2Tawarikh Uram 34
34
Sienyi Yosia biryi yumkuna telebto kuboka talenmou deyok
34:1-7
(2Raj. 22:1-2; 2Raj. 23:4-20)
1Ura, Yosia kubde yanmou ani, kwalina 8 baryi kimbinmou bok, sienyi kibmou. Ba, sienyi kiboka Yerusalem atei taleamwe kwalina ara 31 baryi kwaliamwe. 2Yosia bira Er Iya Erebdobnyi biryi teleb tenerande to akwe kunuboka taleamwe. Er abwe Daud taleamuryi, ukuramwe to akwe doblilibmou. Yosia er urasin ara Er Imtamnyi tam akwe deiamwe, er urasin danguboka kwanimtam babyi, siriktam babyi ton dirbana kum kuramwe. Eda, Er Imtamnyi ebdeiamwe to akwe kunuramwe. 3Ura, Yosia er sienyi yuma kiboka taleamwe ara er mitik talak kwalina inbaryi kubmou talak aryi taleamwe. A talak ara er abwe Daud moloramunyi, Er Iya Erebdobnyi bisi tuba molobde baramwe. Ani, er sienyi kiamwe dinyi kwalina 12 baryi kwalina sirya kwalibmou ura, Yehuda mutuk ab, Yerusalem atei ab kwemdeina molon ai doboka moloramnya nirya dakiribokmou. Ara, mutuk konkon dam kwemdeina ati bisam oboka uk dan keil lamna toto, kwemdeina molon abyokomna ingdaramnya toto, yuk-yuk keica atoa kiknibdeiboka moloramnya toto, nirya daluboka bai donokmou. 4Ani, bisam oboka kwemdeina ati uk dan co lamna ab, siltong ena uk dan co lamna ab nirya dakoka sun a kwemdeina moloramnyi nang tukwe dongoamnya deici asi bobindoka yamubmou. 5Ura, a kwemdeina ati bisam oboka uk daramnyi co lamna deici asi, kwemdeina molon ai wa in nang sun diamnyi yok doboka a co lamna deici asi uk dabmou. Yosia biryi Yehuda mutuk ab, Yerusalem atei ab asi yumkuna me ilikoka ukuryok dinyi kibdeibmou. 6Ani, Yosia biryi kwemdeina moloramnyi dinyi nirya daluboka kum dandeibde binamwe asi, Manasye yala nang mutuk ab, Efraim yala nang mutuk ab, Simeon yala nang mutuk ab, Naftali yala nang mutuk me utam ababyi Asyur ninyi aryi sirya dalubmai atei dam kwemdeina molon dinyi nirya kum dandeibmou. 7Ara, kwemdeina ati bisam oboka uk dan co lamna babyi, kwemdeina molon abyokomna babyi, yuk-yuk keica atoa kiknibdeiboka moloramnyi dinyi babyi, siltong teleb ena uk daramnyi co lamna babyi, Israel mutuk atei aryi nirya daluboka kun dandeibde yibinmou. Ura, tamuboka er atei Yerusalem yanmou.
Er Iya Erebdobnyi biryi, “Ukubdarur-ukuna mem,” eamwe uram kerek sengna wanikamnya dobmou deyok
34:8-33
(2Raj. 22:3–23:3)
8Ura, Yosia sienyi kiamwe talak kwalina 18 dinyi kwalibmou. Ani, Israel mutuk ab, Er Iya Erebdobnyi ai ab sirya malyi dinyi nirya kiboka, teleb kibdeibmou. Ura, Yosia biryi Azalya mi Safan ab, Yerusalem sienyi er amwetam sienyi si Maaseya ab, Yoahas mi si Yoah a mutuk co bok deirinanyi ab asi arukmou ba, er moloramunyi, Er Iya Erebdobnyi ai dakdanamwe dikum ab, lubdanamwe dikum ab asi yumkuna unuboka dorbinmai. 9Ura, Imtamnyi ai wa inanyi imam sienyi si Hilkia dam yanmai ura, Er Iya Erebdobnyi biti dama karebmaici, Lewi yala nang asi karebmai ba, bulubmai uang ab boyandoka karebmai. A uang ara Efraim yala nang ab, Manasye yala nang ab, me utam mutuk kuramnyi nang Israel nang ab aryi bulubmai. Ani, Yehuda mutuk kuramnyi nang ab, Benyamin yala nang ab, Yerusalem atei nang ab aryi bulubmai uang Hilkia bisi bindoka karebmai. 10Ba, a uang ara Hilkia biryi Er Iya Erebdobnyi ai dakoka luboka kiamwe dikum yumkuna donkwamnyi ba, kalingkwamnyi nang winiryi nang ati karebmou. 11Ba, a winiryi nang aryi ai don nang ab, keil borkiringna nang ab ati karebmai. Ba, ai don nang aryi keil dekoka, abyokomna co dekoka, Yehuda sien nang aryi, “A lubde sangmarur,” tenen teneboka takloamnyi ai asi yumkuna dobmai. 12Ba, a ai don nang ara busul kuboka ai dobmai. Ba, a ai don nang sun kalingni nang kibdeibmai nang sun si ara Lewi yala nang bok Merari deibdoba nang ara Yahat ab, Obaja ab wibmai. Ba, Kehat deibdoba nang ara Zakharia ab, Mesulam ab wibmai. Ani, Lewi yala nang mot semna co biribdanamwe nang ab asi wibmai. 13Ura, a Lewi yala nang aryi ai don keica yala nirya borkiringnamnyi nang ab, kerek sengna sengnamnyi nang ab, bisik bublan kalingnamnyi nang ab asi kalingnamnyi.
