2Tawarikh Uram 18
18
Ahab biryi Ramot atei Gilead mutuk dam asi mar bobmou deyok ab, Imtamnyi uram ermurunanyi Mikha ab, kwemdeina uram ermurun nang ab deyok
18:1-34
(1Raj. 22:1-40)
1Yehuda sienyi Yosafat bona bonanyi kuramwe ba, er si ereramnyi. Ba, Yosafat biryi Israel yala nang sienyi si Ahab nebnyi doboka er mi ati kabdeibmou. 2Yosafat a ner doboka kuramwe ani, uki tentok tum ara Samaria dam er yamal Ahab bisi binmou. Binmou ura, Ahab biryi bisam kambing toto, domba toto, sapi toto ilinto er yamal ab, er miliboka binmai nang ab ati, obdeibmou. Ura, Ahab biryi Yosafat bisi, “Gilead mutuk Ramot atei#18:2 Ramot-Gilead ara Israel mutuk atei bok, Aram nang arabdobyi. Ba, Israel sienyi Ahab bira, “Ramot-Gilead mutuk ara nun mutuk bok, arabdobyi ati, nunbiramnang tubto arabdobkwayeb,” tenebmou. 1Raj. 22:3 dirderum. asi mar bobkwanim,” eboka arukmou. 3Ura, Israel sienyi si Ahab biryi Yehuda sienyi Yosafat bisi ato ebmou. “Kan ab, ni ab tonkwa Gilead mutuk Ramot atei binkwanim do?” eboka asibmou. Uca, Yosafat biryi ato ebmou, “Teleb, ni atei ninyi ab, kan atei ninyi ab tonkwa binkwamabyi ura, ni ab, kan ab tonkwa ninyi mar bobkwamab,” ebmou.
4Uca, Yosafat biryi Israel sienyi bisi ato ebmou, “Er Iya Erebdobnyi bisi minob asibdeniryok,” ebmou. 5Ba, Israel sienyi Ahab bira Er Imtamnyi ermurun nang nabi nang yubwa 400 baryi bobulubdeiboka ato asibmou. “Gilead mutuk Ramot atei asi mar bobkwayeb do? Taklobkwan do?” eboka asibmou. Uca, a nang aryi, “Nai sienyi, ur mar bobdum! Er Imtamnyi biryi nai sienyi kansi a weik atei kanti karebkwamakir,” ebmai. 6Uca, Yosafat biryi tubto ato eboka asibmou, “A mutuk ara Iya Erebdobnyi uram ermurun nang yuk nang ton da kunung do? Ba, anyi biryi nun deyok ati, Er Iya Erebdobnyi biryi, ‘Ato ebmar,’ ebkwansir,” ebmou. 7Uca, Israel sienyi biryi Yosafat bisi ato ebmou, “Er Iya Erebdobnyi uram ermurunanyi tentok a kurur. Ucab, anyi bira ni kanyi teleb kum kunurur. Niryi ersi molobmanyi uca, tuba malyito dinyi akwe eranir. Anyi si ara Mikha Yimla mi a kurur,” ebmou. Uca, Yosafat biryi ato ebmou, “A sienyi, kanci ato enmarim ara mem,” ebmou. 8Ura, Israel sienyi biryi sien nang ai dam wa inanyi bisi arukmouci, ato ebmou, “Yimla mi Mikha bisi ola inirbirum!” eboka arukmou. 9Anyi biryi Mikha bisi inirbinmou talak ara Israel sienyi ab, Yehuda sienyi si Yosafat ab ara sien nang ongon aling ongobmareici, weik lika bisik bublan Samaria atei bisik bublan dam asi, sun sien nang bun sokon deici bukmarei. A bukmarei dikum ara lika bublan si Samaria bublan dam gandum yalyi kwen dikum asi bukmarei. Ba, Imtamnyi uram ermurun nang nirya yandoka sun kunurdeina yuk-yuk yandoka enmai. 10Uca, ninyi si Kenaana mi si nabi Zedekia, Imtamnyi uram ermurunanyi biryi kat keica besi aryi sapi kisok yang beleranda atoa kiknibokaburyi, Ahab bisi ato ebmou. “Er Iya Erebdobnyi biryi ato ebmar, ‘Kanci besi yang a kiknibman dinyi atoa aryi, Aram mutuk ninyi asi ninibkaboka kum dandeibkwandim,’ ebmar,” ebmou. 11Ani, Imtamnyi uram ermurun nang yuk nang ababyi ato ebmai. “Gilead mutuk Ramot atei asi ur mar bobdum. Er Iya Erebdobnyi biryi sienyi kan taruk dam karebkici ba, oboka erebdobkwamarim,” ebmai.
