2Tawarikh Uram 20
20
Moab nang ab, Amon nang ab aryi, Yehuda sienyi Yosafat bisi mar iyanmai deyok
20:1–21:1
(1Raj. 22:41-51)
1Yehuda yala nang kubde banmai ani, do talak kurbau ura, Moab mutuk yin doun nang ab, Amon mutuk yin doun nang ab, tonda Meunim mutuk yin doun nang mikbaryi ab aryi sienyi Yosafat ab, sun Yehuda yala nang ab asi mar iyanganmai. 2Ba, ninyi ton yandoka Yosafat bisi ato ebmou, “Nai sienyi, weik me kwan sik me kwan deibwa kouboka otam mutuk Edom yin doun nang ilinto kuboka, kansi iyanganmaking. Ukura, Hazezon mutuk dam Tamar atei#20:2 A mutuk si ton enung si ara, “En-Gedi,” ebok kimnung. yandoka, mar bobingci, arabdobing,” ebmai. 3Ba, Yosafat er ilil kubmou ura, Er Iya Erebdobnyi bisi molobmou. Ani, er taleamwe mutuk Yehuda yala nang kuramnyi atei ninyi nirya asi, “Yina si teboka, Er Iya Erebdobnyi bisi molobdarur!” eboka arukmou. 4Ba, Yehuda yala ninyi weik atei yuk-yuk da kuramnya nirya Er Iya Erebdobnyi bisi, “Nai, nun lebsurum!” eboka molobkwamai ati buluryanmai. 5Ura, sienyi Yosafat ab, Yehuda mutuk ninyi a bulubmai ninyi ab, Yerusalem a kuramnyi ninyi ab, Er Iya Erebdobnyi ai ukuryok dobmou ai dam keta wekmai. 6Ura, Yehuda yala nang sun sienyi Yosafat tikokmouci, Er Iya Erebdobnyi sun moloraminyi bisi ato eboka molobmou. “Nun Nai, Iya Erebdobnyi nun nai yabwe moloraminyi, Kan imtam kurumnyi. Nai, Kanci, tukwetam nang sienyi kiboka taleninung mutuk nirya Kanci talesurum. Kanda iya mikib ilintonyi kurum, yuk nang aryi Kansi tataboka, sun erebdobmanto kumnyi kurum. 7Nai Imtamnyi, Kanci Kan mabwe Israel ninyi urasin dam aryi, a mutuk minob kuramnyi ninyi yakdonokoka, Kan kwit kiamoumnyi Abraham deibdoba mabwe ati, iya karebsumwe. 8Ba, Kan mabwe nun a mutuk dam kunubci, Kanti, Kan ai doboka, Kan si erekunub. 9Ba, Kan mabwe a wekmang nang aryi Kansi ato ebmaking. ‘Nai, nunsi obkwinsingnyi talak ab, yuk-yuk mambul dinyi nun dam kubsici talak ab, ninyi din youn yisici talak ab ara Kan dam akai dam wengdoryandoka moloronkwayeb. Ba, Kanci nun molona kekebsiminci, nun molonmabyi to kunuboka lemdeirinkwansirim,’ ebmaking. 10Ukura, Amon mutuk ninyi ab, Moab mutuk ninyi ab, Seir mutuk kon dam Edom mutuk ninyi aryi nunsi mar bobkwinsingci, yanganmang. Nun abwe yabwe Mesir aryi kuboka boyangaramumwe ani, yuma yandoka kabdeibmoumwe talak ara Kanci, ‘A nang mutuk ara wengbana mem,’ eamumwe. A deyok aryi a ninyi, Amon mutuk ninyi a, Moab mutuk ninyi ab, Edom mutuk ninyi ab ara ona kum kuamnyi. 11Akiryi ukura, a mutuk ninyi aryi nunsi, Kanci karebsoumwe ba, a kuronub mutuk dam aryi yakwinsingci, iyangasing ati kan biksurum. 12Ati, Nai nunsi mar iyanganmasing ninyi asi Kanci obkiribdum. Nunci kuboka a iyanganmasing yin doun nang yubwa ilinto aryi, nunci sunsi obmanto kum ati, nai Kanti, ‘Lebsurum,’ eboka molororyanmab,” eboka molobmai. 13Ura, Yehuda yala ninyi Er Iya Erebdobnyi ai a wekmai ninyi nirya, sal babyi, nerabwe babyi, mitik mabwe babyi, mitik nermabwe babyi nirya tikokmai.
