2Tawarikh Uram 35
35
Yosia biryi Paskah li dobmou deyok
35:1-19
(2Raj. 23:21-23)
1Ura, Yosia biryi Er Iya Erebdobnyi biti Yerusalem atei Paskah li dobmou. Ba, Paskah li doboka yibkwamai bisam domba ara yuma wala tanggal 14 aryi ngang sekoka obmai. 2Ura, Yosia biryi Imtamnyi ai wa in nang imam nang ati, sun wa Er Iya Erebdobnyi ai ibkwamai to minob bokeibmou. Ani, sun wa yuk-yuk bokeibwe ura, sun wa yuk-yuk asi, “Ato-ato kuboka ibkwandarur,” eboka lilibdeibmou. 3Ba, Lewi yala nang ara Imtamnyi biti yuk wibdeiboka, Israel ninyi asi Er Imtamnyi uram eteren nang kuramnyi. Ura, Lewi yala nang asi, Yosia biryi ato ebmou, “Er Iya Erebdobnyi biryi, ‘Ukubdarur-ukuna mem,’ ebmou uram kerek sengna deirin co sangkol boboka, Israel sienyi Daud mi Salomo biryi doamwe Imtamnyi ai asi deirirbindarur! Tubto a co sangkol boboka yuk dikum deirirbana ara mem. Eda, ukura Er Iya Erebdobnyi wa inkwandum. Tonda, Imtamnyi mabwe Israel ninyi asi eterenkwandum! 4Ati, sun yala yuk-yuk ab, sun olong yuk-yuk ab kiknibdeibmounyi ura, minob Israel sienyi kiamunyi Daud ab, er mi Salomo ab aryi kerek sekandei to kubdarur. 5Ura, sun Israel yala nirya, yala yuk-yuk ab, olong yuk-yuk ab Imtamnyi ai dam keta asi buluboka wekwanung. Ba, olong yuk-yuk nirya asi Lewi yalanyi tentok aryi bokeibnin yibinkwanung. 6Ura, Paskah li bisam domba obmunyi ura, sun dam nang Imtamnyi ai wa ina kikiman nang kibdankwandarur. Ba, ukuboka kiknibmamunyi aryi, sun kwit yabwe Israel nang asi Er Iya Erebdobnyi biryi Musa deici asi ebdeiamwe to kunuboka ibde binkwandarur,” ebmou.
7Ura, weik sienyi Yosia biryi a bulubmai Israel yala ninyi Paskah li doboka yibkwamai ati, domba mi yim toto, kambing mi yim toto yubwa 30.000 baryi karebmou. Ba, bisam sapi yim yubwa ara 3.000 baryi karebmou. A bulubmou domba toto, kambing toto, sapi toto yubwa nirya sienyi dinyi akwe karebmou. 8Ani, sienyi er yin doun nang sien nang ababyi a bulubmai nang ab, imam nang ab, Lewi yala nang ab ati, sun kanya teleb asa aryi domba toto, sapi toto ton bulubmai. Ba, Imtamnyi ai wa in nang sien nang si Hilkia ab, Zakharia ab, Yehiel ab aryi Imtamnyi ai wa in nang sun damulub nang ati, Paskah li doboka yibkwamai domba toto, kambing toto, yubwa 2.600 baryi buluboka karebmai. Ani, sapi yim ara yubwa 300 baryi karebmai. 9Ani, Konanya ab, er weit yabwe si Semaya ab, Netaneel ab, tonda Lewi yala nang sun sien nang si Hasabya ab, Yeiel ab, Yozabad ab aryi Lewi yala nang yuk nang ati Paskah li doboka yibkwamai bisam domba ab, kambing ab yubwa 5.000 baryi karebmai. Ani, bisam sapi yim akwe 500 baryi karebmai. 10Paskah li doboka yibkwamai dinyi nirya sirya kiknibmai ura, imam nang ab, Lewi yala nang ab, sienyi ebmou to kuboka sun yala nang olong yuk-yuk dam tikmai. 11Ura, Paskah li bisam domba obmaici, Lewi yala nang aryi domba kala lokmai ura, a domba ining ara imam nang aryi dama deiboka uk dan keil lamna deyok dam asi dikmai. 12Ura, anda obmai bisam domba ara Musa kerek sengna uram deici kerek sekamwe to kunuboka, sun Israel yala ninyi olong yuk-yuk kibmai to domba tentok-tentok karebmai ba, sunci Er Iya Erebdobnyi biti dama deibmai. Ani, sapi ababyi neiktoto tentok akwe sun olong yuk-yuk asi karebmai ba, Imtamnyi biti dama deibmai. 13Ura, a bisam domba uk deici dabmai. Ba, bisam lembu tub asi kuali ab, belanga ab, piring ab umbura dongoboka uk deici yubmai. Ura, sirya obmou ura, ola dingiboka a bulubmai ninyi olong yuk-yuk asi bokeibnin yibinmai. 14Ura, Harun deibdoba nang aryi tuba-tuba bisam domba toto ab sapi toto ab oboka dama deibmaici, nong nirya uk dabmaici, yuk dama deirin dinyi bisam minta ababyi uk dabmai. Ati, kitingtam Er Imtamnyi ai wa inmangnyi tok lukunda ababyi wa irmurunkwamai ati, Lewi yala nang sun yibdobkwamai dinyi ton yuk wiboka deibdobmai ura, tonda imam nang yibkwamai dinyi ton sunti yuk wiboka kiknibdeibmai. 