2Tawarikh Uram 21
21
1Ani, Yosafat sirya dibmou ba, er nai yabwe tukwe dongoramnyi dikum akwe, Daud atei dam tukwe dongobmai. Ba, er mi si Yoram bisi er nai olong unuboka sienyi kibmou.
Yehuda yala nang sienyi Yoram kiboka talebmou deyok
21:2-20
(2Raj. 8:16-24)
2Ba, sienyi Yoram er weit yabwe, Yosafat mabwe si ara Azarya ab, Yehiel ab, Zakharia ab, Azariahu ab, Mikhael ab, Sefaca ab deiamwe. A nang nirya ara Israel sienyi Yosafat mabwe akwe ukuboka yaldakamwe. 3Ura, sun nai biryi dengna weik bona ilinto sunsi kareamwe. Ara, emas ab, perak ab, yuk-yuk bona ab, Yehuda mutuk weik atei lika doboka kalingnamnyi atei ababyi bokeiamwe. Uca, er mi Yoram bira dunyi deyok aryi, Yehuda mutuk sienyi kibdeiamwe. 4Bok, Yoram biryi er nai taleamwe mutuk er sienyi kibmouci, sirya mikib kuboka sasibmou. Ura, Yoram biryi er weit yabwe nirya obkiribokmouci, Israel nang yuk weik nang ababyi obmou. 5Ba, Yoram sienyi kibmou ara kwalina 32 baryi kimbau ura, sienyi kiamwe. Ani, er sienyi kiboka Yerusalem atei kuramwe ara kwalina inbaryi kwaliamwe. 6Yoram er kubde baramwe to ara Israel mutuk sien nang kubde yangaramnyi to kuramwe. Ara, sienyi Ahab nebnyi er doamwe deyok aryi er ukuna nirya ara Ahab ukuramwe to akwe kunubde baramwe. Yoram bira Er Iya Erebdobnyi, Er li kun dinyi akwe kunuboka malyito dinyi akwe kunuramwe. 7Bok, Er Iya Erebdobnyi biryi anyi bisi orkana kum kuamwe. Ara, Er Iya Erebdobnyi biryi minob uram talak Daud bisi ebdeiamuryi, “Niryi kan yala nang asi iya kibdeiansinyi ba, sienyi kibde bankwandum,” eamwe deyok aryi Yoram bisi orkana kum kuamwe.
8Edom mutuk minob talak Yehuda sien nang aryi taleramnyi. Uca, Yoram biryi Yehuda mutuk sienyi kibmou talak ara Edom mutuk nang aryi, sienyi bisi mar iboka, sun sienyi yuk wiboka tikeibdobmai. 9Ba, Yoram ab, er yin doun nang sien nang ab, er kongkong eboka boban keica boboka lukunda anabmaici, Edom nang asi mar ibinmai. Uca, Edom mutuk yin doun nang aryi Yoram ab, er yin doun nang ab asi, mar bobmaici, aknabdongobmai. Uca, cukoka bai buki binmai. 10A talak ara Yoram bira er abwe yabwe moloraminyi, Er Iya Erebdobnyi bisi molona kum kuramwe. A deyok aryi, Edom nang aryi Yehuda yala nang asi mar boramnyi. Ani, ukubabyi tuba mar bonung. Ani, Libna mutuk nang ababyi, Yehuda yala nang asi mar boramnyi. 11Ura, Yoram biryi Yerusalem atei ninyi asi neneboka, bowamlibsinibmouci, Yehuda mutuk konkon dam nirya asi kwemdeina molon ai dobdanin yibinmou. 12Uca, Imtamnyi uram ermurunanyi nabi Elia biryi kerek sekoka Yoram bisi deibmou. A kerek sengna umbura ara ato eboka sekmou, “Nai, sienyi Yoram, kan abwe Daud moloramunyi, Er Iya Erebdobnyi biryi ato ebmakir. Ara, ‘Yoram kanda, Yehuda mutuk sien nang, kan nai Yosafat ab, Asa ab ukurandei to doblilibde bana kum kururum! 13Eda, kanda Israel mutuk sien nang kuramnyi kurumci, Yehuda yala nang, Yerusalem atei kunung ninyi asi, bowamliboka kwemdeina tam bobarum! Ara, Ahab biryi ukuramwe to akwe kunubde barum. Ani, kan mining weit yabwe ab, kan nai kobdoba, er nerabwe mabwe ab obkiribumwe. Sunda kanci malyito kurum ato ninyi asi obumwa kuma, eda, sunda telebto akwe kuramnyi ninyi asi obumwe. 14Ati, a deyok aryi Er Iya Erebdobnyi biryi mambul weikto dinyi kan talebumwe ninyi ab, kan nerabwe ab, kan mabwe ab, kan bona-bona miningdum dinyi ab asi kum dandeibkwamakir! 15Ani, kan nong kobdob ababyi, weikto youn nun yibkwankir. Ba, u doraminyi ani, kan deisu botoboka sakwankir,’ ebmakir,” eboka Elia biryi kerek sekeibmou.
16Ura, Er Iya Erebdobnyi biryi Filistin nang ab, Arab nang ab, mutuk Etiopia dam kuramnyi nang asi, “Yoram bisi mar bobdarur!” eboka arukmou 17Ba, a mutuk nang aryi, Yehuda yala nang asi mar bobmai. Ura, a mutuk nang aryi, Yoram sienyi kiboka kuramwe atei dam wengyanmaici, bona miningdamwe bona ab, er mabwe, ab, er nerabwe ab nirya daluboka bobde binmai. Ba, er mi kelenyi si Yoahas tentok taklobmai. 18Ato kubmai ura, Er Iya Erebdobnyi biryi Yoram deisu asi ola kwetebman kum youn karebmou. 19Ba, Yoram a youn doramwe ani, kwalina bitinyi kwalibmai bok asi, er deisu botoboka sakmou ba, dibmou. Anyi Yoram tukwe dongobmai ara yuk sien nang aryi tukwe dongoboka engenmangiryi, ilila uk sekamnyi to kum kubmai.#21:19 Sun Israel mutuk ninyi dibmangnyi ba, tukwe sirya dongobingnyi ura, ilila uk sekoka engeramnyi. Bok, Yoram dibmou ba, tukwe dongobmai ura, uk sekoka engena kum kubmai. Er ukuramwe to ara malyito dinyi akwe ukuramwe deyok aryi uk sengna kum kubmai. 20Yoram er sienyi kimna ara kwalina 32 baryi kimbau ura, sienyi kiamwe. Ba, sienyi kiboka Yerusalem atei taleamwe talak ara kwalina inbaryi kwaliamnyi. Anyi, Yoram dibmou ara ninyi boukwe kum kubmou. Ba, er tukwe dongona ara weik sien nang tukwe dongoramnyi dikum tukwe dongona kum kubmai. Eda, Daud atei yuk dikum asi tukwe dongobmai.
Currently Selected:
2Tawarikh Uram 21: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
