2Tawarikh Uram 24
24
Yehuda yala nang sienyi Yoas deyok
24:1-27
(2Raj. 12:1-21)
1Sienyi Yoas bira er kubde yangaramwe ani, kwalina tabaryi kwalibmai bok sienyi kiamwe. Ba, sienyi kiboka Yerusalem atei kuramuryi, taleamwe kwalina yubwa ara 40 baryi kwaliamnyi. Ba, Yoas er kwin si ara Bersyeba mutuk ner si Zibya biryi deiamwe. 2Ba, a talak Yoyada kam tuba kuramwe talak ara sienyi Yoas bira malyito dinyi ton kununa kum uca, Er Iya Erebdobnyi biryi teleb tenerande to dinyi akwe kunuramwe. 3Ba, Yoyada biryi nerabwe bitinyi doboka sienyi Yoas bisi kabdeibmou. Ba, Yoas biryi nerabwe toto, sal toto yaldakmou. 4Ani, Yoas biryi, “Er Iya Erebdobnyi ai asi malyi kubdob dikum asi unuboka dobkwan,” tenebmou. 5Ura, sienyi Yoas biryi Er Iya Erebdobnyi ai wa in nang imam nang ab, Lewi yala nang ab asi ato eboka arukmou, “Kwalina bisibci tok ara sun Nai Imtamnyi ai lubwe dikum asi yumkuna unuboka dobkwayeb. Ati, Yehuda yala nang kunung weik atei nirya yibinkirikoka, co bok ola bulubkiriksindarur!” eboka arukmou. Uca, a sienyi er ebmou to ola kununa kum kubmai. 6Ura, sienyi Yoas biryi imam-imam sienyi Yoyada bisi nabmou ba, ato eboka asibmou, “Er Iya Erebdobnyi wa inanyi Musa biryi Israel ninyi nirya asi ato eamwe, ‘Sun Nai Iya Erebdobnyi biryi, “Ukubdarur-ukuna mem,” en uram deirin keis ol ai dobkwamunyi ura, tukwe dengna bulubkwandarur!’ eamwe. Bok, Lewi yala ninyi Yehuda mutuk ninyi babyi, Yerusalem atei kunung ninyi babyi asi, ‘Er Iya Erebdobnyi ai ati tukwe dengna bulubdarur!’ ena kum kurum ara unati kurum do? 7Imtamnyi ai ara malyito ner Atalya er milin nang aryi, dakoka Imtamnyi ai deirin bona nirya dobokabiryi, kwemdeina Baal atei bobinsekyi ati, unuboka dobkwayeb ati ebman,” ebmou.
8Ura, sienyi biryi arukmou ba, co bok dongoryangan co sangkol kikniboka, Er Iya Erebdobnyi ai wengyangan bisik bublan dam kikniboka deibmai. 9Ura, a mutuk nirya, Yerusalem atei babyi, Yehuda yala nang mutuk weik atei kuramnyi ninyi babyi, Er Imtamnyi wa inanyi Musa biryi yini mutuk yangaramyi uca, “Tukwe dengna bulubmunyi ura, a co bok aryi Er Iya Erebdobnyi ai dobkwandarur!” eamwe to kunuboka, Yehuda mutuk weik atei kuramnyi tok nirya, a uram ebde yibinmai. 10Ura, Yehuda yala ninyi nirya a uram kekebmaici, sun kanya kilkil asa aryi, tukwe dengna boboka Imtamnyi ai bublan dam deiamnyi co sangkol dongoryangaramnyi ba, a co sangkol asi co bok langkarikmou. 11Ba, tentok uki berekmaci tum ara Lewi yala nang aryi a co sangkol boboka sienyi dam co bok kalingnanyi boramnyi. Ba, sienyi ai wa in nang aryi a co sangkol kukoka dinmangnyi uca, co bok ilinto kuramwe. Ukuboka co bok doboka deirin ai deibingnyi ura, co sangkol ara tubto bisik bublan dam deirirbaramnyi. Ukuboka co bok buluramnyi ba, co bok ilinto kubmou. 12Ura, imam Yoyada ab, sienyi Yoas ab aryi a co bok doboka Er Iya Erebdobnyi ai dobkwamnyi ai don nang sien nang ati karebmarei. Ba, a nang aryi co aryi don nang babyi, keil kiknin nang babyi, kat keica besi ab, tembaga ab aryi kiknin nang babyi asi dengnamnyi ba, Er Iya Erebdobnyi ai dakdanamwe dikum tubto unuboka doramnyi. 13Ura, Imtamnyi ai unuboka busul asa dobde baramnyi. Ani, minob doamnyi ba, kuamwe ato bol kibdeibmai ba, kwiniboka tikmou. 14Ura, Imtamnyi ai doramnyi nang ara a co bok kablobmai dinyi ara sienyi Yoas ab, imam Yoyada ab asi boyanmai. Ba, sienyi biryi a kablobmai co bok ara Er Iya Erebdobnyi ai yuk-yuk dinyi kikniboka deibmai. Ara, weik li dobmangnyi tum donkwamnyi keica toto, Imtamnyi biti bisam oboka dama deiboka nong nirya uk dankwamangiryi ukunkwamnyi keica toto, me yin moyok toto, emas dinyi toto, perak dinyi toto kikniboka deibmai. Ba, imam Yoyada bira kam kuramwe talak nirya Er Iya Erebdobnyi biti dama deirina akwe kuramwe.
