2Tawarikh Uram 4
4
Er Iya Erebdobnyi ai kikniboka deibmai keica si deyok
4:1–5:1
(1Raj. 7:23-51)
1Ura, sienyi Salomo biryi, “Imtamnyi biti dama deirin co lamna keil tembaga aryi kiknibkwayeb,” ebmou. Ba, Imtamnyi biti dama deirin co lamna meter kiklina ara cangtam 9 meter baryi kiklibmai. Ba, ilatam ababyi meter kiklina 9 meter baryi kikliboka kiknibmai. Ba, co lamna im dub dangdang cang meter kiklina ara 4,5 meter baryi kikliboka kiknibmai. 2Ani, me kwan dingina sangkol ababyi tembaga aryi kiknibmai. A me kwan dingina kiknibmaici, kiklibmai meter ara ato kuboka kiklibmai. A me sangkol um, lulu aryi kuboka alib meter kiklina ara 2,2 meter baryi kikliboka kiknibmai. Ba, a me sangkol sibarya otam aryi kuboka atam kiklina ara 4,4 meter baryi kikliboka kiknibmai. Ba, a me sangkol boongona meter kiklina ara 13,3 meter baryi kikliboka kiknibmai. 3A me dingina sangkol lulu dam baitam kuboka ara bisam sapi yim atoanun ababyi neika tembaga aryi nunuboka, yakna bitinyi kikniboka boongobmai. A yakna umbura asi kiklina 45 sentimeter ara sapi atoa takubaryi kiknibdeibnin binmai. 4Ara, a me sangkol lulu ara bisam sapi yim amolbaryi kiknibmaia kum deici asi bukeiboka tembaga aryi deneboka kiknibmai. A bisam sapi yim amolbaryi ara ton winiryi sapi bisam ara urasin me utam deiboka kiknibmai. Ba, ton winiryi ara me youkwetam urasin deiboka kiknibmai. Ba, ton winiryi sapi ara kiting ban am urasin deiboka kiknibmai. Ba, ton winiryi bisam sapi ara yaletam urasin deiboka kiknibmai. Ba, anda bisam yabwe aryi a me sangkol bobde baroninto kuboka kiknibmai. 5A me dingina sangkol kiknibmaia bukam ara te tang ila ato kiklina ara 75 milimeter kikliboka kiknibmai. A me sangkol sibarya dam ara sikil keta labmariryi, urub dam luknurande to kubdeiboka kiknibmai. Ba, a me sangkol me dingina kikiman ara 60.000 liter baryi dingina kikimanto me sangkol kiknibmai. 6Ani, Imtamnyi biti dama deiboka uk dabkwamangnyi bisam ara sekoka me ilingna ati me dingina sangkol takubaryi kiknibmai. Ura, a me sangkol amubaryi ara Er Iya Erebdobnyi ai me youkwetam kikniboka bukeibmai. Ton amubaryi me sangkol ara Er Iya Erebdobnyi ai me utam ton kikniboka bukeibmai. Ba, yuk me kwan, weik me kwan dingina kiknibmai ara Er Imtamnyi ai wa in nang me kekoka me ilingna ati kiknibmai. 7Ani, Salomo biryi uk ubna yabla takubaryi emas aryi kikniboka Er Iya Erebdobnyi ai bublan dam ai weik ai deibmai. A uk ubna yabla ara ton amubaryi ara bisik wengbana siriktam kuboka deibmai. Ba, ton amubaryi uk ubna yabla ara bisik wengbana kwanimtam kuboka deibmai. 8Ani, co lamna takubaryi kiknibmai ura, Er Iya Erebdobnyi ai siriktam amubaryi deibmai ura, kwanimtam amubaryi deibmai. Ura, bisam ining kwena moyok yubwa 100 baryi emas aryi kiknibmai.
9Ani, Er Imtamnyi ai wa in nang demang wengni atei keta ara ai lumuntam kiknibmai. Ura, talyi ninyi wengna atei keta ara ilila keta baitam kuboka kiknibmai. Akatei keta bisik bublan ara keil tembaga aryi nunuboka denebmaici, kiknibmai. 10Ba, ilila me deirina sangkol ara Er Iya Erebdobnyi ai me youkwetam kuboka siriktam asi bukeibmai. 11Ura, utotoa kikninanyi si Huram biryi Er Iya Erebdobnyi ai deirin dinyi kuali toto, uk sici don sekop toto, bisam ining kwen moyok toto, kikniboka deibmou.
Ukuboka Huram biryi sienyi Salomo arukmou to nirya kunuboka kiknibsekmou. 12Huram biryi Imtamnyi ai dinyi nirya kiknibmoua si nirya ara bisik bublan dam ilila abyokomna bitinyi ab, a bitinyi abyokomna kisok dub asi me yina meyok atoa kikniboka kisok kalubdeibmou dinyi ab, 13co si delima du yubwa 400 baryi lumuboka, a abyokomna bitinyi kisok kalurdongona dam asi tabwe kun bitinyi ongobdeibnin yibinmou. 14Ba, me kwan dingin meyok sangkol deyok dam ara kongkong ena takubaryi kiknibmou. Ba, a takubaryi kongkong ena deici asi, me kweboka ilingna meyok sangkol kikniboka bukeibmou. 15Ani, ilila me kwan deirin me sangkol ab, kuda bisam amolbaryi amwetam kikniboka me deirina sangkol bukeibmou. 16Ani, kuali toto, sekop toto, te kwaleng bela toto, Huram-Abi biryi sienyi Salomo biryi arukamwe to kunuboka mil dangni tembaga aryi Imtamnyi ai dinyi nirya kiknibmou. 17Anda keica kikniramnya nirya ara sienyi Salomo biryi arukamwe ba, Yordan duman mutuk si Sukot atei kan Zereda atei kan aryi ngat tukwe umbura aryi tembaga nunuboka kikniramnyi dinyi aryi akai doramnyi. 18Sienyi Salomo biryi arungnamwe ba, keil tembaga ilinto kikniramnyi aryi ikin nungna ara nuksekman kumto kuramwe.
19Ani, Salomo biryi Er Iya Erebdobnyi ai umbura deirin keica ababyi ilinto kikniboka deiriramnyi. Ara, Imtamnyi biti tong teleb co yung dama deirin co lamna ab, roti dama deirin co lamna, 20uk ubna yabla emas kobdoba aryi kikniramnyi dinyi ab, uk ubna iya beterdongona mem ai bisik bublan dam deiboka uk buk ardeirin dinyi ab, Er Imtamnyi biryi, “Ukubkwandarur,” ebmou to kunuboka kiknibmai. 21Ani, uk buk ardongona dam asi co keta kuna lardeirin dinyi ab, uk buk ardongon dinyi ab, uk buk ardongon tabwe sengni pisau ab a nirya ara yuk dinyi tabtabingna kum uca, emas dem aryok kiknibmai. 22Ani, pisau toto, me kwebde dingna keica toto, meyok toto, uk kalum boyangan keica toto, a nirya ara yuk dinyi tabtabingna kum uca, emas kobdoba aryi kiknibmai. Ani, bublan dam ai weik ai bublan babyi, lumun ai beterdongona mem ai bisik bublan babyi ara emas kobdoba aryok kiknibmai.
Currently Selected:
2Tawarikh Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
