2Tawarikh Uram 6
6
1A talak aryi Salomo biryi ato ebmou, “Nai Iya Erebdobnyi Kanda, ‘Duwa kunuk dangnanda kankan asi kubtinyi,’ tenerumnyi kururum. 2Asi ukura Nai Kan iya kubde binkwandim ai sirya dobmakin,” ebmou.
Er Iya Erebdobnyi biryi minob uram talak eamwe uram asi Daud dam kunubdeibmou deyok
6:3-11
(1Raj. 8:4-21)
3Ukuboka sienyi Salomo biryi Er Iya Erebdobnyi bisi sirya molobmou. Ura, er urasin dangubokmouci, sun Israel ninyi nirya tuba a tikmai asi uram ebmou. 4Ura, ato ebmou, “Nai Iya Erebdobnyi, Israel nang molonubnyi, Ei, ni Nai ni babya! Niryi Kansi kibdobmakin. Minob talak aryi, Kan Iya Erebdobnyi si bambul deici aryi uram eboka, ni nai Daud dam asi uram ebdeiamoumwe. Ani, ukura ni Nai Iya Erebdobnyi, Kan taruk mikib aryi, Kan kun ai sirya dobmarim. 5Minob ura ni nai Daud dam asi Kanci ato eamoumwe, ‘Ni Iya Erebdobnyi biryi sun Israel ninyi asi Mesir dam aryi taruk taleboka boyanansise talak ara sun Israel yala ninyi weik atei-weik atei kundarura kankan dam aryi, “Nira a weik atei asi Ni atei kibkwan,” eboka wimna ton kum kuanse. Ani, sun Israel ninyi kankan dam aryi, “Anyi bisi Israel nang sienyi kibkwande,” eboka Ni ton wimna kum kuanse. 6Bok, ukura Yerusalem atei asi Ni atei kibnyi ura, Ni nermabwe mabwe Israel ninyi taleboka kalikwandanyi bira Daud bisi wibnyi ba, sienyi kibkwande,’ eamwe. 7Ni nai Daud biryi, ‘Er Iya Erebdobnyi, Israel nang molonungnyi ai dobkwan,’ tenebmouci, kiknirminingmou. 8Uca, Er Iya Erebdobnyi biryi ato ebmou, ‘Kan tenebmarim to ara telebto kanya tenebmarim. 9Bok, kanci akai dona kum kubkwandim. Eda, kan aminda deibkwandim mi aryi Ni si weik erenkwaning ai dobkwande,’ ebmou. 10Ati, Er Iya Erebdobnyi biryi ato eamwe to kunuboka Ni nai Daud sienyi bukamwe olong ara ni er mi Salomo bisi Israel mutuk sienyi kibmanci, Niryi akai Er Iya Erebdobnyi, sun Israel ninyi molonanyi Er si deici aryi ai dobman. 11Er Imtamnyi ai sirya dobmanci, Er Iya Erebdobnyi ab, ninyi sirik ab uram talak lingdeirin uram kerek sekoka co sangkol umbura sirya deibman,” Salomo biryi ebmou.
Israel sienyi Salomo biryi Er Iya Erebdobnyi bisi si weik eboka molobmou deyok
6:12-42
(1Raj. 8:22-53)
12-13Ura, Salomo biryi tembaga aryi ninyi tikoka ninyi eteren co lamna kikniamwe. A co lamna cangtam babyi, ilatam babyi kiklina ara 2,2 meter baryi kikniamnyi. Ba, a co lamna dangdang cang im dub kiklina ara 1,3 meter baryi kikniamwe. A co lamna ukuboka Er Imtamnyi ai baitam keta dam asi kiknibdeiamwe. Ura, Salomo biryi ninyi eteren co lamna weleboka Er Imtamnyi biti tembaga aryi kikniamnyi dama deirin co lamna urasintam tingbinmou. Ba, Israel ninyi dinmai bok, Salomo bira a co lamna dub asi kutam sunsunubdongoboka Er Iya Erebdobnyi bisi taruk imtam ereboka molobmou. 14Ura, ato ebmou, “Nai Iya Erebdobnyi, Israel nang molonungnyi, Nai Kan kurum atonyi imtam babyi, tukwetam babyi ton da ton kum kunung. Kanda minob uram talak eaminyi dinyi tuba teneiraminyi ani, kunurdeirirandimnyi kurum. Nai Kanda, Kan mabwe Kan urasin dam kuboka, Kansi iya busul kuboka sun kanya kan kikwe deirirankingnyi nang asi boukwe tuba kimdumnyi kurum. 15Nai, Imtamnyi Kanci ni nai Daud bisi Kan uram deici aryi uram talak minob eamumwe to arub sirya kunubdim. 16Ati, Nai Iya Erebdobnyi, Israel ninyi molonungnyi, ukura ni nai Daud dam asi, ‘Kan mabwe odei-odei binkwandum ara ton sengdona kum uca, Israel sien nang akwe kibde binkwandum! Ara, kanci Ni urasin dam aryi Ni uram kunurandim to kan mabwe ababyi, Ni uram kunun nang kibingnyi ura, sunci sien nang akwe unubdongobnin binkwandum, ton sengdona kum kubkwande,’ eboka uram talak eamumwe. 17Ato eboka, Kan wa inanyi Daud bisi eamumwe dinyi ara iya dib uram eamumwe aryi ukura sirya kunubdeibdim.
