2Tawarikh Uram 9
9
Syeba mutuk sien ner aryi sienyi Salomo bisi diryanmou uram deyok
9:1-12
(1Raj. 10:1-13)
1Ura, Syeba mutuk sien ner kekeramwe uca, “Sienyi Salomo bira etekdob bingna dinyi Iya Erebdobnyi biryi karebwe ba, bikwe,” ena kekebmou. Ura, Syeba mutuk sien ner ab, er yin doun nang ab, bisam unta deici ukoka tong teleb co yung toto, dengna weik keil toto boboka Yerusalem atei Salomo dam yanmou. Sirya yanmou ura, Syeba mutuk sien ner biryi, “Ukuboka-ukuboka asibdetinyi,” teneramwe dinyi nirya Salomo bisi asibmou. 2Uca, Salomo biryi a sien ner asibmou dinyi ara er walwal dinyi ton kum eda, nirya liliboka uram dekeibmou. 3Ba, a sien ner ara Salomo etekdob bingna bukdobto bikamwe dinyi ab, ilila ai doramwe dinyi ab, asing eibmouci, sirya bikmou. 4Ani, Salomo er ai wa in nang aryi yina co lamna deici deiboka karebmai dinyi ab, er me kiknin nang aryi me kikniboka karebmai dinyi ab, er ai wa in nang sun ongon aling ongorona telebto ongobmai dinyi ab, er ai wa in nang sun ai kubmai dinyi ab, Er Iya Erebdobnyi biti dama deiboka keil lamna deici deiriramnyi dinyi ab asi iya telebto akwe ukubmai dinyi asi asing eibmou. Ato kubmai ba, a sien ner er kanya mantanakdobmou.
5Ura, a sien ner biryi Salomo bisi ato ebmou, “Ni mutuk ninyi aryi, ‘Salomo bira etekdob bingna bukdobto bikuryi, bona ilinto talerurci, yuk-yuk dinyi ukurur,’ ena akwe kekekunun. 6Ato enung deyok aryi, ‘Tola ati enung,’ tenekunun deyok aryi ni kan dam yanman. Uca, diba, ni asing eiboka, ni amol kobdob kekebne ati, dib etekdob dinyi bukdobto bikumwe. Ninyi uram aryok enung ba, kekekunun uca, ni asing eibkinaryi kan bingni dinyi ni amol kekebkin ati, ura sirya bikatabkin. Diba, kan bingna dinyi ab, kan bona talena ab, telebto kuboka ai dorum dinyi nirya ara ni kekeranse to nirya bisibkaboka, kum kekeranse dinyi ababyi nirya kubmarim. 7Kan talebumwe mutuk ninyi ara telebto akwe kunung ati, sun kanya kilkil asa kuna teleb. Ani, kan dam wa inung nang ababyi, sun kanya kilkil kuna teleb. Ara, kanci etekdob bingni dinyi deici aryi eteresur dinyi nirya bingnung ati ebman. 8Ati, kan Molorumnyi, Iya Erebdobnyi bisi si erebman. Ara, Kan Molorumnyi biryi kan atei Israel ninyi asi, ‘Kum danana kum kubkwaming,’ tenen kanyi deiboka boukwe kurur. A deyok aryi kan etekdob bingna karebkou ba, bikumci, sun sienyi kibubumci, yan memen uram kiknibdeiboka, mundu lobdobto akwe kunurumci talebumwe. Ati, niryi kan molorumnyi Iya Erebdobnyi bisi si weik erebman,” ebmou. 9Ura, a ner Syeba mutuk sien ner biryi Salomo bisi keil emas yubwa ikin kiklina 4.000 kilogram baryi karebmou. Ani, yuk dengna weik keil toto, tong teleb co yung toto ilinto karebmou. A ner Syeba biryi Salomo bisi tong teleb co yung a karebmou to ara yuk nang aryi da ton ukubde ton kum karenung to kuboka karebmou. 10Ani, Tirus mutuk sienyi si Huram wa in nang ab, Salomo er wa in nang ab aryi, Ofir mutuk aryi emas ab, dengna weik keil yala yuk-yuk ab, dengna weik co si cendana ab ton boyanmai. 11A co cendana boyanmai ara Er Imtamnyi ai kweitata ab, sienyi er ai kweitata ab kiknibkwamwe ati boyanmai. Ani, a co ara mot semni nang bilul si kecapi ab, gambus ab kiknibkwamnyi ati boyanmai. A ukubmai to ara Yehuda yala nang mutuk atei ara ato ton kum kuramnyi to asi ukubmai.