12Ba, “Mikha bisi nambirum,” eboka bokdonokmounyi bira Mikha bisi bindoka ato ebmou, “Imtamnyi uram ermurun nang yuk nang ara, ‘Imtamnyi biryi Aram nang kan taruk dam karebkwamakir,’ eboka, sienyi Ahab bisi erbanmang. Ati kanbabyi, sienyi dam bindoka, ‘Imtamnyi bira ato ebmar,’ erbirum,” ebmou. 13Uca, Mikha biryi a uram erbinmounyi bisi ato ebmou, “Er Iya Erebdobnyi kam kururnyi si deici aryi iya dib ebkun. Sunda sun tenen dinyi aryi enmang bok, nira Ni Imtamnyi ni molonunyi biryi ebdeibmar to kuboka sienyi bisi ebkwaman,” ebmou. 14Ura, anyi biryi Mikha iniboka sienyi dam bobinmou. Ura, sienyi biryi Mikha bisi ato eboka asibmou, “Mikha, Gilead mutuk Ramot atei ur mar bobkwaman do? Taklobkwan do?” eboka asibmou. Uca, Mikha biryi ato ebmou, “Ur mar bobdum! Imtamnyi biryi akatei ninyi kan taruk dam karebkwamakir,” ebmou. 15Uca, sienyi Ahab biryi Mikha bisi ato ebmou, “Tola ati ebmanirim do? Niryi kansi, ‘Tola ati enina mem. Eda, iya dib ebman ebkwanurum,’ ebde bakunun,” ebmou. 16#Mat. 9:36; Mrk. 6:34 Uca, Mikha biryi ato ebmou, “Ni dinmounwe uca, Israel nang ara bisam kambing domba ninyi kalingna kum kuramingnyi bisam aryi mutuk konkon asi bokwalwalaboka yuk-yuk barsengdoraming to kunmongwe asi asing eibman. Ukunmongwe asing eibni uca, Er Iya Erebdobnyi biryi ato ebwe, ‘A banmang ninyi ara sun kalingnanyi ton kum aryi barsengdonmang. Ati, Israel ninyi a baronmangnyi ababyi, sun mar ordana nang aryi ona kum kubingnyi ba, sun atei yuk-yuk bindoka kubdobkwamang,’ ebwe,” ebmou. 17Ato ebmou ba, Israel sienyi Ahab biryi Yehuda sienyi Yosafat bisi ato ebmou, “Anyi bira, ‘Teleb dinyi ton ena kum uca, malyi dinyi akwe enurur,’ ebmonwe tok a yandoka ebde ake!” ebmou. 18Ba, Mikha biryi tubto ato ebmou, “Kanci ato ebmarim ura, Er Iya Erebdobnyi, Erci ebkur uram asi kekerum! Niryi a tikoka din uca, Er Iya Erebdobnyi Er bun sokon deici bukmar. Ba, Er Imtamnyi yin doun nang ara Er kwanimtam ab, Er siriktam ab tikmang asi asing eibne,” ebmou. 19Ura, Er Iya Erebdobnyi biryi ato ebmou, “Unanyi biryi Israel mutuk sienyi Ahab bisi arukmar ba, Gilead mutuk Ramot atei asi mar boboka, obkiribkwamar do?” ebmou. Ba, Imtamnyi yin doun nang aryi, ton nang aryi yukto ebmai. Ba, ton nang aryi yukto ebmai. 20Ba, ni asing dirwelese asi, yuk keica kanya sambal Iya Erebdobnyi dam tingbindoka ato ebmou, “Niryi Ahab bisi, ‘Ukubdum,’ eboka aruknyi ba, mar bobkwamar,” ebmou. Ba, Er Iya Erebdobnyi biryi a keica kanya sambal asi asibdenmou, “Una kuboka anyi bisi arukwamarim do?” eboka asibmou. 21Uca, a keica sambal aryi ato ebmou, “Niryi anaboka, uram ermurun nang si bambul dam asi tola-tola ati, ‘Imtamnyi biryi akatei ninyi kan taruk dam karebkwamakir,’ ebdeiboknyi ba, kunuboka sienyi dam asi ebkwamang,” ebmou. Ba, Er Imtamnyi biryi ersi, “Ur kan tenebmarim to da kunuboka, tola ati ebminyi dinyi, ur da kunubnung. Ati, ukura kanci a ebmarim to kunurbirum!” ebmou. 22Ura, Mikha biryi a sienyi bisi ato ebmou, “Ato kuboka yuk keica kanya sambal aryi, uram ermurun nang si bambul dam asi tola ati erdongonmar ba, sienyi kan dam yandoka tola ati enmaking. Ato kubmar ara Er Iya Erebdobnyi biryi kan dam asi mambul dinyi mengebdeibkwankir ati ukubdeibmakir,” ebmou.
