2Tawarikh Uram 3
3
Salomo biryi Er Iya Erebdobnyi ai yuma dobkalibmou deyok
3:1-14
(1Raj. 6:1-38)
1Ura, Salomo biryi Yerusalem atei dam asi, mutuk kon si Moria kon asi Er Iya Erebdobnyi ai yuma dobkalibmou. Akai Imtamnyi ai dobmai dikum kobdob ara Er Iya Erebdobnyi biryi Daud urasin dam lak kibdanmou dikum asi dobmai. A dikum ara Yebus mutuknyi si Ornan er gandum yalyi kweramwe dam asi Imtamnyi molon ai dobmai. 2A Imtamnyi ai yuma dobkalibmai kwalina nungna ara Salomo sienyi kibmouci, wa ibde banmou talak kwalina dumbaryi kwalina wengbinmouci, wala bitinyi dinyi aryi akai yuma dobkalibmai. 3Er Iya Erebdobnyi ai dobkwamiryi yuma ai olong kiklibmai ara cangtam dina-dina meter kiklina ara 27 meter baryi kiklibmai. Ba, dumdam tam ila meter kiklina ara sembilan 9 meter baryi kiklibmai. 4Bisik wengban ai bublan dam kobdob ai umbura ila babyi, cang babyi meter kiklina ara 9 meter baryi akwe kibmou. Ba, akai im dub dangdang cang meter kiklina ara 54 meter baryi kikliboka dobmai. Akai ai umbura tam nirya ara emas keil kobdoba akwe aryi nunuboka denebmai. 5Bisik wengban dam weik ai ara abilinga aitam kuboka ibmai co si sanobar aryi abilinga ibmai. Ura, akai abilinga deici asi co si palem atoa ab, rantai atoa ab uturuboka kiknibdeibmai. 6Bisik wengbana dam weik ai umbura ara dengna weik keil iya telebto keil akwe kikniboka dobmai. Ani, emas kobdoba, Parwaim mutuk aryi boyanamnyi emas aryok nunuboka denebmai. 7Ara, weik ai umbura ai abyokomna babyi, bisik bublan dam tingdeirin co babyi, abilinga babyi, bublan kobdob babyi, emas aryok nunuboka denebmai. Ani, abilinga deici ara maka ol atoanun si kerub kiknibdanin yibinmai.
8Ba, lumuntam ai ara Imtamnyi ai, beterdongona iya mem ai si Ruang Mahakudus dobmai. Akai cangtam meter kiklina babyi, ila dumdam tam meter kiklina babyi ara 9 meter baryi kikliboka dobmai. Ura, akai iya mem ai umbura aitam abilinga ara emas ikin kiklina 20.000 kilogram baryi aryi nunuboka denebmai. 9Ba, emas ikin kiklina 0,5 kilogram baryi aryi nunuboka bing dakdongobnin yibana kiknibmai. Ani, im dubtam alib yangamni ai ababyi emas aryi nunuboka kiknibmai. 10Ura, sienyi Salomo biryi arukmou ba, Er Iya Erebdobnyi ai beterdongona mem ai asi dengna weik keil aryi nunuboka malaikat atoanun si kerub bitinyi kiknibmaici, emas aryi nunuboka denebmai. 11A kerub bitinyi sun ol meter kiklina ara dina-dina nirya kiklina 2,2 meter baryi kikliboka kiknibmai. Ba, a maka bitinyi sun urasin ara neik tam akwe urasin deibmarei. Ura, ton maka ol aryi ton maka ol asi dimdongorbinmou ura, ton maka ol ara akai abilinga dimdongorbinmou. 12Ani, neikto akwe ton maka ol bitinyi dina-dina ol ababyi, meter kiklina cang ara 2,2 meter baryi kikliboka kiknibmai. Ba, dinatam ol ara ton maka ol dimdongorbinmou ura, dinatam ol ara akai abilinga dimdorbinmou. 13Akiryi a maka ol meter kiklina ara 9 meter baryi akai um nirya kiklibmou. Ba, a maka sun urasin ara bublan dam weik ai dam tam kuboka urasin deiboka kiknibmai. 14Ba, lumuntam ai beterdongona iya mem ai bublan ara kaluna bublan diriboka dolobkwetebmai. A kaluna bol ara kuruta bol wis bol tabwe ab, kuruta bol unduk bol aling tabwe ab, kaluna si kirmizi aling tabwe ab, namin kaluna aling tabwe si lenan aling tabwe ab, aryi wiboka dolobkwetebmai. Ura, akai bublan dolobkwetebmai kaluna deici asi maka ol atoa kiknibdongobmai.
Ilila abyokomna bitinyi tembaga aryi kiknibmai deyok
3:15-17
(1Raj. 7:15-51)
15Akai Er Iya Erebdobnyi ai bublan wengbana dam dina-dina abyokomna tikeibmai. A bitinyi abyokomna dangdang cang meter kiklina ara 15,5 meter baryi kikliboka tikeibmai. Ba, a abyokomna kisok kalurdongona yuk kalubdeibmai. A abyokomna kisok kalurdeirina ila meter kiklina ara ton dinyi babyi-ton dinyi babyi ara 2,2 meter baryi kikliboka kiknibmai. 16Ba, a abyokomna kisok kaluna ngang dam asi co delima du yubwa 100 baryi lumuboka karakna karaibmai. 17A abyokomna ara Er Iya Erebdobnyi ai bublan dam asi, siriktam ton, kwanimtam ton tikeibmaici, si yuk-yuk dobmai. Ton abyokomna siriktam abyokomna si ara, “Yakhin,” eboka si dobmai. Ba, ton abyokomna si kwanimtam abyokomna si ara, “Boas,” eboka si dobmai.#3:17 Abyokomna bitinyi sun si yuk-yuk ara, “Yakhin ab Boas ab.” Siriktam abyokomna si Yakhin, nun uram ara, “Er Iya Erebdobnyi biryi iya dinyi kibdeibwe,” ena ati, “Yakhin,” eboka dobmai. Ba, kwanimtam abyokomna si ara, “Er Iya Erebdobnyi mikib aryi akai dobwe,” ena ati, “Boas,” eboka si dobmai.
Currently Selected:
2Tawarikh Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
