2Tawarikh Uram 2
2
Er Iya Erebdobnyi molon ai dobkwamiryi, kiknirminingdamnyi deyok
2:1-16
(1Raj. 5:1-18; 7:13-14)
1Sienyi Salomo biryi Er Iya Erebdobnyi ai ab, er sienyi kun ai ab dobkwamuryi, uram dobdeibmou. 2Ura, ninyi yubwa 70.000 baryi nang ai don keica borkiringkwamnyi ati wibmou. Ba, ninyi yubwa 80.000 baryi nang ara mutuk kon dam keil telerminingni nang wibmou. Ba, 3.600 baryi nang ara keil telen nang babyi, borkiringni nang babyi asi kalingni nang wibmou.
3Ura, Salomo biryi Tirus mutuk sienyi si Huram bisi ato kerek sekoka uram deibmou. “Kanci minob ni nai Daud bisi co aras deiramumwe ba, ni nai Daud bisi boyangaramnyi ba, er kun ai doramwe. 4Ato kuramumwe to akwe nibabyi Ni molonunyi, Er Iya Erebdobnyi molon ai dobkwan ati kekebniminci, co aras deibnurum! Ba, a co aryi Er Iya Erebdobnyi biti Er ai dobkwan. Ba, akai dam aryi tong teleb erande co yung aryi uk dabingnyi ura, siltong er dam binkwande. Ani, Er Imtamnyi biti deirin roti ab lelebdeibkwaming. Ani, belekuna babyi, sintam babyi ara bisam domba dama deiboka, obingnyi ura, nong nirya uk dabkwaming. Ani, uki ta tum berekmaci tok nirya ab, ukuryok wala dobmaci tum ab ababyi akai dam moloryankwaming. Ani, yuk weik uki li dobmabya nirya ara Er Iya Erebdobnyi, nun Molonubnyi biryi, ‘Ukubkwandarur!’ eboka iya kibdeibsou to, nun Israel nang aryi a dinyi tangna kum uca, li doboka Er si weik eboka iya molobde bankwayeb. 5Ani, niryi Er Iya Erebdobnyi ai a dobkwan ara ilila ai nun dobkwan. Ara, nun molonub Imtamnyi bira yuk kwemdeina da molonung dinyi bisibkaboka iya ililanyi kurur deyok aryi ilila ai nun dobkwan. 6Bok, unanyi biryi Er Iya Erebdobnyi kun ai dobkwamote do? Im karen a daklobwe dikum ababyi nun Molonubnyi Iya Erebdobnyi ai dona ababyi Er kikiman kum kubte. Eda, nunci Er Iya Erebdobnyi biti dama deiboka tong teleb co yung uk dana dikum ati akai dobkwana. Er nong akai kuna ara kikiman kum! 7A deyok aryi kan atei nang asi emas kiknina ab, perak kiknina ab, tembaga aryi kiknina ab, kat dinyi besi kiknina ab, kaluna bol kuruta bol aling unduk bol ab, wis bol ab, namin aling kirmizi ab wina bikamingnyi nang ab, keil kum co kum uturuboka sengdongona bikamnyi nang ab asi bokeibnurum. Ba, a nang ab, nun mutuk nang ni nai Daud biryi minob wiamwe nang ab tonkwa wa ibkwaming. 8Ani, kan atei nang ara co kwemna bikyi nang akwe kunung ni bikse. Ati, kanci kan atei nang co kwemna bikyi nang asi wiboka, bokeibnurum. Ara, co si aras ab, sanobar ab, Libanon mutuk co cendana ab kwemna nang co birianci nang asi bokeibnurum. A yangnyi ura, ni atei nang ab tonkwa co kwebkwaming. 9Co ara ilinto kweboka cakwaming. Ba, niryi akai dobkwan ai ara ilila ai aryi, ‘Nai e,’ tenento ai nun dobkwan. 10Ba, co kweboka abilinga yekwaming nang ara roti kiknin keica gandum aling ikin 2.000.000 kilogram baryi dekwan. Ba, ton gandum akwe si jelai ababyi ikin 2.000.000 kilogram baryi dekwan. Ba, anggur me yung ara 440.000 liter baryi dekwan. Ani, tonda yingying erande me zaitun yung ababyi 440.000 liter baryi kuboka sienyi kan wa in irmilin nang asi sun yibde kuna dekwan,” eboka uram kerek sekeibmou.
