2Tawarikh Uram 28
28
Ahas sienyi kibmou deyok
28:1-27
(2Raj. 16:1-20)
1Ahas er kubde yangaramwe ani, kwalina 20 baryi kimbinmou ura, sienyi kibmou. Ba, sienyi kiboka Yerusalem atei taleamwe ara kwalina 16 baryi kwaliamwe. Ba, Ahas sienyi kiboka taleamuryi, ukuramwe to ara er abwe Daud biryi Er Iya Erebdobnyi teleb tenerande dinyi kunuramwe to kunubde bana kum kuramwe. 2Eda, Israel mutuk nang yuk sien nang kuramnyi to kuboka, kwemdeina kiknibdeiboka Baal moloboka kimdamwe. 3Ani, erci Ben-Hinom mutuk bakan dam aryi kwemdeina Baal biti bisam lembu ab, domba ab oboka uk dabmou. Ani, er mining mabwe oboka kwemdeina ati uk daboka karebmou. Ato kubmou to ara Kanaan mutuk Israel nang wengyangana kum kubmai talak minob kuramnyi ninyi aryi duknasito ukuramnyi to diliboka er mining mabwe asi kwemdeina ati oboka uk dabmou. 4Ani, Ahas biryi mutuk konkon dam ab, erebdob mutuk kon ab, ilila co deyok ab nirya kwemdeina ati, bisam domba oboka kwemdeina ati uk dabde yibaramwe. 5Ato kuramwe deyok aryi, Er Iya Erebdobnyi biryi Ahas tam nang doboka Aram nang taruk dam karebmou. Ba, Ahas er tam nang yin doun nang asi, Aram nang aryi oboka erebdobmaici, er tam ninyi ilinto taleboka Damsyik atei dam bobinmai. Ani, Ahas bisi Er Iya Erebdobnyi biryi Israel sienyi Remalya mi si Pekah taruk dam karebmou. Ba, Ahas tam yin doun nang yubwa ilinto obmaici, erebdobmai. 6Ara, uki tentok tum aryi sienyi Pekah biryi Yehuda yala nang Ahas tam nang asi ninyi yubwa 120.000 baryi obmai. Ara, ninyi ordana co biriamwe nang akwe obmai. Ara, Er Iya Erebdobnyi, sun abwe yabwe moloraminyi bira taklobmaici, kwemdeina kanyi bobmai ba, ato kubmai. 7Ani, sienyi Ahas mi si Maaseya bisi Israel nang yala Efraim yin doun nang sienyi si Zikhri biryi obmou. Ba, Zikhri erbabyi sienyi ai dam wa in nang sienyi Azrikam biryi obmou. Ani, Elkana sienyi er ab tonkwa wa inanyi bibabyi obmou. 8Yehuda yala nang ab, Israel nang ab ara sun neik yala Israel nang bok, sun kwit yabwe Yehuda yala nang asi sun nerabwe ab, sun nermabwe ab, sun mabwe ab yubwa 200.000 baryi boboka Israel mutuk bobinmai. Ani, sun bona ababyi nirya daluboka bobdobmaici Samaria atei dam bobde binmai.
9Uca, Samaria dam ara Imtamnyi uram ermurunanyi si nabi Oded a kunmou aryi Yehuda yala nang asi mar bobmai ani, anda bobanmai yin doun nang asi binmou. Ura, ato ebmou, “Er Iya Erebdobnyi, sun abwe yabwe moloraminyi biryi Yehuda nang asi yu weik bobwe deyok aryi, sun taruk dam doboka karebmasir ara eiandum! Bok, sunci Yehuda nang asi boukwe kimna kum asa aryi ninyi ilinto obmarum ara Imtamnyi sirya asing eibmasir. 10Sun kanya ara, ‘Nun erebdobibci, Yehuda yala nang Yerusalem atei kunung nang ara nun amwetam ner sal kibib,’ tenebmarum. Bok, sunda sun Nai Er Iya Erebdobnyi bisi malyi dinyi ton kununa kum kundarur ninyi do? 11Ati, ukura niryi sunsi ebkwinsin uram kekendarur! Sun kwit yabwe nerabwe toto, nermabwe toto, mabwe toto a boyanmarum ninyi nirya sun dam nang tamubkarerbindarur! Er Iya Erebdobnyi biryi sunsi yu weik bobmar ati ebman,” ebmou. 12Ura, Efraim weik nang si Yohanan mi si Azarya ab, Mesilemot mi si Berekhya ab, Salum mi si Yehizkia ab, Hadlai mi Amasa ab anaboka, a mar iyanmai ani, binmai yin doun nang dam binmai. 13Ura, bindoka sunsi ato ebmai, “Yehuda ninyi kam kibman a boyanmarum to ara mem! Sun ato kubmarum dinyi ara Er Iya Erebdobnyi bisi malyi dinyi kunubmab. Ani, nun malyi kun dinyi tabakmarum ba, weik kibmar. Nunci Er Imtamnyi urasin dam malyito dinyi kununub ara ilinto kibde ati, Er Iya Erebdobnyi yu asa aryi nun Israel ninyi asi obkwamasir dam kubmar,” ebmai. 14Ura, a yin doun nang aryi, a boyanmai ninyi ab, sun daluboka boyanmai bona ab ara a weik nang ab, akatei nang nirya ab dam karebmai. 15Ura, a weik nang dumbaryi anaboka, yin doun nang aryi Yehuda nerabwe ab, mabwe ab nermabwe ab boyandoka dongobmai asi borbinmai. A boyanmai ninyi kankan aryi baning dem akwe nang asi daluboka boyanmai ongon aling aryi karebmai ba, ongobdobmai. Ani, sun ongon aling ab, sun yan karuk ab, sun yina ab, me ab karebmai. Sun nong ab, sun dilaka ab asi tong teleb co yung luboka kwetebmai. Ura, sun bindobman kum ninyi ara bisam keledai deici aryi boboka Yerikho bobinmai. A bobinmai atei ara co si korma atei, sun atei ninyi a kuramnya dam bobinmai. Ura, Israel nang ara Samaria dam tamuboka bindobmai.
