2Tawarikh Uram 7
7
Er Imtamnyi ai sirya dobmaici, Imtamnyi ai bublan kukmai deyok
7:1-3
1Er Salomo biryi Er Imtamnyi bisi si weik eboka molonmou ani, sirya dangdou ura, imtam aryi uk buk yuryanmou. Ura, Er Imtamnyi biti dama deirin co lamna deici nong nirya uk dana ati dama deibmai bisam lembu ab, bisam domba ab, yuk dama deirin dinyi ab asi uk yaliboka yibdobmou. Ura, Er Iya Erebdobnyi milil ibarya aryi akai asi dukubmou. 2Ba, Er Iya Erebdobnyi ibarya akai dukubmou deyok aryi, Imtamnyi ai wa in nang imam nang ara akai wengbinman kum kubmou. 3Ura, sun Israel ninyi nirya aryi uk buk imtam aryi yuryandoka domba bisam yaliboka yibmou dinyi ab, Er Imtamnyi milil ibarya akai dukubmou dinyi ab dinmai uca, co yangamna deici asi sun kutam sunsunubdeiboka, sun urasin tukwe dibdongoboka, Er Iya Erebdobnyi bisi, “Nun Nai teleb, nun babya,” eboka kiron mot sebmaici, si weik ereboka kibdobmai. Ara, ato eboka mot sebmai, “Er Iya Erebdobnyi bira iya dibnyi kurur! Er Iya Erebdobnyi biryi boukwe kimsurur dinyi ara tangna kum uca, iya boukwe kibde basurur,” eboka mot sebmai.
Sienyi Salomo ab, Israel ninyi ab aryi Er Imtamnyi biti bisam oboka dama deibmai deyok
7:4-10
(1Raj. 8:62-66)
4Ura, sienyi Salomo ab, sun Israel ninyi ab aryi, bisam domba ngang sekoka Er Iya Erebdobnyi biti dama deibmai. 5Ara, Salomo biryi bisam lembu sapi yubwa 22.000 baryi oboka dama deibmou. Ba, bisam kambing ab, domba ab yubwa ara 120.000 baryi oboka dama deibmou. Bisam ukuboka obmai ura, Er Iya Erebdobnyi ai bublan kukmai. 6Ura, imam nang ara sun tingni olong tikmai ura, Lewi yala ton nang lilim ena bilul kwemni nang ababyi sun imam nang urasin dam tikokmai. Ara, Daud biryi minob kikniboka Er Iya Erebdobnyi si weik enmariryi, douboka semnamwe keica asi douboka mot sebmai. Ara, ato eboka sebmai, “Er Iya Erebdobnyi bira iya telebnyi dib kurur! Erci, busul kuboka boukwe kimsurur dinyi ara iya kubde binkwande,” eboka a mot sebmai. A nang ara Daud kuramwe talak ababyi, sokon lordeiriramwe ba, ukubde mot semnamnyi. A talak ara imam sun Lewi yala nang urasin dam tikokmai ura, lilim ena si nafiri aryi uboka lilim ei ura, sun Israel ninyi nirya tikokmai.
7Ura, sienyi Salomo biryi Bait Allah ai dam, noutam keta asi Er Imtamnyi biti yuk wiboka dobkarebmou. Ura, a dikum asi Salomo biryi bisam domba toto, sapi toto, ngang sekoka dama deibmouci, uk dabmou. Imtamnyi biti dama deiboka uk dan co lamna tembaga aryi kikniamnyi co lamna ara dama deirina yala mitik kum aryi kikiman kum ati, Imtamnyi ai bublan dam keta noutumang dikum ababyi dama deibmai. 8A talak aryok Salomo ab, sun Israel ninyi nirya ab buluboka, tonkwa aryi uki tabaryi mabingnyi ura, co bok aryi tiya ai doramnyi li si Hari Raya Pondok Daun dobmai. Sun Israel mutuk ninyi a bulubmai mutuk ara Hamat mutuk ban bisik eitam kuramnyi ninyi aryi kuboka, me youkwetam Mesir mutuk wiliba kuramnyi ninyi nirya bulubmai. 9Ura, uki tabaryi nirya Er Imtamnyi ai bublan kungni tum li ab, co bok ai aruma don tum ab li yala bitinyi dobmai. Ani, uki inbaryi ara sun Israel ninyi nirya tubto neik dikum buluboka sirya li dobmai. 10Ani, tanggal 23 tum kimbinmou tum ara sienyi Salomo biryi sun Israel ninyi nirya asi, “Ur bindobdarur,” ebmou. Ara, Er Iya Erebdobnyi biryi minob sienyi kiamunyi Daud ab, Salomo ab, sun Israel ninyi ab asi boukwe kimdan kunurdeiriramwe dinyi ati, sunci kilkil kanya ab, karyi asa ab sun atei yuk-yuk binmai.
