2Tawarikh Uram 33
33
Manasye sienyi kibmou deyok
33:1-20
(2Raj. 21:1-18)
1Ura, Manasye er kubde baramwe ani, kwalina 12 baryi kwalibmou bok asi, sienyi kibmou. Ba, sienyi kiboka Yerusalem atei taleamwe kwalina yubwa ara 55 baryi kwaliamwe. 2Ba, a sienyi Manasye bira Er Iya Erebdobnyi biryi li tenerande dinyi akwe kunuramwe. Ara, Kanaan mutuk Israel nang wengyankoui ati, Er Iya Erebdobnyi biryi Kanaan yoka nang minob kuramnyi nang yakdonokamwe nang aryi ukuramnyi to kuboka kwemdeina moloramwe. 3Ura, Hizkia sienyi kiamwe talak aryi, mutuk konkon dam moloramnyi kwemdeina nirya dalubkiribokamwe dinyi asi tubto kikniboka moloramwe. Ara, kwemdeina si Baal ati dama deiboka uk dan keil lamna toto, kwemdeina si Asyera atoa kiknibdeiboka imtam kurande mikib ati kisok luknubdongoboka moloramwe. 4Ani, Er Iya Erebdobnyi biryi ato eamwe, “Yerusalem atei dam Ni molon ai si Bait Allah ai ara Ni si akwe iya erebde bankwaming atei!” eamwe. Bok, Manasye biryi Er Iya Erebdobnyi ai asi kwemdeina moloboka dama deirin co lamna kiknibdanmouci, moloramwe. 5Ura, Er Imtamnyi ai dam keta bitinyi nirya ara imtam kurya nirya ati dama deiboka molonkwamwe ati, co lamna kiknibmou. 6Ani, mutuk si Ben-Hinom bakan bindoka kwemdeina ati, er mining mabwe asi oboka uk dabmou. Ani, Manasye biryi asing kerketnyi kibmouci, din nang kanya asi naboka, isa toto, isa ner toto asi uram sisikoka molonanyi kibmou. Ato kubmou ba, Er Iya Erebdobnyi kanya u yibdeibmou. 7Ani, Er Iya Erebdobnyi biryi minob talak aryi Daud ab, er Salomo ab deici asi ato eamwe, “Niryi Israel yala nirya kundarura kankan dam aryi, Yerusalem atei dam Ni si weik eboka erenin ai ab dam aryi, Ni si iya a deibdongobne,” eamwe. Bok, Manasye biryi Er Iya Erebdobnyi ai umbura asi, er molon kwemdeina kikniboka deibmouci, moloramwe. 8Ani, Er Iya Erebdobnyi biryi ton ato eamwe, “Sun Israel nang aryi Niryi ni wa inanyi Musa deici aryi, ‘Ukubdarur-ukuna mem,’ ebdeibse uram ab, yan memen uram nirya ab asi kunuramingnyi ura, Niryi Israel yala nang asi sun abwe yabwe ati eanse mutuk dam aryi yangdonongna kum kubkwan,” eamwe. 9Bok, Manasye biryi Yehuda yala nang nirya ab, Yerusalem atei ninyi ab asi malyi dinyi bobdongobmou ba, malyito akwe kunubsekmai. A mutuk yoka nang Kanaan minob kuramnyi to ara mitiktoto uca, sunci ukubmai malyi dinyi ara weikto kubmai.
10Ba, Er Iya Erebdobnyi biryi Manasye ab, er taleamwe mutuk ninyi ab asi, “Kwemdeina molona mem,” eramwe ababyi taba deiboka kwemdeina moloramnyi. 11Ura, Er Iya Erebdobnyi biryi Asyur ninyi asi mundu lobmou ba, Asyur mutuk weik sienyi yin doun nang sien nang yandoka, Manasye bisi kwaburya atoa si diriboka talebmaici, tembaga tabwe aryi deboka Babel dam bobinmai. 12Ura, Manasye bisi Babel mutuk bindoka dongoamnyi ba, mambul doramuryi, iya luknubdongoboka er abwe yabwe moloraminyi, Er Iya Erebdobnyi bisi moloramwe. 13Ba, Er Iya Erebdobnyi Er yu boamwe dinyi mundu tebmou ura, er molona kekebmou. Ura, Manasye er atei Yerusalem tubto bobinmouci, tubto sienyi kibmou. Ura, Manasye biryi, “Kwemdeina ara dib dinyi kuma, eda Er Iya Erebdobnyi bisi dib Erebdobnyi kurur,” ebmou.
