2Tawarikh Uram 32
32
Asyur mutuk sienyi Sanherib biryi Yerusalem atei mar bobmou deyok
32:1-19
(2Raj. 18:13-37; Yes. 36:1-22)
1Ura, Hizkia sienyi kiamuryi, telebto akwe kubde baramuryi, Er Imtamnyi ai yumkuna dobmou dinyi ab, weik li Paskah kwalina li dobmou dinyi ab deyok aryi, Asyur sienyi si Sanherib biryi Yehuda yala nang asi mar bobmou. Ura, Sanherib biryi, “Yehuda mutuk weik atei nirya arabdobkwan,” tenebmouci, Yehuda yala nang mutuk weik atei kuramiryi lika dordaramnyi atei asi mar bobmou. 2Ura, Hizkia kekenmou uca, “Sanherib biryi Yerusalem atei mar bobkwamar,” ena kekebmou. 3Ura, Hizkia biryi yin doun nang sien nang ab, ninyi ordana deyok nang ab asi ato ebmou, “Nun atei Yerusalem dam akiryi, me anaboka, barur bisik nirya tirikdongobkwayeb,” ebmou. Ba, sunci, “Teleb ukubkwamab,” ebmai. 4Ura, ninyi ilinto nirya bulubmai. Ura, a mutuk dam aryi me anaboka baramwe me u dam bok nirya tirikdongobde yibinmai. Ura, ato ebmai, “Asyur sienyi ab, er atei nang ab yangangnyi ura, me una kuboka yibdobkwamang do?” ebmai. 5Ura, Hizkia mikib dobdobmouci, weik atei lika dakamwe dikum nirya sasiboka dobde yibinmou. Ura, ninyi iyangana weleboka dina ati, lika dub asi dukoka dobdanin yibinmou. Ani, baitam kuboka lika yuk doboka dakdongobmou. Ani, Daud kuramwe talak aryi doramwe atei lika baitam kuboka tukwe aryi yamuboka sasibdongobmouci, lika dobmou. Ani, ninyi on te balang ab, mar urub limdon co las ab ilinto kiknibmou. 6Ura, ninyi mar bon sien nang wiboka, sal olong yuk sien nang yuk wibdeibnin yibinmou. Ura, weik atei lika bisik bublan dam asi bulubdeibmouci, ato ebmou, 7“Sun kanya wisibdobmunci, sun nong mikib kusina teleb! Sunci Asyur sienyi ab, er yin doun nang ab ati ilil kuboka, ‘Nai e, talya obkwansing,’ tenena mem. Ara, er tam nang ara mitikto uca, nun tam nang ara ilinto ati ebman. 8Asyur sienyi tam kiboka er milibkwamang nang ara ninyi sirik aryi milibkwamang. Bok, nun tam kiboka, nun milibkwamasiranyi bira nun molonubnyi, Er Iya Erebdobnyi biryi nun tam kiboka mar bobmilibkwamasir ati ebman,” ebmou. Ura, akatei ninyi sienyi Hizkia uram kekebmai ura, sun kanya dabub kanya dongobmou.
