2Tawarikh Uram 29
29
Sienyi Hizkia deyok
29:1-2
(2Raj. 18:1-3)
1Er Hizkia kubde baramwe ani, kwalina 25 baryi dinyi kibmou bok, sienyi kibmou. Ba, sienyi kiboka Yerusalem atei taleamwe kwalina yubwa ara 29 baryi kwaliamwe. Ba, Hizkia er kwin bira Zakharia nebnyi si Abia biryi deiamwe. 2Ba, Hizkia sienyi kiboka taleamwe ara er abwe Daud biryi Er Iya Erebdobnyi teleb tenerande dinyi akwe kunuramuryi, taleamwe to akwe erbabyi kunuramwe.
Hizkia biryi Er Iya Erebdobnyi ai tubto me ilikoka, Imtamnyi ai kikiman kibdeibmou deyok
29:3-36
3Ura, Hizkia sienyi kibmou talak yuma kwalina ara Er Iya Erebdobnyi ai bublan kukoka tubto kiknibmou. 4Ani, Imtamnyi ai wa in nang imam nang ab, Lewi yala nang ab naboka bulubmou. Ura, Imtamnyi ai dam yaletam kuboka keta asi buluboka wekmai. 5Ura, sunsi ato ebmou, “Lewi yala nang kekendarur! Sun nong asi me ilikoka Er Imtamnyi wa ina kikiman ati kiknibdamunyi ura, sun nai yabwe moloraminyi Er Iya Erebdobnyi ai asi malyi dinyi beterdongona nirya kiliboka, Imtamnyi dinyi kikiman kibdeibdarur. Ani, Imtamnyi ai umbura beterdongon dinyi kurdaranci dinyi nirya ai dam dobkweteboka memebdarur! 6Ara, ato ati ebman. Nun nai yabwe ara nun Nai Er Iya Erebdobnyi bisi molona kum uca, takloboka kwemdeina asi moloramnyi ara Imtamnyi urasin dam asi malyito kuramnyi ati ebman. Nun abwe yabwe ara Imtamnyi kuramwe dikum ara donganiboka kwemdeina tam asi urasin deiamnyi. 7Ani, nun nai yabwe aryi, Imtamnyi ai ara bublan tirikdongoboka, Imtamnyi ai umbura uk ubna ardeirin dinyi ababyi tanabdeibokamnyi. Ani, Er Iya Erebdobnyi, nun Israel ninyi molonubnyi ai dam bindoka, siltong teleb en co yung uk daboka, bisam domba oboka nong nirya uk daboka kimna kum kuramnyi. 8Ato kuramnyi deyok aryi, Er Iya Erebdobnyi er yu weik kubmou ura, Yehuda yala nang weik atei nirya ab, Yerusalem atei ab asi, ‘Ur obnung,’ tenen mundu lobsou ba, mar boboka osunung. Er Iya Erebdobnyi biryi se tenen dinyi ukubsou ba, mambul weik dinyi nun dam oungyasou ara sun asing kobdob aryi eibdau. 9A deyok aryi nun nai yabwe asi ya lukoka obnin yibei ba, dibsekyi. Ani, nun nerabwe toto, nun mabwe toto, nun nermabwe toto asi taleboka yuk atei bobiryi, il dimnung. 10Ati, ukura ni tenebmanto ara Nun Israel yala nang molonubnyi, Er Iya Erebdobnyi ab, nun ab uram talak kirikeibdankwayeb. Ba, nunsi yu bobsou dinyi taklobkwansir. 11Ati, ni mabwe Imtamnyi ai wa in nang, se! Sunsi wibsou ara Er Iya Erebdobnyi Er urasin dam tikoka Erti siltong en co yung uk daboka, bisam oboka uk daboka, ninyi nirya asi, ‘Imtamnyi bisi moloboka si weik erebkwayeb,’ eboka kimna ati wibsouci, wa karebsou ati, kunubde bindarur!” ebmou.
