2Tawarikh Uram 25
25
Sienyi si Amazia deyok
25:1-28
(2Raj. 14:1-22)
1Ura, Amazia kubde yangaramwe ani, kwalina 25 baryi kwalibmou bok, sienyi kibmou. Ba, sienyi kiamuryi, Yerusalem atei taleamwe ara kwalina 29 baryi kwaliamwe. A sienyi Amazia er kwin si ara Yoadan Yerusalem atei ner aryi deiamwe. 2A sienyi Amazia bira Er Iya Erebdobnyi biryi teleb kurande to akwe kunuramwe bok, er kanyatam dib tenen dinyi sasina kum kuamwe. 3Ura, Amazia er sienyi kiamwe dinyi sirya kataboka sasibmou ura, er nai oamnyi nang er sienyi kiamwe amwetam wa iramnyi nang asi nirya obkiribmou. 4Uca, a obmou nang sun mabwe ara ona kum kubmou. Ara, Er Iya Erebdobnyi biryi eamwe to Musa kerek sengna umbura aryi ato eboka kerek sekamwe. Ara, “Er nai deyok ati er mi ona mem. Ani, er mi deyok ati, er nai ona mem. Eda, sun malyi dinyi kuraming to kuboka sun yuk-yuk ikin takubdeibkwanung!” eboka kerek sekamwe to kunubmouci, sun mabwe ara ona kum kubmou.
5Ura, Amazia biryi Yehuda yala ninyi nirya ab, Benyamin yala ninyi nirya ab asi bulundeibmou. Ura, “Sun yala kundarur tok nirya, yala yuk-yuk leleboka tikdarur!” eboka arukmou. Ba, yin doun nang yubwa 1.000 baryi nang sienyi tikoka amwetam asi ninyi yala yuk-yuk tikoka lelebmai. Ani, yin doun nang yubwa 100 baryi nang sienyi tikoka er amwetam asi ninyi yala yuk-yuk lelebmai. Ura, sienyi Amazia biryi a yala yuk-yuk nang asi, sun nebde bana kwalina 20 baryi aryi sekeiboka eitam kimbinmou nang akwe nukmou. Ura, nungmou uca, ninyi yubwa 300.000 baryi kibmou. Ura, a nang ara ninyi lungna balang ab, mar u limdon co las ab douboka ninyi mar bona kikiman nang wibmou. 6Ura, tonda Israel mutuk nang yin doun nang ninyi mar ordana co biriamwe nang akwe yubwa 100.000 baryi nang asi tiya mar bobmilibkwamai ati, perak ikin seratus baryi aryi dekmou. 7Uca, Er Imtamnyi uram ermurunanyi tentok er dam yanmou ura, ato ebmou, “Nai sienyi, Er Iya Erebdobnyi bira Israel nang, Efraim deibdoba yala nang asi milina kum kubkwamar. Ati, Israel mutuk yin doun nang Efraim yala dobmarim ara mem! 8A yin doun nang mikib ab, ninyi ordana co biribwe yin doun nang ab aryi, mar bobmilibmakingnyi ababyi, Er Iya Erebdobnyi bira lemdona babyi, mar ordan nang taruk dam doboka karena babyi, ukubkwandurnyi kurur. Ati, kan ab, kan tam yin doun nang ab asi, sun mar ordan nang taruk dam karebsici ba, obkwamasing!” ebmou. 9Uca, a sienyi Amazia biryi anyi bisi ato ebmou, “Ura, ni dengna weik dinyi perak ikin 100 baryi Israel yin doun nang asi dekman dinyi ara una kubkwaman do?” eboka asibmou. Uca, a Imtamnyi uram ermurunanyi biryi Amazia bisi ato ebmou, “A karebmarim bona ati kan kanyi sungkina mem. A karebmarim dinyi Er Iya Erebdobnyi biryi tabakoka karebkwamakir,” ebmou. 10Ura, Amazia biryi a Efraim mutuk aryi dekmou yin doun nang yuk wibmou ura, “Sun atei tamuboka bindarur, milina kum kubkwanurum!” ebmou. Ba, a yin doun nang sun yu weik kubmou ba, Amazia bisi ilinto kerebmaici, sun atei binmai. 11Ura, sienyi Amazia ab, er yin doun nang ab akwe dabub asa aryi yin doboka mutuk si Asin Mutuk Lu dam binmai. Ura, bindoka Seir mutuk ninyi asi yin doun nang yubwa 10.000 baryi obmai. 12Ani, tonda ninyi yubwa 10.000 baryi nang ara kam kibman taleboka yanmai. Ura, a nang asi boboka mutuk kon dub deirirbinmaici, kulaboka, dobkwetebmai ba, keil deici asi bindoka ouboka donokmaici dibmai. 13Uca, Amazia biryi, “Ni milina kum kubkwamanurum ati, sun atei bindarur!” ebmou Israel mutuk yin doun nang aryi, Amazia taleamwe mutuk Yehuda yala nang weik atei bindoka mar bobmai. Ara, Samaria aryi kuboka obde binmai ani, Bet-Horon atei bindoka sirya obmai. A nang aryi ninyi obmaia yubwa ara 3.000 baryi obmaici, sun bona nirya dalubdobmai.
