2Korintus Uram 4
4
“Nunda nun Du Yesus uram Teleb Uram eterebde ban nang ara mitang nang kuramibyi bok, Teleb Uram ara nunci lak eramib uram ara iya mikib uram kurur,” eboka eterebmou
4:1-18
1Ati, nun Nai Imtamnyi biryi nunsi bico tenen kisal daksou deyok aryi, Erci nunsi wa karebsou uca, nunda Teleb Uram eterebde banub. Teleb Uram ara iya milil uram eterebde banub deyok aryi, nun kanya ilil kum kusurur. 2Eda, nun kanya katabum esurur ba, nunci malyi kun dinyi nirya ati, “Nun li,” eboka lak enub. Ara, nunci alyi dinyi kunubde ban dinyi nirya ati, “Nun li,” tenen dongdongonub. Tonda, nunci, “Iniboka malyi dinyi kunubtibyi,” tenen kunubde ban dinyi nirya ati, “Nun li,” tenenub. Tonda, nunci, “Co bok kum yuk dinyi kum karebsiting,” tenen uram ulubyang uram dangna ababyi kum kunub. Tonda, nunda Er Imtamnyi Uram lak eterenub ara tola uram yungdongona kum uca lak eterenub. Eda, nunci dib en uram akwe lak eterenub uca, ninyi nirya ara sun kanya dam aryi, “A uram ara dib en uram,” tenen bikting. Er Imtamnyi biryi nunti, “Dib en uram akwe eboka eterenung,” tenen bingsurur ati ato ebmab. 3Nunda Teleb Uram eterenub ara, “Ninyi nirya ara dib en uram bikting,” tenen laktoto eterenub. Ba, ninyi ton nang ara nun eterenub uram deyok diboka kum bingnung. A nang ara asing kun nang ato kuramingiryi, dib en uram dib kum tenenung deyok aryi din nang ato kunung uca, iya din dinyi dobdobkwaming. 4Isa sienyi bira, “Sun tukwetam nang nirya asi arukdeiboka tabwe debtinyi,” tenenanyi bira sun dib kum tenen nang asing kubdeibwe uca, sunci Teleb Uram berengna asi asing eibman kum kuraming. Ara, nun Du Yesus Kristus berengna ara Teleb Uram biriman aryi berengdeirisurur asi asing eibman kum kuraming. Nun Du Yesus bira Er Imtamnyi bitonyi diboka kurur. Ati, nunci nun Du Yesus biti, “Ato-ato kubde barurnyi kurur,” tenen bingnub uca, nunci Er Imtamnyi biti, “Ato-ato kubde barurnyi kurur,” tenen diboka bingnubci. 5Ara, nunda Teleb Uram eterebde ban nang ara nun Du Yesus uram Teleb Uram eterebde banub cok, nunci nun damnyi ererdeirirdana kum kunub. Eda, nunci nun Du Yesus Kristus si lak eboka, “Nun Du Yesus bitikwa nun Arungdeirisururnyi Iya Erebdobnyi kurur,” enub. Tonda, nunci nun damnyi ati ato eboka lak eramib. “Nun Du biryi nunsi wa karebsou uca, nunda tukwetam bun nang ato kuramibiryi, sun nun uram keken nang asi dirnilinub,” eramib. 6Nun Nai Imtamnyi bira, “Kunuk dam aryi kuboka berengna berekeibkwan,” ebmounyi biryi nun kanya dam berekeibsou. Ara, Er Imtamnyi biryi nunti, “ ‘Er Imtamnyi bira Iya Erebdobnyi kurur,’ tenen bikniting,” tenen nun kanya dam berekeibsou. Tonda, Erci, “Kristus biryi kunurur dinyi asi asing eibingnyi uca, sunci Ni Imtamnyi biti, ‘Iya Erebdobnyi,’ tenen bikniting,” tenen nun kanya dam berekeibsou. A deyok aryi, nunci nun damnyi ererdeirirdana kum kunub ati ebmab.