14Ura, a buluamnyi uang deiamnyi dikum aryi donmai uca, Er Iya Erebdobnyi ai wa in sienyi imam Hilkia biryi Musa deici asi, “Ukubdarur-Ukuna mem,” eamwe uram kerek sengna ab, yuk-yuk dinyi ati arukoka yan memeamwe kerek sengna ab asi asing eiboka dobmou. 15Ura, imam besar Hilkia biryi a mutuk kerek sengnanyi si Safan bisi ato ebmou, “Er Iya Erebdobnyi biryi eamwe ba, Musa biryi kerek sekamwe kerek sengna dobman!” ebmou. Ura, a kerek sengna asi Hilkia biryi Safan biti doboka karebmou. 16Ura, Safan biryi a kerek sengna boboka sienyi Yosia bisi bobinmou. Ani, tonda Imtamnyi ai doramnyi deyok ati, “Nai sienyi, kanci kan wa in nang asi, wa karebsumwe wa ara kunuboka sirya ibyi. 17Ani, Imtamnyi ai deirinung co bok ara ai don nang ab, ai don nang kalingna nang ab ati, nirya doboka karebse,” ebmou. 18Ura, a bobinmounyi, Safan a mutuk kerek sengnanyi biryi sienyi Yosia bisi ato ebmou, “Er Imtamnyi ai wa inanyi imam besar Hilkia biryi Er Imtamnyi uram kerek sengna nisi karebmar ba, a boyanman,” ebmou. Ura, Safan biryi Imtamnyi Uram a bobinmou uram asi, sienyi keken dam yakna mikbaryi nukmou. 19Ukuboka Imtamnyi uram Musa kerek sekamwe nukmoua kekebmouci, sienyi er ongon aling kwilikabokmou. 20Ura, sienyi biryi imam besar Hilkia ab, Safan mi si Ahikam ab, Mikha mi Abdon ab, a mutuk kerek sengnanyi Safan er a binmounyi ab, sienyi wa inanyi Asaya ab asi ato eboka uram deibmou. 21“Sunci Er Iya Erebdobnyi biryi Ni ab, Yehuda yala ninyi ab, Israel ninyi ab ati, ebdeiansici to asi ni dam yandoka ebnindarur! Nun nai yabwe ara Imtamnyi uram diboka kalikoka deirina kum kuamnyi deyok aryi, Er uram ebdeibmasou to akwe kununa kum kunub. Ati, ‘Nun Israel ninyi ab, Yehuda yala ninyi ab asi, Imtamnyi biryi yu bobsou,’ tenebman,” ebmou.