14Uca, sun a wekmaia kankan dam aryi, ninyi si Yahaziel bisi, Er Iya Erebdobnyi kanya Roh er kanya dam wa ibmou ba, tikokmou. Anyi er deibdoba ara Lewi yalanyi si Asaf biryi Matanya deiamwe. Ba, Matanya biryi Benaya deiamwe. Ba, Benaya biryi Zakharia deiamwe. Ba, Zakharia biryi a tikokmounyi, Yahaziel deiamwe. 15Ura, anyi Yahaziel tikokmou ura ato ebmou, “Nai, sienyi Yosafat ab, a wekmarum Yehuda mutuk ab, Yerusalem atei ab kuramnyi nerabwe ab, sal ab nirya teleb ebsin. Er Iya Erebdobnyi biryi ato ebmasir to ebkwan. Yin doun nang ilinto yanganmang ara sun ilil kuboka sirim talesina mem. Sunci a nang asi mar bona kum kubkwamarum. Eda, Nun Nai Imtamnyi biryi mar bobkwamar. 16Ambutum ara a iyanganmasing nang asi ibindarur. Sun a iyanganmasing nang ara mutuk si Zis mutuk as weleyangaramingnyi ura, sunbabyi yurbindoka, yini mutuk si Yeruel dam mutuk lu kubkub dam asi bindoka weklobkwandarur. 17Sunci bindoka obkwamaruma kuma. Eda, a bindoka weklobmamunci, dinmandarur. Er Iya Erebdobnyi biryi a nang asi oboka sunti lebdobkwamasir asi eibkwamarum. Ati, Yehuda mutuk ninyi o, Yerusalem atei ninyi o, sun ilil kuboka sirim talesina mem. Ambutum ara ur mar ibindarur. Er Iya Erebdobnyi biryi sunsi milibkwamasir,” ebmou. 18Ba, sienyi Yosafat bira kutam sunsunuboka buryibinmouci, kisok luknubdongoboka Imtamnyi bisi kibdobmou. Ani, sun a buluboka wekmai ninyi nirya ababyi kisok luknuboka, tukwetam urasin dibdongoboka Er Iya Erebdobnyi bisi si weik eboka kibdobmai. 19Ura, Lewi yala nang Kehat deibdoba nang ab, Korah deibdoba nang ab tikokmai ura, Er Iya Erebdobnyi, sun Israel yala nang moloraminyi biti si weik eboka mot sebmaici, uram weikanun iboka mot sebmai.
20Ura, mabmai ani, berekmou ura, belekuna kobdob anabmaici, mutuk si Tekoa mutuk yini mutuk bisik binmai. Anaboka bai talak aryi Yosafat tikoka ato ebmou, “Yehuda yala nang nirya ab, Yerusalem atei nang ab kekendarur! Nun Nai Iya Erebdobnyi nun molonubnyi bisi dib teneboka, kanyi sasirona teleb. Ani, Er Iya Erebdobnyi ebmaci uram ermurun nang nabi nang asi dib tenebdarur! Ba, sun ebmangnyi to kunubkwansir!” ebmou. 21Ukuboka sienyi Yosafat ab, er taleamwe atei ninyi ab uram sisikmai ura, Yosafat biryi menekoka Er Iya Erebdobnyi si weik ereboka mot sebde binkwamai nang wibmou. Ura, a nang sun ongon aling ababyi kiknibdeibmou. Ura, a nang menekoka Er Iya Erebdobnyi biti mot sebde menekmai. Sun mot ara ato eboka sebmai.
“Er Iya Erebdobnyi bisi, Nun nai, nun babya, teleb!
Er Imtamnyi biryi boukwe kimsurur dinyi ara kum danana kum uca, iya boukwe kimurunkwansir,”
eboka mot sebde banmai.