12Ura, Lewi yala ninyi a bulubmai ninyi ara: Kehat deibdoba Amasai mi si Mahat ab, Azaria mi si Yoel ab yanmarei. Ba, Merari deibdoba ara Abdi mi si Kish ab, Yehaleleel mi Azaria ab yanmarei. Ba, Gerson deibdoba ara Zima mi si Yoah ab, Yoah mi Eden ab yanmarei. 13Ba, Elisafan deibdoba ara Simri ab, Yeiel ab yanmarei. Ba, Asaf deibdoba ara Zakharia ab, Matanya ab yanmarei. 14Ba, Heman mabwe ara Yehiel ab, Simei ab yanmarei. Ba, Yedutun deibdoba ara Semaya ab, Uziel ab yanmarei. 15A nang aryi sun kwit yabwe yuk Lewi nang asi naboka bulubmai ura, sun nong me kekoka, Er Iya Erebdobnyi ai wa in nang kikiman nang kibdeibdanmai. Ura, sienyi ebmou to kunuboka Imtamnyi ai wengbinmai ura, Er Iya Erebdobnyi biryi, “Ukubkwandarur,” eamwe to kunuboka malyi dinyi me ilikmaici, Imtamnyi ai wa ibkalibmai. 16Ura, Imtamnyi ai wa in nang imam nang aryi, Er Iya Erebdobnyi ai wengbindoka me ilikmai. Ani, Imtamnyi ai kubmanto kum dinyi asi deiriramnyi dinyi nirya ara dobkweteboka ai dam keta bobulubmai. Ura, Er Iya Erebdobnyi ai asi, manmalyi dinyi miningdamnya asi ai dam dobkwetebmai dinyi ara Lewi yala nang aryi weik atei lika bisiboka, baitam bosakoka mutuk si Kidron bakan mutuk dam bobinmai. 17Ara, Er Imtamnyi ai wengbindoka, me ilikoka Imtamnyi dinyi akwe kibdeibde binmai tum ara yuma wala tanggal 1 aryi deyok kouboka, memebde baramnyi asi tanggal 8 kibmou. Ukuboka Er Iya Erebdobnyi ai uki inbaryi memeramnyi ani, a wala yuma wala aryok tanggal 16 ara sirya memebmai.
18Ura, Lewi yala nang anaboka sienyi Hizkia dam binmai ura, ato ebmai, “Er Iya Erebdobnyi ai nirya ab, Ersi bisam dama deiboka uk dan keil lamna ab, a ukuraming dinyi nirya ab, Er Iya Erebdobnyi biti kareboka deirin roti co lama ab, a ukuraming dinyi nirya ab sirya memebmab. 19Ani, sienyi Ahas biryi er kwemdeina molonkwamwe ati, Er Imtamnyi molon keica ara yuk-yuk dikum deirirbinamwe dinyi nirya boboka tubto deiriryanmabci, Er Iya Erebdobnyi molona ati kikimanto kibdeibmab. Ukura, anda keica nirya bobulubmabci, Er Iya Erebdobnyi biti bisam oboka dama deirin keil lamna dam akwe deibmab,” ebmai.
20Ura, sienyi Hizkia belekuna kobdob bukoka, Yerusalem atei weik nang nirya bobulubmouci, tonkwa Er Iya Erebdobnyi ai dam binmai. 21Ura, bisam sapi yim akwe tabaryi bobmai. Ba, domba bisam ababyi yim akwe tabaryi bobmai. Domba ukuryok nenmou dinyi yim akwe tabaryi bobmai. Ani, kambing yim akwe tabaryi bobmai ara sienyi ab er ai ninyi ab, Imtamnyi ai beterdongona mem ai ab, sun Yehuda yala ninyi nirya ab, sun malyi dinyi kilina ati bobmai. Ura, boboka Er Iya Erebdobnyi ai dam bobinmai. Ura, sienyi biryi Harun yala nang asi, “Sunci Er Iya Erebdobnyi biti a bisam yabwe oboka dama deiboka, uk dam keil lamna deici deiboka uk dabdarur!” eboka arukmou. 22Ura, imam nang aryi anda bobmai bisam lembu yim ab, domba yim ab, domba ukuryok nenmou dinyi yim ab nirya ngang sekmai ura, ining kweboka Imtamnyi biti dama deiboka uk dan keil lamna deici asi a ining dikmai. 23Sirya ukubmai ura, kambing yim tabaryi bobinmai dinyi ara sienyi ab, akatei ninyi nirya ab, sun malyi kun dinyi kilina ati sun dam deiriryanmai. Ura, sienyi ab akatei ninyi nirya ab a bisam kambing deici asi taruk deibdongobmai. 24Ura, imam nang aryi anda kambing asi ngang sekmaici, Imtamnyi biti dama deiboka uk keil lamna deyok dam asi ining dikmai. Ato kubmai ara Israel ninyi nirya ab, sienyi ab asi, Imtamnyi biryi yu boamwe ati, antanirdan dinyi ati ukuboka ining dikmai. Ato kubmai dinyi ara sienyi biryi, “Nun Israel ninyi nirya malyi dinyi kilibkwansir ati ukubdarur,” eboka arukmou to kunubmai. 