2Tawarikh Uram 15
15
Yehuda mutuk weik sienyi Asa yuk kwemdeina moloramwe dinyi deiblobmouci, Er Imtamnyi bisi molobmou uram deyok
15:1-19
(1Raj. 15:13-15)
1Er Imtamnyi kanya Oded mi Azarya dam wengbinmou. 2Ura, Er Imtamnyi uram ermurunanyi nabi Azarya anaboka Yehuda mutuk weik sienyi Asa dam binmouci, ato ebmou, “Weik sienyi Asa ab, Yehuda mutuk ninyi ab, Benyamin mutuk ninyi ab ni uram kekendarur! Sun Er Iya Erebdobnyi dam kubmunyi ura, Er Iya Erebdobnyi bibabyi sun dam kubkwande. Sunci Er Iya Erebdobnyi bisi ingkirikmunyi ura, Er Iya Erebdobnyi eibkwandarur. Bok, Ersi deiblobmunyi ura, Erbabyi deiblobkwansurur. 3Uki weik sun Israel ninyi aryi Er Imtamnyi dam kuna kum kuramnyi. Ba, yan memen uram ab, arungni uram ab ababyi ton kum kuamwe. Ani, sun Er Imtamnyi biti ninyi dama deirin nang imam ababyi ton kum etereramnyi. 4Bok, sun mambul kubni ura, Israel ninyi sun Nai, Er Iya Erebdobnyi bisi urasin tamuboka Imtamnyi tam deiboka moloramnyi. Ani, sunci Er Imtamnyi bisi ingkiringdoramnyi ura, Erci sun molobmangnyi dinyi kareramwe. 5A kuramnyi talak ara ninyi sakwetebmananyi bira atei ton kum tamuboka yangaramnyi. Ara, atei nirya ordana weik li doamwe deyok aryi ukuramnyi. 6Ba, Er Iya Erebdobnyi biryi mambul weik dinyi yala amuma-amuma kareramwe ba, weik atei aryi weik atei ordaramnyi. Mitik atei aryi mitik atei ordaramnyi. 7Bok, sunda sun kanya mikib kibdobdarur. Sun mitang kusina mem! Sun ato kubmunyi ura, aminda teleb akwe kubkwandum,” ebmou.
8Ura, Yehuda mutuk weik sienyi Asa biryi Oded mi si nabi Azarya ebmou uram kekebmouci, er kanya teleb aryi mikib kibmou. Ura, Asa biryi Yehuda mutuk ab, Benyamin mutuk ab, Efraim mutuk asi muna kibdongoboka arabdoamnyi atei ab moloramnyi kwemdeina nirya dalubmou. Ura, Asa biryi Er Iya Erebdobnyi biti dama deiboka uk daramnyi keil lamna tubto dobmou. A keil lamna ara Er Iya Erebdobnyi ai bisik wengbantam doamnyi asi tubto dobmou. 9Ura, Yehuda mutuk ninyi ab, Benyamin mutuk ninyi ab, Efraim mutuk ninyi ab, Manasye mutuk ninyi ab, Simeon mutuk ninyi ab ara Asa tam kibdobmaci, Asa atei tam yandobmai. A kubmai dinyi ara sunci diramnyi uca, Asa bira er Nai, Er Iya Erebdobnyi biryi dirliliramwe asi eibmai ura, Asa tam bindobmai. 10Ura, weik sienyi Asa biryi anda ninyi nirya ab, Yehuda mutuk ninyi ab, Benyamin mutuk ninyi ab asi, “Yerusalem atei dam bulubdarur,” eboka arukmou. Ba, Yerusalem atei bulurbinmai talak ara Asa weik sienyi tikamwe uki nungna ara kwalina 15 baryi, wala winiryi kimbinmou bok, “Yerusalem atei bulubdarur,” ebmou. 11Ba, a uki tum aryok Er Iya Erebdobnyi biti bisam lembu sapi 700 baryi ab, bisam kambing domba 7.000 baryi ab dama deiboka uk dabmai. A dama deibmai bisam yabwe ara yuk atei nang ab, ordaramiryi ukula doboka boyanamnyi bisam yabwe dama deibmai. 12A dama deibmai ara sun kanyi ab, nong ab nirya, “Nun abwe yabwe aryi moloramunyi, Er Iya Erebdobnyi biryi ebdeibwe tok akwe kununkwayeb,” eboka Er Imtamnyi bisi uram talak ebmai. 13Ba, “Sun a mutuk ninyi sal kum, ner kum, nebnyi kum, mi kum aryi Er Iya Erebdobnyi, sun Israel ninyi molonungnyi ebdeibwe to kum kunuramingnyi ura, obibyi ba, dibkwande,” ebmai. 14Ura, sun a wekmai tok nirya uram weikanun iboka Er Iya Erebdobnyi bisi uram talak ebmai, “Nai, nun Kan dam kubkwayeb,” ebmai. Ebmaici, sunci mot seboka buu ena si nafiri ab, trompet ab buu enmai. 15Ura, Yehuda atei ninyi nirya kanyi teleb kibmou. Ara, sunci Er Iya Erebdobnyi bisi sun kanyitam nirya aryi uram talak ebmai dinyi ati teleb kubmou. Ba, sun kanyi teleb asa aryi Er Iya Erebdobnyi bisi molobmai. Ura, Er Iya Erebdobnyi bibabyi sun molona kekebmouci, sun kun mutuk nirya kalikmou. 16Ba, Yehuda mutuk weik sienyi Asa biryi er tat Maakha doamwe wa asi kilibmou. Er tat doamwe wa ara sien ner kiamwe asi kum ebmou. A kum ebmou ara Asa er tat biryi kwemdeina abyokomna si Asyera kiknibmou ati si kilibmou. Sirya kilibwe ura, a kiknibmou kwemdeina asi Asa biryi daluboka sici kibmouci, me Kidron kin tam uk dongobmou. 17Bok, Yehuda mutuk ab, Benyamin mutuk ab mutuk konkon dub aryi kikniramnyi kwemdeina nirya ara daluboka uk dongona kum kuamnyi. Bok, Asa bira er kam kuramwe nirya ara Er Imtamnyi ebdeiamwe to akwe kunuramwe. 18Ba, Asa biryi dengna weik keil si emas ab, perak ab, yuk-yuk bona ab er nai deiriramwe dinyi babyi, er deiriramwe dinyi babyi asi, boboka Er Imtamnyi ai dama deirbinmou. Ba, Er Imtamnyi dinyi kibmou. 19Ba, Asa Yehuda mutuk sienyi kiamwe uki kwalina 35 baryi kiamwe talak ara Yehuda mutuk ninyi talyi ton ordana kum kuramnyi.
Currently Selected:
2Tawarikh Uram 15: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