12Ura, sienyi Salomo biryi Syeba atei sien ner asi erti yanman ninyi ati er bona kareramwe to kuboka karebmou. Ani, tubto Syeba sien ner aryi yuk bona ababyi molobtabakmou ba, karebmou. Salomo biryi a ner asi ato kuboka karebmou ba, a ner er milibmai ba, yanmai nang ab er atei bindobmai.
Salomo wa iramuryi, bona miningdamwe deyok
9:13-28
(1Raj. 10:14-29; 2Taw. 1:14-17)
13Sienyi Salomo bira kwalina kwibdongobni tok ara emas 23.000 kilogram baryi akwe tuba doramwe. 14Ba, tonda bona dengtamuna nang aryi boyangaramnyi nukman kumto kuramwe. Ba, Arab mutuk weik sienyi ab, er amwetam sien nang ab tukwe dengna molobkirikoka, buluboka Salomo biti boyangaramnyi dinyi yubwa ababyi nukman kumto kuramwe. 15Ura, sienyi Salomo biryi, “Yin doun nang ting ato mar lilirona yubwa 200 baryi kiknibnindarur,” eboka arukmou. Ba, co aryi ilila mar lilirona akwe, emas aryi teikokabiryi, ila lilibdeiboka kiknibmai. 16Ani, tonda mitik-mitik mar lilirona ababyi, emas ikin 3 kilogram baryi aryi keil teikoka, yubwa 300 baryi kiknibmai. Ura, sienyi Salomo biryi anda kiknibmai ting nirya ara ai si, “Hutan Libanon Ai,” eboka doamwe ai minikmou.
17Ani, sienyi Salomo biryi sien nang bun sokon weik dinyi kiknibmou. A sien nang bun sokon kiknibmou ara ilila bisam si gajah si yang aryi kiknibmou ura, tabtabingna kum emas aryi nunuboka denebmou. Ura, dongtam kubkub-kubkub buntam bitinyi ara burbinaryi taruk deirin ai kiknibdeibnin yibinamwe. 18A bun sokon dina-dina siriktam babyi-kwanimtam babyi yu kam singa atoa kiknibnin yibinmou. Ani, a sien nang bun sokon kiknibmou ara kweitata nabaryi dakoka kiknibmou. Ba, a bun sokon dam ara yan yanina yuk kiknibmouci, emas aryi nunuboka denebmou. Ba, a bun sokon bukoka yan yanin dikum ara bun sokon ab, tentok kibdeibmou. 19Ba, a bun sokon kweitata dakde welebmou tok nirya ara siriktam babyi, kwanimtam babyi yu kam singa atoa akwe kiknibdeibnin binmou. Ara, yu kam singa nirya ara amolbaryi kiknibdeibnin yibinmou. A bun sokon kiknibmou ara yuk mutuk-yuk mutuk sien nang buramnyi dikum aryi a kiknibmou ato bun sokon ton kum kikniramnyi. Eda, Salomo biryi a kunum tentok kiknibmou. 20Ba, Salomo er me yin meyok ab, yuk-yuk keica nirya, “Hutan Libanon Ai,” eboka doamwe ai deiriramwe keica nirya ara emas aryok nunuboka kiknibmai. 21Ura, sienyi Salomo bibabyi er ilila co ngun-ngun deibdob aryi, Tirus atei sienyi si Hiram co ngun-ngun ab aryi sun tonkwa antanibdobnaryi irandei. Ba, a ilila co ngun-ngun aryi uki kwalina winiryi kwalibni tok Tarsis atei aryi kuboka sienyi Salomo biti emas ab, perak ab, tonda bisam gajah er dengna weik si ab, weinya si kera ab, maka merak ab boyangaramwe.