14Ura, Edom mutuk ninyi mar bobmai ani, sienyi Amazia bira atei yanmou ura, Seir yala nang kwemdeina kikniboka moloramnyi dinyi daluboka boyanmou aryi, deibmouci, er kwemdeina kibdobmou. Ura, a kwemdeina ati dama deirin dinyi uk daboka molobmou. 15Ato kuboka molonmou deyok aryi, Er Iya Erebdobnyi Er yu wekmou. Ura, Er Imtamnyi biryi Er uram ermurunanyi bisi ebdeibmou ba, Amazia bisi dam uram eryanmou. Ura, yandoka ato ebmou, “Kanda, unati yuk mutuk nang kwemdeina boyanmarimci, molonmarim do? Kan mar bobmomwe asi, a kwemdeina aryi ton lemdeirina kum kubmar bok, a kwemdeina asi boyandoka molonmarim ara unati kunmarim do?” ebmou. 16Uca, Amazia biryi ato ebmou, “Kanda sienyi bisi, ‘Ato kubdum-ato kubdum,’ enanyi ton kibdeibkei ati, sienyi bisi yandoka ato enmarim do? ‘Obniting,’ tenen yandoka enmarim do? Kilikokdum!” ebmou. Ura, a Imtamnyi uram ermurunanyi uram kilingdona kum kuaburyok ato ebmou. “Nai, sienyi, niryi a ebman uram asi kekeboka kununa kum kubmarim. Ati, kan kwemdeina boyandoka molonmarim deyok ati, Er Iya Erebdobnyi biryi kansi obkwamakir!” ebmou. Ura, a enmou uram kilikokmou.
17Ura, Yehuda yala nang sienyi Amazia ab, ersi, “Ato-ato kubdum!” en nang ab bulubmaici, Israel nang asi bobkwamaici, mar moun yibmai. Ura, Israel yala nang sienyi, Yehu deibdoba, Yoahas mi si Yoas bisi nabmouci, ato ebmou, “Ni mikib kum, kan mikib kum obdankwanim!” eboka uram deibmou. 18Uca, Israel mutuk nang sienyi Yoas biryi erbabyi uram dekeibmouci, kiklina kikliboka ato nukmou, “Libanon kon asi tiling co sirilukluka mitik co tikanci aryi, Libanon kon ilila co keibyal asi ato eboka uram deibte. ‘Kan nebnyi ara ni mi dobkwande ati iniboka boyarum!’ eboka uram deibmote. Uca, Libanon kon bai kurande kamyoa kurante aryi yibaturyi, a mitik tiling co asi tulubyanibte. 19Kan kanya ara, ‘Edom ninyi mar boboka obman ara ni mikibnyi biryi kubman,’ tenebmarimci, ererdanmarim do? Kan mutuk ninyi babyi kanbabyi, ‘Obsiting,’ tenen a deyok ebmarim do? Atei ur buronkwandum!” eboka uram deibmou. 20Uca, Amazia bira Edom mutuk nang kwemdeina boyandoka molonmou deyok aryi, Er Iya Erebdobnyi biryi Amazia bira Yoas taruk dam karebkwamou ati, a ebdeibmou uram kekena kum kubmou. 21Ura, Israel sienyi Yoas ab, er yin doun nang ab, anaboka mutuk si Bet-Semes dam Yehuda yala nang mutuk yanmai. 22Uca, Israel yala nang aryi Yehuda yala nang asi oboka erebdobmai ba, Yehuda yin doun nang aryi cukoka atei yuk-yuk binsekmai. 23Ura, Yehuda sienyi Amazia bisi Israel sienyi Yoas biryi talebmou. Ura, Yoas biryi Amazia boboka er mining atei, Yerusalem bobinmou. Ura, Yerusalem atei lika dalubmai. Ara, lika bublan si Efraim Bublan dam aryi, dalubde binmai asi, lika bublan si Sudut Bublan dam bindoka sirya akmai. A lika dalubmaia cang kiklina ara 200 meter baryi lika dalubmai. 24Ura, Er Imtamnyi ai mining damnyi bona, emas toto, perak toto, yuk-yuk bona miningdamnya nirya dalubmai. Ani, Obed-Edom ai ninyi kalingnamwe bona ab, sienyi ai dam mining damnyi bona ab, ninyi tabwe deboka dongon ai dongoramnyi ninyi ababyi anabdeiboka Samaria atei bobinmai.
25Kuramnyi ani, Israel sienyi Yoahas mi Yoas dibmou. Ba, Yehuda sienyi Yoas mi Amazia bira kam tuba kuramwe. Ba, Yoas dibmou ba, Amazia tuba kam kuramuryi, sienyi tuba kiamwe talak ara kwalina yubwa 15 baryi kwaliamwe. 26Ba, Amazia kubde yanamwe to liliboka, yuma aryi kuboka, sirya kuamwe dinyi liliboka kerek sekyi kerek sengna ara Yehuda yala nang ab, Israel yala nang ab sun sien nang kimnamyi kerek sengna umbura kerek sekyi. 27Ani, sienyi Amazia bira Er Imtamnyi molona takloboka, kwemdeina moloramwe deyok aryi, Yerusalem atei er taleamwe mutuk ninyi aryi obmanto kuramnyi ba, Lakhis atei bindobmou. Uca, Lakhis atei ababyi, “Orbindarur,” eboka arukmai ba, dombindoka obmai. 28Ura, Amazia oboka tukwi boyandoka, er abwe yabwe tukwe dongoramyi dikum akwe Daud atei dam tukwe dongobmai.
Currently Selected:
2Tawarikh Uram 25: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