9Ura, Asyur sienyi si Sanherib ab, er yin doun nang ab Lakhis atei yandoka mar bobmai. Ura, akatei dam yandoka ninyi bokeibmouci, uram ebdeibmou ba, Yehuda yala nang Yerusalem atei ninyi ab, sienyi Hizkia ab asi eryanmai. 10A ebdeibmou uram ara ato ebdeibmou, “Nira, Asyur mutuk sienyi si Sanherib biryi sun Yehuda yala nang asi asibdenkwankin. Sunda, ni mar iyanganmasin bok, taba deiboka Yerusalem atei tuba kunmarum ara unanyi biryi lebkwamasir ati kunmarum do? 11Hizkia biryi sunsi, ‘Asyur nang mar iyanganmasing ara ilil kuna mem! Nun Nai Imtamnyi biryi lebkwamasirca,’ enmasir uram ara dib tenebmarum do? Tola enmasir. Sunda Hizkia uram asi, ‘Dib,’ ebmar tenebmarum aryi sun kwaning utaboka, me utanmasir. 12Sun sienyi Hizkia biryi Imtamnyi biti dama deirin keil lamna yuk-yuk dinyi nirya ara dalubkiriboka sun Yehuda yala nang ab, Yerusalem atei ninyi ab asi, ‘Imtamnyi biti dama deiboka, uk dan keil lamna tentok dinyi akwe dama deiboka uk dankwayeb,’ ebsou. Ato ebsou ura, erbabyi Imtamnyi bisi dib tenena kum kururcok Imtamnyi tam kimdonmar do? 13Hizkia bira, ‘Asyur ninyi aryi, yuk-yuk mutuk asi ukuboka onung,’ ena ton bingdur do? Ani, ni Asyur sienyi mar bobmanyi atei asi, sun moloramingnyi kwemdeina aryi, ‘Ukuboka lebdeibmar,’ ena ton kekerur do? 14Unanyi bisi ni nai yabwe mar bobmangnyi ateinyi bisi er kwemdeina aryi ukuboka ton lebdeiamwe do? Ati, Israel nang molondarurnyi biryi ni mar bobmasinyi asi lebdobkwamasir do? 15Sun Yehuda yala nang aryi, sun sienyi Hizkia uram kekeboka, ‘Dib ebmasir,’ teneboka, kununa mem! Ni Asyur sienyi biryi mar bobmanyi atei ara sun moloramingnyi kwemdeina aryi ton lemdona kum kunung! Ani, ni abwe yabwe aryi mar bobmangnyi atei ara ton lemdeirina ton kum kuramwe. Bok, sun tikwe lebdobkwamakute do?” ebmou. 16Ani, Sanherib biryi er yin doun nang asi yuk-yuk uram ababyi ilinto eboka, Er Iya Erebdobnyi ab, er wa inanyi Hizkia ab asi ilinto kereboka durukmai. 17Ani, kerek sekeibmoua umbura ara Er Iya Erebdobnyi, Israel nang moloraminyi bisi malyito eboka kerek sekmou. Ara, ato eboka kerek sekmou, “Ni mar boranyi mutuk atei ara sun moloramingnyi kwemdeina aryi ton lemdeirina kum kurur! Ato akwe Hizkia er molorurnyi biryi ni mar bobmanya lemdeirina kum kubkwamar!” eboka kerek sekmou. 18Ura, Asyur sienyi biryi uram ab kerek sengna ab bobinmai nang aryi, Yerusalem atei lika deici wekmai nang asi, Yehuda yala nang uram Ibrani uram aryi uram doboka ilil kibsinibmai. Sun kanya ara, “Uram ato eboka, ilil kanya bobingnyi talak ara mar boboka obkwayeb,” tenen ato ebmai. 19Ura, a nang aryi Er Iya Erebdobnyi, Israel yala nang moloraminyi bisi durukoka, malyi uram enmai ara ninyi aryi kiknibdeiboka moloraming kwemdeina asi eninto enmai.
Asyur sienyi Sanherib biryi Yerusalem atei nang asi mar bona kum kubmou deyok
32:20-23
(2Raj. 19:1-37; Yes. 37:1-38)
20Uca, ato enmai deyok aryi Hizkia ab, Imtamnyi uram ermurunanyi Amos mi nabi Yesaya ab aryi, imtam ai Er Iya Erebdobnyi bisi uram weikanun iboka uram dobmareici, molobmarei. 21Ba, Er Iya Erebdobnyi biryi Er dam wa inanyi malaikat dobkwetebmou ba, Asyur mutuk yin doun nang, mar ordana mikib aryi co biribdob nang ab, mar boboka menengni nang ab, yin doun nang sien nang ab nirya, Asyur sienyi ai yandoka doboka kunmai dikum aryi nirya obukmou. Ba, Asyur sienyi alyi asa er atei tamuboka binmou. Ani, Asyur sienyi er kwemdeina moloramwe ai wengbau asi er mining mabwe aryi, ninyi on ya aryi lukoka obmai. 22Ukuboka, Asyur sienyi Sanherib ab, er yin doun nang ab asi Er Imtamnyi biryi obkiribmou ba, Yerusalem ninyi ab, Hizkia ab ona kum kubmai. Ukuboka, Er Imtamnyi biryi Yerusalem atei dina bisik-dina bisik nirya kalikokamwe ba, mangkau asa kuroramnyi. 23Ura, ninyi ilinto Yerusalem atei yangaramiryi, bona dengna weik dinyi Er Imtamnyi biti dama deiboka, Yehuda yala nang sienyi Hizkia biti bona ilinto kareboka kimnamnyi. Ba, a talak ara yuk-yuk mutuk ninyi nirya Yehuda sienyi Hizkia si ereramnyi.