22Ura, Hilkia ab, sienyi biryi a eboka arukmou nang ab, anaboka Imtamnyi uram ermurun ner si Hulda bisi binmai. A ner Hulda bira er akenyi si Salum kuramwe. Salum bira Imtamnyi bisi molorbinkwamingiryi, ongon aling bongnanyi kuramwe. Ba, Salum er nai si ara Tokhat kuramwe. Ba, Tokhat er nai Hasra kuramwe. Ba, Salum bira ongon aling kalikoka bukmaci aryi sirya wibdeibingnyi ura, bobde deirinanyi kuramwe. Ba, Hulda Imtamnyi uram ermurun ner ara Yerusalem atei asi ukuryok doramnyi atei kuramwe. Asi, sienyi uram ebdeibmou to bindoka ebmai. 23Ba, a ner Hulda biryi sunsi ato ebmou, “Nun Israel ninyi molonubnyi Er Iya Erebdobnyi uram ara ato ebmar, ebkwan ati, sun arukmasiranyi uram ebdeibmar to ebdarur! 24Er Iya Erebdobnyi bira ato ebmar, ‘Niryi Yerusalem atei ab, ninyi akatei kunung tok nirya ab asi ikin karebkwaman. Ni uram ebdeiansiryi, “Ato kubmunyi ura, ukuboka wenebkwansin,” eanse to kunuboka uk dabkwamasin,’ ebmar. Ani, tonda ‘Yehuda mutuk sienyi dam asi a kerek sengna bindoka nukmandau to kubkwansin. 25Ara, akatei ninyi aryi, Ni Iya Erebdobnyi bira taklobokabneici, yuk kwemdeina asi bisam oboka dama deiboka, molonungci, yukto-yukto kunung ara Ni kanyatam u yirsiniraning. Ati, ni yu aryi uk lemberengdur dinyi ara akatei ab, ninyi nirya ab asi ikin weik dinyi karebnyi ba, mambul weik dobde binkwaming, ebmar,’ ebkwandum! 26Bok, eda, Yehuda mutuk sienyi biryi, ‘Imtamnyi biryi aruksou to ara una eboka aruksou do? Imtamnyi uram ebmar to asi asirbindarur!’ eboka sunsi arukmasir ba, yanmarumnyi bisi bindoka, ‘Er Iya Erebdobnyi uram kekeabdau uram asi ato ebmar,’ ebdarur! 27Ani, tonda ato ebkwandarur, ‘Er Iya Erebdobnyi uram kerek sengna yandoka nukmobwe ba, kekebumci, kan kanya luknubdongoboka, “Ni malyito kuniryi Er Imtamnyi uram dangbisinun,” tenen aryi kan ongon aling kwilikabokmarimci, engebmarim ara ni kekebmakin. A deyok aryi akatei Yerusalem atei ab, akatei ninyi nirya ab asi orminingna kum kubkwan. Er Iya Erebdobnyi uram ara ato ebmar,’ ebkwandarur. 28Ani, tonda ato ebmar ebkwandarur, ‘Ato kuna kum kubmatum ura, minob dibmatuma. Kan minob dibmatum bok asi, aminda aryi a mutuk ab, a mutuk ninyi ab asi ikin dinyi kareboka wenebkwamatinyi dinyi ara kan asing eirina kum kubkwamatum, ebmar,’ ebkwandarur!” ebmou. Ura, a nang tamuboka sienyi bisi binmai ura, “Er Imtamnyi bira ato ebmar,” ebmai.
29Ura, sienyi Yosia biryi Yehuda mutuk sien nang ab, Yerusalem atei sien nang ab nirya nabmou ba, buluryanmai. 30Ura, Imtamnyi biryi ebdeiamwe uram nukwamai ati, Yehuda mutuk sienyi ab, Yehuda yala nang weik atei-weik atei kuramnyi ninyi nirya ab, Yerusalem atei kuramnyi ninyi nirya ab bulubmai. Ani, Lewi yala nang babyi, imam nang babyi, wisi nang babyi, mitik mabwe babyi, nirya Er Iya Erebdobnyi ai dam akwe bulubmai. Ura, sun kekenmai ba, Imtamnyi ai umbura aryi Er Imtamnyi ebdeiamwe uram dobmai kerek sengna nirya nukmou. 31Ura, sienyi Yosia bisi er sokon yuk lobdeibmai ba, tikokaburyi, Er Iya Erebdobnyi urasintam tubto uram talak kirikeiamwe. Ara, ato ebmou, “Nun Israel ninyi aryi Hilkia dobmou kerek sengna umbura sekamwe dinyi nirya iya kunubkwamab. Ara, Er Iya Erebdobnyi biryi, ‘Ukubdarur-Ukuna mem,’ eamwe uram ab, yuk-yuk deyok nirya ati, ‘Ato kubde bankwandarur,’ eboka arukmou uram ab, nunci nong ab, kanya ab iya kunubkwamab,” eboka tubto uram talak kirikeiamwe. 32Ura, sienyi biryi Yehuda yala mutuk Yerusalem atei kuramnyi ninyi nirya ab, Benyamin yala mutuk kuramnyi ninyi nirya ab asi, “Nun nai yabwe moloraminyi, Er Iya Erebdobnyi biryi a ebdeibwe to akwe kunubde bankwayeb,” eboka arukmou. 33Ura, sienyi Yosia biryi, “Israel yala nang mutuk nirya kwemdeina kikniboka molordaramnyi dikum nirya dalubkiribdarur! Ukura nun abwe yabwe ab, nun nai yabwe ab, moloraminyi Er Iya Erebdobnyi bisi molonkwayeb,” eboka arukmou. Ba, Yosia sienyi kiboka taleamwe talak ara Israel mutuk ninyi nirya ara kwemdeina ton molona kum uca, Er Iya Erebdobnyi bikwe moloramnyi.
Currently Selected:
2Tawarikh Uram 34: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