23Ura, Imtamnyi uram ermurunanyi Kenaana mi si nabi Zedekia tingyandoka, Mikha bisi katum tam bokdonokmou. Ura, ato ebmou, “Er Iya Erebdobnyi kanya ni dam kuranturyok kan dam wengyandoka ato uram erkarenmakute ba, a uram enmatum do?” ebmou. 24Uca, Mikha biryi ato ebmou, “Tola tenebmaminyi ababyi, ai umbura inirorbaminya dam aryi asing eibminci, ‘Dib ebmo,’ tenebkwamarim!” ebmou. 25Ato ebmou ba, Israel sienyi Ahab biryi ato ebmou, “Anyi, Mikha bisi taleboka weik atei kalingnanyi si Amon ab, sienyi mi Yoas ab dam asi bobindarur! 26Bobimunyi ura, malyi kun nang wenen ai dongoboka yina mitikanun karenkwandarur! Ukuboka kalikamunyi ani, ni ninyi mar ibinanyi ani, tamuryanyi ura, lobdeibkwandarur!” ebmou. 27Ba, Mikha biryi sienyi bisi ato ebmou, “Sangkuna a mar bobinaminyi ani, ona kum kubkingnyi ba, ur yaminyi ura, a ebman uram ara Er Iya Erebdobnyi biryi ena kum kubmaci bok, niryok dukoka tola ebmaniryi. A ebne uram ara a wekoka kekenmang nang aryi, ‘Mikha dib eamwe!’ tenebkwaming. A wekmarum ninyi nirya a ebman uram diboka bikdarur!” ebmou.
28Ura, Israel sienyi Ahab ab, Yehuda sienyi Yosafat ab, tonkwa antaniboka Gilead mutuk Ramot atei mar ibinmarei. 29Ura, Israel sienyi Ahab biryi Yosafat bisi ato ebmou, “Nira sien nang ongon aling ara kwiribloboknyi ura, ur yin doun nang ato kuboka mar ibinkwayeb. Ba, Yosafat kanda, sien nang kikniboka sien nang ongon aling ongobkwandum!” ebmou. Ura, Israel sienyi yin doun nang kankan yukmouci, Gilead mutuk ninyi asi mar bobmai. 30Ba, Aram mutuk sienyi biryi sienyi er kongkong eryiban keica bon nang sien nang asi ato ebmou, “Ninyi mar bobmamunci, ninyi onkwamamunya ara talyi nang ara takloboka Israel sienyi Ahab bikwe dibliliboka obkwandarur!” eboka arukmou. 31Ura, a kongkong ena bon sien nang dinmai uca, Yosafat Yehuda sienyi bira sien nang ongon aling tuba ongobmou deyok aryi, “Ara, Israel sienyi bica, obkwayeb!” eboka mar bobmai uca, Yosafat biryi Er Iya Erebdobnyi bisi u eboka molobmou ba, Er Imtamnyi biryi lebdobmou. 32Ba, a nang aryi diramnyi uca, “Israel sienyi kuma,” tenebmai ura, takloboka yuk nang asi mar bobmai. 33Bok, ninyi tentok aryi mar talyi doblobmou uca, Israel sienyi Ahab bisi er ongon aling dungdongon bisik mar wikiboka wekmou. Ba, a sienyi biryi er kongkong ena bobmounyi bisi ato ebmou, “Ni mar sirya wekmanir ati, ni boboka tamubnurum!” ebmou. 34Uca, ninyi ordanmaia mak aryi, botamubman kum ati, kongkong ena ab, Aram yin doun nang urasintam tiklobmou tok asi, kiting werbau ura, Israel mutuk sienyi Ahab dibmou.
Currently Selected:
2Tawarikh Uram 18: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
