2Tawarikh Uram 30
30
Sienyi Hizkia biryi kwalina li si Paskah li dobmou deyok
30:1–31:1
1Ura, sienyi Hizkia biryi uram kerek sekoka Israel yala ninyi ab, Yehuda yala ninyi ab kuramnyi weik atei nirya deibmou. Ani, Efraim yala nang ab, Manasye yala nang ab ababyi uram kerek sekoka deibmou. Ba, a bitinyi yala nang ababyi, “Nun nai Iya Erebdobnyi, Israel yala ninyi molonubnyi biti, kwalina li si Paskah tonkwa Yerusalem atei Er Iya Erebdobnyi ai dam aryi li dobkwayeb,” eboka nabmou. 2Ura, sienyi Hizkia ab, a mutuk weik nang ab, Yerusalem atei ninyi nirya ab aryi, bitinyi wala ara Paskah li doboka ukubde binkwamnyi to kiknibminikmai. 3Ura, Imtamnyi ai wa in nang ton nang ara me ilikdandoka Imtamnyi ai wa ina kikiman nang kimdana kum kubmai ba, ninyi mitikanun kibmou. A deyok ab, ninyi nirya Yerusalem atei buluna kum kubmai deyok ab ati, bitinyi wala aryi li donkwamnyi ati o wala kibdeibmou. 4Ba, uram toubdeibmai dinyi ara a mutuk ninyi nirya sun kanya teleb kubmou. 5Ura, sun Israel yala ninyi kuramnyi mutuk nirya, Bersyeba yala nang mutuk me youkwetam sirya kobdob mutuk aryi kuboka, Dan yala nang mutuk me utam sirya kobdob mutuk nirya uram ebde yibinmai. Ba, sun yala yuk-yuk nirya Yerusalem dam buluboka, sun nai yabwe Israel yala nang moloraminyi, Er Iya Erebdobnyi biti neika buluboka Paskah li doboka ton ukurdena kum kuramnyi deyok aryi ato kuboka nabmai. 6Ura, ninyi ol weik nang akwe arukmai ba, Israel yala nang kuramnyi weik atei nirya ab, Yehuda yala nang kuramnyi weik atei nirya ab yibinkirikoka, sienyi ab akatei weik nang ab aryi uram kerek sekeibmai kerek sengna boyibinkirikmai. A uram kerek sengna umbura deici ara ato eboka kerek sekmai, “Se, Israel yala nang e! Sun Asyur mutuk nang aryi osina kum kubsei ba, tuba kunmarum nang ara sun abwe yabwe Abraham ab, Ishak ab, Israel ab moloraminyi, Er Iya Erebdobnyi bisi tamuboka yandobdarur! Ba, Iya Erebdobnyi, Erbabyi tamuboka sunsi lebdobkwansir. 7Sunda sun nai yabwe ab, sun kwit yabwe ab aryi Er Iya Erebdobnyi, sun abwe yabwe moloraminyi bira takloboka, kwemdeina kanyi akwe deiamnyi ba, yuk atei ninyi aryi ilinto obsei ara sun asing kobdob aryi eibdau. 8Ati ukura, sun nai yabwe ab, sun kwit yabwe ab aryi kisok kat biriboka, kwemdeina moloramnyi to ara mem! Eda, Er Iya Erebdobnyi ebdeianci to akwe kunubde binkwandarur! Sun nong ara Er Iya Erebdobnyi biti karebdandobmunyi ura, Er Iya Erebdobnyi biryi wiboka, Er iya kunkwande ai sirya wibwe atei Yerusalem dam yandobdarur. Yandobmunyi ura, sun nai Er Iya Erebdobnyi bisi molobdarur! Ba, Imtamnyi biryi sunsi yu bobsou dinyi ara taklobkwansir. 9Ani, sunci Er Iya Erebdobnyi dam tamuboka yandobmunyi ura, sun kwit yabwe ab, sun nerabwe ab, sun mabwe ab boboka bindobiryi il dimnung ninyi ara a bobei ninyi sun boukwe kubci ba, lobdeibingnyi ura, a mutuk dam tanuboka yankwanung. Ara, sun Nai Iya Erebdobnyi bira ninyi boukwe kimnanyi kurur ati ebman. Er Iya Erebdobnyi bira Er dam yandobmunyi ura, sunsi donganirongna kum kubkwansir ati ebman!” eboka kerek sekeibmou.