14Ura, Daud sienyi kiamuryi, kuramwe atei asi baitam lika sasiboka dobmou. Ara, me Gihon kouboka kitingbantam kuboka bakan aryi lika dobde binamwe ani, Pintu Gerbang Ikan dam Ofel enung atei dam bindoka sirya dobmou. Lika dobmou ara im dub ereboka dobmou. Ura, yin doun nang sien nang Yehuda mutuk atei lika doboka sasibde kuramnyi tok nirya kabdeibnin yibinmou. 15Ani, Er Iya Erebdobnyi ai umbura asi, yuk-yuk kwemdeina ati molon keica nirya daluboka bai donokmou. Ani, kwemdeina ati, dama deiboka molon co lamna Imtamnyi mutuk kon dam deibdanamwe dinyi nirya ab, Yerusalem atei deibdanamwe dinyi nirya ab daluboka lika bisiboka bai donongbinmai. 16Ura, Er Iya Erebdobnyi biti dama deirin co lamna yumkuna kiknibmou. Ura, Imtamnyi biti, “Ni nai, ni babya,” eboka Imtamnyi bisi kiron dinyi ati dama deirin dinyi ab, malyi dinyi kilina ati dama deirin dinyi ab dama deiboka uk dabmou. Ura, Yehuda mutuk ninyi asi, “Er Iya Erebdobnyi, nun Israel nang molonubnyi bisi molobkwayeb,” eboka nabmou. 17Ba, Yehuda yala ninyi aryi mutuk konkon aryi kwemdeina molon dikum dama deiboka molonmangnyi ababyi, Er Iya Erebdobnyi bitikwe dama deiboka moloramnyi.
18Ba, Manasye biryi er ukubde yangaramwe to ab, Imtamnyi bisi moloramwe to ab, Er Imtamnyi Israel nang sun moloraminyi biryi kunumna kunurdeiramwe. Ba, a nang sun asing eibmangnyi to Manasye er dam eramnyi dinyi ab, liliboka kerek sekyi kerek sengna ara Israel nang sun sien nang buramnyi dinyi kerek sengna umbura asi liliboka sekyi. 19Ani, Manasye Er Imtamnyi bisi moloramwe dinyi babyi, molobmaci ba, kunurdeiriramwe dinyi babyi, malyi dinyi kunuramwe dinyi babyi, Imtamnyi bisi busul kuboka molona kum kuramwe dinyi babyi, dama deiboka molon dikum kikniboka uk daramwe dinyi babyi, kwemdeina molon co ikoka tingdeiriramwe dinyi babyi ara Imtamnyi uram ermurun nang kerek sengna umbura kerek sekyi. Ani, Manasye Er Imtamnyi bisi luknubdongoboka ilil tenena kum kubmou talak aryi, kwemdeina kiknibdeiboka moloramwe dinyi babyi, liliboka kerek sengna ara Imtamnyi uram ermurun nang kerek sengna umbura kerek sekyi. 20Ani, Manasye dibmou ura, er sienyi kiboka kuramwe atei dam tukwe dongobmai. Ura, er mi Amon unuboka sienyi kibmou.
Amon sienyi kibmou deyok
33:21-25
(2Raj. 21:19-26)
21Ura, Amon kubde yangaramwe ani, kwalina 22 baryi kwalibmou bok, sienyi kibmou. Ba, er sienyi kiboka Yerusalem talebmou kwalina ara kwalina bitinyok kwalibmou. 22Ura, Amon bira er nai Manasye biryi Er Iya Erebdobnyi teleb tenena kum dinyi kunuramwe to akwe kuramwe. Ara, Amon biryi er nai Manasye biryi kwemdeina kiknibdanamwe dinyi asi kisok luknubdongoboka moloramwe. 23Uca, er nai Manasye bira malyi dinyi kunuramuryok, luknubdongoboka Er Iya Erebdobnyi dam yandobmou. Bok, er mi Amon bira malyito dinyi akwe ilinto tabakdongobnin baramwe uca, malyito dinyi weik kibmou. 24Ato kuramwe deyok aryi er wa in nang aryi moun yibmaici, er mining sienyi kiboka kuramwe ai dam aryi obmai. 25Ba, Yehuda mutuk ninyi aryi Amon obmai nang ababyi obmaici, er mi Yosia sienyi tikeibmai.
Currently Selected:
2Tawarikh Uram 33: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