18Bok, Nai Kanda, ninyi sirik ab tonkwa tukwetam kubkwandim ara dib kubkwandim do? Im karen yangabwe tok nirya ara Kanda kikiman kum kubte. Ni a dobman ai ara wanok Kan akai kuna kikiman kum. 19Ati, Nai Iya Erebdobnyi, ni Kan wa inanyi biryi kan dam asi a molobman dinyi kekeboka kunubdeibnurum. 20Ati, Nai Imtamnyi, Kanci, ‘Ni si weik erenkwanurum ai dobnindarur,’ eamumwe ai asi lukunda babyi, kitingtam babyi tuba kalingmuruna teleb. Nai, Imtamnyi ni kan wa inanyi biryi Kan ai dam aryi, Kansi molobmakin dinyi kekeboka kununurdeirina teleb. 21Ani, Kan molon nang Israel nang ab, ni Kan wa inanyi ab aryi akai dam yandoka molonmabya kekesina teleb. Nai Imtamnyi nun molona asi, Kan kurandim ai imtam aryi kekebsiminyi ura, nun malyi kun dinyi libsurum.
22Nun kankan dam aryi unanyi biryi er kwit bisi malyi kibdongobmaci ura, akai dam yandobkwandur. Ba, er kwit bisi malyi kimdongona kum kubmaci bok, tola ebmaci ura, akai dam dama deirina dam yandoka, ‘Imtamnyi Kan si deici aryi ni ton manmalina kum kubman,’ eboka iya dib en uram ebkwande. 23Ba, Nai, Kan imtam aryi kekeboka kan wa in nang asi malyi dinyi lilibkwandim. Ba, malyi dinyi kunubmarinyi bira ikin karebminyi ura, malyi dinyi kununa kum kubmarinyi bira lebkwandim.
24Ba, Kan mabwe Israel ninyi aryi malyi dinyi kunuboka, Kan urasin dam asi manmalibdongobmakingnyi deyok aryi, sun mar ordan nang aryi muna obdongobingnyi ura, akai dam tamuryandoka Kan si weik eboka molobkwanking. 25Ba, Nai Kan imtam aryi sun Kan mabwe Israel nang sun molona kekebminyi ura, sun malyi dinyi libdobkwandum. Sun malyi dinyi libdobminyi ura, sun abwe yabwe deici asi Kanci sunti etereamumwe mutuk tamuboka bobinkwandum.
26Ani, sun Israel ninyi aryi Nai Kan uram kununa kum uca, malyi dinyi kunubmangnyi deyok aryi imtam bublan tirikminyi ba, mo ton cemna kum kubci ura, akai dam yandoka Kansi si weik eboka molobkwankunung. Ukuboka molobkingnyi ura, sun malyi dinyi kunuramingnyi dinyi takloboka Kan uram kunun nang kibkwaming. 27Ura, Kanci, Kan mabwe Israel nang sun molona kekebminci, sun malyi kun dinyi libdobkwandum. Ura, Kanci sun Israel nang asi, ‘Ato kubde bankwandarur,’ eboka bisik eterebkwandum. Ukuboka eterebminyi ura, Kanci sunsi mo karebminyi ba, Kanci sunti karebumwe mutuk asi iya kubde binkwaming.
28Ani, sangkuna aminda aryi Kan mabwe Israel ninyi asi, a mutuk dam aryi kwaning utabkwande talak ab aryi Kansi molobmakingnyi ura, sun molona kekebkwandum. Ani, lubna youn yibkwande talak ab, sun gandum koubdamingnya asi kwising aryi yibkwande talak ab, yuk atei ninyi aryi weik atei tentok da yandoka mar bobkwaming talak ab, yuk mambul dinyi sun dam kubkwande talak aryi Kansi molobmakingnyi ura, sun molona kekebkwandum. 29Ura, kan mabwe Israel ninyi aryi, sun malyi kun dinyi yuk-yuk teneibdeboka, engen kanya boboka, akai dam tam asi taruk ukdongoboka molobmakingnya ara sun molona kekebkwandum. 30Nai Kanda imtam, Kan ai iya kurandima dam aryi sun molona kekebminyi ura, sun malyi dinyi kunuamingnyi to kuboka ikin karebminyi ura, lebdeibkwandum. Nai Kanda ninyi sirik kanya umbura teneraming dinyi nirya bingdumnyi kurum deyok aryi sun tenebmangnyi to kuboka liliboka wenen dinyi ab, limdon dinyi ab karebkwandum. 31Ukuboka wenebminyi ba, Nai Kanci nun abwe yabwe deici asi mutuk eterebsumwe mutuk dam kubde baramibya nirya ara Kansi ilil kuboka Kan uram akwe kunubde bana teleb.
