2Tawarikh Uram 10
10
Yehuda yala nang bokoka sien nang yuk-yuk kibmai deyok
10:1–11:4
(1Raj. 12:1-24)
1Ura, Rehabeam bisi sienyi tikeibkwamai ati, Israel ninyi nirya buluboka Sikhem atei akwe bulubmai. Ba, Rehabeam bira Sikhem atei binmou. 2Ani, Nebat mi, Yerobeam bira Salomo biryi obmanto kunmou ba, cukoka Mesir mutuk bindamuryi, Mesir dam kuramunyi bibabyi, Mesir mutuk aryi kuboka Israel mutuk yanmou. 3Ura, Israel mutuk me utam kuramnyi ninyi aryi, Yerobeam bisi nabmai ba, yanmou. Ura, tonkwa anaboka, Rehabeam bisi binmaici, ato ebmai. 4“Kan nai Salomo biryi ikin kibdongoansou ba, ikin tuba bobde kunub. Ati, nai sienyi Rehabeam, kanci caknam kibdeibsurum. Ukubdeibsiminyi ura, nunda kan ebminyi tok lamlamak eboka kununkwankib,” ebmai. 5Uca, Rehabeam biryi sunsi ato ebmou, “Ni kanyi teneibdeniryi ebkwansin. Ati, amdi tum aryi yandarur,” ebmou. Ba, a ninyi ara sun atei bindobmai.
6Ura, Rehabeam biryi er nai Salomo ab minob wa tonkwa iramnyi nang asi bulubdeiboka ato asibmou. “Nai yabwe a yandoka asibmaning dinyi ara una kuboka dekeibkwaman do? Sunci eterebnumunyi ba, sun uram dekeibkwan,” eboka molobmou. 7Uca, sunci ato ebmai, “Kanci a nang asi uram dekeibkwaminyi ara yu asa uram ena mem. Eda, namin asa uram ebkwandum. Ba, sun kanya teleb kubci ura, kan taleaminyi mutuk nang iya kubkwanung,” ebmai. 8Uca, wis yoka nang ebmai uram kununa kum uca, tubto er kikib nang ab, er ab tonkwa wa iramnyi nang ab asi asirbinmou. 9Ura, bindoka ato ebmou, “Ni kwit yabwe, me utam nang aryi ni dam yandoka ato eboka asibmaning. ‘Kan nai biryi ikin takubdeiansou dinyi ara kanci caknam kibdeibsurum!’ eboka molobmaning,” eboka asibmou. 10Uca, er kikib nang ab, er ab tonkwa wa iramnyi nang ab aryi ato ebmai, “Kanci, a yandoka molobmongwe ninyi asi ato ebdum! ‘Ni te dumwe ara weik taruk dumwe bobse. Ni nai er barwe ara mitang barwe boamwe,’ ebkwandum. 11‘Ati, minob talak ni nai biryi ikin kareansou ba, ikin dobde kundarur. Bok, ukura niryi ikin tabakoka bobdeibkwamasin. Ni nai bira namin litukna aryi kuaransou bok, nira kat keica besi taci belbelerdaranca aryi kulabkwansin,’ ebkwandum,” ebmou.
12Uki bitinyi kunmai ani, uki winiryi tum, sienyi biryi, “Amdi tum yandarur,” ebmou tum berekmou ura, Yerobeam ab, me utam nang ab, Rehabeam dam tubto yanmai. 13Uca, sienyi Rehabeam biryi wis yoka nang ebmai to kununa kum uca, 14kam nang er kikib nang aryi ebmai to kunuboka, mikib asa aryi ato ebmou, “Minob talak ni nai biryi ikin kareansou ba, ikin dobde kundarur. Bok, ukura niryi ikin tabakoka bobdeibkwamasin. Ni nai bira namin litukna aryi kularansou bok, nira kat keica besi taci belbelerdaranci litukna aryi kulabkwansin,” ebmou. 15A sienyi Rehabeam me utam nang molobmai to kununa kum kubmouci, “Ikin tabakoka takubdeibkwamasin,” ebmou ara Er Iya Erebdobnyi biryi teneamwe to kunubkwamwe ati ato kubmou. Ara, minob talak aryi Imtamnyi uram ermurunanyi Silo mutuknyi si nabi Ahia biryi kunumna bisik aryi Iya Erebdobnyi biryi ersi eamwe ba, kunumna minob kunubdeiamwe. Ara, Nebat mi Yerobeam deyok ati kunubdeiamwe to kunubmou.#10:15 Er Iya Erebdobnyi biryi minob ura nabi Ahia deici ato ebmou, “Rehabeam taruk dam aryi iya ati sienyi kiboka talen dinyi ara dobokabniryi, Yerobeam kanti atei takubaryi karebkwankin,” ebmou.
16Ura, Israel ninyi nirya dinmai uca, sienyi biryi sun molobmai to kunurdeirina kum kubmou ura, sunci ato eboka uram dobmai,
“Daud biryi telebto ton kum kurdeirisurur.
Isai mi iranci wa yuk nang ton kum donkwayeb.
Ati, Israel ninyi nirya ai yuk-yuk baronub!
Daud mi er yuk sienyi kiboka, er yala nang asi kalikoka talebdobkwande!”
eboka uram dobmai ura, sun atei yuk-yuk binsekdobmai. 17Ato kuboka binsekdobmai deyok aryi, Rehabeam bira Yehuda yala nang kuramnyi weik atei-weik atei dem asi sienyi kiboka taleamwe. 18Ukuboka Israel nang binsekdamnyi ba, Yehuda yala nang akwe Rehabeam sienyi kiboka taleamwe. Bok, tubto, Israel nang yala asi il dimkwamunyi tentok wiboka bokdonokmou. Anyi si ara Hadoram bokdonokmou. Uca, anyi bisi Israel nang aryi keil aryi kulaboka obmai. Ba, sienyi Rehabeam bira ola er kongkong ena deici bukoka Yerusalem atei yandobmou. 19Ato kuboka Israel nang aryi Daud deibdoba asi mar iramnyi tok ukubabyi tuba, mar irdanung.
Currently Selected:
2Tawarikh Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