11Ba, Tirus mutuk sienyi Huram biryi Salomo biti erbabyi a uram dekeiboka ato eboka kerek sekmou. “Er Iya Erebdobnyi biryi Er uram keken nang boukwe deyok aryi kansi sun sienyi kiboka talebkwandim ati sienyi kiboka tikeibmakir,” ebmou. 12Ani, tonda ato ebmou, “Er Iya Erebdobnyi, sun Israel nang molondarurnyi, Erci im ab tukwe ab kiknibunyi bisi si weik erebman. Ara, Imtamnyi biryi Daud deici asi bukdob bingna ab, ‘Telebto ara ukubkwan,’ tenen diboka bingni mi tentok karebwe. A deyok aryi er etekdob bingna deici aryi Er Iya Erebdobnyi ai ab, sienyi er kun ai ab dobkwande ati niryi Er Iya Erebdobnyi bisi si weik erebman. 13Ati, ukura niryi utotoa kiknina nirya bingdurnyi nun tentok bokdonokwamakin. Anyi si ara Huram-Abi kan dam bokdonokwamakin. 14Anyi er kwin bira Dan yala ner ba, er nai bira Tirus mutuknyi kurur. A bokdonokwamakinyi bira emas kiknina babyi, perak aryi kiknina babyi, tembaga aryi kiknina babyi, besi aryi kiknina babyi, keil aryi kiknina babyi, co aryi kiknina babyi, kuruta bol aling unduk bol aryi wina babyi, kuruta bol aling wis bol aryi wina babyi, namin kaluna lenan aryi wina babyi, kait bol aling si kirmizi aryi wina babyi, ani yuk dinyi-yuk dinyi nirya ukuna bikunyi bisi bokdonokwamakin. Anyi yandoka wa ici ura, kan atei nang anda keica kiknina bikamingnyi nang ab, tonkwa wa ibkwanung. Ani, kan nai Daud wa iramnyi nang ab tonkwa ibkwanung. 15Ati ukura nai sienyi, kanci kan mabwe asi arukminyi ba, ‘Gandum toto, jelai toto, yingying erande me yung toto, co anggur du me yung toto dekwan,’ ebmomwe dinyi deibniminyi ba, boyanganunung. 16Ba, nunda Libanon dub aryi keibyal co asi kanci ebmarim to kikliboka kwebkwamab. A co sirya kwebibyi ura, kungang dakoka weik me kwan deici aryi co eng kiboka boyanmabyi ani, mutuk Yafo dam yandoka deibkwamab. Ba, kandamnyi boboka Yerusalem atei dam bobirum,” eboka kerek sekeibmou.
Er Iya Erebdobnyi ai yuma dobkalibmai deyok
2:17-18
(1Raj. 6:1-38)
17Ura, sienyi Salomo biryi yuk-yuk mutuk nang asi Israel nang mutuk nang kankan dam bindoka kuramnyi ninyi nirya si kerek sekmou. Er nai Daud bibabyi minob ukuamwe to akwe ukubmou. Uca, yuk mutuk nang Israel nang kankan kuramnyi ninyi yubwa ara 153.600 baryi yandoka kuramnyi. 18Ura, ninyi yubwa 70.000 baryi ninyi ara ai don keica borkiringni nang kibdeibmai. Ba, ninyi yubwa 80.000 baryi ninyi yubwa ara mutuk kon dam keil telerminingni nang kibdeibmai. Ba, ninyi yubwa 3.600 baryi ninyi ara il don nang asi kalingni nang kibdeibmai.
Currently Selected:
2Tawarikh Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