7Ba, nunda Teleb Uram eterebde banub nang ara mitang nang kuramibiryok, nunda Teleb Uram ara iya bikdob uram lak eramib. Nunda tukwetam bun nang akwe kuramibiryi, tukwe iniboka kiknin moyok ara ou sakoka minola tolorande moyok kunub. Ba, nun lak eramib uram ara iya bikdob dinyi kururcok, bona bon dinyi iya teleb dinyi ato kurur. Er Imtamnyi bira mikib nang nirya asi bisibkaboka iya Mikibnyi kurur bok, nunda Teleb Uram eterebde ban nang ara mitang nang akwe kunub. Ati, ninyi nirya aryi, “Er Imtamnyi bira Teleb Uram eterena deib aryi bisibkaboka iya mikib dinyi wa irur,” tenen bikwamnyi ati, nunda Teleb Uram eterebde ban nang ara mitang nang akwe kunub. Nun yuk aryi mikib dinyi wa ibmana kum kuramib ati ebmasin. 8Nunda Teleb Uram eterebde banub nang ati ninyi aryi, “Obtibyi,” tenen malyi dinyi kiminingsunung bok, iya kum oransing. Tonda, nunci mambul dinyi ilinto amuma-amuma boramibiryok, nunci iya mambul kanya kum bonub. Ati, nunci mambul dinyi ilinto doramibiryok, nunci, “Nun Du biryi nunsi lebdeibkwansir,” tenenubci, iya mambul kanya kum bonub. 9Ninyi aryi nunti, “Obtibyi,” tenen domkiringsunung. Domkiringsunung bok, nun Nai Imtamnyi biryi nunsi kum tangloransir. Ninyi aryi nunsi kulab-kulab eransing. Kulab-kulab eransing bok, nun kam tuba kuramibci, tanglona kum uca Teleb Uram eterenub. 10Sun dib tenen kum nang aryi nun Du Yesus bisi mambul weik kibdeiboka obmai to, nunda nun Du Yesus wa irmilin nang ababyi neiktoto mambul weik kibdeiboka on dinyi tuba-tuba doronub. Ara, nunci, “Nun Du dibmounyi bisi kam tubto bukeibmou mikib ara nunbabyi lak kibsute uca, nun nong ab nun kanya ab neiktoto kam kurdeirin dinyi dobdobtibyi,” tenenub. Ato tenenubci, nunbabyi nun Du Yesus biryi doramwe mambul weik dinyi dorormilinub. 11Ara, nunda nun Du Yesus bisi milinub nang ara kam tuba kunub bok, ninyi aryi nunti, “Obkwayeb,” tenen tuba-tuba talesunung ati ebman. Ara, nun Du Yesus si deyok aryi, nunci osina ato dinyi tuba-tuba doronub. Ara, nunci, “Nun Du Yesus kam kurdeirisin mikib ara nunda dibmanto nang dam lak kibkwansir,” tenen nunci osina ato dinyi tuba-tuba doronub. 12Ati, Ni kwit yabwe. Nunda Teleb Uram eterebde ban nang ara mambul kibdeiboka osin to dinyi doronub bok, Er Imtamnyi biryi nunsi kam kurdeirisin dinyi karesurur. Tonda, sunda nun uram kekeransurum nang ababyi Teleb Uram deib aryi kam kurdeirisin dinyi dororandum ati ebman.
13Er Imtamnyi Uram umbura aryi ato eboka kerek sekeiamnyi. “Niryi Er Imtamnyi biti, ‘Lebdeibkwanir,’ tenen dib teneranse ba, Erci nisi lebdeibmanou deyok aryi, niryi Er si erebdeiboka lak enun.” Ura, nunbabyi neiktoto Er Imtamnyi biti, “Lebdeibkwansir,” tenen dib tenenub deyok aryi, Er si erebdeiboka lak enub. 14Ati, nunci, “Nun Nai Imtamnyi bira nun Du Yesus dibmounyi bisi kam bukeibmounyi biryi nunbabyi kam bukeibkwansir,” tenen bingnubci, Er Imtamnyi si erebdeiboka lak enub. Ara, nunbabyi sunbabyi nun Du Yesus dam kun nang kunub asi nun Nai biryi nun Du Yesus biriman aryi kam bukeibkwansir. Bukeibsici ura, Er Imtamnyi biryi nunbabyi sunbabyi erebdeiboka Er urasintam aryi tikeibkwansir. 15Ati, nunda Teleb Uram eterebde banub nang ara iya mambul dinyi ton obmasinto dinyi ton doronub ara talyi ati kum doronub. Eda, sunci sun kanya dam aryi kam kurdeirisin dinyi dobdobkwandum ati, nunci obmasinto dinyi doronub. Ara, nun Nai biryi kisal dakoka lebdeibde barur ara ninyi ilinto tabakde banungci, dib tenenung. Uca, ninyi ilinto aryi tabakde banungci, nun Du Yesus bisi dib tenebtingiryi, Er Imtamnyi si weik ebting.
16Ati, nunci, “Er Imtamnyi biryi nunsi kam bukeibkwansir,” tenen bingnub deyok aryi, nun mambul kanya kum bonub. Nun nong ara mitang kuboka tabakdongo-tabakdongo dibmanto dinyi ato kimnansir bok, nunci uki-uki nirya kubde banubci, nun kanya dam aryi ukuryok dinyi kam kurdeirisin dinyi doronub. 17Ara, ninyi aryi nunsi mambul weik kiminingnansing bok, nunci a mambul kurdeirisin dinyi ati, “Caknam dinyi aca,” tenen, “Tiya dinyi aca,” tenen bingnub. Nunci a mambul dinyi boramib deib aryi Er Imtamnyi biryi nunsi utotoa bisibkaboka iya ererdeirisin dinyi karebkwansir. A karebkwansir dinyi ara iya milil dinyi kurur ati, nunci kiklibdeiboka a mambul kimdeirisin dinyi nirya ati, “Tiya dinyi aca, ur bobkwayeb,” tenenub. 18Ati nunci, “Asing eibmanto dinyi ara tiya dinyi aca,” tenen asing eibmanto dinyi nunukeiboka kum teneinub. Eda, nunci, “Asing eibman kum dinyi ara iya kurur dinyi,” tenen asing eibman kum dinyi asi nunukeiboka teneinub.
Currently Selected:
2Korintus Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