15Ba, Yoyada a kubde baramwe ani, kwalina yubwa 130 baryi kimbinmou bok, dibmou. 16Ura, Yoas er sienyi kiboka taleamwe talak ara Imtamnyi ab, Er ai ab teleb akwe kuboka doamwe dinyi ab, Israel nang asi manmalirdongona kum uca, telebto akwe kimdeiriramwe. A deyok dinwe ura, Daud atei tukwe dongoamya weik sien nang dinatam kuboka tukwe dongobmai. 17Ba, Yoyada sirya dibmou talak ara Yehuda mutuk weik nang nirya sienyi Yoas dam yandoka, luknubdongoboka molobmai. Ura, sienyi kanya nenebdobmai ba, sun tenebmai kanya kunubmou. 18Ura, Yehuda yala nang nirya sun abwe yabwe moloraminyi, Er Iya Erebdobnyi ai molona taklonmaici, sun mining kwemdeina co ikeiboka, yuk-yuk dinyi atoa kikniboka molobde baramnyi. Ato kuramnyi deyok aryi, Yehuda yala nang weik atei kuramnyi atei ninyi nirya ab, Yerusalem atei kuramnyi ninyi nirya ab asi, Imtamnyi biryi yu bobmou. 19Ura, Er Iya Erebdobnyi biryi Er uram ermurun nang wiboka bokdonokmou ba, sun dam asi tuba-tuba, “Ato kuboka kwemdeina molona mem! Imtamnyi yu bobsouci, ikin dinyi karebkwansir,” eramnyi. Uca, sun uram kekena kum uca, kwemdeina akwe moloramnyi. 20Ura, Er Imtamnyi kanya Yoyada mi Zakharia bisi koukwe olokmou ba, Yehuda yala ninyi asi ato ebmou, “Er Iya Erebdobnyi biryi ato ebmasir, ‘Sunda unati Ni, “Ukuna mem-ukubde binkwandarur!” ebdeibsise uram lebesekoka, mem ebse dinyi kunundarur? Ato kuboka sun telebto kuna kum kubkwandum. Sunci Nisi taklobnindau to, Nibabyi sunsi taklobkwansin,’ ebmasir,” ebmou. 21#Mat. 23:35; Luk. 11:51Uca, Zakharia ebmou uram tataboka keil aryi malmalung ebmai. Ani, sienyi Yoas bibabyi, er nai Yoyada eramwe uram kununa kum uca, erbabyi a onmai nang ab antaniboka Zakharia bisi keil kulaboka, Er Iya Erebdobnyi ai bublan dam oboka maibmai. 22Ato kuboka obmai ara sienyi Yoas bira Zakharia er nai Yoyada telebto akwe busul asa kunubde baramwe ani, diamwe dinyi teneirdena kum kubmou. Ba, Zakharia sirya oboka mabdeibyi ura, sirya uram aryi ato ebmou, “Niryi sunbabyi kum dekeibkwinsin. Eda, Er Iya Erebdobnyi biryi sunbabyi dekwansir!” ebmou ura, isin dakdobmou.
23Ura, a kwalina aryok do talak kubwe ura, Aram mutuk nang yin dobmaici, Yehuda yala nang mutuk weik atei nirya ab, Yerusalem atei ab asi mar bobmai. Ura, Yehuda mutuk sien nang nirya obmaici, sun bona ilinto dalubdobmaici, sun sienyi Damsyik atei kuramwe dam asi bobde binmai. 24Aram mutuk yin doun nang ara ilinto kum bok, Yehuda yala ninyi sun abwe yabwe moloraminyi, Er Iya Erebdobnyi bisi takloboka, kwemdeina kanyi deibmai deyok aryi, Imtamnyi biryi teneboka yanlobmou ba, Yoas sienyi kiamwe mutuk nang asi, Aram nang aryi oboka erebdobmai. 25Ba, sienyi Yoas bira er susa dilaka weik kibmou ba, Aram mutuk yin doun nang ara takloboka bindobmarei. Ura, er kalingni yin doun nang bitinyi aryi uram sisikdobmarei. Ura, imam Yoyada mi Zakharia bisi Yoas biryi oamwe deyok ati, kisok dakoka er mining man sokon deici asi obdeiboka bindobmarei. Ba, a sienyi Yoas dibmou ura, sien nang dongoramnyi dikum tukwe dongona kum uca, Daud minob kuramwe atei dam yuk dikum tukwe dongobmai. 26Sienyi obmarei nang bitinyi si ara Amon mutuk ner si Simeat mi Zabad ab, Moab mutuk ner Simrit mi si Yozabad ab aryi obmarei. 27Ba, Yoas er ukubde yangaramwe dinyi ab, er mabwe yaldakamwe dinyi ab, Yoas erci ukubkwamwe to minob kunumna kunurdeiriramnyi dinyi ab, Imtamnyi ai yumkuna dobmou dinyi ab, liliboka sekyi dinyi ara Israel nang sienyi kimnamyi deyok kerek sengna umbura asi liliboka sekyi. Ba, Yoas sirya dibmou ura, er mi si Amazia unuboka sienyi kibmou.
Currently Selected:
2Tawarikh Uram 24: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
