2Tawarikh Uram 22
22
Ahazia sienyi kibmou deyok
22:1-6
(2Raj. 8:25-29)
1Ura, Yoram er mi kelenyi si Ahazia bisi Yerusalem ninyi aryi er nai olong unuboka sienyi tikeibdobmai. Minob sienyi kiamunyi Yoram er mabwe danda mabwe ara Arab nang ab, Filistin nang ab aryi nirya oboka binamnyi. Eda, tentok a takloaminyi bisi sienyi tikeibmai ba, Yehuda yala nang sienyi kibmou. 2Ba, anyi ukuryok sienyi kibmounyi Ahazia bira er kubde yangaramwa kwalina 42 baryi kibmou bok, sienyi kibmou. Ba, erci sienyi kiboka Yerusalem atei taleamwe ara kwalina tentok talebmou. Anyi Ahazia er kwin si ara Atalya mi kuramwe. A ner er abwe bira Omri. 3Anyi Ahazia bira Ahab kuramwe to akwe malyito kuramwe. Ato kuramwe dinyi ara er kwin biryi malyi dinyi etereramwe deyok aryi malyi dinyi kununanyi kiamwe. 4Ba, Ahazia er ukubde baramwe dinyi ara Er Iya Erebdobnyi urasin dam malyito dinyi akwe kunuramwe. Ato kuramwe dinyi ara Ahab kuramwe to akwe kunubde baramwe. Ara, Ahazia er nai sirya dibwe talak ara Ahab ai ninyi aryi Ahazia bisi, “Ukubkwandum-ukubkwandum,” ebde etereramnyi. A deyok aryi anyi Ahazia malyito dinyi akwe kununanyi kiamwe ba, anyi bisi obsiniamnyi. 5Ani, sun ukuboka etereamnyi deyok aryi, Israel sienyi Ahab mi Yoram ab, Gilead dam Ramot atei Aram weik sienyi Hazael bisi mar bobmarei uca, ersi mar maraamnyi. Ba, tonda Aram nang aryi Yoram bisi mar marabmai. 6Ba, Yizreel atei kwetebkwamai ati bobde bindobmou. Ba, Yehuda sienyi Yoram mi Ahazia bira sienyi Ahab mi Yoram bisi er kweteramnyi ai dam dirbinmou.
Ahazia bisi Yehu biryi obmou deyok
22:7-9
(2Raj. 9:27-29)
7Ura, Er Imtamnyi biryi, “Ahazia bira Yoram dirbinmaci tum aryi Yehu biryi obci ba, dibkwande,” teneamwe. A deyok aryi, Ahazia bira Yoram mar bisik eamnyi ba, bindoka doramwe ai dirbinmou. Ura, Israel sienyi Yoram ab, Yehuda sienyi Ahazia ab tonkwa antanibdobdei ura, ninyi si Nimsi er mi si Yehu bisi binmarei. Ba, Yehu bira Er Iya Erebdobnyi biryi, “Israel sienyi Ahab ai ninyi ara erci oboka kum dandeibkwande,” tenen wa minob kareamwe. 8Akiryi Yehu biryi Ahab ai ninyi asi orbunmou talak ara Yehuda mutuk sien nang ab, Ahazia er miliboka, wa tonkwa iramnyi nang ab ebdanmai. Ura, Yehu biryi a ninyi ababyi nirya obkiribmou. 9Ura, Yehu biryi, “Yehuda sienyi Ahazia bisi ingkirikoka boyandarur,” eboka arukmou ba, ingkiringbinmai. Ani, Samaria bindoka inibdamwe asi bindoka talebmaici, boboka Yehu dam boyanmai ura, obmou. Ura, anyi bira, “Yosafat Er Iya Erebdobnyi teleb tenerande dinyi akwe kunuramwe deyok aryi, tukwe dongobkwayeb,” ebmaici, tukwe dongobmai. Ato kubmai ba, Ahazia deibdoba ara Yehuda mutuk sien nang kimna kikiman ton kum kubmou.
Atalya obmai ura, Yoas sienyi kibmou deyok
22:10–23:21
(2Raj. 11:1-21)
10Ura, Ahazia er kwin Atalya#22:10 Yehuda sienyi Ahazia er kwin Atalya bira Israel mutuk sienyi si Ahab nebnyi kuramwe. Ba, Yehuda sienyi si Yoram doamwe. kekenmou uca, er mi, “Ahazia obmang,” ena kekebmou ura, Atalya biryi Yehuda mutuk sien nang yala nirya oboka kum danabdeibmou. 11Ba, Ahazia er malner si Yosabat kuramwe. A ner Yosabat ara imam si Yoyada doamwe. Akiryi er malnyi Ahazia mi tentok si Yoas bira ukula tomoboka, duknubdeibokmou. Ba, Atalya biryi sienyi mabwe nirya obde yibanmou ara Yoas ona kum kubmou. A mi ara Imtamnyi ai asi man ai tentok da duknuboka, er kwaknamkwamwe ner ab kurorandei. Ukuboka, weik sienyi Yoram nebnyi Yosabat biryi Yoas duknubdeibokamwe deyok aryi, Atalya biryi Yoas bira ona kum kubmou. 12Ura, Yoas Imtamnyi ai um da duknuboka kuroramwe ara kwalina nabaryi kwaliamnyi. A kwalina nabaryi ara Atalya sien ner kiamwe kwalina nabaryi Yoas Er Imtamnyi ai duknuboka kuroramwe.
Currently Selected:
2Tawarikh Uram 22: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
