2Tawarikh Uram 1
1
Salomo biryi Er Imtamnyi bisi etekdob bingna dinyi molobmou uram deyok
1:1-13
(1Raj. 3:1-15)
1Weik sienyi Daud mi Salomo bira Israel atei weik sienyi kiboka sasiamwe. Ba, Er Iya Erebdobnyi biryi Salomo bisi kisal dangnamuryi, mikib kimdeiriramwe ba, Israel nang mutuk sienyi sasiboka taleamwe.
2Ura, Salomo biryi Israel mutuk atei ninyi kuramnyi tok nirya asi nabmou ura, ninyi wiboka, yin doun nang yubwa 1.000 baryi ninyi talen weik sien nang ton nabmou. Ba, yin doun nang ninyi yubwa 100 baryi talen sien nang ton nabmou. Ani, ninyi yala yuk-yuk sien nang ton nabmou. 3Ukuboka nabmou ba, sirya bulubmai ura, Israel sienyi Salomo ab, a wibmou nang nirya ab, anaboka mutuk kon si Gibeon kon yini mutuk dam asi, Er Iya Erebdobnyi wa inanyi Musa biryi Er Iya Erebdobnyi biti dama deiboka molona ati keis ol ai si Kemah Suci doamwe dikum asi binmai.
4Minob talak ara Daud Israel sienyi kiamwe talak aryi, Daud biryi Er Iya Erebdobnyi, “Ukubdarur-ukuna mem,” en uram deirin co sangkol ara mutuk si Kiryat-Yearim dam aryi boboka Yerusalem atei dam keis ol ai dobmouci, bobindoka deiamwe. 5Bok, Er Iya Erebdobnyi biti dama deiboka uk dan keil lamna Gibeon a tuba kuamwe deyok aryi Er Imtamnyi bisi moloboka asirbinmai. A keil lamna ara ninyi si Bezaleel biryi keil tembaga aryi minob kikniamwe. A keil lamna kikniamunyi Bezaleel bira ninyi si Hur mi Uri biryi deiamunyi kuramwe. 6Ura, Salomo biryi Er Iya Erebdobnyi ai bublan dam asi, Er Imtamnyi biti dama deiboka tembaga aryi kikniamnyi dama deirin keil lamna deici asi bisam domba yubwa 1.000 baryi oboka uk dabmou.
7Ura, a bindoka mabmai lukunda aryi Er Iya Erebdobnyi biryi Salomo dam asi lak kibdanmouci, ato ebmou. “Salomo, kanci, ‘Ukuboka karebnute,’ tenebmarim dinyi ara Niryi kansi kunuboka karebkwamakin,” ebmou. 8Ura, Salomo biryi Er Iya Erebdobnyi bisi ato ebmou, “Nai Imtamnyi, Kanci boukwe weik kimni dinyi ni nai Daud dam asi lak kibdanamumci, ni Salomo bisi sienyi ni nai olong unuboka sienyi kibdeibnoumwe. 9Ati, ukura Nai Iya Erebdobnyi, Kanci ni nai Daud dam asi uram talak ebdeiamumwe dinyi ara Nisi kunubdeibnurum. Ara, Nai Kanci, ‘Israel ninyi ilinto tukwe borbosa ato kunung ninyi talebkwandim,’ tenen sienyi kibdeibnoumwe. 10Ati, ukuca, etekdob bingna dinyi ab, diboka bingkatana ab karebnurum. Ba, niryi etekdob bingna bikniryi a mutuk talen sienyi kikniboka etekdobto kuboka lilibdeibnin binkwan. Kanci etekdob bingna karena kum kubniminyi ura, unanyi biryi Kan mabwe Israel ninyi asi telebto kuboka lilibdeibkwande do?” ebmou.
11Uca, Er Imtamnyi biryi Salomo bisi ato ebmou, “Kan molobmarim dinyi ara telebto molobmarim. Kanci, ‘Bona talena ilinto taleboka bona bonanyi kibtinyi,’ tenen bona kum molobmarim. Ani, kan ibarya dongon dinyi kum molobmarim. Ani, kanci, ‘Ni mar ordan nang asi obtinyi,’ eboka kum molobmarim. Ani, ‘Ni uki weik kubdobkwan ati, uki cang kibdeibnurum!’ eboka kum molobmarim. Eda, anda dinyi molona kum kubmarimci, etekdob bingna bikoka, telebto akwe Ni mabwe Israel ninyi lilibdeiboka talebkwandim ati Niryi sienyi kibdeibkise. 12Ati, Niryi kansi etekdob bingna ab, ato kuna ara teleb tenen bingni dinyi ab karebkwamakin. Ani, tonda bona talena ilinto bonanyi kibdeibkwamakin. Minob talak sienyi kimdamnyi nang kan bona bonanyi kibdeibkwamakin ato dinyi ton ukuna kum kuramnyi. Ani, aminda sien nang kibde binkwaming sien nang ababyi ton ato ukuna kum kubkwaming,” ebmou.
13Ura, Salomo Gibeon kon Er Imtamnyi biti dama deiboka molon mutuk kon Imtamnyi molon ai keis ol ai dam aryi anaboka Yerusalem atei yanmouci, Israel mutuk sienyi kiboka talebmou.
Salomo bona talena deyok
1:14-17
(1Raj. 10:26-29)
14Ura, Salomo biryi bisam kuda deici bukoka kongkong eryiban keica ab, bisam kuda bon nang ab bobulubmou ara kongkong ena yubwa 1.400 baryi deibmou. Ba, kuda bon nang yubwa ara 12.000 baryi ninyi wiboka deibmou. Ura, kongkong ena bona kikiman atei ton deibde yibinmou ura, tonda weik atei sienyi er kunkwamwe atei Yerusalem dam deibmou. 15Ani, sienyi Salomo biryi Yerusalem dam ara dengna weik keil emas toto, perak toto ilinto doboka kiknibde miningdamwe ara keil sirik ato kuboka calaramwe. Ani, co si aras kouramwe ara mutuk kon dam aryi talyi co ara wengdande to kuramwe. 16Ba, sienyi Salomo er boyiban bisam kuda ara mutuk si Misraim ab, Kewe ab aryi boyandoka deiamwe. Ani, sienyi dan dengna dekoka wa in nang ababyi Mesir dam ab, Kewe mutuk ab ninyi asi mitikanun dekoka boyanamwe. 17Ba, ninyi ordankwamanaryi bon kongkong ena ara Mesir mutuk dam aryi perak ikin 600 baryi aryi dekoka boyanamnyi. Ba, bisam kuda ara perak ikin 150 baryi aryi kikliboka dekamnyi. Ura, sun deici aryi Het mutuk sien nang ab, Aram mutuk sien nang ab ababyi dengna perak ikin 150 baryi akwe dekoka dongobnin binamnyi.
Currently Selected:
2Tawarikh Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
