura ni kanya kilkil weik kuranou ani, ni kanya ara bisibkaboka iya kilkil kuranse ati ebman.
8Niryi sunsi kerek sengna kerek sekeibmasise asi sunci nukde binmandau uca, sun kanya lukeibmasou. Sun kanya asi lukeibmasou bok, niryi, “A kerek sengna kerek sekeibmase ara manmaliboka sekeibmase,” tenen mambul kanya kum bonun. Ato tenena kum kunun cok, niryi boukwe deib aryi, “Ni kwit yabwe kanya lukeibman se,” tenen mambul kanya tiya bobmase. Ba, a kerek sengna deib aryi sun kanya lukeibmasou ara tiya akwe lukeibmasou ati ni kekebmase uca, mambul kanya iya kum bormururanse. 9Ura, ukuryok ara ni kanya kilkil kuranir. Ara, niryi sunsi, “Unato ati a malyi kunanyi kum wenebmarum do?” eboka wenebmasisiryok, sun kanya asi lukeibmasise deyok aryi, ni kanya kilkil kum kuranir. Eda, sunci ni kerek sengna deib aryi mambul kanya borandau uca, sunci, “Nun malyi kun dinyi taklobkwayeb,” tenebmandauci, Er Imtamnyi dam kun nang tubto kibmandau. A deyok aryi, ni kanya kilkil weik kuranir ati ebman. Ara, nun Nai Imtamnyi Er kanya teleb kurur to, sunci, “Malyi dinyi kuramoubwe se,” tenen mambul kanya borandau. Ati, niryi sunsi kerek sengna kerek sekeibmasou uca, sun kanya lukeibmasou bok, niryi sunsi malyi kum kibminikmasise. 10Nun Nai Imtamnyi biryi teleb teneboka karesurur mambul kanya bon dinyi ara talyi dinyi kuma. Eda, ato mambul kanya bon dinyi biriman aryi ninyi aryi sun malyi kun dinyi tangloramingiryok, lemsin dinyi dororaming. Sun ato kuboka mambul kanya bon nang ara, “Malyi dinyi tubto kunurantibyi,” tenen kanya kum bonung. Ba, tukwetam kanya bon nang boramingnyi mambul dinyi ara lemsin dinyi kum boyangarande. Eda, din dinyi boyangarande. 11Ni kwit yabwe, sun damnyi diblilibdandarur. Ara, nun Nai Imtamnyi biryi sunsi mambul bobdeibsou ara talyi ati kum bobdeibsou. Eda, a mambul kanya borandum biriman aryi sun kanya dam du moubdeibsou. Du moubdeibsou uca, sunci, “Er Imtamnyi biryi teleb tenesurur to kunubde binkwayeb,” tenen kanya borandum. Tonda, sunci, “Yuk nang aryi kuraming malyi kun dinyi kum miliramoubwe ati lak kibkwayeb,” tenen busul kanya borandum. Tonda, sunci, “Sun malyi kun nang asi bitabdeiboka wenebkwayeb se,” tenen busul kanya borandum. Tonda, sunci, “Nun Nai Imtamnyi biryi nun malyi kuramoubwe dinyi wenebsicei,” tenen ilil kanya borandum. Tonda, sunci ni Paulus biti boukwe weik kuboka, “Er ab tonkwa kurantibyi,” teneranurum. Tonda, sunci busul kanya borandumci, “Malyi kun nang deyok lilibkwayeb,” tenerandum. Ati, nun Nai biryi mambul bobdongobmasou uca, sun kanya dam aryi du diboka moubdeibsou. Ati, sunci sun damnyi ati, “Malyi deyok kum kuransou,” tenen lak kibdanmarum ati ebman. 12Ati, niryi sunsi kerek sengna kerek sekeibmasise ara, “Malyi kiminingnanyi bira er kwin nong asi talyi yordananyi bisi tatab-tatab ebkwan,” tenen dinyi u dikum deiboka kum sekeibmasise. Tonda, “Talyi yon ner er akenyi bisi milibkwan,” tenena ababyi kum kerek sekeibmasise. Eda, sunda Korintus nang aryi “Nunda Paulus bisi boukwe weik kunub,” tenen Er Imtamnyi urasintam aryi lak bikdankwandau ati, niryi sunsi kerek sekeibmasise. 13Nunci a dinyi nirya asi kunubde barandum asi asing eirirankib uca, nun kanya katabum ebmasir.
Ura, nun kanya atikwe katabum kum kuransou. Eda, sunda Korintus nang aryi nun kwit Titus bisi teleb kurdeirirandau deyok aryi, nun kwit Titus er kanya ababyi katabum eramwe. A deyok ababyi nun kanya teleb kuransir. 14Niryi nun kwit bisi sun dam bokdonokmasisiryi, niryi erti, “Sun Korintus nang ara teleb kun nang,” eboka kisal weik dakdobmasise. Ura, niryi sunti kisal weik dakoka, “Teleb dinyi kun nang kunung,” ebmase to, kunubde barandau deyok aryi, sunci nisi alyi kum bobdongobmanindau. Nunci sunsi esunub uram ara tuba-tuba dib en uram akwe esunub to, nunci sunsi kisal dangnub uram ababyi dib en uram akwe kurur. Ati, niryi sunsi kisal dakmasise to, diboka kunurandau deyok aryi ni kanya kilkil weik kuranir. 15Nun kwit Titus bira sun nirya ati boukwe weik kusurur. Tonda, erci sunti, “Ilil kanya boboka Er Imtamnyi Uram diboka kekeramnyi,” tenen tubto teneiriransir uca, erci tabakoka boukwe weik kusurur. 16Ni kwit yabwe. Niryi sunti, “Er Imtamnyi Uram diboka kunubde banung,” tenen diboka bingsunun deyok aryi, ni kanya kilkil weik kunurur.
Currently Selected:
2Korintus Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
