2Tawarikh Uram 31
31
1Ukuboka li doamnyi dinyi sirya dakmai ura, Israel ninyi nirya Yehuda yala nang mutuk atei yuk-yuk bindobmai. Ura, atei bindoka kwemdeina moloramiryi keil dukoka kiknibdanin yibaramnyi dinyi nirya dalubmai. Ani, kwemdeina co ingdaramnyi dinyi daluboka, mutuk konkon aryi kwemdeina ati bisam oboka uk dan keil lamna daluboka kibmai. Ara, Yehuda mutuk weik atei nirya ab, Benyamin yala nang mutuk atei nirya ab, Efraim yala nang mutuk nirya ab, Manasye yala nang mutuk atei nirya ab kwemdeina moloramnyi dinyi nirya daluboka kum dandeibmai. Ani, Israel yala nang ababyi sun mutuk atei yuk-yuk binmai.
Sienyi Hizkia biryi Lewi yala nang ab, imam nang ab ati, sunci dama deirinkwamnyi bisam domba buluboka karebmou deyok
31:2-21
2Ura, sienyi Hizkia biryi Lewi yala nang olong yuk-yuk, Imtamnyi ai wa in nang imam nang olong yuk-yuk wibmou. Ura, sun wa inkwamnyi to kuboka bokeibmou. Ura, sun yuk-yuk karebmou wa ara bisam domba toto, sapi yim toto dama deiboka nong nirya uk dan bisam domba ab, Er Imtamnyi biti bisam kob dama deiboka tub ara tonkwa yina dinyi ab, bisam uk dan nang ton wibmou. Ba, tonda Imtamnyi biti, “Ei nun Nai, nun babya,” ena ati bisam deirina ab, Er Imtamnyi si weik ereboka mot semni nang ton kuboka wa karebmou. Tonda, Imtamnyi ai wengban bisik bublan dam kalingni nang ton wa karebmou. 3Ura, sienyi Hizkia biryi er taleramwe bisam ilinto karebmou. Ara, belekuna aryi oboka uk dankwamnyi domba ab, sintam aryi dama deiboka uk dankwamnyi bisam domba ab, uki ta tum hari Sabat tum berekci tum aryi oboka uk dankwamnyi bisam domba ab, ukuryok wala dobci tum aryi oboka uk dankwamnyi domba ab ati karebmou. Ani, yuk-yuk li tum Imtamnyi biryi Musa biti eamwe ba, kerek sekamwe umbura kerek sekwe li don tum nirya tum aryi oboka uk dankwamnyi domba toto, sapi toto ilinto karebmou. 4Ura, Hizkia biryi Yerusalem atei ninyi ati, “Imtamnyi ai wa in nang imam nang ab, Lewi yala nang ab ati, sun yina bulubdarur! Ba, sunci Er Iya Erebdobnyi ebdeibwe to Er ai wa teleb kuboka ibde binkwaming,” ebmou. 5Ato ebmou ura, a uram boboka Israel mutuk weik atei nirya ebde yibinmai. Ba, sun roti kiknina gandum wa iramnya yuma dinyi ab, co anggur yuma dakmai dinyi ab, zaitun du yung ab, kwiryi me ab, ani yuk-yuk koubdoba nirya kiboka bulubmai. Ani, sun wa iramnya dinyi nirya asi ara meici kukoka takubaryi kiboka yina ilinto boyanmai. 6Ani, Israel yala nang babyi, Yehuda yala nang babyi, Yehuda mutuk kuramnyi nang ara sun bisam sapi toto, domba toto, kambing toto meici kukoka takubaryi kiboka bulubmai. Ani, Er Imtamnyi biti yuk dinyi wiboka deirin dinyi ababyi meici kukoka takubaryi kiboka bulubmai. Ura, Er Iya Erebdobnyi, sun moloraminyi biti boyanmai. Ura, boyandoka deibde welenmai ba, im si tobmou. 7Ato kuboka buluramnyi ara winiryi wala aryi deyok kouboka ukuramnyi asi, tabaryi wala kimbinmou. 8Ura, Hizkia ab, er dam wa in nang ab yandoka diramnyi uca, utotoa deiriramnya ilinto im si tobmou ura, Er Iya Erebdobnyi bisi kiboka a deiriramnyi ninyi asi kisal dakmai. 9Ura, Hizkia biryi imam nang ab, Lewi yala nang ab asi a buluramnyi yina deyok ati asibmou. 10Uca, imam nang sienyi Zadok deibdoba Azarya aryi ato ebmou. “Yuma Imtamnyi biti dama deiriryangaramnyi talak aryi kuboka, uku talak ara nun kwaning utana kum kusurur. Eda, kwaning bousurur. Ba, kamlonub dinyi ara ilinto kurur. Ara, Er Iya Erebdobnyi biryi a mutuk ninyi asi kisal dangna dinyi karerur deyok aryi yina ilinto kamlonub,” ebmou.
