2Korintus Uram 5
5
“Nun Nai Imtamnyi biryi nunsi kam bukeibsiriryi, Erci nunsi bol otong ukuryok dinyi ara dibmanto kum dinyi iya karebsiriryi,” eboka eterebmou uram
5:1-10
1Nunda ukuryok tukwetam aryi kuboka kam tuba kuramibiryi, nun nong ara diramib dinyi tuba kuransir. Nun nong diramib dinyi ara tiya don ai ato dinyi kuransir. Ura, nun sirya dibmabyi ura, nun nong ara tiya don ai ato dinyi kum dandobkwansir bok, nun Nai Imtamnyi biryi kam bukeiboka nun yuk-yuk asi ukuryok nong karebkwansir. Nunci a dinyi tenen diboka bingnub. Ukuryok nong karebkwansir ara imtam ai don dinyi ato kikniboka karebkwansir uca, nunda eikai umbura aryi iya kubkwayeb. Ukuryok nong karebkwansir dinyi ara ninyi taruk aryi kiknin dinyi kuma. Eda, nun iya kubkwayeb ai asi nun Nai Imtamnyi taruk aryok kiknibkwansir. 2Ba, ukuryok ara tukwetam tuba kuramibiryok, nunda tukwetam nong ara tiya don ai ato dinyi umbura aryi tuba kuramib. Kuramibiryok, nunci, “Iya kubkwayeb nong bol dobdobtibyi uca, nunci akai iya ai umbura aryi kurantibyi se,” tenen engen kanya bonub. Nun dobdobkwayeb imtam nong ara iya teleb ongon aling kurur ati, nunci, “Ongobtibyi se,” tenen kuramib. 3Ati ukuryok ababyi nunci, “Ongon aling ongon kum nang ato kibibyei,” tenen, “Iya teleb ongon aling ongobtibyi,” tenen kuramib. Ongon aling sirik ati ato kum ebman. Eda, imtam nong ara nun Nai biryi nunsi karebkwansir nong ati ebman. 4Ukuryok ara tukwetam ai umbura aryi tuba kuramib. Ara, tiya don ai ara keis ol ai doraming ato dinyi umbura aryi kuramib deyok aryi, nunci engen kanya bonub. Tonda, mambul weik kanya bonub. Ati, nunci, “Nun nong iya kum dandobsicei,” tenen nunci, “Imtam nong dobdobtibyi ara iya teleb ongon aling ato ongobtibyi se,” tenenub. Ati, nunci, “Nun diramib to dinyi deibloboka iya kam burdeirisin dinyi unuboka dobdobtibyi,” tenen dibde bunub. 5Ura, “Iya kam bukeibtinyi uca, ukuryok nong ara dina kum dinyi dobdobkwaming,” tenen a dinyi nirya kiknibminikmasounyi bira nun Nai tentok a kurur. Tonda, nun Nai biryi Er Imtamnyi Kanya Roh Kudus asi nun kanya dam karebmasou. Ara, nunci, “Nun Nai biryi ebdeibsou tok kunubkwansir,” tenen diboka bikwamoubwe ati, Erci Er Imtamnyi Kanya Roh Kudus asi nun kanya dam karebmasou.
