2Tawarikh Uram 14
14
1Ura, Abia sienyi kiamwa ani, sirya dibmou ba, sien nang tukwe dongoramnyi dikum akwe Daud minob kuramwe atei dam tukwe dongobmai. Ura, er mi si Asa sienyi kibmouci, er nai olong unubmou. Ba, Yehuda yala nang mutuk Asa sienyi kiboka taleamwe talak ara mangkau asa akwe kwalina takubaryi kuramnyi.
Sienyi Asa biryi Etiopia sienyi Zerah bisi oboka erebdobmou deyok
14:2-15
(1Raj. 15:9-12)
2Ura, weik sienyi si Asa bira Er Iya Erebdobnyi biryi teleb tenerande dinyi akwe kunuramwe. 3Ba, Asa biryi kwemdeina ati, mutuk konkon dub aryi dama deiboka uk yaliramnyi keil lamna ara dakiriboka, kwemdeina ati keil dukoka tingdeiriramnyi dinyi nirya daluboka, kwemdeina moloramiryi co abyokomna ingdaramnyi dinyi nirya dalukaboka kibmou. 4Ura, Asa biryi Yehuda yala ninyi asi, “Nun abwe yabwe moloramnyi, Er Iya Erebdobnyi dam akwe kuboka, Er ebdeibwe uram akwe kunubde bindarur!” eboka arukmou. Ba, Imtamnyi ebmou to akwe kunubde baramnyi. 5Ani, Asa biryi Yehuda yala nang weik atei nirya mutuk konkon kwemdeina moloramnyi dikum ab, kwemdeina ati tong teleb dinyi uk daramnyi dikum ab dalubde yibinmou. Ba, Yehuda mutuk weik atei nirya, Asa er taleamwe talak ara telebto akwe kuramnyi. 6Ara, Asa sienyi kiboka taleamwe kwalina talak ara ninyi mar ordana ababyi ton kum kuramnyi. Ba, Yehuda mutuk weik atei nirya lika dobde yibinamwe. Ara, Er Iya Erebdobnyi biryi mangkau dinyi kareamwe deyok aryi teleb akwe taleamwe. 7Ura, sienyi Asa biryi Yehuda yala ninyi nirya asi ato ebmou, “Yehuda yala ninyi kunub weik atei nirya lika doboka aknamnin yibinkwayeb. Ani, ninyi kalingna dukoka dobde weleamibyi ani, tikeibkwayeb. Ani, lika bisik bublan ababyi kikniboka, bisik mardeirina ababyi kiknibkwayeb. Nun Yehuda yala nang mutuk ara nun taruk dam kubmar. Ara, nunci Er Imtamnyi bisi ingkirikibyi ura, Er Iya Erebdobnyi biryi nunsi ingkirikwansir. Ura, kitingbantam babyi, yaletam babyi, me youkwetam babyi, me utam babyi ara ninyi mar iyangana kum kubkwansing, sirya mangkau kibdeibsou. Ati, a mutuk nirya nun taruk dam kubmar,” ebmou. Ba, Yehuda yala nang aryi weik atei nirya kunuboka dobmai. 8Ura, sienyi Asa taleamwe mutuk Yehuda yala nang yin doun nang bok, te balang douboka, mar u limdon ting bon nang yubwa ara 300.000 baryi kuramnyi. Ba, Benyamin yala nang asi, mar u limdon ting mitik dinyi ab, yin mar ab bon nang yubwa ara 280.000 baryi kuramnyi. Sun a yin doun nang nirya ara ninyi ordana dabub aryi co biriamwe nang akwe kuramnyi.
9Ura, Etiopia mutuknyi si Zerah biryi anaboka Yehuda yala nang mar bobkwamouci, ninyi yubwa 1.000.000 baryi kiknibmouci, kongkong ena yubwa 300 baryi kiknibmou. Ura, anaboka mar ibanmai ani, mutuk si Maresa dam binmai. 10Ba, Yehuda sienyi Asa erbabyi yin dobmouci, mutuk Zefata mutuk bakan, Maresa dam mutuk akwe yandoka yin kiknibmou. 11Ura, Asa biryi er moloramunyi, Er Iya Erebdobnyi bisi molobmou, “Nai, Iya Erebdobnyi, nun lemsinanyi da ton kum kubmang, Eda, Nai Kan tentok asi mikib nang aryi, mitang nang obkungnyi asi lemdeirinanyi kurum. Ati, Nai Iya Erebdobnyi nun molokunubnyi, nunda kan dam asi liknibdobsurum. Ani, nunci sun yin doun nang ilinto iyanganmasing bok, nun Kan si deici aryi a nang asi mar bobkub. Nai kanda nun molokunubnyi kurum. Ati, ninyi sirik tentoknyi mikib aryi, Kan tam nang asi muna oboka erebdobcei!” eboka molobmou. 12Ato eboka molobmou ba, Er Iya Erebdobnyi biryi Etiopia nang asi, Yehuda yala nang ab, sun sienyi Asa ab dinmai bok asi oboka erebdobmou. Ba, Etiopia nang ton nang ara cukoka binmai. 13Ba, Asa ab, er yin doun nang ab aryi a cukoka banmai nang asi dombinmai ani, mutuk si Gerar dam binmai. Ba, Etiopia yin doun nang ara Er Iya Erebdobnyi biryi obukmou ara ilinto obmou. Ba, ninyi tentok ababyi kam kuna ton kum kubmai. Ba, Yehuda yala nang aryi sun bona dalubmai ara ilinto dobmai. 14Ura, Gerar mutuk weik atei nirya ara Er Iya Erebdobnyi biryi ninyi ilil kibsinibokmou ba, mikib dorona kum kubmai. A deyok aryi Gerar mutuk yibinkirikoka ninyi obde yibanmaici, sun bona nirya anda weik atei aryok bona ilinto dalubdobmai. 15Ani, bisam kambing domba kalingni nang winin keis ol ai dordaramnyi ababyi wengbindoka bisam kambing toto, domba toto, unta toto nirya daluboka bobmaici, Yerusalem atei yanmai.
Currently Selected:
2Tawarikh Uram 14: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
