2Tawarikh Uram 19

Er Imtamnyi uram ermurunanyi Yehu biryi Yosafat bisi erekdobmou deyok

19:1-3

1Ura, Yosafat Yehuda yala nang sienyi bira ona kum kubmai ba, er atei Yerusalem tamuboka yandobmou. 2Ura, Hanani mi si nabi Yehu biryi sienyi Yosafat bisi binmou ba, ebdanmarei ura, ato ebmou, “Kanda, Er Iya Erebdobnyi bisi li tenenungci, Er uram kununa kum kun nang asi milibmarimci, tonkwa ninyi bobmarum ara telebto kubmarim do? Ato kubmarim ara malyito kubmarim. A deyok aryi Er Iya Erebdobnyi biryi kansi ikin dinyi kareboka wenebmanto kubmarim. 3Bok, eda, kanci a mutuk telebto kurdeirirum deyok aryi wenena kum kubkwankir. Ara, kanci a mutuk kwemdeina moloramiryi, kiknirdaramnyi keica nirya daluboka kum dandeibumwe deyok aryi taklobkwankir,” ebmou.

Yehuda sienyi Yosafat biryi malyi kubman nang deyok lilin nang tikeibmou deyok

19:4-11

4Sienyi Yosafat bira Yerusalem atei kuramuryi, Yehuda mutuk weik atei nirya, Bersyeba dam aryi kuboka Efraim mutuk kon dam yibinkirikoka, “Nun abwe yabwe moloraminyi, Er Iya Erebdobnyi bikwe si weik eboka molonkwandarur,” ebde yibaramwe. 5Ura, Yosafat biryi malyi kun nang lilirdeirin nang er taleamwe mutuk Yehuda yala nang mutuk weik atei doramnyi tok nirya tikeibnin yibinmou. 6Ura, a nang asi ato ebdeibmou, “Sun deyok kubca liliboka, uram sengkwetenkwanduma nirya ara ninyi sirik demang aryi lilirdeirinkwanduma kuma. Eda, Er Iya Erebdobnyi si deici aryi deyok liliboka uram sengkwetenkwandum. Ati, sunci malyi deyok lilinmamunyi talak ara Er Iya Erebdobnyi kalikmasici ba, etekdobto akwe lilirdeirinkwandum! 7Ati, sunci Er Iya Erebdobnyi bisi ilil tenebmunci, uram sisikoka ninyi kanya mundu lobdobto akwe kunuboka uram sengkwetena teleb. Ara, nun molonubnyi, Er Iya Erebdobnyi bira malyito kubmarinyi bisi libdobnaryi, malyito kum kubmarinyi bisi lulurdongona ab, dongbisik dengdana dinyi ab ara er teleb kum kurur ati ebman,” ebmou.

8Ani, Yosafat biryi Yerusalem atei dam aryi, Lewi yala nang ab, imam nang ab, yala yuk-yuk sien nang ab kankan dam aryi ninyi wiboka wa karebmou. Ba, a nang aryi, “Mem,” en dinyi dakbisibmangnyi ninyi ab, Er Iya Erebdobnyi biryi, “Ukuna mem-ukubdarur,” en uram dakbisibmangnyi ninyi ab asi, liliboka wenen nang kiboka wa karebmou. Ba, a nang ara Yerusalem atei kuramiryi, a wa karebmou to wa iramnyi. 9Ura, a nang asi ato kubkwandarur ebmou, “Sunci malyi kubmangnyi nang asi lilibkwamamunyi ara Er Iya Erebdobnyi bisi ilil tenebmuncok, namin kanya aryi busul kuboka telebto akwe deyok liliboka uram sekwetebkwandarur. 10Ba, sun mutuk weik atei nang aryi, ninyi on deyok ati kum, mem en uram dakbisibmangnya deyok ati kum, yan memen uram dakbisibmangnya deyok ati kum ara sunci, ‘Ato dinyi kunubmarum to ara mem!’ ebkwandarur. Ba, Er Iya Erebdobnyi biryi sun babyi, sun kwit yabwe Yehuda yala nang babyi, ikin dinyi karebsicei. 11Niryi Imtamnyi ai wa in nang imam nang sienyi si Amarya bisi, malyi deyok lilina sienyi kibkwansir ati, wa karebne. Ba, erci, Er Imtamnyi biryi, ‘Ukuna mem,’ eboka yan memebsou dinyi dakbisibmangnyi ba, lilirdeirinanyi kibdeibne. Ba, Ismael mi si Zebaja Yehuda mutuk sienyi ni buksa amwetamnyi, wibne ara yuk-yuk deyok er dam boyangnyi ba, lilinkwande ati wa karebne. Ba, malyi kubmangnyi nang lilinmamunyi ani, uram sekwetebkwamamunyi ara Lewi yala nang aryi kerek sekwaming. Ba, telebto, mundu lobdobto akwe uram sekwetebkwandum. Sun malyi kubmangnyi to kuboka lilibkwanduma nirya Er Iya Erebdobnyi milisina teleb!” ebmou.

Currently Selected:

2Tawarikh Uram 19: MTG

Highlight

Copy

Compare