16A talak ara Yehuda sienyi Ahas biryi Asyur sienyi bisi, “Ni ton milibnurum,” eboka ninyi ton bokeibmou ba, Asyur sienyi dam erbinmai. 17Ara, neik talak aryok Edom mutuk nang aryi, Yehuda yala nang asi mar bobmaici, ninyi taleboka sun atei bobinmai ababyi ilinto bobinmai. 18Ani, tonda Yehuda yala nang mutuk akwe, Negeb mutuk ab, mutuk konkon doramnyi atei nirya asi Filistin nang aryi mar bobmai. Ura, Bet-Semes atei ab, Ayalon atei ab, Gederot atei ab, Sokho atei ab mitik-mitik atei nirya ab, Timna atei ab mitik-mitik atei ab, Gomzo atei ab, mitik-mitik atei ab arabdobmaici, kuronmai. 19Ato kuboka Yehuda yala ninyi asi mar boboka, obkiribmai ara Ahas malyito kuramwe deyok aryi, er taleamwe ninyi ababyi malyito dinyi kunuramnyi deyok aryi, Er Iya Erebdobnyi biryi Yehuda nang asi mitang kibdeibmou ba, ukuboka obmai. 20Ura, Asyur mutuk sienyi si Tilgat-Pilneser nabmou ba, Ahas bisi yanmou. Ara, miliboka telebto kubdeibkwamwe ati kum yanmou. Eda, tubto malyito dinyi mengersininkwamwe ati yanmou. 21Ura, Ahas biryi Er Iya Erebdobnyi ai deiriramnyi bona toto, sienyi ai miningdamwe bona toto, weik nang-weik nang ai deiriramnyi bona toto, ukula daluboka Asyur sienyi bisi dekmou. Ukuboka dekamwe bok, “Ukuboka deknou,” tenen Ahas bisi telebto kurdeirina kum kubmou. 22Ba, Ahas bira ukuboka mar boramnyi ba, mambul doramnyi talak bok, taba deiboka malyi dinyi tuba kunuramwe. 23Ara, erci muna oboka erebdamwe atei si Damsyik atei nang kwemdeina asi bisam oboka, dama deiboka moloramwe. Er kanya ara ato tenebmouci, “Aram ninyi sun molonung kwemdeina aryi, Aram sien nang asi milibmar deyok aryi sun erebdobmang. Ati, nibabyi sun kwemdeina asi molobnyi ura, nisi milibkwanir,” tenebmouci, Aram nang kwemdeina asi molobmou. Bok, er Ahas a molonmou kwemdeina deyok aryi er ab, Israel ninyi nirya ab asi mar boboka oramnyi dinyi er kum bikmou. 24Ura, Ahas biryi Imtamnyi ai deiriramnyi dinyi nirya doboka tolobkiribokmou. Ura, Er Iya Erebdobnyi ai bublan tirikdongobokmouci, Yerusalem atei kitingbantam babyi, yali tam babyi, me youkwetam babyi, me utam babyi nirya kwemdeina molon co lamna kiknibdanmou. 25Ani, Yehuda mutuk weik atei doramnya nirya yuk kwemdeina ati, bisam oboka, dama deiboka uk dabde molon atei dobdanin yibinmou. Ukuramwe deyok aryi, Er Iya Erebdobnyi kanya yu kibsinibmou.
26Ba, Ahas er yuk dinyi-yuk dinyi da ilinto kuramwe dinyi liliboka sekyi kerek sengna ara Yehuda mutuk sien nang ab, Israel nang sien nang kimnamnyi kerek sengna umbura asi liliboka kerek sekyi. 27Ani, Ahas dibmou ura, Yerusalem atei dam tukwe dongobmai. Bok, Israel sien nang tukwe dongoramnyi dikum tukwe dongona kum kubmai. Ahas sirya dibmou ura, er mi Hizkia olong unuboka sienyi kibmou.
Currently Selected:
2Tawarikh Uram 28: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
