2Tawarikh Uram 8
8
Salomo biryi yuk-yuk dinyi ababyi kiknibmou deyok
8:1-18
(1Raj. 9:10-28)
1Sienyi Salomo biryi Er Iya Erebdobnyi ai ab, sienyi er kun ai ab doramwe ani, kwalina 20 baryi kibmou ura, sirya dobmou. 2Ura, Tirus mutuk sienyi si Hiram biryi Salomo biti eamwe weik atei-weik atei asi tubto dobtabakoka weik atei lika dobmou. Ura, Israel nang ton bokoka, “Anda atei bindoka kubdarur,” eboka arukmou ba, anda weik atei bindoka kubmai. 3Ura, Salomo biryi Hamat-Zoba atei asi mar boboka arabdobmou. 4Ani, yini mutuk dam weik atei si Tadmor ababyi sasiboka, Hamat mutuk kuramnyi utotoa miningni atei nirya ababyi doboka sasibdobmou. 5Ani, Salomo biryi Bet-Horon me utam babyi, me youkwetam babyi nirya lika doboka, lika bisik bublan botobmouci, tirikdeibman ani, kukeiabni ani, kimni lika bublan kiknibmou. 6Ani, Baalat atei ababyi sasibdeibmouci, sienyi er kongkong eboka boyiban keica ab, bisam kuda deici bukoka yiban bisam toto ab dobmou. Ara, Yerusalem atei ab, mutuk Libanon kon ab, er taleamwe mutuk nirya ab, “Ukuboka dobkwan,” teneamwe tok nirya kunuboka dobmou. 7Ba, Kanaan mutuk yoka nang kobdoba ara Het mutuk ninyi ab, Amori mutuk ninyi ab, Feris mutuk ninyi ab, Hewi mutuk ninyi ab, Yebus mutuk ninyi ab, 8ara Israel ninyi aryi orkiriramnyi ani, takloamnyi ninyi kuramnyi. Anda mutuk atei nang ara Salomo biryi arukmou ba, sun wa il don nang kibmai. Anda atei nang ara uku talak ababyi sun il don nang kimnung. 9Bok, Salomo biryi Israel ninyi asi, “Wa ibdarur,” eboka dimna ara ton kum kuramwe. Eda, Israel nang ara er yin doun nang sien nang kimna ab, yin doun nang kimna ab, bisam kuda deici bukoka boyiban nang ab, kongkong ena boyiban nang ab akwe kimnamnyi.
10Ba, Salomo dam wa in sien nang yubwa ara 250 nang aryi il dimnamnyi ba, il doramnyi ninyi asi kalingdamnyi.
11Ura, Salomo er ner, Firaun nebnyi Daud minob kuramwe ai dam kuramwe ani, Salomo biryi er sien atei kobdoba dam bobinmou. Ara, Salomo er kanyatam aryi ato tenebmou, “Israel sienyi Daud minob kuramwe atei dam kuna ara, ‘Ukubdarur-ukuna mem,’ en uram deiamnyi dikum ara yuk mutuk ner a kuboka talbalirdongona malyito,” tenebmou ura, er ner yuk atei er sien ai kobdob bobinmou.
12Ura, Salomo biryi ukuryok dobmou Iya Erebdobnyi ai dam asi, domba bisam oboka dama deiboka uk dan keil lamna deici dama deibmouci, uk dabmou. 13Er Iya Erebdobnyi biryi Musa deici ebdeiamwe ba, Musa biryi ato kerek sekamwe. “Uki ta tum berekci tum ab, ukuryok wala dobci tum ab li doboka dama deirinkwandarur! Ani, tonda tentok kwalina ara liki winiryi weik li donkwandarur. Ara, Roti Kwaning Bungbung Ena Dongona Kum Roti tum ab, Roti kiknin Dinyi Gandum Kin tum ab, Co Bok aryi Tiya ati Durubdeiboka Kun Ai tum berekci tum ab ara li donkwandarur!” eamwe ba, kerek sekamwe to kunubmou. 14Ani, er nai Daud biryi, “Er Imtamnyi ai wa in nang ara ato-ato kubkwanung,” eamwe to kunubmouci, Imtamnyi ai wa in nang imam nang ab, Lewi yala nang mot semna nang ab, Lewi yala nang imam nang wa irmilin nang ab, bisik bublan dam kalingna nang ab, asi, “Ukuboka-ukuboka ibkwandarur,” eboka wa karebmou. 15Ba, imam nang ukunkwamnyi to ab, Lewi yala nang ukunkwamnyi nang ab, Imtamnyi ai mining damnyi keica liliboka deirina ab nirya Daud ebdeiamwe to nirya kunubmou. 16Ura, Salomo biryi arukmou to Er Iya Erebdobnyi ai yuma keil deiboka wa ibkalibmaia aryi kuboka dobde baramwe ani, sirya ai bublan kukmaici, Er Iya Erebdobnyi ai sirya ukuboka dobmai.
17Ura, Salomo bira Edom mutuk dam Ezion-Geber binmou. Ani, akiryi kuboka, me kwan kubkub doramnyi atei si Elot binmou. 18Ba, weik sienyi Hiram biryi Salomo bisi ai donanyi Huram er mabwe ab, me deici yiban aia bona bingdamnyi nang ab bokdonokmou ba, Salomo dam yanmai. Ura, Salomo mabwe ab, Huram mabwe a yanmai nang ab, me deici aia bisik aryi Ofir mutuk binmai. Ura, Ofir mutuk aryi, emas ikin ara 15.000 kilogram baryi Salomo bisi boyanmai.
Currently Selected:
2Tawarikh Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
