2Tawarikh Uram 26
26
Uzia Yehuda mutuk sienyi kibmou deyok
26:1-23
(2Raj. 15:1-7)
1Amazia mi si Uzia er kubde yangaramwe kwalina 16 baryi kwalibmou bok, Yehuda mutuk ninyi aryi Uzia bisi sienyi tikeibmai. Ba, er nai Amazia olong unubmouci, sienyi kibmou. 2Ura, Er nai Amazia sirya dibmou talak aryi, Uzia biryi Elot atei arabdobmouci, tubto Yehuda yala nang atei kibdobmouci, yumkuna akatei dobtabakmou. 3Uzia er kubde yanamwe ani, kwalina 16 baryi dinyi kimbau ura, sienyi kiamwe. Ba, Uzia er sienyi kiboka Yerusalem atei kuramuryi, taleamwe kwalina yubwa ara 52 baryi kwalibmou. Uzia er kwin si ara Yekholya, Yerusalem atei ner aryi deiamwe. 4Ba, Uzia er kubde baramwe to ara Imtamnyi teleb tenento akwe kunuramwe. Ara, er nai Amazia kuramwe dinyi akwe kunuramwe. 5Uzia bira Zakharia biryi, “Imtamnyi bikwe ilil kuboka sienyi kibkwandum,” eramwe deyok aryi telebto akwe kunuramuryi, sienyi kiamwe. Ba, Uzia Er Imtamnyi bikwe ilil kuramwe deyok aryi, er wa iramwe dinyi nirya kunuramwe.
6Ura, Uzia biryi Filistin mutuk nang asi mar bobmouci, Gat atei lika ab, Yabne atei lika ab, Asdod atei lika ab dalubkabokmouci, Filistin mutuk yuk-yuk atei ababyi arabdobmouci, er atei kibsekdobmou. Ura, Asdod mutuk atei nirya dobtabakmou. 7Ura, Er Iya Erebdobnyi biryi Uzia bisi milibmou deyok aryi, Filistin nang mutuk babyi, Arab nang mutuk Gur-Baal kuramnyi mutuk babyi, Meunim yala nang mutuk atei nirya arabdobmou. 8Ani, Amon mutuk ninyi aryi Uzia bisi tukwe dengna dengnamnyi. Ba, Uzia er mikib yaboka sienyi kiamuryi, sasiamwe deyok aryi Uzia si ara eramwe aryi, Mesir mutuk ninyi ababyi si bikamnyi 9Ani, Uzia biryi Yerusalem atei weik lika bisik bublan dam asi Sudut Lika Bublan babyi, Lebak Lika Bublan dam babyi, outam bisik bublan Penjuru Lika Bublan dam babyi dukoka dobde weleramwe ani, mutuk kon kuna lobdeiboka kiknibnin yibinamwe. 10Ani, Uzia biryi yini mutuk ato dikum kato mutuk asi ababyi dukoka dobde weleramwe ani, im dub akwe lobdeibnin yibinamwe. Ani, er bisam yabwe mitik kum winiramwe deyok aryi, er bisam me lokde yibinamwe ara bakan mutuk babyi, mutuk kon babyi nirya me ilinto longdaramwe. Ani, Uzia bira wa iboka koubde kuna ara er teleb kuramwe deyok aryi, er anggur wa in nang ab, anggur kalingna nang ab ilinto wa kareamwe. Ba, tukwe sul dikum babyi, mutuk konkon babyi wa iramnyi. 11Ani, Uzia er yin doun nang ababyi ninyi ordana co biriamwe ninyi akwe kuramnyi. Ba, er yin doun nang yubwa kerek sengna nang ara yin doun nang sienyi Yeiel ab, Maaseya ab kurandei. Ba, Hananya bira a bitinyi nang sun kalikoka lilirdeirinanyi kuramwe. 12Ba, sun yala yuk-yuk kuramnyi to kuboka yin doun nang menengni nang kiamnyi nang yubwa nirya ara 2.600 baryi kuramnyi. 13Ba, sun menengni nang amwetam ara ninyi ordana yin doun nang ab, sienyi kalingni yin doun nang ninyi ordana co biribdob nang ab, sun yubwa ara 307.500 baryi nang aryi sienyi bisi milibmaci ninyi mar bobmai. 14Ura, Uzia biryi er yin doun nang ongoboka mar iban keica nirya kiknibdeiamwe. Ara, mar u limdon co las toto, ninyi lungna balang toto, kat kisok kaluna toto, kat keica besi aryi kiknin ongon aling toto, yin toto, ninyi nenemna keil toto kikniboka kareamwe. 15Ani, Uzia biryi Yerusalem atei, ninyi ordan keica yala amuma ilinto kiboka deiriramwe. Ara, ninyi ordan yin kiknin nang aryi kikniramnyi. Ani, ilila keil boboka im dub dukoka dobdamwe deici bindoka deiriramnyi. Ani, lumum dina-dina ninyi mar iyangan bisik nirya kikniboka deiriramnyi. Ba, Uzia si dantam-dantam nirya era mutuk ababyi si bikamnyi. Ba, Uzia bira ersi miliramnyi deyok aryi, ukubman kumto dinyi ababyi kuramuryi, mikib kiboka sasiamwe.
