2Tawarikh Uram 23
23
1Ba, kwalina tabaryi dinyi kimbinmou ura, Imtamnyi ai wa inanyi imam si Yoyada mikib dobmouci, yin doun nang 100 baryi sun sien nang amubaryi nang ab sisikmai. A yin doun nang sien nang si ara Yeroham mi Azarya ab, Yohanan mi Ismael ab, Obed mi Azarya ab, Adaya mi Maaseya ab, Zikhri mi Elisafat ab uram sisikoka sekwetebmai. 2Ura, sun anaboka Yehuda yala nang mutuk weik atei doramnya nirya yibinkirikoka, Lewi yala nang ab, Israel yala nang sien nang bobulubmai. Ura, a nang ara Yerusalem atei boyanmai. 3Ura, Imtamnyi ai asi wekmaici, sienyi kiamunyi mi Yoas ab uram talak likeibdanmai. Ura, Yoas kalingnamunyi imam Yoyada biryi a bulubmai nang asi ato ebmou. “Sienyi kiamunyi Ahazia mi ara Yoas atiba! Minob uca, Er Iya Erebdobnyi biryi ato ebdeiamwe, ‘Daud deibdoba akwe sien nang kibde bankwaming,’ eboka uram talak ebdeiamwe ati, Yoas sienyi kibkur! 4Ati, ukura ato kubkwayeb: Uki ta tum ara Lewi yala nang ab, Imtamnyi ai wa in nang ab ara Imtamnyi ai wa inmangnyi ani, nirya atei yuk-yuk barona kum kubkwaming. Eda, meici kukoka olong winiryi kibibyi ura, Imtamnyi ai lika bisik bublan dam asi kalingkwaming. 5A nang meici kukoka, ton nang ara Er Iya Erebdobnyi ai lika bublan dam kalikingnyi ura, ton meici kukoka, sienyi ai dam lika bisik bublan dam kalikingnyi ura, ton meici kukoka, akatei Yerusalem atei lika, weik bisik bublan dam kalikwaming. Ba, akatei ninyi nirya ara Er Iya Erebdobnyi ai dam keta asi buluboka wekwaming. 6Er Iya Erebdobnyi ai ara talyi nang wengbana mem. Eda, imam nang ab, Lewi yala nang ab, Imtamnyi ai wa inkwaming nang akwe wengbankwaming. Sun a nang ara akai wa in nang sirya wibdob nang kunung. Talyi nang ara Er Iya Erebdobnyi eanci to akwe kunuboka Imtamnyi ai wengbana mem. 7Ba, sienyi mi Yoas dantam yibaca nirya ara Lewi yala nang yuk nang aryi yin douboka kalingmurubkwandarur. Ba, talyi nang, unanyi biryi Imtamnyi ai wengbarinyi bira ona akwe kubkwaming,” ebmou. 8Ura, Yoyada biryi ebmou to kuboka Lewi yala nang babyi, Yehuda mutuk nang babyi kunubmai. Ura, imam Yoyada bira a uki ta tum hari Sabat tum aryi Imtamnyi ai wa in nang wa inmana ani, atei bana babyi, wa ir yangana babyi ara tonkwa akwe kaliknibok, wekoka, anaboka kimnamnyi. 9Ura, imam Yoyada biryi yin doun nang 100 baryi nang sienyi yuk-yuk asi ninyi on balang toto, mar u limdon ting toto, Daud biryi Imtamnyi ai miningdamwe dinyi doboka bokeibmou. 10Ura, a nang asi. “Imtamnyi ai bublan dam tam babyi, dongtam babyi, siriktam babyi, kwanimtam babyi, nirya kalikdarur,” eboka wa karebmou ba, sienyi mi Yoas oryangana ati kalikmai. 11Ato kubmai ura, Yoyada ab, er mabwe ab aryi sienyi mi Yoas boboka imtamnyi ai dam sakmouci, sien nang kaluraming kisok kaluna kalubdeibmou. Ura, Imtamnyi biryi, “Ukubdarur-ukuna mem,” eboka yan memeamwe dinyi kerek sekamnya karebmou. Ura, ukuboka, Yoas sienyi tikeibmou. Ura, imam Yoyada ab, er mabwe ab aryi Yoas bisi me kisok deici dikmai ura, ninyi nirya aryi ato ebmai, “Sienyi iya kibkwandim! Sienyi iya kibkwandim!” eboka diririb ebmai.
