2Tawarikh Uram 17
17
Yosafat sienyi kiboka talebmou deyok
17:1-19
1Yehuda yala nang mutuk ara Asa sienyi kiamwe ani, dibmou. Ura, er mi si Yosafat unuboka sienyi kibmou. Ura, Yehuda mutuk sienyi kiboka talebmouci, Israel yala ninyi asi mar bobkwamou ati, mikib sasibmou. 2Ura, sienyi Yosafat biryi Yehuda yala nang weik atei lika doboka aknaamnyi atei nirya asi yin doun nang kabdeibnin yibinmou. Ani, er nai Asa biryi arabdamwe mutuk Efraim yala nang mutuk weik atei nirya ababyi, yin doun nang kabdeibnin yibinmou. 3A sienyi Yosafat bira er abwe Daud ukuramwe to akwe dorliliboka taleamwe ab, kwemdeina Baal kum moloramwe ab deyok aryi, Er Iya Erebdobnyi miliramwe. 4A sienyi Yosafat bira kwemdeina Baal asi molona kum uca, er nai moloramunyi, Er Iya Erebdobnyi uram akwe kunuramwe. Sun Israel yala ninyi aryi, Er Imtamnyi uram kununa kum kuramnyi to ara takloboka erda Imtamnyi uram kunun sienyi kiamwe. 5Ba, a sienyi bira ukuramwe deyok aryi Er Iya Erebdobnyi biryi mikib kibkareamwe ba, er taleamwe mutuk sasiboka taleamwe. Ba, Yehuda mutuk kuramnyi atei ninyi nirya aryi, bona ersi kareramnyi ba, Yosafat bona talenanyi kibmouci, ninyi nirya kisal dangnamnyi. 6Ura, er kanya busul kanya bobokaburyi, Er Iya Erebdobnyi biryi eamwe to akwe kunuramwe. Ura, erci Yehuda yala nang mutuk konkon dam kwemdeina molon ai dordaramnya nirya ab, kwemdeina molon abyokomna tingdeiriramnya ab asi daluboka kum dandeibmou.
7Ura, Yosafat sienyi kiamwe kwalina winiryi dinyi kibmou ura, er taleamwe mutuk weik wa iramnyi nang asi bokdonokmou ba, Yehuda mutuk weik atei nirya Er Imtamnyi biryi, “Ukubdarur-ukuna mem,” ebmou uram etererbinmai. A nang sun si ara Benhail ab, Obaja ab, Zakharia ab, Netaneel ab, Mikha ab bokdonokmou ba, Yehuda yala nang mutuk weik atei nirya etererbinmai. 8Ani, Lewi yala nang toubnibaryi ababyi sunsi milibmai. A nang sun si ara Semaya ab, Netanya ab, Zebaja ab, Asael ab, Semiramot ab, Yonatan ab, Adonia ab, Tobia ab, Tob-Adonia ab milibmai. Ani, Er Imtamnyi ai wa in nang imam Elisama ab, imam Yoram ab milibmarei ba, binmai. 9Ura, anda nang aryi, Yehuda yala nang mutuk weik atei doramnya nirya yibinkirikoka, Er Iya Erebdobnyi biryi Musa deici, “Ukubdarur-ukuna mem,” eamwe uram nirya eterebde yibaramnyi.
10Ura, Er Iya Erebdobnyi biryi Yehuda yala nang kuramnyi mutuk atei dina-dina yuk mutuk ninyi nirya asi ilil mengebsinibmou ba, Yosafat bisi ton mar bona kum kuramnyi. 11Ani, Yosafat biti Filistin mutuk ninyi aryi keil perak ongomna ab, yuk bona ab boyanmai. Ani, Arab mutuk ninyi ababyi, bisam domba yim akwe yubwa 7.700 baryi boyanmai. Ani, bisam kambing yim akwe yubwa 7.700 baryi boyanmai. 12Ura, Yosafat ukubde baramwe uca, bona talenanyi kiboka sasibmou. Ura, Yehuda yala nang mutuk weik atei kuramnyi tok nirya lika doboka, bona miningni atei tabakoka dobde yibinmou. 13Ura, Yosafat biryi Yehuda mutuk a bona miningni atei asi yin mar toto, yina toto, yuk bona toto deibde yibinmou. Ura, Yerusalem atei ara yin doun nang sien nang mikib dabub weik nang akwe kibdeibmou.
14Ba, sun yala kuramnyi to kuboka, yin doun nang sien nang wibnin yibinmou. Ara, Yehuda yala nang mutuk yin doun nang sienyi bira Adna wibmouci, ur yin doun nang mikib deici akwe yubwa 300.000 baryi wiboka anyi tam nang kibdeibmou. 15A wibmou yin doun nang damulub tam ara yin doun nang sienyi Yohanan wibmouci, ur yin doun nang mikib dici akwe yubwa 280.000 baryi wiboka anyi tam kibdeibmou. 16Ba, a damulub tam ara Zikhri mi Amasia kibmou. Ura, er tam nang yin doun nang mikib dici akwe yubwa 200.000 baryi wibmou. Anyi Amasia bira er kanya olobum eboka, erdamnyi Er Iya Erebdobnyi biti karebdanmounyi kuramwe. 17Ba, Benyamin yala nang yin doun nang sun sienyi ara Elyada ninyi ordana mikib dici ilintonyi bisi wibmou. Ba, er tam yin doun nang ab, te balang doun nang ab, mar u limdon ting bon nang ab yin doun nang yubwa 200.000 baryi nang wibmou. 18Ba, a damulub tam ara Yozabad wibmouci, er tam yin doun nang yubwa 180.000 baryi nang kibdeibmou. A nang ara ninyi mar ordan nang kibdeibmou. 19A wibmou nang asi sienyi Yosafat er ab tonkwa wa iramnyi. Bok, yin doun nang da nirya ara Yehuda mutuk weik atei-weik atei wa karebmou ba, binsekamnyi.
Currently Selected:
2Tawarikh Uram 17: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