10Ura, a kerek sekeibmou ba, boban nang ara ola anaboka ton weik atei bindoka a kerek karebdongobokni ura, ton atei bindoka karebdongobokni ura, kibde binmai. Ani, Efraim yala nang mutuk ab, Manasye yala nang mutuk ab wiliba bisibmaici, Zebulon yala nang mutuk wengbinmai. Uca, a mutuk ninyi ilinto aryi a banmai nang asi akwi tunmaici, durukoka, ina ngilikoka, ikik enmai. 11Uca, Asyer yala ninyi ab, Manasye yala ninyi ab, Zebulon yala ninyi ab ninyi ukunengkwe sun kanya luknubdongoboka, Yerusalem atei yandobmai. 12Ura, Yehuda yala nang mutuk ninyi nirya ara Er Iya Erebdobnyi biryi sun kanya dam wa ibmou ba, sienyi ab er wa irmilin nang ab ebmai to kunuboka, Er Iya Erebdobnyi biryi teleb tenerande dinyi akwe kunubmai. 13Ura, bitinyi wala ara Yerusalem atei asi ninyi ilinto bulubmaici, Roti Bungbung Ena keica Dongona Kum Roti li dobmai. 14Ura, Yerusalem atei dam nirya kwemdeina moloramiryi dama deiboka, uk daramnyi dinyi babyi, siltong telen co yung uk daramnyi keil lamna babyi deirirdaramnya nirya boboka weik atei lika bisiboka, baitam Kidron mutuk dam bai donongbinmai. 15Ura, bitinyi wala dobmouci, tanggal 14 tum berekmou ura, weik li Paskah tum dama deibkwamai bisam domba ngang sekoka obmai. Ba, imam nang ab, Lewi yala nang ab ara minob Imtamnyi ai wa inanyi kikimanyi kimdeirirdana kum kubmai deyok aryi, o wala kibdeibmai nang ara sun alyi kubmou. Ba, sunci dama deiboka, uk dan dinyi ara Imtamnyi ai umbura bindoka uk dabmai. 16Ura, Imtamnyi ai wengbinmaici, Musa biryi kerek sekamwe to kunuboka, sun tingni olong yuk-yuk tikmaici, a bisam obmai ining asi Lewi yala nang aryi doboka imam nang asi karebmai. Ura, imam nang aryi dama deirin keil lamna deyok dam asi ining dikmai. 17Ato kubmai ara a bulubmai ninyi ilinto Imtamnyi dama deirina kikiman ninyi kimdana kum kubdanmai deyok aryi, Lewi yala nang aryi sun a ninyi ati miliboka bisam domba obmai. 18Ara, Efraim yala ninyi ab, Manasye yala ninyi ab, Isakhar yala ninyi ab, Zebulon yala ninyi ab ara sun nong ab, ongon aling ab me ilikoka nining ato dinyi kilirdana kum bok, Imtamnyi kwalina Paskah yibkwamai ati ato kubmai. Ato kubmai to ara, “Ato kubkwandarur,” eboka kerek sengna kum bok, suncok liboka ukubmai. Uca, sienyi Hizkia biryi a nang ati, Imtamnyi bisi ato eboka molobliknibmou, “Kan Iya Erebdobnyi bira iya telebnyi kurum. Akiryi, ninyi nirya asi Kanci yu tuba bona kum uca, antanirdarandimnyi kurum. 19Ati, Nai Kanda, nun abwe yabwe molorankinyi, Er Iya Erebdobnyi kurum. Israel ninyi ton nang sun malyi kun dinyi kilibdandoka yangana kum kubmangcok, Kansi yandoka molonmaking ati, Kanci sun malyi dinyi kilibdum. Kan ai dam ara, ‘Ukubdarur,’ ena ton kum kubumwe bok, Kanda kanya telebnyi deyok aryi molobmakin,” eboka molobmou. 20Ba, Er Iya Erebdobnyi biryi Hizkia molona kekebmouci, a nang asi ikin dinyi kareboka wenena kum kubmou. 21Sun Israel yala nang nirya buluboka, Yerusalem atei akwe buluamiryi, uki tabaryi nirya karyi asa aryi Roti Bungbung Ena Dongona Kum Roti li doboka kuramnyi. Ba, berengnamwe uki nirya ara Lewi yala nang ab, Imtamnyi ai wa in nang imam nang ab ara Imtamnyi si weik eren uram iboka mot tuba semnamnyi. 22Ba, imam nang ab, Lewi yala nang ab, aryi Imtamnyi si weik eramiryi li doamnyi talak telebto akwe lilibdeiboka ukuramnyi deyok aryi sienyi Hizkia biryi kisal dangna uram eboka kisal dakdobmou. Ukuboka, uki tabaryi li doboka Paskah kwalina yiramiryi, Er Iya Erebdobnyi, sun moloraminyi biti sun lemdaron dinyi karena ati dama deiboka, “Nun Nai, nun babya,” en dinyi dama deiboka kibmai.
23Ani, akatei ninyi nirya aryi, “Tubto uki tabaryi tabakoka li dobkwayeb,” eboka uram sisikmai. Ura, tubto uki tabaryi sun kanya kilkil asa aryi li dobmai. 24Ura, sienyi Hizkia biryi a bulubmai ninyi ati, bisam sapi yim ara yubwa 1.000 baryi dobmou. Ani, domba ara 7.000 baryi dobmou. Ba, Hizkia er wa in nang aryi bisam sapi yim akwe yubwa 1.000 baryi dobmai. Domba ara 10.000 dobmai. Ura, a bisam sapi yim toto, domba yim toto yubwa nirya a bulubmai ninyi ati karebmai ba, oboka yibmai. Ba, a talak aryi imam nang ilinto ara sun malyi dinyi kiliboka Imtamnyi ai wa in nang kikiman nang sirya kibdanmai. 25Ura, Yehuda yala ninyi a bulubmai ninyi sun ab, imam nang ab, Lewi yala nang ab, Israel yala nang mutuk aryi yanmai ninyi ab, yuk mutuk nang asi Israel mutuk kuramnyi aryi yanmai nang ab, Yehuda yala nang mutuk a kuramnyi aryi yanmai nang nirya sun kanya kilkil kubmou. 26Ukuboka Yerusalem atei buluboka li dobmai. A bulubmaici, li dobmai to ara minob Daud mi Salomo Israel sienyi kiboka taleamwe talak ababyi, a bulubmaici li dobmai to ara Yerusalem atei ton ukuna kum kuramnyi to asi a kunum ukubmai. 27Ura, Lewi yala nang bok imam nang ara tikoka a wekmai ninyi asi kisal dangna dinyi karebmai. Ba, imam nang aryi Er Iya Erebdobnyi bisi molobmai uram ara Er Iya Erebdobnyi imtam ai dam binmou ba, kekebmou.
Currently Selected:
2Tawarikh Uram 30: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