25Ura, Er Iya Erebdobnyi biryi Daud biti, Imtamnyi uram ermurun nang si nabi Gad ab, nabi Natan ab, sienyi Daud wa irandei nang deici asi ebdeiamwe. A ebdeiamwe to kuboka Lewi yala nang asi lilim eboka, mot semna keica si gambus ab, kecapi ab douboka mot semni wa karebmou. 26Ura, Lewi yala ara Daud biryi douboka mot semnamwe dinyi douboka tikmai. Ba, Imtamnyi ai wa in nang ara lilim en keica si nafiri douboka tikmai. 27Ura, sienyi Hizkia biryi ato ebmou, “Bisam oboka Imtamnyi biti dama deirin keil lamna deici deirdongorbangnyi ura, nafiri lilim eboka, yuk-yuk lilim en keica, sienyi Daud deiriramwe dinyi aryi lilim eboka, Imtamnyi biti semni mot erebkwandarur!” eboka arukmou. 28Ba, a mot ererdongoi ura, akatei ninyi nirya kutam tukwetam ikeiboka, kisok tukwe dibdongoboka Er Imtamnyi molobmai. Ba, mot semni nang ara ukuboka mot semurunmai. Ba, akatei ninyi nirya ara kisok tukwe dibdongobmai tok asi bisam uk dabmai dinyi nirya uk sirya yibmou. 29Ura, a dama deiboka uk dabmai dinyi sirya ura, sienyi ab, akatei ninyi nirya ab kisok tukwe dibdongoboka Er Imtamnyi si weik eboka molobmai. 30Ura, sienyi Hizkia ab, yuk weik nang ab aryi sun Lewi yala nang mot semni nang asi, “Sienyi Daud ab, Imtamnyi uram ermurunanyi nabi Asaf ab eboka semdandei to eboka semdarur!” eboka arukmai. Ba, Daud eramwe to kuboka, karyi asa aryi sun nirya mot semaici, kisok tukwe dibdongoboka Er Imtamnyi si weik erebmai.
31Ukubmai ura, sienyi Hizkia biryi ato ebmou, “Ukura sun malyi dinyi sirya me ilikmarumci, Er Iya Erebdobnyi dam bana kikiman nang kibdanmarum. Ati, ukura, Imtamnyi biti bisam domba oboka dama deirin dinyi ab, ‘Ei nun Nai, nun babya,’ ena ati dama deirin dinyi ab Imtamnyi ai dam dama ur kareryandarur!” ebmou. Ba, sun kanya mundu loboka Imtamnyi biti dama deiboka uk dabmai. 32Ura, Israel ninyi aryi Imtamnyi biti dama deiboka uk dabkwamai dinyi yubwa ara sapi bisam ara yim akwe 70 baryi boyanmai. Ba, domba bisam ara yim akwe 100 baryi boyanmai. Ba, domba ukuryok nenmou bisam ara yik akwe 200 baryi boyanmai. Ba, a boyanmai bisam nirya ara Er Iya Erebdobnyi biti oboka nong nirya dama deiboka uk dabmai. 33Er Imtamnyi biti wiboka karen dinyi ara sapi bisam yim akwe 600 baryi boyanmai. Ba, domba bisam ab, kambing bisam ab yubwa ara 3.000 baryi boyanmai. 34Bok, Imtamnyi ai wa in nang imam nang ara me sirya ilikoka imtamnyi ai wa ina kikiman kibdanmai nang ninyi mitikanun deyok aryi bisam kala longna lokiribman kum kubmou. Ati, Lewi yala nang ara sirya me ilikdandoka Imtamnyi ai wa ina kikiman nang sirya kibdanmai deyok aryi, miliboka bisam kala tonkwa lokmai. Ukuboka sirya kala lokmai ura, sun nong asi Imtamnyi ai wa in nang kikiman nang kibdanmai. 35Ani, Imtamnyi ai wa in nang sun wa ara bisam oboka uk dan dinyi akwa kuma eda, sun wa yuk wa ababyi ilinto inmai. Ara, sun malyi kun dinyi lemna ati, oboka tonkwa yibmangnyi bisam kob ab, uk dabkwamai bisam deici asi anggur me dikdongoboka dama deirina ab kuboka dama deibmai. Ura, Er Iya Erebdobnyi ai dam ukuboka dama deirina Imtamnyi biryi eamwe to kunuboka tubto iya dinyi kibdeibmai. 36Ura, Er Iya Erebdobnyi biryi sun kankan dam aryi ola kibdeibmou ba, anda wa nirya ola ukubsekmai. A deyok aryi Hizkia ab, akatei ninyi nirya ab aryi sun kanya kilkil weik kubmou.
Currently Selected:
2Tawarikh Uram 29: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