11Ura, Hizkia biryi, “Utotoa dama deiriryanmangnyi dinyi miningna ai, Er Iya Erebdobnyi ai dam dobdarur!” eboka arukmou ba, dobmai. 12Ba, Imtamnyi biti dama deirin yala nirya, utotoa meici kukoka takubaryi kiboka deiriryangan dinyi babyi, yuk-yuk dama deirin dinyi babyi nirya ara akai akwe mining damnyi. Ba, Lewi yalanyi si Konanya akai kalingnanyi kiamwe. Ba, er weit si Simei bira er milinanyi kiamwe. 13Ba, sun damulub sun wa irmilin nang ara ninyi takubaryi iramnyi. A nang sun si ara Yehiel ab, Azazya ab, Nahat ab, Asael ab, Yerimot ab, Yozabad ab, Eliel ab, Yismakhya ab, Mahat ab, Benaya ab, sun menengni nang Konanya ab, Simei ab amwetam wa iramnyi. Ara, sienyi Hizkia ab, imam nang sienyi Azarya ab aryi eande to kunuboka iramnyi. 14Ani, Lewi yalanyi Yimna mi Kore bira Imtamnyi ai wengyangan bisik yaletam bisik bublan dam kalingnanyi kibdeibmai. Ani, er wa ara tonda, sun kanya mundu loboka Imtamnyi biti dama deiriryanganmangnyi dinyi ab, Er Iya Erebdobnyi biti yuk wiboka boyanmangnyi dinyi ab doboka, liliboka bongdeirinanyi ab kibdeibmai. 15Ba, yuk atei-yuk weik atei Imtamnyi ai wa in nang kuramnyi atei ara Kore bisi Lewi yala nang nabaryi aryi busul kuboka miliramnyi. A nang si ara Eden ab, Minyamin ab, Yesua ab, Semaya ab, Amarya ab, Sekhanya ab aryi miliramnyi. Ba, a nang aryi a bulubmangnyi yina ab, bona ab ara neiktoto akwe sun kwit yabwe Lewi yala nang olong yuk-yuk nirya wis nang babyi, kabir nang babyi neiktoto akwe bongdamnyi. 16Ani, sal kwalina 30 baryi eitam kwaliamingnyi nang ara Imtamnyi ai wa in nang imam nang si kerek sengna umbura sekamingnyi deyok aryi a nang ara anda yina toto, bona toto kareramnyi. Ba, imam nang yala ara sal nirya Er Iya Erebdobnyi ai sun wa yuk-yuk kareamingnyi to Er Imtamnyi ai wa irbaramnyi. 17Imtamnyi ai wa in nang sun deibdoba yala yuk-yuk si kerek sengnamnyi. Ba, Lewi yala nang ara kwalina 20 baryi kwalibmangnyi nang ara sun ai ninyi si kerek sengna umbura si sengnamnyi. 18Imam nang ara sun ai ninyi nirya si kerek sengnamnyi. Ara, er ner si ab, er mi si ab, er nebnyi si ab ani, sun ai ninyi si nirya sengnamnyi. Ba, ukuboka ninyi si kerek a sengnamnyi aryi, Er Iya Erebdobnyi ai wa ina tangna kum kuramnyi. 19Ba, Harun yala deibdoba imam nang ara sun si semebni to kuboka, anda weik atei nirya bongdeiriramnyi. Ani, Lewi yala nang asi sal akwe sun si kerek sekamingnyi nang ara yina kareramnyi.
20Sienyi Hizkia biryi Yehuda yala nang mutuk nirya ukuboka lilirdeiriramwe. A sienyi Hizkia bira teleb dinyi ab, dib dinyi ab, ninyi mundu lobdobto dinyi ab, Er Iya Erebdobnyi kanya teleb kun dinyi akwe kunuramwe. 21Er Hizkia biryi sienyi kibmou ura, yuma Imtamnyi ai doboka, Imtamnyi biryi, “Ukubde binkwandarur,” eamwe to akwe kunubde baramwe. Ani, Er Iya Erebdobnyi bisi kanyi deiamuryi, yuk-yuk wa ibde baramwe dinyi nirya nong kuboka kunuramwe.
Currently Selected:
2Tawarikh Uram 31: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