16Ura, er mikib kiboka sasibmou deyok aryi er kanyatam erebdanmouci, malyito dinyi kunubmou. Ura, Uzia er minob luknubdongoboka, busul asa aryi Er Iya Erebdobnyi teleb tenerande dinyi kunuranwe dinyi ara taklobmou. Ura, erebdandoka Imtamnyi ai, malyi dinyi beterdongona mem ai asi wengbinmou. Ura, akai wa in sienyi biryi uk daramwe dinyi bok, Uzia bindoka, siltong ena ati tong teleb co yung uk dan co lamna dam bindoka uk dabkouci, tingbinmou. 17Uca, akai wa in sienyi imam Azarya ab, akai wa in nang imam nang 85 baryi nang sek erongna nang ab ara aminda diblilibokmai. 18Ani, Uzia dam tingbinmai ura, ato ebmai, “Se, Uzia kanci Er Iya Erebdobnyi biti a siltong en dinyi uk dana ara kan wa kuma. Eda, Harun yala nang imam nang asi akai wa ina ati wiboka wa kareamingnyi to kuboka siltong en dinyi uk daraming! Ati, kanda Imtamnyi uram busul asa kununanyi kiamumwe ani, ukura kan kanya dangubmakir. Ati, ukuca malyi dinyi beterdongona mem ai dam aryi anaboka birum! Kanci malyito kubdim deyok aryi Er Iya Erebdobnyi nun molonubnyi biryi kansi, ‘Anyi bira teleb,’ tenerankou dinyi malyi kibdeibdanmarim,” ebmai. 19Uca, Uzia bira siltong en co yung uk dabkwamangiryi dingdongon keica dobtaleabwe tok tikoka a nang asi kerebmou. Ukuboka, Uzia er yu aryi akai wa in nang asi kererabwe talak aryok er asok tam asi susa tobdongobmouci, ililim ebmou. 20Ba, Imtamnyi ai wa in sienyi Azarya ab, akai wa in nang akwe ton nang ab aryi Uzia asok susa ililim ebmou asing eibmai. Ura, Uzia bisi ola akai um aryi yakdonokmai. Ani, erdamnyi bibabyi, Imtamnyi biryi wenen dinyi karebmou ba, ola sakoka bindobmou. 21Ura, Uzia bira susa ilinto taleamwe aryi ola kwetebman kum kuramwe. Ba, Uzia bisi, “Imtamnyi ai wengbana kum kunkwande,” eboka yakdonokamnyi deyok aryi er ai yuk kibdeiamnyi ba, er ai yuk kuramuryi, susa youn doramwe. Ura, Uzia er mi Yotam biryi er nai olong unuboka sienyi kiamuryi, a mutuk talebmou.
22Ba, Uzia er yuma aryi kubde yanamwe ani, sirya ukurbinamwe dinyi liliboka sengna ara Amos mi nabi Yesaya kerek sengna umbura kerek sekamwe. 23Ba, Uzia susa youn doramwe ani, dibmou ba, er abwe yabwe sien nang-sien nang dongoramnyi dikum asi, “Susa youn yiramwe deyok aryi kubkub dam dongobkwayeb,” ebmai ura, tukwe dongobmai. Ba, er mi Yotam biryi er ani, unuboka weik sienyi kiamwe.
Currently Selected:
2Tawarikh Uram 26: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