Hizkia sienyi kiboka Yerusalem taleamwe ani, sirya talak deyok
32:24-33
(2Raj. 20:1-21; Yes. 38:1–39:8)
24A talak aryi Hizkia youn dobdobmouci, dibmanto kunmou. Ura, Hizkia biryi Er Iya Erebdobnyi bisi molobmou ba, kunumna tentok erti karebmou. Ara, dibmanto youn yiramwe bok, nakibdobmou. 25Uca, Hizkia biryi er youn kwetebdeiboka telebto kurdeiriramwe dinyi ati, “Ni nai, ni babya,” ena kum uca, er wingdana kanya bobmouci, taklobmou ba, sienyi ab Yehuda yala nang mutuk nirya ab, Yerusalem atei ab asi Er Imtamnyi biryi yu bobmou. 26Ba, Hizkia tubto, “Ni malyito kubman,” tenebmouci, luknubdongoboka Yehuda yala nang ab, Yerusalem atei nang ab buluboka, Imtamnyi bisi molobmai ba, Imtamnyi biryi yu bobmou dinyi kununa kum kubmou. Ba. Hizkia sienyi kiamwe talak ara mangkau asa kuroramnyi. 27Ba, Hizkia bona ilinto bonanyi kibmouci, si ererdeiriramnyi. Ura, er ai dam er bona deirin ai dobmouci, emas deirin ai yuk, perak deirin ai yuk, dengna weik keil deirin ai yuk, tong teleb erande co yung deirin ai yuk, er mar urub limdon co las deirin ai yuk, ani yuk-yuk dinyi ababyi miningna ai dobmouci, miningdamwe. 28Ani, koubdoba miningni ai yuk dobdanmou. Ara, gandum toto, anggur toto, zaitun toto miningni ai yuk doboka miningdamwe. Ani, bisam yala nirya sapi toto, domba toto, kambing toto ani yuk-yuk bisam ababyi ai yuk-yuk doboka winiramwe. 29Ura, Er Iya Erebdobnyi biryi Hizkia bisi bona ilinto kareramwe. Ani, tonda bisam sapi toto, domba toto ilinto taleramuryi, erbiramnyi ati weik atei-weik atei doramwe. 30Ani, Hizkia biryi me si Gihon u dam bok aryi wakoka kitingbantam Daud sienyi kiamuryi, weik atei doboka kuramwe tam kuboka dobkweteamwe. Akiryi Hizkia er wa iramwe dinyi ara kunuboka telebto kuramwe. 31Ura, Babel mutuk aryi ninyi bokdonokmai ba, Hizkia er youn yiramwe asi nakibdobmanto kum youn yiramwe bok, ilil tenen dinyi kunuboka nakibmou ati asiryanmai. A talak ara Er Iya Erebdobnyi biryi, “Hizkia er kubkwande to nun. Ba, er teneranci dinyi lak kibkwande,” teneboka yanlobmou.
32Ba, Hizkia biryi yuk-yuk dinyi da ukuramwe dinyi ab, erci telebto kuramwe dinyi ab liliboka kerek sengna ara Amos mi nabi Yesaya biryi kunumna asing eibmou dinyi kerek sengna umbura ab, Israel nang ab Yehuda yala nang ab sien nang kimnamnyi kerek sengna umbura ab asi liliboka kerek sekyi. 33Ba, Hizkia sirya dibmou ura, sien nang Daud mabwe tukwe dongorban bisik welebana dam asi tukwe dongobmai. Ba, Hizkia dibmou talak ara Yehuda yala nang mutuk ninyi nirya ab, Yerusalem atei ninyi ab aryi boukwe boboka engebmai. Ura, Hizkia er mi Manasye bisi er nai sienyi kiamwe olong unuboka sienyi kibmou.
Currently Selected:
2Tawarikh Uram 32: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