6Nun Nai biryi Er Kanya asi nun kanya dam karebmasou deyok aryi, nunci kankana kum kunubci, katabum kanya boboka ato dib tenenub. Ara, “Tukwetam nong ara tiya don ai ato dinyi umbura aryi tuba kuramibiryok, nun Du Yesus iya kurur sokon damtoto kum kuramib,” tenen diba ati bingnub. 7Ara, nunda kam kuramib ara nun Nai bisi dib tenena deib aryi kam kuramib. Ara, asing eirin dinyi deib aryi kam kum kuramib. Eda, asing eirin kum dinyi deib aryi kam kuramib. 8Ati, nunci kankana kum uca dib teneramibiryi, “Tukwetam nong deiblobtibyi uca, nun Du Yesus ab tonkwa Er ai dam iya kurantibyi,” tenen lak enub. Nun Du ab tonkwa kuna ara, nunci, “Iya nunukeiboka wimdeirinub uca, diboka dobdobtibyi,” tenen dinyi kusurur ati ebman. 9Ati, nunci, “Nun Du ab tonkwa kubtibyi,” tenenub deyok aryi, nunci, “Nun Du kanya teleb kubdeibkwayeb,” tenen kunub. Ara, nunda tukwetam tuba kuramib ababyi, imtam kubkwamib ababyi, nunci nun Du Yesus teleb tenerur to kunubde binkwayeb. 10Nun Nai Imtamnyi biryi teleb teneansou tok, nun Du Yesus bira nunda dib tenen nang yuk-yuk aryi kunubde banub to diboka lilibkwansir ati ebman. Ara, nun Du Yesus iya erebdob bun sokon bukci ura, Erci nunda dib tenen nang ababyi Er urasintam aryi naboka bulubdeibkwansir. Ura, nun Du Yesus biryi nun yuk-yuk aryi kunubde baramibyi tok dekeibkwansir. Ara, tukwetam nong tuba kuramibiryok, teleb dinyi kunubde baramibyi uca, Erci nunsi dekeiboka kisal dakwansir. Ba, malyi dinyi kunubde barantibyi uca, Erci nunsi dekeiboka wenebsute.
“Nun Nai Imtamnyi biryi nun Du Yesus biriman aryi antanirdeirisin dinyi diboka karebmasou,” eboka eterebmou uram
5:11–6:2
11Ati, nunci, “Nun Du bira nun kunubde baramibyi tok diboka lilibkwansir,” tenen bingnubci, nunci ilil kanya boboka, “Nun Nai Arungdeirisururnyi teleb tenesurur dinyi kunubkwayeb,” tenenub. Ato tenen ilil kanya bonub deyok aryi, nunci ninyi nirya asi, “Nun Du uram Teleb Uram dobdobdarur,” eboka lak eterebde banub. Ati, nun Nai Imtamnyi biryi nunti, “Niryi bokdonokse nang diboka kunung,” tenen bingsurur. Ba, sunbabyi sun kanya dam aryi neiktoto, “A nang ara Er Imtamnyi biryi bokdonokmou nang diboka kunung,” tenen biksindate. 12“Nunda Er Imtamnyi biryi bokdonoksou nang kunub,” tenen bingdanub ati, nunci sunti, “Dib tenebsindate,” eboka tubto kum molobkwayeb. Eda, nun du ba, teleb dinyi ukuramib to sunci asing eiboka diboka bingnansurum. Ati, sunci nun du moubsou dinyi asing eirirandum deib aryi nunti kisal dakoka, “Er Imtamnyi bokdonokmou nang,” eboka lak ebkwansindate ati ato ebman. Ato kubdate uca, sunci sun nunsi dib tenesin kum nang asi uram dekeibdate ba, sekwetebdate. A nang ara asing eirin dinyi ara alib langlang en dinyi deib aryi ninyi kisal dangnaming. Ba, asing eirin kum dinyi ara nun kanya dam aryi tenen dinyi deib aryi kisal kum dangnaming. 13Ninyi aryi nunti, “Luba talebdob nang aca,” teneransing bok, nunda, “Er Imtamnyi wa irmilibkwayeb,” tenen, “ ‘Luba talebdob nang kunung,’ tenebsitingnyi ababyi nunti teleb,” tenen kunub. Ba, nunda dikum kanya bon nang diboka kunubci, nunci sunda dib tenen nang ati, “Teleb kubdeibkwayeb,” tenen ato kanya bonub ati ebman. 14Nun Du Kristus nunsi boukwe weik kusurur deyok aryi, nunci, “Nunci ukurlona kum uca nun Du Yesus uram Teleb Uram eterebde binkwanub,” tenen kunub. Ati, nunci ato tenen bingnub. “Nun Du tentok dibmou ara nunda dib tenen nang nirya lebdeibkwamasou ati dibmasou. Nun Du bira nunti dibmasou ati, nun nirya ara nun kanya dam malyi tenen dinyi sirya dibdeibdanmoubwe nang ato kibmoubwe,” tenen bingnub. 15Nun Du bira nun nirya ati dibmasou ara nunci, “Nun kanya teleb tenebtibyi tok kunubkwayeb,” tenebkwamoubwe ati kum dibmasou. Eda, nunci, “Nun Du nunti dibmasounyi Er kanya teleb kurur tok kunubtibyi,” tenebkwamoubwe ati, Erci nunti dibmasou. Nun Du bira nun Nai Imtamnyi biryi kam bukeibmounyi biti ato ebman.