22Ura, Yehuda yala ninyi aryi ukuboka mot seboka Er Iya Erebdobnyi si weik erebde banmai. Ba, sun mar iyanganmai ninyi, Amon mutuk ninyi ab, Moab mutuk ninyi ab, Seir mutuk konkon kuramnyi Edom ninyi ab asi, Er Iya Erebdobnyi biryi bisekoka obkiribmouci, erebdobmou. 23Ba, a yin doun nang aryi tamuboka, Seir mutuk kuramnyi Edom ninyi ab, Moab ninyi ab asi bindoka obkiribokmai ba, mutuk yok dem takmai. Ani, sun mining dam ninyi ababyi, obdanin yibanmai. 24Ba, Yehuda yala ninyi mutuk kon diniboka, a yin doun nang mar iyanganmang ebmai dikum binmai. Bindoka dinmai uca, ninyi obukmai ba, a mutuk nirya ninyi dibdanin binmaia asok akwe kubmou. Ninyi ton tentok ababyi bai bukoka atei barona kum kubmai. Nirya obdanmaici, a dibdanin binmai asi asing eibmai. 25Ura, Yosafat sun sienyi ab, Yehuda yala ninyi nirya ab ara dam bindoka diramnyi uca, sun sapi bisam yubwa toto, ninyi on keica toto, ongon aling toto, yuk-yuk bona yala nirya ilinto taklobdanmai asi, bindoka ilinto bubdobmai. Bona ara sun bobanmai bona ara mitikto uca, o bindoka bubdobmai dinyi ara ilinto bubdobmai. Bona mak aryi, bubde kuramnyi ani, uki winiryi bubmai. 26Ba, uki dumbaryi tum ara Er Iya Erebdobnyi biti, “Nun nai, nun babya,” eboka mot sebmai. Ba, a mutuk bakan si ara, “Nun Nai, nun babya lebdeibsirim ati, Kansi kibmakib,” eboka mot sebmai. A deyok aryi a mutuk si ara Er Imtamnyi Si Ereboka Kiron Mutuk Bakan eboka si dobmaici, ukubabyi a si akwe tuba enung. 27Ura, Yosafat ab, Yehuda yala ninyi ab, Yerusalem atei ninyi ab menekoka atei yandobmai. Ura, Er Iya Erebdobnyi biryi sun iyanganmai ninyi asi obkiribmou deyok ati, sun kanya kilkil asa aryi Er Iya Erebdobnyi bisi si weik eboka kibdobdoro yanmai. 28Yerusalem atei yanmai ura, Er Imtamnyi ai dam asi leleboka, bilul si kecapi toto, trompet toto, gambus toto douboka mot sebnin ani, Er Iya Erebdobnyi ai dam binmai. 29Ba, yuk-yuk mutuk kekeramnyi uca, “Israel nang molonungnyi, Iya Erebdobnyi biryi Israel yala nang sun mar ordan nang asi, ukuboka obkiribmar,” ena kekebmaici, sun kanya ilil mitik kum kubmou. 30Ba, Yosafat taleamwe mutuk nirya ara Er Iya Erebdobnyi biryi mangkau dinyi kareamwe. Ba, dina-dina bisik aryi mar ton iyangana kum uca, iya mangkau asa akwe kuroramnyi.
31Yosafat biryi weik sienyi kiamuryi, Yehuda yala nang atei taleamwe ara er kwalina 35 baryi kimbau ura, sienyi kiamwe. Ba, kwalina 25 baryi sienyi kiamuryi, Yerusalem atei kuramwe. Yosafat er kwin si ara Azuba. Ba, Azuba er nai bira Silhi. 32Yosafat bira er nai Asa ukuramwe to akwe domliliramwe. Erci, Imtamnyi biryi li kurande dinyi kununa kum kuramwe. Eda, Er Iya Erebdobnyi teleb tenen dinyi akwe kunuramwe. 33Bok, sunci mutuk konkon dam kwemdeina molon dikum ara nirya dalurkana kum kuramnyi. Sun kanya ara tentok kouboka sun abwe yabwe moloraminyi kanya akwe kum boramnyi. 34Yosafat er yuma aryi kubde yanamwe aryi kuboka sirya kurbinamwe dinyi nirya liliboka kerek sekamnyi ara Hanani mi Yehu kubde yanamwe dinyi kerek sengna umbura asi liliboka sekamnyi. A kerek sengna ara Israel nang sienyi kimnamnyi nang sun ukuramnyi to nirya liliboka sengni kerek sengna umbura sekamnyi.
35Ani, Yosafat Yehuda sienyi bira Israel nang me utam kuramnyi nang sienyi si Ahazia malyi dinyi kununanyi ab antanibmana ani, kimnamwe. 36Ukuboka tonkwa antanibdobmareici, mutuk si Ezion-Geber atei asi Tarsis atei bana ati, me deici yiban aia kikniboka miningdandei. 37Uca, weik atei si Maresa ateinyi si Dodawa mi nabi Eliezer biryi Yosafat bisi ato eboka erekdobmou, “Nai sienyi kanda, Ahazia ab tonkwa antanirordurum deyok aryi, Er Iya Erebdobnyi biryi kan ukubde wa irum dinyi ara walwalabkabokwamakir,” ebmou. Ba, a sien nang bitinyi aryi me deici yiban aia miningdandea asi botoboka tolobmou ba, a me deici yiban aia boyibinman kum kubmou.
Currently Selected:
2Tawarikh Uram 20: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