12Ba, Atalya kekenmou uca, akatei ninyi nirya cukirikoka, kisal dakoka kinmaici, sienyi Yoas bisi tomorbanmai uram lilim asi kekebmou. Ura, Atalya Er Iya Erebdobnyi ai dam yanmouci, akai wekmai ninyi ab ebdanmai. 13Ba, minob sien ner kiamwe ner si Atalya yandoka diramwe uca, ukuryok sienyi Yoas bira Imtamnyi ai bublan dam abyokomna dam tikmou. A tikmou ba, weik nang ab, mot semna nang ab aryi buu ena si nafiri kwemai ba, akatei ninyi nirya ab sun kilkil asa sienyi kisal dangni mot semai asi eibmou. Ura, Atalya yandoka er yu aryi er mining ongon aling asi kwilikaboka ato ebmou, “Nira, malyi kiboka, dobkwetebmanurum darib? Yu kanya bobdob ninyi!” eboka kerebmou. 14Uca, imam Yoyada biryi yin doun nang yubwa 100 baryi nang sien nang asi, ato ebmou. “A ner bobokabmunci, baitam bobindoka obdarur. Ani, er tam kimdorinyi bibabyi obkwandarur!” eboka arukmou. Imam Yoyada biryi, “Baitam bobindoka obdarur!” ebmou ara, “ ‘Er Iya Erebdobnyi ai dam ara ninyi ona mem e!’ eabwe deyok aryi baitam bobindoka obdarur!” ebmou. 15Ura, a ner Imtamnyi ai dam bosakmaici, sienyi kun ai dam bisik bublan wengbana lika bublan dam bobinmai ura, a ner asi obmai. A bisik bublan si ara, “Bisam kuda bublan,” eramnyi bublan dam aryi obmai.
16Ura, imam Yoyada ab, sienyi Yoas ab, akatei ninyi nirya ab uram sekwetebmaici, “Er Iya Erebdobnyi uram kekeboka kunun ninyi kibkwayeb,” eboka uram sekwetebmai. 17Sirya ato ebmai ura, akatei ninyi nirya kwemdeina si Baal moloramnyi ai wengbindoka dalubkabmai. Ura, kwemdeina ati dama deiboka uk daramnyi keil lamna ab, yuk-yuk keica atoa kiknibde deiriramnyi kwemdeina ab dakmaici, kwemdeina Baal ai wa inanyi Matan ababyi kwemdeina Baal dama deirin keil lamna urasintam obkiribmai. 18Ura, imam Yoyada biryi Er Iya Erebdobnyi ai wa in nang imam nang ab, Lewi yala nang ab asi, Daud ebdeiamwe to kubok, wa yuk-yuk karebnin yibinmou. Ani, Er Iya Erebdobnyi biryi Musa deici ebdeiamwe ba, Musa biryi kerek sekamwe to kunuboka, “Bisam domba toto, kambing toto obmunyi ura, ukuboka nong nirya uk dabkwandarur,” eamwe to kunuboka wa karebmou. Ba, sun kilkil asa aryi Daud eamwe to kunubmai. 19Ura, Er Iya Erebdobnyi ai dam lika bublan dam ababyi, kalingni nang wiboka wa karebmou. Ba, Er Iya Erebdobnyi ai wengbana kikiman kum nang ara talyi wengbana kum kuramnyi. 20Ukubmai ura, imam Yoyada biryi yin doun nang yubwa 100 baryi nang sien nang ab, akatei weik nang ab, akatei ninyi kalingni nang ab, sun akatei nang nirya asi, “Ukuryok sienyi Yoas bira sienyi kun ai dam kamdeirirbinkwayeb,” ebmou. Ura, Er Iya Erebdobnyi ai aryi bosakwetebmaici, sienyi kun ai dam eitam lika bisik bublan kuboka bowengbinmai ura, sien nang bun sokon dam bindoka bukeibmai. 21Ba, minob a mutuk sien ner kiboka taleamwe ner si Atalya bira sirya obmai. Ura, ukuboka sienyi bukeibdobmaici, a mutuk mangkau asa kubmai deyok aryi, a mutuk ninyi nirya sun kanya kilkil kubmou.
Currently Selected:
2Tawarikh Uram 23: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
