2Tawarikh Uram 16
16
Yehuda sienyi Asa ab Aram ab deyok
16:1-14
(1Raj. 15:16-24)
1Ura, Yehuda mutuk sienyi Asa sienyi kiboka taleamwe ani, kwalina yubwa 36 baryi dinyi kimbinmou. Ura, Israel sienyi si Baesa biryi Yehuda nang asi mar bobmou. Ura, Baesa biryi Rama atei asi Yehuda nang yiban bisik sekmouci, yin doun nang kalingni ai dobmou. 2Ato kubmou ba, Asa Yehuda sienyi biryi Er Iya Erebdobnyi ai ab, sienyi er ai ab, mining damnyi emas ab, perak ab doboka Aram mutuk sienyi si Benhadad Damsyik atei kuramwe asi deibmou ba, bobinmai. 3Ani, uram ato ebdeibmou, “Ni ab kan ab ara, ‘Mar bordana kum kurdankwanim,’ eboka uram talak ebdeibdankwanim. Minob nun nai yabwe ababyi ato kubdanande to kubkwanim. Ati, niryi kansi emas toto, perak toto deibmakin. Ati, kanci Israel yala nang mutuk sienyi Baesa biryi ni mutuk wiliba dam asi yin doun nang yandoka bisik sengnung ara tanglona teleb,” eboka uram deibmou. 4Ba, Aram sienyi Benhadad biryi Asa ebdeibmou uram kekebmou ura, Benhadad biryi er yin doun nang asi arukmou. Ba, Israel mutuk nang weik atei si Iyon atei ab, Dan atei ab, Abel-Maim atei ab, Naftali yala nang mutuk sun bona mining damnyi weik atei nirya mar bobmai. 5Ba, Israel sienyi Baesa kekenmou uca, ukuboka mar bobmai uram tol kekebmou ura, Rama atei yin doun nang kalingna ai doamwe dinyi taklobmou. 6Uca, sienyi Asa biryi Yehuda yala ninyi nirya asi arukmou ba, Baesa biryi Rama atei doamwe dinyi, keil toto, co toto, boboka Geba atei ab, Mizpa atei ab sasibdobkwamnyi ati boboka binmai.
7Ba, a talak aryi kunumna asing eirinanyi si nabi Hanani, Yehuda yala nang mutuk sienyi Asa dam yanmou. Ura, ato ebmou, “Kanda, Er Iya Erebdobnyi bisi, ‘Milibnurum,’ eboka molona kum kurumci, Aram sienyi bisi, ‘Milibnurum,’ eboka molorum ati, Israel mutuk sienyi yin doun nang asi muna oboka ererona kum kubkwandim. 8Kanda, Er Iya Erebdobnyi bisi, ‘Milibnurum,’ eboka moloamumwe ura, Etiopia mutuk yin doun nang ab, Libia yin doun nang ab, sun kongkong ena ab, sun kuda deici bukoka mar iyangan nang ab yubwa ilinto ababyi sun muna oboka erebdamumwe ara bingdum do? 9Er Iya Erebdobnyi bira im dangna tukwe dangna nirya, Er mikib aryi kinkin ololom eboka yibarurci, Ersi kanyi deiboka Er uram kunurandinyi bira Er mikib karerande. Bok, Kanda, lubnyi bito kuboka Aram sienyi bisi kanyi liknibdobmarim deyok aryi, ukura mar bonkwamaking,” ebmou. 10Ba, Asa er yu wekmouci, anyi kunumna asing eirinanyi nabi Hanani bisi malyi kubmarinyi dongoraming ai dongobmou. Ani, a talak ara er mining atei ninyi ilinto ninyi dongon ai dongobmou.
11Asa er kubde yangaramwe dinyi yuma aryi kuboka, sirya ukurbinamwe dinyi kerek sekamnyi ara Yehuda mutuk nang ab, Israel mutuk ab sienyi kiboka talebde binamnyi nang liliboka kerek sekamnyi dinyi umbura asi a kerek sekamnyi. 12Asa Yehuda mutuk sienyi kiamwe ani, kwalina yubwa 39 kimbau ura, er yan dina-dina bukam weik u yibmou. U ukuboka yiramwe bok, Er Iya Erebdobnyi bisi, “Kwetebnurum,” eboka molorona kum kuramwe. Eda, ninyi kweten nang asi bobaramwe. 13Ani, Asa dibmou ba, er nai yabwe tukwe dongoramnya dam akwe tukwe dongobmai. Asa dibmou ara sienyi kiamwe kwalina yubwa 41 baryi kwalina kimbinmou bok, dibmou. 14Ba, er tukwe dongobmai dikum ara Daud minob kuramwe atei dam asi minob tukwe ukoka kiknibdeibdamwe umbura dongobmai. Ba, Asa er tukwe dongobkwamaici, mabdeibkwamai dikum ara tong teleb erande keica yala amuma yamubmaia deici asi deiboka tukwe dongobmai. Ani, a mutuk ninyi dibmarinyi tukwe dongobingiryi, ukuraming to kuboka, engenmaici ilila uk sekmai.
Currently Selected:
2Tawarikh Uram 16: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
