2Tawarikh Uram 5

1Ura, Salomo biryi Er Iya Erebdobnyi ai ukuboka sirya dobmou. Ura, Salomo biryi er nai Daud biryi Er Imtamnyi biti dama deiriramwe bona-bona emas toto, perak toto Er Iya Erebdobnyi ai deirirbinmou.

Er Iya Erebdobnyi biryi, “Ukubdarur-ukuna mem,” uram kerek sengna Er Imtamnyi ai deirirbinmai deyok

5:2–6:2

(1Raj. 8:1-13)

2Ura, Salomo biryi Israel ninyi wis yoka nang ab, sien nang yala nirya asi nabmou ba, Yerusalem atei akwe bulubmai. Ara, Er Iya Erebdobnyi biryi, “Ukubdarur-ukuna mem,” en uram deirin co sangkol er nai Daud kuramwe atei Sion dam aryi boboka yankwamai ati bulubmai. 3Ura, weik uki tum si wala tabaryi wala dobci ba, li doramnyi tum berekmou. Ura, Israel mutuk sien nang nirya sienyi Salomo dam buluryanmai. 4Ba, Israel sien nang wis yoka nang buluryanmai ura, Lewi yala nang aryi, “Ukubdarur-ukuna mem,” en uram kerek sengna deirin co sangkol boboka erebdobmai. 5Ura, a co sangkol ab, Kemah Suci ai ab, a keis ol ai umbura Er Imtamnyi biti deiriramnyi dinyi nirya ab boboka binmai. Anda keica nirya ara Er Imtamnyi ai wa in nang ab, Lewi yala nang ab aryok bobkwamai. 6Bok, sienyi Salomo ab, Israel ninyi nirya ab aryi, “Ukubdarur-ukuna mem,” en uram kerek sengna deirin co sangkol dam buluboka, bisam kambing domba ab, bisam lembu sapi ab ilinto aryi nukman kumto kuboka, Er Imtamnyi biti dama deibmai. 7Ura, imam-imam nang aryi Er Iya Erebdobnyi co sangkol asi Er Imtamnyi ai ukuryok ai lumuntam ai, iya beterdongona mem ai bobindoka deibmai. Ara, akai umbura maka ol atoa nun kerub bitinyi kiknibdeiamnya ol amwetam asi bindoka deibmai. 8Ba, malaikat si kerub kiknibdeiamnya ol aryi a co sangkol ab, maloua caboka boban co ab asi kalubdobmou. 9A co sangkol maloua caboka boban co ara cang deyok aryi, iya beterdongona mem ai akiryi dina ara lak bok, bublan dam yuma ai aryi dina ara lak kum kubmou. Uku talak ababyi a co sangkol deirin dikum ara tuba a kubwe. 10A co sangkol umbura ara yuk dinyi ton deirina kum kubmai. Eda, sun Israel ninyi Mesir dam aryi anaboka yangaramnyi talak aryi, Er Iya Erebdobnyi biryi sun Israel ninyi ati, uram talak ebdeibmouci, keil kerek bitinyi sekeibmou dinyi akwe deibmai. Ara, Er Iya Erebdobnyi biryi Musa bisi Horeb kon aryi, “Ukubdarur-ukuna mem,” en uram keil kerek bitinyi sekoka karebmou uram akwe a co sangkol umbura deibmai.

11Ura, Imtamnyi ai wa in nang sirya bobindoka deibmai ura, anaboka yanmai. Sun Imtamnyi ai wa in nang yala olong yuk-yuk nirya ara me ilikdobmaici, sirya kiknibdobmai. 12Ura, Imtamnyi ai wa in nang Lewi yala nang ara mot semna bikdob nang bulubmai. A nang sun si ara Asaf ab, Heman ab, Yedutun ab, sun weit yabwe sun mabwe ab bulubmai. Ura, Imtamnyi biti bisam sapi kum, domba kum oboka dama deirin co lamna dinatam yaletam kuboka asi tingbinmai. Sun ongobmai ongon aling ara namin aling lenan aling ongobmai ura, bilul si keracap ab, gambus ab, kecapi ab douboka tingbinmai. Ani, trompet si nafiri keboka on nang imam nang yubwa 120 baryi nang ab tikoka mot sebmai. 13Ura, nafiri on nang ab, mot semni nang ab, mot tonkwa ereboka Er Iya Erebdobnyi bisi si weik eboka, “Nun Nai teleb, Nun babya,” en mot sebmai. Ura, nafiri lilim ab, keracap lilim ab, yuk-yuk bilul lilim deici ab aryi sun mot semni nang Lewi yala nang tonkwa Imtamnyi bisi si weik eboka mot sebmai.

“Er Iya Erebdobnyi iya telebnyi kurur!

Er mikib weiknyi iya kurmuranci tok iya kubkwande.

Er boukwe kurmururanci tok, tangdongona kum kubkwansir,”

eboka mot sebmai. Ato eboka mot semai talak aryi, duwa yandoka Imtamnyi ai nirya dukuboka kinikdobmou. 14Ato kubmou deyok aryi, a imam-imam nang mot semai nang ara akai umbura uki tikman kumto kubmou. Ara, Er Iya Erebdobnyi milil ibarya akai nirya dukubmou ba, ato kubmai.

Currently Selected:

2Tawarikh Uram 5: MTG

Highlight

Copy

Compare