Er Iya Erebdobnyi biryi Salomo bisi liki bitinyi dinyi lak kibdanmou deyok
7:11-22
(1Raj. 9:1-9)
11Ukuboka Salomo biryi Er Iya Erebdobnyi ai umbura ab, sienyi er kun ai umbura ab, er kanya dam aryi, “Ukuboka dobkwan,” teneamwe to nirya kunuboka dobmou.
12Ura, lukunda aryi Er Iya Erebdobnyi biryi tubto Salomo dam asi yanmouci, ato ebmou, “Kanci Nisi molobmanirim dinyi sirya kekebmanci, a dobmanirim ai ara Niti dama deirin ai kibdeibman. 13Aminda aryi sangkuna mo dorkwetena kum kubmunyi talak ab, tukwetam betekoka arande dinyi nirya asi kwising dobkwetebnyi ba, yibdobci talak kum, Ni mabwe sun kankan dam asi, lubna youn karebnyi talak kum ara, 14Ni mabwe kibse ninyi sun kanya luknubdongobingnyi ura, Nisi molon deici aryi Ni urasin ingkiringyankwanung. Ura, sun malyito kuramingnyi dinyi takingiryi, Nisi molobningnyi ura, Niryi imtam aryi kuboka sun molona kekeboka, sun malyi kun dinyi kilibkwan. Ura, sun kuraming mutuk ababyi tubto teleb kibdeibkwan. 15Uku talak ara sunsi asing dirlilinkwansin. Ani, akai dam yandoka Niti molonmanumunya amol takeiboka sun molona kekenkwansin. 16Ukura Niryi wiboka akai asi Ni ai kibdobne. Ba, Ni si ara akai dam iya kunkwande. Ani, Niryi akai asi tuba-tuba dirlilinkwan. Tonda, akai asi Ni kanya iya deibkwan. 17Ba, Salomo kanda, kan nai Daud biryi kuramwe to kuboka, Ni dam kuraminci, Ni arukmakinyi to ab, Ni yan memen uram ebdeibkinyi to ab asi nirya kunuraminyi ura, 18Niryi kan nai Daud dam asi, ‘Kan deibdoba akwe Israel mutuk sien nang kibde binkwaming,’ eanse dinyi kunubdeibkwan. 19Bok, kanci Ni uram dakbisiboka Nisi taklobniminci, yuk kwemdeina asi molorbiminyi ura, 20Niryi kansi sunti karebsise mutuk aryi bai donokwankin. Ani, akai wiboka Ni ai kibman ai asi taklobkwan. Ba, yuk mutuk nang aryi, ‘Israel nang sun molonungnyi biryi ukubwe,’ eboka nukingiryi, akwi tubkwaming. 21Akai iya im dub ai dobumwe ara ninyi yibanmangiryi asing dinung ara sun ilil kurur. Bok, sangkuna Ni dam takloboka yuk kwemdeina kanyi bobminyi ura, Ni ai taklobokniryi, a mutuk kum daneibnyi ura, ato ebkwaming, ‘Una deyok ati, Imtamnyi biryi akai ab, a mutuk ab asi ato kubwe do?’ ebkwaming. 22Ura, ato ebkwaming, ‘Sun Nai Iya Erebdobnyi Mesir mutuk dam aryi boyanamunyi takloboka yuk kwemdeina molonung dinyi ati ikin kareboka wenebwe,’ ebkwaming” ebmou.
Currently Selected:
2Tawarikh Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