16Ati, ukuryok aryi kuboka nunci tukwetam nang aryi tenen dinyi deib aryi ninyi tentok ababyi, “Anyi bira telebnyi do kum do?” tenen kum kunub. Eda, Er Imtamnyi Kanya Roh Kudus aryi tenen dinyi deib aryi nunci yuk nang ati, “A nang ara teleb nang do kum do?” tenen kunub. Tonda, minob ura nunci nun Du Yesus Kristus biti teneramoubwe ara tukwetam nang aryi tenen dinyi deib aryi teneramuburyok, nunci Erti, “Tukwetamnyi bica,” teneramoubwe. Ba, ukuryok ara Er Imtamnyi Kanya Roh Kudus tenena deib aryi tenenubci, nunci nun Du Yesus biti, “Ninyi Lemdeirisururnyi,” tenenub. 17Nun Du bira nunti dibmasou deyok aryi, unanyi-unaner ara nun Du Yesus Kristus dam kun nang kibingnyi ara nun Nai biryi tamuboka kiknibdeibmou nang kunung. Minob malyi kunubde baramoubwe dinyi ara tuba kum kubwe. Asing diboka dibdendarur. Er Imtamnyi biryi nunsi ukuryok kanya kiknibdeiboka karebsou deyok aryi, nunci Er Imtamnyi biryi teleb tenesurur dinyi kunubde banub. 18Ura, a ukuryok dinyi nirya asi nun kanya dam aryi wa iboka kiknisururnyi bira nun Nai Imtamnyi kurur. Nun Nai bira nun Du Yesus biriman aryi Er ab nunda ordana nang ato kuramoubwe ab antanibdeibsou. Sirya antanibdeibsou ura, Erci nunda Er wa irmilin nang asi, “Antanirdeirina uram lak ebdarur,” eboka takubdeibsou. 19Ara, Er Imtamnyi biryi nun Du Yesus biriman aryi Er ab sun im dangna tukwe dangna nang ara sun Erti, “Nun li,” tenen nang ab antanibdeibmasou. Ati, nunci Er Imtamnyi urasintam aryi malyi dinyi kuramoubwe bok, nun Nai biryi a malyi kun dinyi asi tuba kum teneirisurur. Tonda, Erci nunsi, “Antanirdeirin uram lak ebdarur,” eboka takubdeibsou. 20Ati, nunda nun Du Yesus Kristus Uram ermurun nang kunub cok, nunci ninyi nirya asi, “Er Imtamnyi biryi karebmasou antanirdeirisin dinyi dobdobdarur,” eboka erkatardeiriramib. Nun yuk aryi ato eboka erkatardeirina kum kunub. Eda, nun Nai Imtamnyi biryi nun biriman aryi, “Ni ab antanibdeibdandarur,” eboka ebkatabdeibde basurur. Ati, nunci nun Du Yesus si deici aryi erkatana uram enub ara, “Er Imtamnyi ab antanibdeibdandarur,” enub. 21Nun Du bira malyi dinyi ton kum kuamwe bok, nun Nai Imtamnyi biryi Erda yuk nang aryi malyi kun dinyi bobmunyi bisi wenebdeibmou. Ara, nunda malyi kuramoubwe nang asi nun Du Yesus dam kun nang kiboka Er Imtamnyi urasintam aryi teleb dinyi kibkwamoubwe ati nun Nai biryi nun Du Yesus bisi wenebmou.
Currently Selected:
2Korintus Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