22Salomo bira tukwetam sien nang kununga nirya kiklibman kum tonyinun kuramwe. Salomo, yuk sien nang bisibkaboka, erda erebdobnyinun kuramwe. Ara, etekdob bingna bukdobto bikamwe dinyi ton, bona talena ilinto taleramwe dinyi ton aryi, erda erebdob sienyi nun kuramwe. 23Tukwetam a talak aryi sienyi kiamnyi ninyi ara Salomo dam yandoka Imtamnyi biryi kareamwe ba, er kanya dam etekdob bingna dinyi asi kekeryangaramnyi. 24Ba, Salomo er etekdob bingna bukdobto bikamuryi, uram eramwe dinyi kekeryanmangiryi, emas toto, perak toto, ongon aling toto, ninyi on yin toto, tong teleb erande co yung toto, bisam kuda toto, bisam keledai toto boyangaramnyi. Kwalina o kwali-o kwali baramnyi nirya bulubde baramnyi.
25Ba, Salomo er bisam kuda dongoramwe ai yubwa 4.000 baryi ab, er kongkong eboka boyiban kereta dongoramwe ai 4.000 baryi ababyi dobmou. Ba, a kuda ab, kongkong ena ab bon nang yubwa ara 12.000 baryi wiboka wa kareamwe. Ba, a kuda ab, kereta ab ilinto nirya ton er taleamwe mutuk weik atei asi kereta deirin weik atei ton deiriramwe, ton kereta ara er kuramwe atei Yerusalem dam deiriramwe. 26Ba, Salomo er taleamwe mutuk weik atei sien nang nirya ababyi ercok taleamwe. Andakatei sien nang ara me si Efrat kin aryi kuboka, Filistin nang mutuk aryi kuboka, Mesir mutuk wiliba dam sekoka taleamwe. 27Ura, Salomo Yerusalem atei sienyi kiboka taleamwe talak ara dengna weik keil perak ara keil sirik limdon ilinto kiknibde deiriramwe. Ani, dengna weik co aras ara co sirik si aras kuna mutuk kon talyi kurande to boboka buluramwe. 28Ba, Salomo er bisam kuda boyangaramnya ara Misraim mutuk ab, yuk-yuk mutuk ab aryi boyangaramnyi.
Salomo dibmou deyok
9:29-31
(1Raj. 11:41-43)
29Yerusalem sienyi Salomo er yuma aryi kubde yangaramwe ani, sirya kuamwe to nirya liliboka kerek sekamnyi ara Imtamnyi uram ermurunanyi si Natan biryi kerek sekamwe dinyi ab, Silo mutuknyi si Ahia biryi kerek sekamwe dinyi ab umbura ara liliboka sekamnyi. Ani, kunumna deici asing eibmaci to lak eramunyi si Ido biryi kerek sekamnyi. Ani, nabi Ido kerek sengna umbura Yerusalem sienyi yuma kiamunyi Nebat mi si Yerobeam ukuramwe to deyok ababyi liliboka kerek sekamnyi. 30Ba, Salomo Yerusalem sienyi kiboka Israel ninyi nirya taleamwe kwalina ara kwalina 40 baryi kwaliamwe. 31Ani, Salomo dibmou ba, er nai Daud kuramwe atei dam tukwe dongobmai. Ura, Salomo er mi si Rehabeam er nai unuboka Yerusalem atei sienyi kibmou.
Currently Selected:
2Tawarikh Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