15Ba, Lewi yala nang mot semni nang Asaf deibdoba nang ara weik sienyi si Daud biryi eamwe to kuboka sun wa kareamwe dikum tikmai. A nang sun si ara Asaf ab, Heman ab, sienyi dam kuboka Imtamnyi uram ermurunanyi si Yedutun ab sun wa kareamwe dikum tikoka mot semai. Ba, bisik bublan kalingni nang ababyi sun wa kareamwe dikum tanglona kum uca, sun wa iramnyi to Bait Allah bisik bublan kalingnamnyi. Ati, sun Lewi yala nang ton nang aryi a nang ati sun yibkwamai dinyi kiknibminikmai. 16A tum ara kwalina si Paskah li doboka kwaliboka yibkwamai dinyi ab, Er Iya Erebdobnyi biti dama deiboka uk dabkwamai dinyi ab kiknibminikmai. Ara, sienyi Yosia biryi, “Ukubkwayeb,” ebmou to kunuboka kiknibminikmai. 17A talak ara Israel ninyi li bitinyi doboka kuramnyi. Ara, kwalina si Paskah ab, Roti Bungbung Ena Kum Roti yin tum ab uki tabaryi li doamnyi. 18Paskah kwalina ati, ukuboka li dona ara Imtamnyi uram ermurunanyi si Samuel kuramwe talak aryi ukuboka, a talak kubde yangaramnyi talak ara ato ibarya kuboka li ton dona kum kuramnyi. Ara, sienyi Yosia biryi ato li dobmou ara imam nang ab, Lewi yala nang ab, Yehuda mutuk ninyi ab, Israel mutuk ninyi ab neika Yerusalem atei buluboka paskah li dobmai deyoka aryi ibarya weik Paskah li dobmou. Bok, weik sien nang Israel ninyi minob taleramnyi weik sien nang aryi, Yosia biryi weik li Paskah dobmou to ara ton kum kuramnyi. 19A Paskah li dobmai ara Yosia sienyi kiboka taleamwe talak kwalina 18 dinyi kibmou talak aryi ukuboka li dobmai.
Sienyi Yosia bisi Nekho biryi obmou uram
35:20-27
(2Raj. 23:28-30)
20Ura, sienyi Yosia biryi Er Iya Erebdobnyi ai ati sirya ukubmou. Ura, Mesir sienyi si Nekho ab, er yin doun nang aryi atei si Karkemis me Efrat kin atei asi iyandoka mar bobmou. Ura, Yosia anaboka Nekho yandoka mar bobmou atei asi ibinmou. 21Uca, Nekho biryi uram ebdeibmou ba, Yosia dam asi eryanmai, ara ato ebdeibmou, “Nira, kan ab kikimna ati yanganmana de? Nira, Yehuda sienyi kanti mar bobkwamakinci kum yanganman. Eda, ni mar ibdabwe ninyi asi mar bobkwaman ati mar iyanganman. Ara, Er Imtamnyi biryi, ‘A ninyi ara ola oboka kum dandeibdum!’ eboka arukmanir ati yanganman. Ati, kanci ni milibmanir Imtamnyi bisi tataboka, bisik sengna ara taklobdum! Ato kunmaminyi ura, kan talinyi bisi oboka kum dandeibkicob!” ebmou. 22Uca, Yosia bira Nekho ebdeibmou uram kekena kum kubmouci, tataboka sien nang ongon aling ongoboka sienyi kiknina kum uca, yin doun nang sirik ato danmouci, er yin doun nang ab, Megido mutuk dam mar ibinmai. 23Uca, Mesir mutuk yin aryi bisik en nang aryi sienyi Yosia bisi yin aryi mar marabmai. Ura, Yosia biryi er yin doun nang asi ato ebmou, “Ni mar kulubmaning ati, ola atei bobinindarur!” ebmou. 24Uram er kongkong ena deici aryi doboka, yuk kongkong ena deici deibdongoboka Yerusalem dam boyanmai. Ura, dibmou ba, er abwe yabwe tukwe dongoramnyi dikum dongobmai. Ura, Yehuda yala nang ab, Israel yala nang ab Yosia biti engeboka boukwe eibmai. 25Ura, Yeremia biryi Yosia dibmou ati, engenmouci, urumna libmou. Ba, Yeremia biryi a libmou urumna ara uku talak ababyi, Israel ninyi sal babyi, nerabwe babyi a libmou urumna asi eboka engeraming. Ba, a urumna ara urumna eboka engena kerek sengna si Kitab Ratapan deici kerek sekyi.
26Ba, Yosia er kubde yangaramwe to ab, Er Iya Erebdobnyi, “Ato kubkwandarur-ato kuna mem,” ebdeiamwe to akwe kunuramwe dinyi ab, 27Yosia er kubde yanamwe to nirya liliboka kerek sekyi kerek sengna ara Israel ab Yehuda nang ab sienyi buramnyi deyok kerek sengna umbura asi liliboka sekyi.
Currently Selected:
2Tawarikh Uram 35: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