32Ani, sangkuna Israel yala nang kuma, eda yuk mutuk nang era aryi Kan si weik erena ab, Kan taruk mikib ab, Kan ninyi lemna kikiman dinyi ab kekeboka ati, akai dam yandoka molobci ura, 33Nai Kan imtam Kan ai iya kurandim ai dam aryi kekeboka, a yuk mutuknyi er molobdobmaci to kunuboka karebkwandum. Ba, Kansi ara im dangna tukwe dangna nirya si bikwanking. Kan si bikingnyi ura, Kan kikwe ilil kuboka molobkwanking. Nun Israel ninyi aryi, Kansi nun ilil kuboka kan ebminyi to kunuramib to kubkwaming. Ukubingnyi ura, niryi a dobse ai asi, yuk mutuk ninyi aryi, ‘Akai ara Er Imtamnyi, Israel ninyi molonungnyi si weik eboka molon ai,’ tenen bikwaming.
34Ani, sangkuna Kanci Kan mabwe Israel nang arukmou to sun mar ordan nang asi, dantam-dantam mar bobkwamangnya nirya ara Kan kanyi deibumwe atei Yerusalem atei ab, Niryi Kanti dobkise ai ab asi urasin deiboka Kan molobkingnyi ura, mar ibankwaming. 35Ati, imtam aryi sun molobmangnyi dinyi Kanci kekeboka, sun ninyi mar bobmangnya asi muna oboka ererona teleb. 36Ninyi tukwetam kunub ara malyi dinyi kununa iya ton kumnyi ton kum kurur ati, sun malyi dinyi kunubmangnyi nang ara Kanci sunsi sun mar ordan nang taruk dam dobkarebminyi ba, taleboboka sun mar ordan nang atei, dam atei kum-era atei kum bobinkwanung. 37Ani, sangkuna a bobinamingnyi atei bindoka kuramingiryi, ‘Nun malyi dinyi kunubmoubwe,’ tenebingiryi, Nai Kansi, ‘Nun malyi dinyi kiliboka libdobsurum,’ eboka molobingnyi ura, sun molobmangnyi to kekeboka kunurdeirina teleb. 38Ba, a nang sun bobindoka wa dimnamingnyi ba, ibde kuramingnyi mutuk dam aryi sun malyi dinyi kununa taklobingiryi, Kan uram kunun nang tubto kiboka, sun kanya nirya ab, sun nong nirya ab koubtaleboka kanya kan kikwe deibkingiryi, Kanci nun abwe yabwe asi kareamumwe mutuk ab, Kanci wiamumwe atei Yerusalem ab, Kanti dobkise ai ab, asi kanya teneibkwaming. 39Ato kuboka, Kan mabwe Israel nang aryi Kansi molorankingnyi ura, sun molona kekeboka, sun malyi kun dinyi kunuamingnyi to kiklibdeboka, sun molobmangnyi to kuboka sun malyi kun dinyi asi kilina teleb. 40A deyok aryi Nai Iya Erebdobnyi, Kan asing ab, Kan amol ab ara akai umbura aryi molonmabyi dinyi asing eiboka amol kekena teleb!
41 #
Mzm. 132:8-10
Ati ukura, Nai Iya Erebdobnyi se! Ura, anabdobminci,
Kanci, ‘Ukubdarur-ukuna mem,’ eamumwe kerek sengna deirin co sangkol ab, Kan mikib ab Kan iya kubkwandim ai wengbarum!
Nai Iya Erebdobnyi, Kan ai wa in nang ara kait aling ongoboka akai wa ibi bankung.
Nai, Kanci telebto akwe kurdeirirandim dinyi ati, Kanci boukwe kimdum nang ara sun kanya kilkil kanya bobkung.
42Nai Iya Erebdobnyi, Kanci nisi sienyi tikeianiminyi bisi yangnina mem.
Eda, Nai Kanci kan wa inanyi Daud bisi busul kuboka boukwe kimnamumwe to ara luba kimna mem,”
eboka Salomo biryi molobmou.
Currently Selected:
2Tawarikh Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
